انمول پنکی کی سی ٹی ڈی کے مقدمے میںبھی بریت کی درخواست دائر

کراچی (این این آئی) مبینہ منشیات فروش انمول عرف پنکی نے انسدادِ دہشت گردی محکمے (سی ٹی ڈی) کے
تھانے میں درج منشیات کے مقدمے میں بھی بریت کے لیے سیشن عدالت سے رجوع کرلیا۔ ملزمہ نے ضابطہ فوجداری کی دفعہ 265 کے تحت بریت کی درخواست دائر کی ہے۔ عدالت نے درخواست پر ڈپٹی پبلک پراسیکیوٹر کو نوٹس جاری کرتے ہوئے آئندہ سماعت پر جواب طلب کرلیا۔ ملزمہ کے وکیل میر ہدایت اللہ نے مؤقف اختیار کیا کہ مقدمے میں انمول پنکی کے خلاف ٹھوس شواہد موجود نہیں، اس لیے انہیں مقدمے سے بری کیا جائے۔ وکیل کے مطابق ملزمہ گزری میں درج تین مقدمات میں پہلے ہی بری ہوچکی ہیں۔ مقدمے میں ملزمہ کے دو مبینہ سہولت کار ضمانت پر رہائی کے بعد مفرور ہوچکے ہیں۔ واضح رہے کہ انمول پنکی کو مئی 2026 میں کراچی کے علاقے گارڈن میں کارروائی کے دوران گرفتار کیے جانے کی اطلاع سامنے آئی تھی۔ حکام نے ان کے قبضے سے منشیات اور اسلحہ برآمد کرنے کا دعویٰ کیا تھا، تاہم ملزمہ نے پولیس کے دعوؤں کی تردید کی تھی۔