وفاقی وزیر برائے آبی وسائل سید خورشید احمد شاہ نے کہا ہے کہ جارج بش نے بینظیر بھٹو کو عمران خان کا خیال رکھنے کا کہا، اگر کوئی لاکھوں کا جلوس لیکر آتا ہے تو آنے دیں، انتقامی سیاست کے بجائے معاشی بہتری پر جانا ہوگا۔
میڈیا سے گفتگو کرتے ہوئے خورشید احمد شاہ نے کہا کہ ہم یہ چاہتے ہیں کہ عوام دیکھ بھال کر فیصلہ کریں، ہماری کوشش ہے مسائل حل کریں لیکن مسائل بہت ہیں، اس وقت معاشی مسائل ہیں کہ اگر بتایا جائے تو حیران رہ جائیں گے، ساڑھے تین سال اس حکومت نے 22 ہزار ارب روپے کا قرضہ لیا ہے، عوام کو کوئی ریلیف نہیں دیا، عوام ویسے ہی پریشان رہے۔
انہوں نے کہا کہ ہمیں امپورٹڈ حکومت کہنے والا خود امپورٹڈ ہے، عمران خان کو تو پاکستان کے لیے تیار کیا گیا ہے، جارج بش نے بے نظیر بھٹو کو کہا تھا اس بچے کا خیال رکھنا، یہ خود امپورٹڈ ہے، اس حکومت کو امپورٹڈ کہتا ہے، ہم انتقام کی سیاست نہیں کرنا چاہتے ہیں، اگر کوئی لاکھوں کا جلوس لیکر آتا ہے تو آنے دیں، ہمیں گرفتاریاں نہیں کرنا ہیں، ہمیں صرف معاشی ترقی لانی ہے۔
وفاقی وزیر کا کہنا تھا کہ سنتے ہیں پٹرول اور مہنگا ہوجائے گا، ڈالر دو سو روپے تک پہنچ رہا ہے، ہمیں انتقامی سیاست نہیں بلکہ معیشت کی بہتری کی طرف لے جانا ہے۔

پاکستان مسلم لیگ (ن) کے رہنما اور وزیر مملکت برائے توانائی مصدق ملک نے کہا ہے کہ شیریں مزاری کے خطوط “ہمیں بچاؤ” کی دہائی ہے۔
پاکستان تحریک انصاف کی رہنما ڈاکٹر شیریں مزاری کے اقوام متحدہ کو خطوط پر ردعمل دیتے ہوئے مصدق ملک نے کہا کہ ڈاکٹر مزاری ایک طرف امریکہ کی سازش کا کہہ رہی ہیں، دوسری طرف اقوامِ متحدہ کو رحم کی اپیل کر رہی ہیں، امریکہ سازش کر رہا ہے اور یہ اقوام متحدہ کو درخواست دے رہے ہیں۔
وزیر مملکت نے مزید کہا کہ سیاست چمکانے کے لئے بیرون ملک خط لکھ رہے ہیں، پی ٹی آئی دوسروں پر فتوے باندھنے والی جماعت ہے، پی ٹی آئی لیڈر کس منہ سے اقوام متحدہ کو عرضیاں لکھ رہی ہیں؟۔

جدہ ایئر پورٹ سے پروازوں کی روانگی بدستور تاخیر کا شکار ہے، پی آئی اے کی 2 پروازیں تاخیر کا شکار ہوئیں، مسافروں نے احتجاج کیا جبکہ وزیر ہوابازی سعد رفیق نے واپسی آپریشن نارمل ہونے کا دعویٰ کیا ہے۔
تفصیلات کے مطابق جدہ ایئرپورٹ سے پروازوں کی روانگی تاحال تاخیر کا شکار رہی، کئی کئی گھنٹوں سے پھنسے مسافروں نے احتجاج کیا اور ایئرپورٹ پر ہلڑ بازی ہوئی جبکہ سعودی ایوی ایشن حکام صورتحال بہتر بنانے میں مصروف ہیں۔
پی آئی اے حکام کے مطابق رش کی وجہ سے پی آئی اے کی 2 پروازیں 5، 5 گھنٹے تاخیر کا شکار ہیں، پشاور اور لاہور کیلئے پروازیں پاکستان پہنچیں گی۔
جدہ ایئرپورٹ پر پی آئی اے اور پاکستانی سفارتخانے کا عملہ متحرک ہے، وفاقی وزیر ہوا بازی سعد رفیق تمام آپریشن کی نگرانی خود کر رہے ہیں۔
سماجی رابطے کی ویب سائٹ پر ٹوئٹ کرتے ہوئے سعد رفیق نے مسافروں کی واپسی کا آپریشن نارمل ہونے کا دعویٰ کیا کہ 16گھنٹے کی انتھک کوششوں کے بعد آپریشن نارمل ہوچکا، پی آئی اے، سفارتخانے کے عملے کا شکریہ۔

اگرچہ سائنسداں ساحلوں پر جان دار، پتھروں اور آلودگی وغیرہ کو دیکھتے ہیں تاہم اب ٹیکساس کے ساحلوں پر عجیب وغریب گڑیوں کی آمد سے لوگ حیران و پریشان ہیں۔
اب تک ٹیکساس بھر کے ساحلوں سے درجنوں پراسرار گڑیائیں مل چکی ہیں۔ یہ سب بہت پرانی ہیں کیونکہ کچھ کے اوپر سمندری جانور بارنیکل اگ آئے ہیں۔ بعض پر سمندری گھاس اور کائی کے نشانات ہیں۔ اکثر گڑیا دیکھنے میں خوفناک لگتی ہیں جبکہ کئی ایک کے ہاتھ پیر بھی غائب ہیں۔
مشن آرینسس ریزرو کے سائنسدانوں نے اس معمے پر غور شروع کردیا ہے کیونکہ ساحلوں پر بہہ کر آنے والے گڑیوں کی تعداد بڑھتی جاری ہے۔ کچھ گڑیوں کی آنکھیں بھی غائب ہیں۔ تاہن جامعہ ٹیکساس میں واقع سمندری تحقیقی ادارے نے بھی اسے ایک عجیب واقعہ قرار دیا ہے۔

شمالی کوریا نے ایک اور بیلسٹک میزائل کا تجربہ کیا ہے جسے رواں سال کا 14واں میزائل تجربہ قرار دیا جارہا ہے۔
غیر ملکی میڈیا کےمطابق جنوبی کوریا کے فوجی حکام کا کہنا ہےکہ شمالی کوریا نے حال ہی میں مشرقی ساحل کی جانب ایک میزائل فائر کیا ہے اور یہ تجربہ شمالی کوریا کے حالیہ جوہری پروگرام سے متعلق بیان کے ایک ہفتے بعد کیا گیا ہے۔
اس بیان میں شمالی کوریا کا کہنا تھا کہ وہ جتنی جلدی ممکن ہو جوہری صلاحیت کے حصول کو ممکن بنائے گا۔
جنوبی کوریا کے جوائنٹ چیفس آف اسٹاف نے دعویٰ کیا ہےکہ شمالی کوریا نے تقریباً دوپہر بارہ بجے کے قریب پیانگ یانگ کے علاقے سے ایک میزائل فائر کیا۔
میڈیا رپورٹس کے مطابق جاپانی کوسٹ گارڈ کا کہناہےکہ شمالی کوریا کی جانب سے فائر کیا گیا میزائل ممکنہ طور پر بیلسٹک میزائل ہوسکتا ہے۔
میڈیا رپورٹس کے مطابق شمالی کوریا کا یہ میزائل تجربہ رواں سال ہتھیاروں کا 14واں تجربہ ہے۔
اس سے قبل گزشتہ ماہ شمالی کوریا نے 2017 کے بعد پہلے بین البراعظمی بیلسٹک میزائل کا تجربہ کیا تھا جسے امریکا اور دیگر پڑوسی ممالک پر شمالی کوریا کی جانب سے دباؤ برقرار رکھنے کی حکمت عملی قرار دیا گیا تھا

محکمہ موسمیات کے مطابق رواں ماہ کے وسط تک کراچی میں کسی ہیٹ ویو کا امکان نہیں۔
چیف میٹرولوجسٹ سردارسرفراز کا کہنا ہےکہ کراچی میں 9 مئی تک موسم گرم و مرطوب رہےگا اور زیادہ سے زیادہ درجہ حرارت 34 سے36 ڈگری سینٹی گریڈ رہنےکا امکان ہے جب کہ مئی کے وسط تک کراچی میں ہیٹ ویوکا امکان نہیں۔
انہوں نے بتایا کہ بالائی سندھ میں 7 مئی سےگرمی کی شدت میں اضافےکاامکان ہے اور درجہ حرارت 45 ڈگری سینٹی گریڈ سے زائد رہنےکا امکان ہے۔
سردار سرفراز کے مطابق خلیج بنگال میں سائیکلون بننے کا امکان ہے ،7یا 8 مئی کو خلیج بنگال میں کم دباؤ والی صورتحال کا امکان ہے، لو پریشر ایریا سائیکلون بننے کی جانب بڑھ سکتا ہے۔
چیف میٹرولوجسٹ کا کہنا تھا کہ سائیکلون کا رخ اور اس کے اثرات بنگلادیش اور میانمارپر رہیں گے البتہ پاکستان کے ساحلی علاقوں کو سائیکلون سے کوئی خطرہ نہیں۔