لاہور: (ویب ڈیسک) قومی کرکٹ ٹیم کے کپتان بابر اعظم نے غلاف کعبہ کی تیاری میں حصہ لینے کی سعادت حاصل کرلی۔
عمرہ کی ادائیگی کے لیے سعودی عرب میں موجود بابر اعظم نے غلاف کعبہ کی تیاری میں حصہ لینے کا شرف حاصل کیا۔
قومی کرکٹ ٹیم کے کپتان نے انسٹاگرام پر ایک ویڈیو پوسٹ کی جس میں انہیں غلاف کعبہ کی تیاری میں حصہ لیتے ہوئے دیکھا جاسکتا ہے۔
انہوں نے سوشل میڈیا پر پوسٹ شیئر کرتے ہوئے کیپشن میں لکھا ہے کہ اس عظیم سعادت کو حاصل کرنے پر اللہ کا شر گزار ہوں۔ انشاءاللہ یہ اگلے غلاف کعبہ کا حصہ ہوگا۔
یاد رہے کہ بابراعظم نے اس سے قبل مسجد نبوی کے سامنے اور عمرہ ادائیگی کے بعد مسجد الحرام سے بھی تصاویر شیئر کی تھیں۔

لاہور: (ویب ڈیسک) سابق وفاقی وزیر فوادچوہدری کا کہنا ہے کہ شاید پاکستان کی تاریخ میں پہلی بار کوئی حکومت توہین مذہب قانون اپوزیشن کے خلاف استعمال کررہی ہے۔
پی ٹی آئی رہنما فوادچوہدری نے سوشل میڈیا پلیٹ فارم ٹوئٹر پر ایک پیغام میں کہا ہے کہ شاید پاکستان کی تاریخ میں پہلی بار کوئی حکومت توہین مذہب قانون اپوزیشن کے خلاف استعمال کررہی ہے۔
ان کا کہنا ہے کہ پہلے صرف فرقے اور انتہا پسند ذاتی انتقام کے لیے اس الزام کو استعمال کرتے تھے۔ مگر آج وفاقی وزراتوہین مذہب کے قانون کا نشانہ بناکر اسے کامیابی سمجھ رہے ہیں۔
واضح رہے کہ مسجد نبوی ﷺ واقعے پر سابق وزیراعظم عمران خان، فواد چوہدری، شہباز گل اور شیخ رشید سمیت 150 افراد کے خلاف توہین مذہب کا مقدمہ درج کیا گیا ہے۔

لاہور: حکمراں جماعت پاکستان مسلم لیگ(ن) وفاقی اور صوبائی حکومتوں کے پاس موجود قانونی دفعات کے تحت سابق وزیراعظم نواز شریف کی سزا کو منسوخ یا معطل کرنے پر غور کر رہی ہے۔

 رپورٹ کے مطابق وفاقی وزیر داخلہ رانا ثنااللہ خان نے ایک نجی ٹی وی چینل سے گفتگو کرتے ہوئے کہا کہ وفاقی اور پنجاب حکومتوں دونوں کو یہ اختیار حاصل ہے کہ وہ کسی ملزم کی سزا کو منسوخ یا معطل کر سکتی ہے اور اسے ‘پہلے کسی مقدمے میں غلط طریقے سے سزا’ ہونے کی صورت میں عدالت میں دوبارہ اپنا مقدمہ پیش کرنے کا موقع فراہم کرے، انہوں نے کہا کہ یہ دفعات مسلم لیگ(ن) کے قائد اور دیگر کو ریلیف فراہم کرنے کے لیے استعمال کی جا سکتی ہیں۔

تاہم انہوں نے کہا کہ میاں نواز شریف کی صحت کی بنیاد پر ان کی وطن واپسی کا فیصلہ کریں گے۔

رانا ثنااللہ نے آئین اور متعلقہ قوانین میں ترمیم کرنے کا بھی اشارہ دیا تاکہ پریزائیڈنگ افسر کو معاملہ صدر یا گورنر پر چھوڑنے کے بجائے وزیر اعظم یا وزیر اعلیٰ کے الیکشن کے بعد ان سے حلف لینے کا اختیار ہو۔

انہوں نے کہا کہ اس اقدام کی ضرورت پنجاب کے بحران میں محسوس کی گئی جس میں گورنر کی جانب سے لاہور ہائی کورٹ کے احکامات کے باوجود حمزہ شہباز کی تقریب حلف برداری ہفتوں تک ملتوی کر دی گئی۔

انہوں نے کہا کہ مستقبل میں وزیر اعظم یا وزیر اعلیٰ کا انتخاب کرنے والے پریزائیڈنگ افسر کو یہ اختیار دیا جائے گا کہ وہ الیکشن میں جیتنے والے امیدوار سے عہدے کا حلف لے گا۔

لاہور: (ویب ڈیسک) پاکستان اور یو اے ای قیادت کے فیصلوں پر عملدرآمد کے حوالے سے بڑی خبر سامنے آ گئی، پاکستان اور متحدہ عرب امارات کی قیادت کے فیصلوں پر عملدرآمد کے لئے معاشی ٹیم پاکستان آئے گی اور وزیراعظم شہبازشریف سے کل لاہور میں ملاقات کرے گی۔
متحدہ عرب امارات کے معاشی ماہرین کا وفد پاکستان کا ہنگامی دورہ کرے گا، وزیراعظم شہباز شریف سے یو اے ای کا وفد 3 مئی کو لاہور میں ملاقات کرے گا، یو اے ای کے وفد اور وزیراعظم کی معاشی ٹیم میں ملاقات ہوگی جس کے دوران پاکستان اور یو اے ای کے درمیان معاشی سرگرمیاں تیز کرنے سے متعلق تجاویز پر غور ہوگا۔
وزیراعظم شہباز شریف وفد کے اعزاز میں عشائیہ دیں گے، ملاقات میں دونوں ممالک کے درمیان معاشی، تجارتی اور سرمایہ کاری کے فروغ سے متعلق بات چیت ہو گی، وفد کو پاکستان میں سرمایہ کاری سے متعلق ماحول اور پالیسی سے آگاہ کیا جائے گا، توانائی، معاشیات، پٹرولیم انڈسٹری کے شعبوں میں تعاون پر بات چیت ہوگی۔

لاہور: (ویب ڈیسک) پیپلزپارٹی کی مرکزی نائب صدر سینیٹر شیری رحمن نے کہا ہے کہ مسجد نبوی ﷺ واقعے کی مذمت نہ کرنا اس کے دفاع کے مترادف ہے، عمران خان اپنے کرپشن سکینڈل کا دفاع کرنے میدان میں اتر آتے ہیں لیکن مسجد نبویﷺ واقعے کا دبے الفاظ میں دفاع کر رہے ہیں۔
شیری رحمن نے اپنے بیان میں کہا کہ اپنے سیاسی مقاصد کے لئے امر بالمعروف جلسے کرنے والے مسجد نبویﷺ واقعے کا دفاع کر رہے ہیں، چور، ڈاکو اور میں نہ مانوں کا بیانیہ ملک میں بد ترین تقسیم کا سبب بن رہا ہے، تحریک انصاف نے اپنے 26 سال میں ملک کو نفرت، تقسیم اور انتشار کے سوائے کچھ نہیں دیا۔
شیری رحمن نے کہاکہ تحریک انصاف کو پاکستان نہیں، اپنی طرز سیاست تبدیل کرنے کی ضرورت ہے، شخصیات اور اداروں کے خلاف گالم گلوچ اور الزامات سے آپ اپنی سیاست تو زندہ رکھ سکتے ہیں لیکن انتخاب نہیں جیت سکتے، کرپشن، بدانتظامی اور ناکامیوں سے بھرپور حکومت کا دور ختم ہو چکا ہے۔

اٹک: (ویب ڈیسک) تحریک انصاف کے رہنما زلفی بخاری نے کہا ہے کہ وزیر داخلہ رانا ثنا خود دہشت گرد ہیں اور قوم کو آپس میں لڑانے کی کوشش کر رہے ہیں۔
اٹک میں میڈیا سے گفتگو کرتے ہوئے پی ٹی آئی رہنما زلفی بخاری نے کہا کہ وزیر داخلہ رانا ثنا کے خلاف 18قتل کی ایف آئی آرز درج ہیں ، وزیر داخلہ مسلمان کو مسلمان سے لڑانے کی سازش کر رہا ہے ۔
انہوں نے کہا کہ رانا ثناء اللہ یہ سمجھتا ہے کہ ہمارے کارکن مقدمات سے ڈر جائیں گے اور باہر نہیں نکلیں گے یہ اس کی غلط فہمی ہے ۔عمران خان واحد لیڈر ہے جس نے اسلامو فوبیا پر آواز اٹھائی۔