کیوآرپینک بٹن لگانے کا عمل جاری، 82 ہزار گاڑیوں پر کیو آر کوڈچسپاں

لاہور (این این آئی)وزیراعلیٰ پنجاب مریم نواز شریف کی خصوصی ہدایات پر لاہور میں رکشوں، آن لائن کیب سروسز اور پبلک ٹرانسپورٹ پر کیو آر پینک بٹن لگانے کا عمل جاری ہے۔تفصیلات کے مطابق اب تک 82ہزار گاڑیوں پر کیو آر پینک بٹن چسپاں کیے جا چکے ہیں جبکہ 22ہزار سے زائد مرد و خواتین رکشوں اور آن لائن کیب سروسز میں نصب کیو آر پینک کوڈ اسکین کرچکے ہیں۔اس حوالےسے چیف ٹریفک آفیسر لاہور سید عبدالرحیم شیرازی نے کہا کہ شہر میں 45مختلف مقامات پر ٹریفک ٹیمیں کیو آر پینک بٹن نصب کر رہی ہیں۔ اس مقصد کے لیے ہر ٹریفک سیکٹر میں ٹیمیں تعینات ہیں جبکہ رکشوں پر پینک بٹن لگانے کے لیے 12خصوصی ٹیمیں بھی مختص کی گئی ہیں۔ پبلک ٹرانسپورٹ کو قانونی دائرے میں لانے اور عوام کے تحفظ کو یقینی بنانے کے لیے کیو آر پینک بٹن کی تنصیب لازمی قرار دی گئی ہے۔