جہلم: (ویب ڈیسک) پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ اب 20 نہیں ،25 لاکھ افراد اسلام آباد پہنچیں گے، ہماری جماعت چاروں صوبوں کی جماعت ہے، پاک فوج اور تحریک انصاف پاکستان کو متحد رکھ رہے ہیں۔ بھارت کو پتا ہے فوج اور میرے ہوتےہوئے کوئی پاکستان کو نقصان نہیں پہنچا سکتا۔
جہلم میں پی ٹی آئی کے جلسے سے خطاب کرتے ہوئے سابق وزیراعظم نے کہا کہ لوگوں کا جذبہ دیکھ کر آپ کا شکریہ ادا کرتا ہوں، جلسے میں پارٹی جھنڈے سے زیادہ پاکستان کا جھنڈا لے کر آئیں، بہت کم ایسے ہوتا ہے ساری قوم اکٹھی ہوجائے، ساری قوم نے آزادی کی جنگ لڑنے کا فیصلہ کیا ہے، کبھی اتنے بڑے جلسے نہیں دیکھے، جہلم میں ایسا جلسہ پہلے نہیں دیکھا۔
انہوں نے کہا کہ اللہ نے ہم پرخاص کرم کیا ہے، ایک پلان انسان، دوسرا اللہ بناتا ہے، امریکی انڈرسیکرٹری ڈونلڈ لو ہمارے سفیر کو تکبرمیں بلا کرحکم دیتا ہے، سفیر کو تکبرانہ اندازمیں کہا گیا اگرعمران خان کو نہ ہٹایا تو بڑا مشکل وقت آئے گا، مجھے ہٹا کرچیری بلاسم کولے آئے تو سب کچھ معاف کر دیا جائے گا، میر جعفر، میر صادق سازش میں ملوث تھے، 22کروڑعوام کے وزیراعظم کوسازش کے تحت نکالا گیا۔
عمران خان نے کہا کہ 30 سال سے ملک لوٹنے والے بڑے ڈاکوؤں کو مسلط کیا گیا، اللہ نے کرم کیا قوم کو بیدار کر دیا، پاکستان کلمے کی بنیاد پر بنا تھا اللہ نے قوم کی خودداری کو جگا دیا، اللہ کا جتنا بھی شکرادا کریں کم ہے، ہماری خودداری کو کرپٹ، غدارلیڈروں نے ختم کر دیا تھا، ان میں خود غیرت نہیں تھی انہوں نے قوم کی غیرت کو بھی نقصان پہنچایا، 26سال سے قوم کی خودداری جگانے کی کوشش کررہا تھا۔
ان کا کہنا تھا کہ علامہ اقبالؒ نے کہا تھا اس رزق سے موت اچھی جس رزق میں آتی ہو پرواز میں کوتاہی، چیری بلاسم بوٹ پالش کو قوم پر بٹھایا تو قوم جاگ گئی، آج پاکستان کو قوم بنتے ہوئے دیکھ رہا ہوں، عمران سارے چوروں کی بندر بانٹ ہو رہی ہے، میں نے سوچا تھا فضل الرحمان کوئی ایجوکیشن کی منسٹری سنبھالیں گے، فضل الرحمان نے این ایچ اے کی منسٹری پیسہ بنانے کے لیے سنبھالی، چوروں کی کابینہ بنی ہے 60 فیصد ضمانت پر ہے، کسی نے 18 قتل کیے ہیں، شریف خاندان نے 40 ارب کی چوری کا حساب دینا ہے، زرداری نے ایان علی کے فیک اکاؤنٹس کا حساب دینا ہے، سزایافتہ، جھوٹ بول کر بھاگنے والے نے ساری کابینہ کو لندن بلالیا ہے، یہ سارے عوام کے ٹیکس کے پیسوں سے لندن جارہے ہیں، لندن جا کر مفرور، سزا یافتہ، بزدل کو ملیں گے، بزدل، مفرور سے جا کر ہدایات لیں گے یہ ملک کی توہین ہے۔
سابق وزیراعظم کا کہنا تھا کہ پاکستانیوں نے فیصلہ کرلیا ہے ’امپورٹڈ حکومت نامنظور، 20 مئی کے بعد اسلام آباد کی کال دوں گا، پہلے سوچا تھا کہ 20 لاکھ لوگ اسلام آباد پہنچیں گے، آپ لوگوں کو دیکھ کرلگ رہا ہے، اب اسلام آباد 25 لاکھ لوگ پہنچیں گے، چیری بلاسم کون ہے بچوں کو بھی پتا چل گیا ہے، نوازشریف اوران کی بیٹی فوج کو بُرا بھلا اور شہبازشریف بوٹ پالش کرتا ہے، لیگی قائد بزدل جب باہر جاتا ہے تو فوج کو برا بھلا کہتا ہے، شہبازشریف کہتا ہے عمران خان فوج کے خلاف بڑی باتیں کرتا ہے، کچھ تو شرم کرو، شہبازشریف تم ہو وہ میر جعفر، میرجعفر وہ تھا جس نے سراج الدولہ سے غداری کی پھر انگریزوں نے اسے اوپر بٹھایا تم ہو وہ شہباز شریف میرجعفر، آصف زرداری سندھ آرہا ہوں، سندھ کو میں نے آصف زرداری سے آزاد کرانا ہے۔ سابق صدر نے بیرون ملک پیسہ باہر بھیجا سب جانتا ہوں، کہا تھا جب اقتدارسے نکلوں گا تو زیادہ خطرناک ہو جاؤں گا۔
انہوں نے کہاکہ وزیراعظم ہاؤس میں تو میرا وزن بھی بڑھ گیا تھا، یااللہ تیرا لاکھ، لاکھ شکر میری عوام کھڑی ہو گئی ہے، بھارت نے پاکستان کے خلاف 600 جعلی اکاؤنٹس بنا کرپروپیگنڈا کیا، بھارت نے پاکستان کی فوج اورمیرے خلاف پروپیگنڈا کیا، بھارت نے کیوں فوج اورمجھے نشانہ بنایا، بھارت بلوچستان میں دہشت گردی کرارہا ہے، بھارت کو پتا ہے فوج اورعمران خان پاکستان کواکٹھا رکھ رہی ہے، بھارت اس لیے فوج اورمیرے خلاف پروپیگنڈا کرتا ہے، بھارت کو پتا ہے فوج اور عمران کے ہوتے ہوئے وہ کچھ نہیں کر سکتا، چوروں کا پلندہ مل کر مینار پاکستان میں جلسی بھی نہیں کر سکتے، شہبازشریف شرم کرو، میرا جینا مرنا پاکستان میں ہے، دُعا کرتا ہوں میرا نام ای سی ایل ڈال دو باہرنہیں جانا چاہتا۔
عمران خان کا کہنا تھا کہ نوازشریف سابق صدر پرویز مشرف سے معاہدہ کر کے گیا تھا، زرداری، نوازشریف مشرف سے این آر او لیکر واپس آئے تھے، ساڑھے تین سالوں میں ایک نجی دورہ نہیں کیا تھا، سابق وزیراعظم نے 24اور سابق صدر نے 50 نجی دورے کیے تھے، انکی ساری پراپرٹی بیرون ملک ہے، شہبازشریف تم کہتے ہومیں فوج کے خلاف ہوں، نوازشریف بھارت گیا تو حریت رہنماؤں سے ملنے کے بجائے نریندرا مودی کے جوتے پالش کیے، لیگی قائد بھارتی وزیراعظم سے کہتا ہے میں تو دوستی چاہتا ہوں فوج کا سربراہ نہیں، میری حکومت میں مودی کی میرے آرمی چیف کے خلاف بات کرنے کی جرات نہیں تھی۔
انہوں نے مزید کہا کہ کبھی نواز شریف، شہبازشریف کے منہ سے کشمیر کی آزادی کی بات سنی؟ شہبازشریف اقتدارمیں آ کر کہتا ہے بھارت سے دوستی چاہتے ہیں، شہباز شریف تم بھارت سے دوستی کی بات اس لیے کرتے ہو تمہیں یہ حکم دیا گیا، روس ہمیں 30 فیصد سستا تیل دینے پر راضی ہو گیا تھا، موجودہ وزیراعظم تمہارے پاس روس سے سستا تیل لینے کی جرات ہے، پہلے تمہیں روس سے معاہدہ کرنے کی اجازت مانگنی پڑے گی جو نہیں ملے گی، امریکی بھارت کو آزاد فارن پالیسی کی وجہ سے کچھ نہیں کہتے، ہمارا مسئلہ ہمارے حکمران پیسے کے غلام کبھی عوام کے لیے کھڑے نہیں ہوئے، ایک بھٹو کھڑا ہوا تھا اس کے خلاف بھی سازش ہوئی تھی، بھٹو کے خلاف نواز شریف، فضل الرحمان کے بڑے سازش کا حصہ تھے، پاکستانیوں! خوددارقوم کھڑی ہورہی ہے۔
انہوں نے کہا کہ اقتدار کے دنوں باہر جا کر قرضہ مانگنے پر شرم آئی، ملک کا سربراہ کسی اورملک سے پیسے مانگے تواس سے زیادہ شرم والی بات نہیں، ماں، باپ بھی خوددار بچے کی زیادہ عزت کرتے ہیں، میں نے آج تک اپنے والد سے بھی کبھی پیسے نہیں مانگے تھے، شوکت خانم کے لیے غیر ملکیوں نہیں پاکستانیوں سے پیسے مانگے تھے، اقتدارسنبھالا توسب سے زیادہ بیرونی خسارہ تھا، چیری بلاسم نے کہا ہم بھکاری اورغلام ہیں، سیالکوٹ کا رنگ بازکہتا ہے لائف سپورٹ مشین پرہیں، میرا رنگ بازسے سوال ہے قوم کو کس نے مقروض کیا؟ 30 سال سے دو خاندان حکومت کر رہے ہیں اور ملک کو مقروض کر دیا، میں توساڑھے 3 سال اقتدارمیں رہا۔
پی ٹی آئی چیئر مین کا کہنا تھا کہ اوورسیزپاکستانی بڑی محنت کے بعد ملک میں پیسہ بھیجتے ہیں، یہ ڈاکومنی لانڈرنگ کر کے پیسہ باہر بھیجتے ہیں، انہوں نے ملک کو بھکاری بنایا، جس طرح قوم اکٹھی ہورہی ہے تو ہم سب کچھ کر سکتے ہیں، زلزلے کے دوران قوم نے اکٹھے ہو کرمقابلہ کیا تھا، کابینہ قوم کے خرچے پر ایک مفرورسے ملنے جا رہی ہے، اقتدار میں اس طرح فضول پیسہ خرچ نہیں کیا تھا، جب ہم ایک قوم بن جائیں گے تو قرضوں سے نجات اور ملک کو اپنے پاؤں پر کھڑا کریں گے، یااللہ تیرا شکرتونے قوم میں شعور پیدا اور قوم کی غیرت کو جگادیا، 20 مئی کے بعد ایک ڈیمانڈ ’الیکشن کراؤ‘اور’امپورٹڈ حکومت نامنظور‘۔

اسلام آباد: (ویب ڈیسک) وفاقی وزیر خزانہ مفتاح اسماعیل نے ہدف حاصل کرنے پر ایف بی آر ٹیم کی تعریف کی ہے۔ انہوں ںے تعریف ایف بی آر ہیڈ کوارٹرز کے دورے کے دوران کی۔
پاکستان مسلم لیگ (ن) سے تعلق رکھنے والے وفاقی وزیر خزانہ مفتاح اسماعیل نے ایف بی آر ہیڈ کوارٹرز کا دورہ کیا تو انہیں ادارے کی کارکردگی اور ریونیو اکھٹا کرنے کے حوالے سے بریفنگ دی گئی۔
وفاقی وزیر خزانہ کو بریفنگ چیئرمین ایف بی آر عاصم احمد اور دیگر سینئر افسران نے دی۔ وزیر خزانہ کو گزشتہ دس ماہ کے دوران ادارے کی مجموعی کارکردگی اور محصولات وصولیوں کی بابت بھی آگاہ کیا گیا۔
مفتاح اسماعیل نے ہدف حاصل کرنے پر ایف بی آر کی ٹیم کی تعریف کی اور اس توقع کا اظہار کیا کہ ایف بی آر رواں مالی سال کے لیے مقرر کردہ ہدف حاصل کر لے گا۔
وفاقی وزیر خزانہ مفتاح اسماعیل نے اس دوران زور دے کر کہا کہ ایف بی آر ٹیکس وصولیوں کی حقیقی صلاحیت بروئے کار لانے کے لیے بھرپور کوششیں کرے۔ انہوں نے چیئرمین ایف بی آر کو ٹیکس وصولی مہم میں مکمل تعاون کی بھی یقین دہانی کرائی۔
مفتاح اسماعیل نے پاکستان کسٹمز کی جانب سے اپنائے گئے مختلف ڈیجیٹل اقدامات کو بھی سراہا۔

اسلام آباد: (ویب ڈیسک) ملک بھر میں سیاسی محاذ آرائی کے دوران افواج پاکستان اور اس کی قیادت کو نشانہ بنانے پرریٹائرڈ فوجی برہم ہو گئے۔
ہر اِختلاف قابلِ احترام لیکن اب بات ہمارے گھر پرآگئی ہے۔ جاگ فوجی جاگ تیری پَگ نوں لگ گیا داغ۔ ریٹائرڈ آفیسرز اور جوان فوج اور آرمی چیف کے ساتھ کھڑے ہیں۔
ریٹائرڈ آفیسرز نے کہا کہ ہمیں فوج پر فخر ہے۔ پاک فوج کو کام کرنے دیں۔ الزام برداشت نہیں کریں گے۔ کیایہ میر جعفر اور میر صادق والی فوج ہے؟ فوج اور عوام میں تقسیم پیداکرنے کی کوشش کی جاری ہے۔ جو فوج کو غدار کہتے ہیں وہ خُود غدار ہیں۔

اسلام آباد: (ویب ڈیسک) پاکستان تحریک انصاف کے منحرف رکن قومی اسمبلی نور عالم خان نے دُہری شہریت رکھنے والوں کو ووٹ کا حق دینے کی مخالفت کردی۔
قومی اسمبلی اجلاس میں پی ٹی آئی کے منحرف رکن قومی اسمبلی نے کہا کہ بیرون ملک پاکستانیوں کو ووٹ کا حق دینے کے بل کی حمایت نہیں کریں گے۔ دہری شہریت والوں کو الیکشن لڑنے کی اجازت دینے کی بھی حمایت نہیں کریں گے۔ دہری شہریت والوں کو ووٹ کا حق دینے کے حامی وہ ہیں، جو لیڈروں کو چندہ دیتے ہیں۔
اس پر وفاقی وزیر قانون اعظم نذیر تارڑ نے کہا کہ اوورسیز پاکستانیوں کو ووٹ دینے کے حق کا بل انتخابی اصلاحات کمیٹی کو بھیج دیا جائے۔

اسلام آباد: (ویب ڈیسک) وزیر داخلہ رانا ثنا اللہ نے کہا ہے کہ پاک چین دوستی خراب کرنے کی سازش کامیاب نہیں ہونے دیں گے۔
وزیر داخلہ رانا ثنا اللہ سے پاکستان میں تعینات چینی ناظم الامور نے ملاقات کی اور پاکستان چین دوطرفہ تعلقات سمیت باہمی دلچسپی کے دیگر امور پر بات چیت کی گئی۔ چینی ناظم الامور نے رانا ثنا اللہ کو وزارت داخلہ کا منصب سنبھالنے پر مبارکباد دی۔
پاکستان میں چینی شہریوں کی سیکیورٹی کو یقینی بنانے کے لیے اقدامات پر تبادلہ خیال کیا گیا۔ پاکستان اور چین کے درمیان باہمی تعلقات کو مزید وسعت دینے اور ملاقات میں چینی شہریوں کے لیے ویزا میں سہولیات دینے پر بھی اتفاق کیا گیا۔
وزیر داخلہ نے کراچی یونیورسٹی میں چینی شہریوں کی جانوں کے ضیاع پر افسوس کا اظہار کیا۔
اس موقع پر وزیر داخلہ رانا ثنا اللہ نے کہا کہ پاکستان اور چین کے درمیان تعلقات دیرینہ اور لازوال ہیں جبکہ وزیر اعظم چین کو پاکستان کا بہترین اور قابل بھروسہ دوست تصور کرتے ہیں۔
انہوں نے کہا کہ حکومت پاک چین تعلقات کو نئی بلند ترین سطح پر لے جائے گی اور پاک چین دوستی خراب کرنے کی کسی بھی سازش کو کامیاب نہیں ہونے دیں گے۔ کراچی یونیورسٹی دہشت گردی واقعے میں ملوث افراد کو قرار واقعی سزا دیں گے۔
رانا ثنا اللہ نے کہا کہ چینی شہریوں کی حفاظت کے لیے ریاست مکمل وسائل استعمال کر رہی ہے جبکہ سی پیک منصوبوں پر کام کرنے والے چینی باشندوں کے لیے فُول پروف سیکیورٹی فراہم کی ہے۔
چینی ناظم الامور نے کہا کہ چینی شہریوں کی غیر معمولی دیکھ بھال کرنے پر حکومت پاکستان کے مشکور ہیں اور کراچی یونیورسٹی دہشت گردی واقعے کے اصل مجرمان تک پہنچنے کے خواہشمند ہیں۔ پاکستان اور چین کی دوستی لازوال ہے۔
انہوں نے کہا کہ پاکستان کی ترقی میں چینی معاونت کا عمل جاری رہے گا جبکہ سی پیک پاکستان اور چین کے درمیان دوستی اور بہترین تعلقات کی علامت ہے۔

کراچی: (ویب ڈیسک) ایم کیوایم پاکستان کےرکن قومی اسمبلی اقبال محمد علی کے انتقال کےباعث خالی ہونے والی قومی اسمبلی کے حلقہ این اے 240 کےضمنی الیکشن کیلٸے کاغذات نامزدگی جمع کرانے کی آخری تاریخ ہے۔ اب تک مختلف سیاسی جماعتوں کے 13امیدواروں نےکاغذات نامزدگی جمع کرادیےہیں۔
ایم کیوایم کی جانب سے 6 امیدواروں، تحریک لبیک کی جانب 3، تحریک انصاف 2، پیپلزپارٹی 1 اور ایک آزاد امیدوار نے کاغذات نامزدگی جمع کروائےہیں۔
ایم کیوایم کی جانب سے محمد ابوبکر، شیر زمان، مسعود محمود ، محمد صادق، عارف اعظم اور نگہت فاطمہ نے کاغذات جمع کروائے ہیں۔ ٹی ایل پی کی جانب سے شہزادہ شہباز،محمد کاشف اور عبد الستار نے کاغذات نامزدگی جمع کروائےہیں۔
تحریک انصاف کے خان زمان خٹک اور گوہر علی خٹک نے کاغذات نامزدگی جمع کروائے ہیں۔ کاغذات جمع کروانے والے دیگرامیدواروں میں پیپلزپارٹی کے محمد نعیم اور ایرک مشتاق شامل ہیں۔
یاد ر رہے کہ این اے 240 کی نشست پر پولنگ 16 جون کو ہو گی۔

اسلام آباد: (ویب ڈیسک) وفاقی وزیر دفاع خواجہ آصف نے کہا ہے کہ پاکستان تحریک انصاف (پی ٹی ائٓی) کے چیئر مین اور سابق وزیراعظم عمران خان کو چھوٹ ملنی چاہیے، اس نے جو کرنا ہے کرلے۔
میڈیا سے گفتگو کے دوران وفاقی وزیر دفاع نے کہا کہ لندن میں کوئی بڑا اجلاس نہیں، خیرسگالی ملاقات کے لئے جا رہے ہیں جب سے حلف اٹھایا ہے ہم سوچ رہے تھے اپنے قائد میاں محمد نواز شریف سے ملاقات کریں، آج رات 8 سے 10 لوگ نجی دورے پر لندن جارہے ہیں۔
انہوں نے کہا کہ ہمارا لندن کا دورہ سیاسی نہیں، ہمارے قائد وہاں ہیں، احترام میں ان سے ملاقات کرنے لندن جارہے ہیں، ہماری ملاقات کرٹسی کے طور پر ہو گی، ان سے مشاورت بھی کریں گے، کوئی خصوصی ایجنڈا لے کر نہیں جارہے ہیں۔ قائد سے سیاسی مشاورت کریں گے، ان سے ہدایات لیں گے۔ انے والے دنوں میں کیا حکمت عملی ہونی چاہیے اس پر بھی بات کریں گے۔
صحافی نے سوال پوچھا کہ موجودہ حالات میں یہ ملاقات غیر معمولی ہوسکتی ہے، جس پر جواب دیتے ہوئے خواجہ آصف نے کہا کہ کوئی غیر معمولی ملاقات نہیں، میں کارکن ہوں، کیا غیرمعمولی بات کروں گا۔
صحافی نے ایک اور سوال کیا کہ سنا ہے عمران خان کو چھوٹ ملنے پر نوازشریف کو تحفظات ہیں،جس پر جواب دیتے ہوئے وزیر دفاع نے کہا کہ عمران خان کو چھوٹ ملنی چاہیے، اس نے جو کرنا ہے کرلے۔