کراچی: (ویب ڈیسک) پاکستان سپر لیگ ( پی ایس ایل) کے ساتویں ایڈیشن کے پہلے مرحلے کے میچ میں کوئٹہ گلیڈی ایٹرز نے اوپنر جیسن روئے کی شاندار سنچری کی بدولت لاہور قلندرز کو7 وکٹوں سے شکست دے دی۔
205 رنز کا ہدف کوئٹہ نے 20 ویں اوور میں مکمل کرلیا، جیسن روئے57 گیندوں پر 116 رنز بناکر نمایاں رہے، ان کی اننگز میں 11 چوکے اور 8 چھکے شامل تھے۔
نیشنل اسٹیڈیم کراچی میں کھیلے گئے میچ میں کوئٹہ کے کپتان سرفراز احمد نے ٹاس جیت کر لاہور قلندرز کو پہلے بیٹنگ کی دعوت دی۔
لاہور قلندرز نے مقررہ 20 اوورز میں5 وکٹوں پر 204 رنز بنائے، فخرزمان 70 رنز بناکر نمایاں رہے۔
لاہور قلندرز کی اننگز کا آغاز اچھا رہا اور اوپنر عبداللہ شفیق اور فخرزمان کے درمیان 61 رنز کی شراکت داری قائم ہوئی تاہم عبداللہ 27 گیندوں پر 32 رنز بناکر آؤٹ ہوگئے۔
لاہور کو دوسرا نقصان کامران غلام کی صورت میں اٹھانا پڑا، وہ 13 گیندوں پر 19 رنز بناکر پویلین لوٹے، اس کے علاوہ محمد حفیظ ایک بار پھر بڑا اسکور کرنے میں ناکام رہے اور صرف 8 رنز بناکر ٹیم کا ساتھ چھوڑ گئے۔
تاہم دوسرے اینڈ سے فخر زمان جارحانہ بیٹنگ کرتے رہے تاہم وہ بھی 45 گیندوں پر 70 رنز بناکر آؤٹ ہوئے لیکن اختتامی اوورز میں ہیری بروک کی جارحانہ اننگز کی بدولت لاہور نے مقررہ 20 اوورز میں 204 رنز بنائے۔
ہیری بروک 17 گیندوں پر 41 رنز بناکر ناٹ آؤٹ رہے اس کے علاوہ ڈیوڈ ویزا نے 9 گیندوں پر 22 رنز بنائے ۔
کوئٹہ کی جانب سے غلام مدثر نے 2 جبکہ افتخار احمد نے اور کوک ووڈ نے ایک ، ایک کھلاڑی کو آؤٹ کیا۔
205 رنز کے ہدف کے تعاقب میں کوئٹہ گلیڈی ایٹرز کا آغاز دھواں دار رہا، اوپنر جیسن روئے نے اننگز کے آغاز سے ہی جارحانہ کھیل پیش کیا اور گراؤنڈ کے چاروں اطراف دلکش شاٹس لگائے۔
تاہم جب ٹیم کا اسکور 71 رنز پر پہنچا تو اوپنر احسان علی 7 رنز بناکر آؤٹ ہوئے جس کے بعد جیسن روئے نے قلندرز کے بولرز پر لاٹھی چارج شروع کردیا اور سنچری مکمل کی۔
تاہم جیمز ونز کے ساتھ 96 رنز کی شراکت داری قائم ہونے کے بعد روئے 57 گیندوں پر 116 رنز کی دھواں دار اننگز کھیل کر آؤٹ ہوئے۔
اس کے علاوہ اختتامی اوورز میں جیمز ونس کی شاندار بیٹنگ کی بدولت کوئٹہ نےکامیابی حاصل کی۔
انہوں نے 38 گیندوں پر 49 رنز کی ناقابل شکست اننگز کھیلی۔

فیصل آباد: (ویب ڈیسک) ایف آئی اے سائبر کرائم نے کارروائی کرتے ہوئے جنسی ہراسانی میں ملوث ملزم کو گرفتار کر لیا۔
ایف آئی اے سائبر کرائم فیصل آباد نے چھاپہ مار کر ملزم سہیل عمر دراز ولد ایم یونس کو فیصل آباد سے گرفتار کیا گیا ہے۔
ملزم سوشل میڈیا کے ذریعے شکایت کنندہ کا قابل اعتراض اور جنسی طور پر واضح ڈیٹا شیئر کرکے بلیک میلنگ اور ہراساں کرنے میں ملوث تھا۔

اسلام آباد: (ویب ڈیسک) وزیر اعظم عمران خان اور صدر مملکت ڈاکٹر عارف علوی سے سعودی وزیر داخلہ سے ملاقات کی جس میں اہم امور پر تبادلہ خیال کیا گیا۔
وزیراعظم عمران خان سے سعودی وزیر داخلہ عبدالعزیز بن سعود بن نائف نے ملاقات کی، ملاقات کے دوران وزیراعظم نے اسلامی اتحاد کے فروغ میں شاہ سلمان بن عبدالعزیز کے قائدانہ کردار کی تعریف کی۔
وزیراعظم نے خطے میں امن و سلامتی کے لیے سعودی عرب کی کوششوں کو سراہا اور پاکستان، سعودی عرب کے درمیان برادرانہ تعلقات میں سعودی ولی عہد شہزادہ محمد بن سلمان کے موثر کردار کی تعریف کی۔
عمران خان نے مشکل حالات میں سعودی قیادت کی حمایت اور پاکستان کی حالیہ مالیاتی مدد پر سعودی قیادت کا شکریہ ادا کیا۔ جبکہ سعودی عرب پر حوثی ملیشیا کے حملوں کی مذمت کی۔
اعلامیہ کے مطابق وزیراعظم نے مملکت کی سلامتی، خودمختاری اور علاقائی سالمیت کے لیے پاکستان کی مکمل حمایت کا اعادہ کیا اور عوام سے عوام کے روابط کو مزید مضبوط بنانے کی ضرورت پر زور دیا۔ ملاقات میں دونوں ممالک کے درمیان مجرمان کی منتقلی کے معاہدے پر بھی بات ہوئی،
اس موقع پر وزیراعظم کا کہنا تھا کہ امید ہے اس فریم ورک کے ذریعے سعودی عرب میں پاکستانی قیدیوں کی ایک بڑی تعداد کو پاکستان واپس بھیجا جائے گا۔
اعلامیہ کے مطابق شہزادہ عبدالعزیز نے وزیر اعظم کو ولی عہد شہزادہ محمد بن سلمان کی جانب سے تہنیتی مبارکباد پیش کی۔ سعودی وزیرداخلہ نے سعودی عرب کی ترقی میں پاکستانیوں کے مثبت کردار کا بھی اعتراف کیا۔
سعودی وزیرداخلہ نے اپنی وزارت سے متعلق تمام معاملات پر پاکستان کے ساتھ مل کر کام کرنے کے عزم کا اعادہ کرتے ہوئے کہا کہ پاکستان اور سعودی عرب ایک برادرانہ رشتے میں بندھے ہوئے ہیں، پاک سعودی تعلقات باہمی اعتماد، قریبی تعاون اور ایک دوسرے کی حمایت کرنے کی مستقل روایت پر مشتمل ہیں۔
دوسری طرف صدر مملکت ڈاکٹر عارف علوی سے سعودی عرب کے وزیر داخلہ شہزادہ عبدالعزیز بن سعود بن نائف بن عبدالعزیز آل سعود نے ملاقات کی۔ ملاقات کے دوران پاکستان اور سعودی عرب کے درمیان باہمی دلچسپی کے مختلف شعبوں میں دوطرفہ تعاون کو مزید مضبوط اور متنوع بنانے کے عزم کا اعادہ کیا گیا۔
صدر مملکت نے سعودی وزیر داخلہ کا خیرمقدم کرتے ہوئے کہا کہ دونوں برادر ممالک کے درمیان بہترین تعلقات ہیں جنہیں دونوں ممالک کے باہمی مفاد کے لیے مزید مضبوط کرنے کی ضرورت ہے۔
سعودی عرب میں پاکستانی قیدیوں کی رہائی کے حوالے سے انہوں نے امید ظاہر کی کہ سعودی حکومت اپنی سزا پوری کرنے والے قیدیوں کی رہائی پر مثبت انداز میں غور کرے گی۔
صدر مملکت نے “روڈ ٹو مکہ” پائلٹ پراجیکٹ شروع کرنے پر سعودی قیادت کا شکریہ ادا کیا اور کہا کہ حکومت پاکستان اس کی توسیع ملک کے دیگر شہروں تک کرنے کی منتظر ہے۔
انہوں نے او آئی سی اور ایف اے ٹی ایف کی سطح پر گراں قدر حمایت کے ساتھ ساتھ دسمبر 2021 میں اسلام آباد میں منعقدہ او آئی سی وزرائے خارجہ کونسل کے 17 ویں غیر معمولی اجلاس میں شرکت اور پاکستان کو مالی معاونت فراہم کرنے پر سعودی عرب کا شکریہ ادا کیا،
انہوں نے اس بات کی اہمیت کو اجاگر کیا کہ دونوں ممالک نے افغانستان میں صورتحال پر اپنے تحفظات کا اظہار کیا ہے اور عالمی برادری پر زور دیا ہے کہ وہ افغان عوام کو انسانی تباہی سے بچانے کے لیے ضرورت کے پیش نظر ان کی مدد کرے۔
اس موقع پر صدر مملکت نے شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز آل سعود کے لئے اپنی نیک خواہشات کا پیغام دیا۔
سعودی وزیر داخلہ نے بتایا کہ دونوں ممالک کی ٹیکنیکل ٹیموں کی جانب سے پاکستانی قیدیوں کے معاملے کو حل کرنے میں مدد کے لیے اقدامات کیے جا رہے ہیں۔
انہوں نے پاکستان میں قیام کے دوران اپنے وفد کے پرتپاک استقبال اور مہمان نوازی پر حکومت پاکستان کا شکریہ ادا کیا۔ صدر مملکت نے 20 لاکھ سے زیادہ پاکستانیوں کی میزبانی میں سعودی عرب کے کردار اور تعاون اور بالخصوص کورونا وبا کے دوران ان کے ساتھ اس کے خیر خواہانہ سلوک کی تعریف کی۔

لاہور: (ویب ڈیسک) پاکستان مسلم لیگ ن کے سینٹرل ایگزیکٹو اجلاس میں حکومت کیخلاف تمام فیصلوں کا اختیار نواز شریف کو دیدیا گیا۔
مسلم لیگ ن کی سینٹرل ایگزیکٹو کمیٹی کے اجلاس کی صدارت پارٹی قائد نواز شریف نے لندن سے اور پارٹی صدر شہبازشریف نےلاہور سے کی۔ ورچوئل اجلاس میں ن لیگ کی سینئر قیادت، مرکزی عہدیدار اور صوبائی پارٹی صدور نے شرکت کی۔
اجلاس کے دوران تمام فیصلوں کا اختیار نواز شریف کو دے دیا گیا۔ شرکا نے نواز شریف کی قیادت پر اعتماد کا اظہار کیا اور نااہل حکومت کے خلاف تمام آئینی سیاسی فیصلوں کا اختیار نواز شریف کو دیدیا۔
مسلم لیگ ن کی سینٹرل ایگزیکٹو کمیٹی نے ن لیگ صدر شہباز شریف کو تمام سیاسی جماعتوں سے رابطوں کا میںنڈنٹ دے دیا۔
اجلاس کے دوران شہباز شریف کو مینڈیٹ دیتے ہوئے کہا گیا ہے کہ عوام دشمن حکومت کے خلاف عوامی۔ سیاسی اور جمہوری اقدامات کے لئے تمام جماعتوں سے رابطے کریں۔
اجلاس کے بعد سماجی رابطے کی ویب سائٹ ٹویٹر پر اپنے ایک بیان میں پاکستان مسلم لیگ ن کی نائب صدر مریم نواز نے لکھا کہ عوام کی حالت زار اور حکومت کی نااہلی اور ہر میدان میں ناکامی کو سامنے رکھتے ہوئے پارٹی میں اتفاق رائے ہے عمران خان کی حکومت کو جانا ہے۔
انہوں نے مزید لکھا کہ ہر وہ روز جس دن پی ٹی آئی حکومت کو رہنے دیا جائے گا اس سے لوگوں کی مشکلات میں اضافہ ہو گا۔ کسی ایک رکن نے بھی اختلاف نہیں کیا۔
ایک اور ٹویٹ میں مریم نواز نے کہا کہ ن لیگ کے سی ای سی اجلاس میں تمام اراکین نے نواز شریف پر مکمل اور غیر مشروط اعتماد کا اظہار کرتے ہوئے پارٹی ان کی طرف سے لیے گئے تمام فیصلوں کی حمایت کرے گی۔

اسلام آباد: (ویب ڈیسک) وفاقی وزیر برائے امورِ کشمیر علی امین گنڈاپور کے بھائی اور ڈیرہ اسماعیل خان سے سٹی میئر کے امیدوار عمر امین گنڈاپور نے ضابطہ اخلاق کی خلاف ورزی پر نااہل قرار دیئے جانے کے فیصلے کو چیلنج کرنے کا اعلان کیا ہے۔
وفاقی وزیر برائے اطلاعات و نشریات فواد چودھری کی طرف سے سماجی رابطے کی ویب سائٹ ٹویٹر پر بتایا گیا کہ ڈیرہ اسماعیل خان سے پی ٹی آئی کے امیدوار عمر امین گنڈاپور کا فیصلہ سپریم کورٹ میں چیلنج کریںگے، واضح طور پر مولانا فضل الرحمن کو شکست کا سامنا تھا۔
وفاقی وزیر اطلاعات نے مزید لکھا کہ ایسے میں تحریک انصاف کے امیدوار کو نااہل قرار دے دیا گیا اور وہ بھی اس گراؤنڈ پر کہ ان کا بھائی انتخابی مہم کیوں چلا رہا ہے،ایسے فیصلے الیکشن کمیشن کو متنازعہ بناتے ہیں
اس سے قبل الیکشن کمیشن آف پاکستان نے وفاقی وزیر برائے امورِ کشمیر و گلگت بلتستان علی امین گنڈاپور کے بھائی اور بلدیاتی امیدوار عمر امین گنڈاپور کو ضابطہ اخلاق کی خلاف ورزی پر نااہل قرار دے دیا۔
الیکشن کمیشن کے 3 رکنی بینچ نے بلدیاتی انتخابات کے ضابطہ اخلاق کی خلاف وزری سے متعلق کیس کا محفوظ شدہ فیصلہ سنایا۔

اسلام آباد: (ویب ڈیسک) وزیراعظم عمران خان نے کہا ہے کہ دورہ چین تاریخی اور گزشتہ دوروں سے مختلف تھا، چینی قیادت کے ساتھ ملاقاتیں کامیاب رہیں۔
ذرائع کے مطابق وزیراعظم کی زیر صدارت پارٹی رہنماؤں اور ترجمانوں کا اجلاس ہوا، وزیراعظم کے دورہ چین پر تفصیلی بریفنگ دی گئی۔ وفاقی وزیر اسد عمر اور معاون خصوصی سی پیک خالد منصور نے بریفنگ دی۔ دورہ چین میں ہونے والے معاہدوں سے آگاہ کیا گیا۔
وزیراعظم عمران خان نے کہا کہ عالمی امور پر پاکستان کے موقف کو پزیرائی مل رہی ہے، یہ دورہ چین تاریخی اور گزشتہ دوروں سے مختلف تھا، چینی قیادت کے ساتھ ملاقاتیں کامیاب رہیں جن کا پاکستان کو فائدہ ہو گا۔
انہوں نے کہا کہ چین سیاسی اور جغرافیائی امور پر پاکستان کے ساتھ کھڑا ہے، چین پاکستان کی صنعتی ترقی میں اہم کردار ادا کرنے جا رہا ہے، چین نے مسئلہ کشمیر اور افغانستان کے معاملہ پرپاکستان کے موقف کی تائید کی۔
عمران خان نے کہا کہ پاکستان میں کرپٹ ٹولہ ذاتی مفادات کی سیاست میں لگا ہے، دنیا نے اسلامو فوبیا کے معاملہ پر پاکستان کے موقف کی تائید کی۔

ڈیرہ اسماعیل خان: (ویب ڈیسک) پاکستان ڈیمو کریٹک موومنٹ (پی ڈی ایم) کےسربراہ اور امیر جمعیت علمائے اسلام آباد (ف) مولانا فضل الرحمان نے وزیراعظم پر تنقید کرتے ہوئے کہا ہے کہ چین کی قیادت نے ویڈیولنک کے ذریعے بات کی تو پھر گئے ہی کیوں تھے۔
کارکنوں سے خطاب کرتے ہوئے پی ڈی ایم سربراہ کا کہنا تھا کہ ایک فون کرتا نہیں، دوسرا فون اٹھاتا نہیں، سرکاری دورے پر وزیروں کا لشکرچین گیا، چین کی قیادت نے ویڈیولنک کے ذریعے بات کی تو پھر گئے ہی کیوں تھے؟ وہاں ترلے کیے گئے مجھ سے ملاقات کرلیں۔ چین کے ساتھ ہمالیہ سے بلند ہماری دوستی تھی، آج چین ہم سے ناراض ہوچکا ہے۔ ہمیں تنہا کردیا گیا، چین، بھارت کی معیشت کہاں کھڑی ہے، ہم سے تو ٹوٹے، پھوٹے افغانستان کی معیشت بھی بہترہے، یہ چھوٹے، موٹے ایجنڈے پرنہیں پاکستان کومعاشی لحاظ سے ڈبونے آیا تھا۔
اپنی بات کو جاری رکھتے ہوئے پی ڈی ایم سربراہ کا کہنا تھا کہ تم نے پاکستان کوکالونی بنادیا، اگرہم نے کالونی میں رہنا ہوتا تو 200 سال پہلے فرنگی سے نہ لڑتے، 50 ہزارعلما کو سولیوں پرلٹکایا گیا تھا، علما کرام نے قربانیاں پاکستان کو امریکا کی کالونی بنانے کے لیے نہیں دی تھی، افغانستان نے امریکا کواوقات یاد دلادی، امریکا کا رعب، دبدبا ٹوٹ چکا، اب امریکا کو سپر پاور کہلانے کا کوئی حق نہیں۔
انہوں نے مزید کہا کہ امانت، دیانت کا بیج لگانے والوں کے دورمیں معیشت زیروسے بھی نیچے چلی گئی، دنیا میں آج ہمیں کوئی قرض دینے کوتیارنہیں، سٹیٹ بینک کوآئی ایم ایف کے سپرد کردیا گیا، سٹیٹ بینک پارلیمنٹ، وزیراعظم کوجوابدہ نہیں ہے۔ وزیراعظم ہمارا اتنا عقل مند ہے، کہتا ہے جرمنی اورجاپان ہمسایہ ملک ہے، ڈیرہ اسماعیل خان میں انہیں جعلی نمائندگی دی گئی، جب پارلیمنٹ میں اس کی آوازکوسنا گیا تویقین آگیا یہ دھاندلی سے سیٹ دی گئی۔
مولانا فضل الرحمان کا کہنا تھا کہ ملک کا بیڑا غرق کر دیا گیا، ابھی مزید ٹیکس لگائے جا رہے ہیں، وزیراعظم کہتے ہیں سال میں بارہ موسم ہیں، نااہلی، نالائقی نے ملک کو ڈبودیا ہے، غریب آدمی کے پاس بچوں کی ادویات کے لیے پیسے نہیں، یہ ملک اس لیے بنا تھا کہ ایسے نااہلوں کو لا کربین الاقوامی ایجنڈے پورے کیے جائیں گے۔
امیر جمعیت علمائے اسلام (ف) کا کہنا تھا کہ اگر پاکستان تحریک انصاف (پی ٹی آئی) کوووٹ دیں گے تو آپ بھی اس عمل میں شریک ہونگے، ملک کی کشتی ڈوب چکی ہے، ہم اس ملک کی بقا کی جنگ لڑ رہے ہیں، ہم اپنی ذات نہیں ملک کی بقا کے لیے ووٹ مانگ رہے ہیں۔ ترقیاتی منصوبوں کے نام پرووٹ خریدے جارہے ہیں۔ پیسے کوپانی کی طرح بہایا جارہا ہے۔ ہمارے سامنے ان کولایا گیا جن کا نام لینا بھی توہین سمجھتے ہیں، میری مجبوری ہے گلی،کوچوں کے لفنگوں جیسی زبان استعمال نہیں کرنا چاہتا، جعلی نمائندے ڈیرہ اسماعیل خان کو ڈبو رہے ہیں، ہم پاکستان اورڈیرہ اسماعیل خان کوڈوبنے نہیں دیں گے۔

اسلام آباد: (ویب ڈیسک) پاکستان تحریک انصاف کے رہنما سینیٹر فیصل جاوید نے کہا ہے کہ اگر آصف زرداری، نوازشریف بیرون ملک ساری پراپرٹی بیچیں، ایک، ایک پیسہ اور پورے ٹبر کو واپس لائیں تو عمران خان این آراو دینے کو تیار ہیں۔
سینیٹر فیصل جاوید نے سینیٹ میں اظہارخیال کے دوران کہا کہ یہ لوگ کہتے ہیں کہ عمران خان کون ہوتا ہے این آراو دینے والا، حکومت ہی این آراو دیتی ہے، انہوں نے الیکشن میں جانے سے پہلے این آر او لیا، قوم کوگمراہ کرنے والوں کوعوام سمجھ چکی ہے، ملکی ایشوز پر ہم سب کو ایک پیج پر ہونا چاہیے، دعوے سے کہتا ہوں اگر آج عمران خان این آراو دے دیں تو پورا ٹبر واپس آجائے گا، عمران خان آصف زرداری، نوازشریف کو این آر او دینے کو تیارہیں، ان کوپتا ہے یہ دو، دوبار این آراو لے چکے ہیں۔
اپوزیشن نے فیصل جاوید کی تقریرکے دوران کورم کی نشاندہی کردی جس پر انہوں نے کہا اب یہ میری بات کونہیں سنیں گے اور انہوں نے کورم کی نشاندہی کردی ہے، مجھے پھربولنے کا موقع نہیں دیا جارہا، میں جب بھی بولتا ہوں تب یہ شور شروع کر دیتے ہیں، ہم تواپوزیشن کی تقریروں کو چپ کر کے سنتے ہیں، دنیا میں کہیں ایسی اپوزیشن نہیں ہوتی۔
اپوزیشن پر تنقید کرتے ہوئے سینیٹر فیصل جاوید کا کہنا تھا کہ یہ کمیٹیوں میں کچھ اورعوام میں جاکر کچھ اوربات کرتے ہیں، وزیراعظم چین گئے اورانہوں نے پیچھے کھابے پروگرام شروع کر دیئے، جب یہ اکٹھے ہوتے ہیں تو پی ٹی آئی کو فائدہ ہوتا ہے، انہوں نے زرداری کو سڑکوں پر گھسیٹنا تھا۔

لاہور: (ویب ڈیسک) متحدہ قومی موومنٹ (ایم کیو ایم) پاکستان کے رہنما عامر خان نے کہا ہے کہ اگر عوام وزیراعظم عمران خان سے مطمئین نہیں تو ہم کیسے ہوسکتے ہیں۔
لاہور میں وسیم اختر اور پنجاب کے صدر چوہدری عابد کے ہمراہ پریس کانفرنس کے دوران انہوں نے کہا کہ ملک مہنگائی کی جو صورتحال ہے اس پر ہمہں بہت پہلے سے تشویش ہے، اختلاف رائے اچھی بات ہے، ملنے جلنے میں کوئی قباحت نہیں ہے۔
انہوں نے مزید کہا کہ ایم کیو ایم کے دروازے سب کےلیے کھلے ہیں، ہم حکومت کے اتحادی ہیں بیڈگورننس کا ہمیں سب سے شکوہ ہے۔
علاوہ ازیں پیپلز پارٹی پر تنقید کرتے ہوئے انہوں نے کہا کہ پی پی پی کی 15 سال سے سندھ میں حکومت ہے، افسوس پورے سندھ میں انصاف نہیں ہوسکا، جن علاقوں سے پیپلزپارٹی جیتی وہاں بھی کام نہیں کرائے گئے۔
ان کا کہنا تھا کہ وڈیرہ شاہی نے سندھ کا نظام تباہ برباد کردیا ہے، ایم کیو ایم پرامن انداز میں اپنی جدوجہد کررہی ہے۔
رہنما ایم کیو ایم پاکستان عامر خان نے کہا ہم نے بلدیاتی بل کے خلاف وزیراعلی سندھ ہاوس کے باہر پرامن احتجاج کیا لیکن پولیس نے ہمارے کارکنوں پر لاٹھی چارج اور شیلنگ کی، ہم بات چیت کرنے کے حق میں تھے لیکن حکومت سندھ نے تشدد کا راستہ اختیار کیا۔