اسلام آباد: (ویب ڈیسک) پی ٹی آئی رہنما شہباز گل نے وزیراعظم شہباز شریف کو اپنے تین ذاتی گھروں کو کیمپ آفس ڈکلیئر کرنے پر تنقید کا نشانہ بنایا۔
شہباز گل نے لکھا کہ عمران خان صاحب آپکو خبر ہو کہ اگلے نے حلف لینے سے پہلے ایک نہیں دو نہیں بلکہ تین تین زاتی گھروں کو کیمپ آفس ڈکلیئر کر دیا، آپ ساڑھے تین سال تک ایک بھی کیمپ آفس نہ بنا پائے۔
آپ نے ساری ایمانداری اپنے آپ پر اپنی ٹیم پر لگا رکھی تھی، حاصل وصول کیا ہوا جو آپ نے بچایا تھا وہ لٹ رہا اب۔
ریاض: (ویب ڈیسک) سال 2030 میں دو مرتبہ رمضان المبارک کا مقدس مہینہ آئےگا۔
سعودی ماہر فلکیات خالد الذقاق نے اپنے ٹوئٹر اکاؤنٹ پر پوسٹ کی گئی ایک ویڈیو بتایا ہے کہ سال 2030میں مسلمان دو بار رمضان کے روزے رکھیں گے۔
ان کا کہنا ہے کہ اسلامی کلینڈر قمری ادوار جبکہ عیسوی کلینڈر سورج کے گردزمین کے گردش کی نشان دہی کرتا ہے۔ رمضان ایک عیسوی سال میں قریباً ہر 30 سال میں دوبارآتا ہے۔
ہجری سال 1451ھ میں رمضان المبارک کا آغاز5 جنوری 2030کے آس پاس ہوگا اور سال 1452ھ میں رمضان 26 دسمبر 2030 کے آس پاس آئے گا۔اس طرح سے مسلمان 2030 میں مجموعی طور پر تقریباً 36 دن روزے رکھیں گے۔
آخری بارایسا 1997 میں ہوا تھا اور اس سے پہلے 1965 میں ہوا تھا۔2030 کے بعد سنہ 2063 میں ایک مرتبہ پھر دوباررمضان آئے گا۔
واضح رہے کہ ہجری قمری سال 354 یا 355 دن کا ہوتا ہے جبکہ عیسوی سال 365 دن کا ہوتا ہے اسی لیے ہر سال رمضان اور دیگر مہینوں کی تاریخوں میں ہیر پھیر آتا ہے
جھارکھنڈ: (ویب ڈیسک) بھارتی ریاست جھارکھنڈ میں دردناک واقعہ پیش آیا جب ریسکیو کے دوران شہری ہیلی کاپٹر سے گر کر ہلاک ہوگیا۔
اتوار کے روز جھارکھنڈ کے تفریحی مقام پر12 کیبل کاریں آپس میں ٹکرا گئیں جس کے باعث پچاس سے زائد افراد فضا میں پھنس گئے، بھارتی فضائیہ نے 30 افراد کو ریسکیو کرلیا جبکہ 18 ابھی بھی فضا میں معلق کیبل کار میں موجود ہیں۔
ریسکیو کے دوران شہری کی گرفت چھوٹنے سے وہ کئی فٹ گہرائی میں جاگرا، حادثے میں اب تک خاتون سمیت 2 افراد ہلاک ہوچکے ہیں۔
واقعہ پر افسوس کا اظہار کرتے ہوئے جھارکھنڈ کے وزیر اعلیٰ کا کہنا ہے کہ ریسکیو کا کام جنگی بنیادوں پر کیا جا رہا ہے، اور حکومت صورتحال پر گہری نظر رکھے ہوئے ہے۔
فضائیہ کے دو ہیلی کاپٹرز کو ریسکیو مشن کا حصہ بنایا گیا ہے، حکام نے بتایا کہ ڈرون کی مدد سے پھنسے ہوئے لوگوں کو پانی اور خوراک فراہم کی جا رہی ہے۔
برطانیہ : (ویب ڈیسک) یوکرینی فوج نے روس کے متعدد حملے ناکام بنا دیے۔
برطانوی انٹیلی جنس ایجنسی نے دعویٰ کیا ہے کہ یوکرینی افواج نے روس کی جانب سے ملک کے مشرقی حصے میں کیے جانے والے کئی تازہ حملے ناکام بنا دیے ہیں۔
یوکرینی صدر وولودیمیر زیلنسکی نے کہا ہے کہ رواں ہفتہ جنگ کے حوالے سے مشکل رہے گا۔ انہوں نے فوج کو پوری طرح تیار رہنے کی ہدایت کی ہے۔
دوسری جانب آسٹریا کے چانسلر کارل نیہامر آج ماسکو میں روسی صدر ولادیمیر پیوٹن سے ملاقات کر رہے ہیں۔ آسٹریا کی وزارت خارجہ کے مطابق کارل نیہامر روسی صدر کوجنگ بندی کے امکانات اور جنگ کے سبب پیدا شدہ خطرات سے آگاہ کریں گے۔
واضح رہے کہ 24 فروری کو روس کے یوکرین پر حملے کے بعد روسی صدر پیوٹن کے ساتھ کسی یورپی رہنما کی یہ پہلی براہ راست ملاقات ہوگی۔
ممبئی : (ویب ڈیسک) بالی وڈ کی ایک اور حسین جوڑی رنبیر کپور اور عالیہ بھٹ کی شادی کی تیاریاں عروج پر پہنچ گئیں، رنبیر کے گھر کو خوبصورت لائٹس سے سجا دیا گیا۔ جبکہ بھارتی ڈیزائنر کا لہنگا بھی عالیہ کے گھر پہنچ چکا ہے۔
رپورٹس کے مطابق رنبیر اور عالیہ اپنی شادی میں سابیا ساچی کے تیار کردہ ملبوسات پہنیں گے، جبکہ ای ٹائمز کی ایک رپورٹ کے مطابق، انہوں نے اس موقع کے لیے پیسٹل شیڈز کا انتخاب کیا ہے۔ رپورٹ میں دعویٰ کیا گیا کہ عالیہ بھٹ اپنی شادی کی تقریبات کے دوران منیش ملہوترا کے ملبوسات بھی پہنیں گی۔
بھارتی میڈیا کے مطابق عالیہ بھٹ اور رنبیر کپور کی آنے والی شادی کے لیے سیکیورٹی کے سخت انتظامات کیے جا رہے ہیں، جن میں مبینہ طور پر 200 ‘انگریزی بولنے والے’ باؤنسرز، گارڈز، ڈرونز اور فوٹوگرافی کو روکنے کے لیے اسکرینیں لگائی جائیں گی۔
جس کے لیے ممبئی کی سب سے بڑی سیکورٹی ایجنسی سے مدد لی گئی ہے۔
عالیہ بھٹ کے بھائی راہل بھٹ کا کہنا ہے کہ شادی کے لیے انتہائی کم مہمانوں کی فہرست جاری کی گئی ہے، جن میں فیملی اور قریبی دوست شامل ہیں۔ ان کا یہ بھی کہنا ہے کہ یہ فہرست صرف 28 لوگوں پر مشتمل ہے۔
دونوں بالی ووڈ اسٹارز کی شادی کی تاریخ کےلیے 14 اور 15 اپریل کی تاریخ سامنے آرہی تھی، تاہم عالیہ کے چچا رابن بھٹ نے حال ہی میں تصدیق کی کہ عالیہ بھٹ 14 اپریل کو رنبیر سے ان کے گھر پر شادی کریں گی۔
پنک ولا نے رپورٹ میں کہا تھا کہ شادی کے بعد رنبیر اور عالیہ کا ریسپشن ممبئی میں رکھا جائے گا، جس میں کئی بالی ووڈ ستارے نظر آئیں گے، جس کی گیسٹ لسٹ بھی تیار ہو چکی ہے، جس میں شاہ رخ خان کے ساتھ رنبیر کپور کی پرانی دوست رہ چکیں دیپیکا پڈوکون کا نام بھی شامل ہے۔
یاد رہے عالیہ بھٹ ہمیشہ سے انٹرویوز میں بتاتی رہی ہیں کہ 11 سال کی عمر سے انہیں رنبیر کپور سے محبت ہوئی تھی، لیکن ان کا رشتے کا آغاز 2017 میں ہوا، جسے 2018 میں انہوں نے سونم کپور کی شادی پر ایک ساتھ آ کر آفیشل کر دیا۔
لاہور: (ویب ڈیسک) بھارت میں جاری آئی پی ایل میچز کے دوران سنیل گواسکر نے برطانیہ سے کوہ نور ہیرا واپس کرنے کا مطالبہ کر دیا۔
یہ واقع راجستھان رائلز اور لکھنو سپر کے درمیان جاری میچ کے دوران پیش آیا، جس بھارت کے سابق کرکٹر نے لائیو اپنے ساتھی برطانوی کمنٹیٹر سے کوہ نور ہیرا واپس لانے میں مدد مانگ لی۔
میچ کے دوران جب کیمرے نے سی ویو کے مناظر دکھانا شروع کیا، تو مزاق کے موڈ میں سنیل گواسکر نے کہا کہ ہم ابھی تک کوہ نور ہیرے کا انتظار کر رہے ہیں۔
اس پر انگلش کمنٹریٹر نے زور دار قہقہہ لگا کر کہا کہ وہ سوچ رہے تھے کہ یہ کب آئے گا؟ جس پر بھارتی سابق کرکٹر نے مزید کہا کہ اگر آپ اسے لانے میں مدد کر سکتے ہیں تو برطانوی حکومت سے اس بارے میں درخواست کریں۔
بھارتی میڈیا کے مطابق یہ واقع 2015 میں ہونے والے آئی پی ایل میں پیش آیا، جو اب سوشل میڈیا پر وائرل ہورہا ہے، اور کئی صارفین کی جانب سے انہیں اس بات پر سراہا بھی جا رہا ہے۔
کوہِ نور دنیا کا مشہور ترین ہیروں میں سے ایک ہے جو اس وقت تاج برطانیہ کی زینت ہے، دوسری اینگلو سکھ جنگ میں انگریزوں کی فتح کے بعد ان کی سلطنت اور کوہ نور دونوں پر انگریزوں نے قبضہ کر لیا تھا۔
اسلام آباد: (ویب ڈیسک) وزیراعظم نے ہفتے میں 2 سرکاری تعطیلات ختم کر دیں۔ شہباز شریف نے سرکاری دفاتر کے اوقات کار میں تبدیلی کر دی۔ دفتر صبح 10 بجے کے بجائے صبح 8 بجے کام شروع کریں گے۔
وزیراعظم شہباز شریف نے رمضان بازاروں کی سخت مانیٹرنگ یقینی بنانے کی ہدایت کرتے ہوئے کہا کہ عوام کو سستی اشیاء کی فراہمی میں غفلت برداشت نہیں کروں گا۔ شہباز شریف نے پینشنرز کی پینشن میں اضافے، کم از اکم اجرت 25 ہزار کرنے کے اعلانات پر فی الفور عمل درآمد کا حکم بھی جاری کر دیا۔
شہباز شریف کی وزیراعظم آفس کے افسران اور عملے سے ملاقات ہوئی، جس میں وزیراعظم شہباز شریف سے عملے کا تعارف کرایا گیا۔ اس موقع پر کا کہنا تھا کہ کمر ہمت کس لیں، عوام کی خدمت کے لئے آئے ہیں، ایک لمحہ مزید ضائع نہیں کرنا، ایمان داری، شفافیت، مستعدی، انتھک محنت ہمارے راہنما اصول ہیں۔
اسلام آباد : وزیراعظم شہباز شریف کا دھمکی آمیزخط پارلیمنٹ میں لانے کا اعلان کردیا اور کہا خط میں بیرونی سازش کا رتی برابر شبہ ہوا تو وزارت عظمیٰ سے استعفیٰ دیکر گھر چلا جاؤں گا۔
تفصیلات کے مطابق وزیراعظم شہباز شریف نے دھمکی آمیزخط پارلیمنٹ میں لانے کا اعلان کرتے ہوئے کہا کوئی غدار ہے اور نہ کوئی غدار تھا،خط پارلیمان اور دنیا کےسامنے آنا چاہیے تاکہ یہ بحث ہمیشہ کےلیے ختم ہو۔
وزیراعظم کا کہنا تھا کہ پارلیمان کی سیکیورٹی کمیٹی کے ان کیمرہ اجلاس میں بریفنگ دی جائے، اجلاس میں خط لکھنے والے سفیر،تمام ارکان پارلیمنٹ اور مسلح افواج کےسربراہ شریک ہوں۔
شہباز شریف کا کہنا تھا کہ اگر ثابت ہوجائے کہ ہم کسی سازش کا حصہ بنے ہیں یا خط میں بیرونی سازش کا رتی برابر شبہ ہوا تو وزارت عظمیٰ سے استعفیٰ دے کر گھر چلا جاؤں گا۔
وزیراعظم پاکستان نے آئین شکنی کو کالعدم قرار دینے پر سپریم کورٹ کا شکریہ ادا کرتے ہوئے کہا فیصلے نے نظریہ ضرورت کو ہمیشہ کیلئے دفن کردیا ہے۔
یاد رہے وزیراعظم منتخب ہونے کے بعد ایوان میں اظہار خیال کرتے ہوئے شہبازشریف نے کہا تھا کہ ہمت کریں گے اور آگے بڑھیں گے ایک لاکھ تک تنخواہ والوں کیلئے10فیصداضافہ یکم اپریل سےکریں گے پنشن میں 10فیصد اضافےکا اعلان کرتا ہوں۔
اسلام آباد: (ویب ڈیسک) فواد چودھری نے کہا ہے کہ ملک کا سیاسی بحران سنگین ہو رہا ہے، ٹکراؤ سے بچنے کا واحد طریقہ انتخابات ہیں۔
پاکستان تحریک انصاف کے رہنما فواد چودھری نے سماجی رابطے کی ویب سائٹ پر ٹویٹ کرتے ہوئے کہا کہ ن لیگ حکومت سوشل میڈیا اور سیاسی مخالفین کیخلاف کریک ڈاؤن کے خواب چھوڑے، چوں چوں کا مربع حکومت چند ہفتوں کیلئے ہے،135 حلقوں سے استعفیٰ آ چکے ہیں، موجودہ پارلیمان اپنی اہمیت اور حیثیت کھو چکی ہے۔
لاہور: (ویب ڈیسک) وزیراعلیٰ عثمان بزدار نے کہا ہے کہ عمران خان نے قوم کی صحیح سمت رہنمائی کی اور خودداری کی راہ پر چلنا سکھایا۔
وزیراعلی پنجاب عثمان بزدار نے اپنے بیان میں کہا کہ عمران خان نے قوم کے جذبات کی حقیقی معنوں میں ترجمانی کی ہے، کپتان نے قوم کو اقبال کے افکار اور قائداعظم کے زریں اصولوں پر چلنا سکھایا، عمران خان نے عالمی سطح پر ملک و قوم کا وقار بلند کیا۔
عثمان بزدار کا کہنا تھا کہ عمران خان سیاسی افق پر روشن ستار ے کی مانند چمک رہے ہیں، عمران خان نے عوام کو سیاسی شعور دیا اور جذبہ حب الوطنی بیدار کیا، عمران خان نے قوم کے جذبات کی حقیقی ترجمانی کی، ملک میں اصولوں کی سیاست کو فروغ دیا، کپتان نے قوم کو اقبالؒ کے افکار اور قائداعظمؒ کے زریں اصولوں پر چلنا سکھایا۔
وزیراعلیٰ پنجاب نے مزید کہا کہ عمران خان نے عالمی سطح پر ملک و قوم کا وقار بلند کیا، عمران خان ایماندار و دیانتدار لیڈر، کوئی مائی کا لعل ان کا مقابلہ نہیں کر سکتا۔
