ہاتھی بھی ایک دوسرے کو نام لیکر پکارتے ہیں: سائنسی تحقیق میں انکشاف

کراچی(این این آئی)افریقی ہاتھی بھی انسانوں کی طرح اپنے ساتھیوں کو مخصوص آوازوں کے ذریعے مخاطب کرتے ہیں، جو انفرادی ناموں کی طرح کام کرتی ہیں۔ نئی سائنسی تحقیق میں سامنے آنے والے اس انکشاف سے جانوروں کی ذہانت، باہمی رابطے اور سماجی تعلقات کو سمجھنے کے حوالے سے اہم پیش رفت ہوئی ہے۔برطانوی اخبار ”دی گارڈین” کی رپورٹ کے مطابق، سائنس دانوں نے مصنوعی ذہانت اور مشین لرننگ کی مدد سے ہاتھیوں کی آوازوں کا تجزیہ کیا، جس سے ایسے شواہد ملے کہ وہ کسی دوسرے ہاتھی کی آواز کی محض نقل کیے بغیر اسے مخاطب کرنے کے لیے مخصوص صوتی انداز استعمال کر سکتے ہیں۔ یہ صلاحیت انسانوں کے نام لے کر ایک دوسرے کو پکارنے کے طریقے سے مشابہت رکھتی ہے۔بین الاقوامی سائنس دانوں کی ٹیم نے کینیا کے دو مقامات، سامبورو نیشنل ریزرو اور امبوسیلی نیشنل پارک میں ریکارڈ کی گئی افریقی ہاتھیوں کی آوازوں کا جائزہ لیا۔ تحقیق میں 1986 سے 2022 تک ریکارڈ ہونے والی آوازیں شامل کی گئیں، جن کے تجزیے سے 469 منفرد صوتی نمونے شناخت کیے گئے۔ ان آوازوں میں 101 ہاتھیوں کی جانب سے نکالی گئی تھیں، جب کہ 117 ہاتھیوں کو مخاطب کرکے یہ آوازیں سنائی گئی تھیں۔تحقیق کے مرکزی مصنف مائیکل پارڈو کے مطابق، نتائج ظاہر کرتے ہیں کہ ہاتھی اپنے ساتھیوں کے لیے مخصوص آوازیں استعمال کرتے ہیں اور یہ بھی پہچان سکتے ہیں کہ انہیں مخاطب کیا جا رہا ہے۔