وزیراعظم شہباز شریف کا گزشتہ روزمائیکرو سافٹ کے بانی بِل گیٹس  سے ٹیلی فونک رابطہ ہوا جس میں ‏پاکستان میں بل اینڈ میلنڈا گیٹس فاؤنڈیشن کے تعاون سے جاری منصوبوں پر تبادلہ خیال  کیا گیا۔

 وزیر اعظم  ہاؤس کے مطابق شہباز شریف نے تمام شعبوں میں فاؤنڈیشن سے شراکت داری مزید مستحکم کرنے کے عزم کا اعادہ کرتے ہوئےکہا کہ پاکستان نے پولیو کے خاتمے کی جانب پیش رفت کو برقرار رکھا ہے ۔

ان کا کہنا تھا کہ 2021 میں پولیو کا صرف ایک کیس ریکارڈ کیا گیا تھا،حکومت ملک سے پولیو کی تمام اقسام کے خاتمے کے لیے پُرعزم ہے ۔

وزیر اعظم ہاؤس کے مطابق دوسری جانب  بل گیٹس نے مثبت پیش رفت کا اعتراف کیا اور پاکستان کی معاونت جاری رکھنے کا اعادہ بھی کیا۔

اس کے علاوہ ٹیلیفونک رابطے میں  وزیراعظم  شہباز شریف نے افغانستان میں انسداد پولیو ویکسی نیشن مہم کی بحالی پر اطمینان کا اظہار کیا۔

لاہور: (ویب ڈیسک) پاکستان تحریک انصاف (پی ٹی آئی) اور ق لیگ کے اراکین صوبائی اسمبلی نے ہائی کورٹ کا فیصلہ چیلنچ کرنے کا اعلان کر دیا۔
پی ٹی آئی کے وکیل اظہر صدیق نے کہا کہ حمزہ شہباز کی حلف برداری کی درخواست پر فیصلے کے خلاف اپیل تیار کر لی ہے اور معاملے کی سنگینی کو دیکھتے ہوئے اپیل رات 12 بجے سے پہلے دائر کی جائے گی۔
انہوں نے کہا کہ لاہور ہائی کورٹ کا فیصلہ آئین اور قانون کے خلاف ہے جبکہ ہائی کورٹ کے جانب سے حلف کی معیاد مقرر کرنا صدر اور گورنر کی عہدے کی توہین ہے۔
وکیل اظہر صدیق نے کہا کہ لاہور ہائی کورٹ کے پاس گورنر اور صدر کے خلاف کوئی بھی کارروائی کا اختیار نہیں جبکہ آئین کا آرٹیکل 248 مکمل صدر اور گورنر کو مکمل تحفظ فراہم کرتا ہے۔
واضح رہے کہ لاہور ہائی کورٹ نے نومنتخب وزیراعلیٰ پنجاب حمزہ شہباز سے کل تک حلف لینے کا حکم دیا ہے۔
لاہور ہائیکورٹ نے حمزہ شہباز کی درخواست پر فیصلہ سناتے ہوئے کہا ہے کہ کل جمعرات تک گورنر خود یا کسی نمائندے کے ذریعے حلف لیں۔ حلف میں تاخیر آئین کے خلاف ہے۔عدالت کا حکم گورنر پنجاب کو فوری بھیجا جائے۔

اسلام آباد: (ویب ڈیسک) شہباز حکومت کی کابینہ میں مزید توسیع ہوگئی۔ پیپلز پارٹی کے چیئرمین بلاول بھٹو زرداری نے وفاقی وزیر کے عہدے کا حلف اٹھالیا۔ بلاول بھٹو وزیر خارجہ کا قلمدان سنبھالیں گے۔
پیپلزپارٹی کے چیئرمین بلاول بھٹو زرداری کی حلف برداری کی تقریب ایوان صدر میں ہوئی جہاں صدر مملکت عارف علوی نے بلاول بھٹو سے حلف لیا۔
تقریب میں وزیراعظم شہباز شریف، سابق صدر آصف زرداری، راجہ پرویز اشرف اور پی پی قیادت سمیت دیگر حکومتی اراکین نے بھی شرکت کی جب کہ اس موقع پر بلاول بھٹو کی بہن آصفہ بھٹو زرداری بھی موجود تھیں۔
تقریب حلف برداری کے بعد صدر مملکت عارف علوی نے بلاول بھٹو سے مصافحہ کیا اور انہیں مبارکباد دی جب کہ وزیراعظم شہباز شریف نے بلاول بھٹو سے گلے مل کر انہیں مبارکباد دی۔
واضح رہےکہ وزیراعظم شہباز شریف کی کابینہ میں حنا ربانی کھر وزیر مملکت برائے خارجہ امور ہیں۔

لاہور: (ویب ڈیسک) عمران خان نے کہا ہے کہ امریکا بوٹ پالش اور چیری بلاسم کے ذریعے ہمیں کنٹرول کرے گا، چاہتا ہوں جب کال دوں کم از کم 20 لاکھ لوگ اسلام آباد پہنچیں۔
ایوان اقبال میں ورکرز کنونشن سے عمران خان نے خطاب کرتے ہوئے کہا کہ یہ اپنی چوری بچانے کیلئے پورے ملک کو غلام بنا دیں گے، ملک پر سازش کے تحت امپورٹڈ حکومت مسلط کی گئی، امپورٹڈ حکومت سے امریکا ہمیں فتح کیے بغیر کنٹرول کرے گا، امریکا بوٹ پالش اور چیری بلاسم کے ذریعے ہمیں کنٹرول کرے گا، امریکا کی جنگ میں ہمارے 80 ہزار افراد مارے گئے۔
عمران خان کا کہنا تھا کہ پاکستان نے بہترین حکمت عملی کے ذریعے کورونا کا مقابلہ کیا، مشرف دور میں بیرونی قرض 2 یا 3 ارب ڈالر بڑھا، ان کے دور میں 50 ہزار ارب ڈالر بیرونی قرضے میں اضافہ ہوا، شہباز شریف پر ایف آئی اے میں کرپشن کے کیسز ہیں، مشرف نے امریکا کے دباؤ میں انہیں این آر او دیا، یہ این آر او ٹو لیں گے تو انصاف کے نظام کی قبر کھو دی جائے گی۔
چیئرمین پی ٹی آئی نے کہا کہ شہباز شریف نے وزارت عظمیٰ سنبھالتے ہی ایف آئی اے میں تبادلے کیے، شہباز شریف اب اپنے کیسز ختم کرائیں گے، یہ صفائی کر کے پھر سے لوٹ مار شروع کریں گے، نیب، عدالتیں صرف چھوٹے چھوٹے چوروں کو پکڑیں گی، طاقتور چوروں کو ہمارا نظام نہیں پکڑ سکے گا۔ چیف الیکشن کمشنر ن لیگ کا ایجنٹ ہے۔

اسلام آباد: (ویب ڈیسک) عاصم احمد کو ایف بی آر کا نیا چیئرمین تعینات کر دیا گیا۔ اعلامیے میں کہا گیا کہ عاصم احمد بطور چیئرمین ایف بی آر آج سے ذمہ داریاں سنبھالیں گے۔
ادھر وفاقی حکومت نے بیوروکریسی میں اعلیٰ سطح پر تبادلے اور تقرریاں کر دی ہیں۔ اسٹیبلشمنٹ ڈویژن کی جانب سے جاری ہونے والے نوٹیفکیشن کے مطابق گریڈ 22 کے آصف حیدر شاہ کو سیکرٹری موسمیاتی تبدیلی تعینات کر دیا گیا ہے، وہ اسٹیبلشمنٹ ڈویژن میں اپنی تقرری کے منتظر تھے۔ وزارت تعلیم و تربیت میں تعینات ایڈیشنل سیکرٹری محی الدین وانی چیف سیکرٹری گللگت بلتستان لگا دیا گیا ہے۔
ایک اور نوٹیفکیشن کے مطابق وزیر اعظم آفس میں تعینات ایڈیشنل سیکرٹری عثمان باجوہ کو عہدے سے ہٹا دیا گیا ہے اور سارہ سعید وزیر اعظم آفس میں ایڈیشنل سیکرٹری تعینات کر دیا گیا ہے، وہ وزارت خزانہ میں ایڈیشنل سیکرٹری تعینات تھیں۔ حکومت نے محسن مشتاق کو ایڈیشنل سیکرٹری انچارج وزارت آئی ٹی تعینات کر دیا ہے۔ گریڈ 21 کے محسن مشتاق ایڈیشنل سیکرٹری انچارج وزارت بین الصوبائی رابطہ تعینات تھے۔
سیکرٹری تخفیف غربت و سماجی تحفظ محمد علی شہزادہ کو بھی عہدے سے ہٹا دیا گیا ہے اور ڈاکٹر فخر عالم عرفان ایڈیشنل سیکرٹری انچارج تخفیف غربت و سماجی تحفظ ڈویژن تعینات کر دیا گیا ہے۔

لاہور: (ویب ڈیسک) مریم نواز کا پاسپورٹ واپس لینے کیلئے درخواست کا معاملہ، لاہور ہائیکورٹ نے درخواست واپس لینے پر نمٹا دی۔
مریم نواز کے وکیل امجد پرویز نے عدالت سے درخواست واپس لینے کی استدعا کرتے ہوئے کہا مزید دلائل نہیں دینا چاہتے۔ جس پر عدالت نے مریم نواز کی درخواست نمٹا دی۔ مریم نواز نے عمرے پر جانے کیلئے پاسپورٹ واپسی کی درخواست دی تھی مگر سماعت کیلئے بنائے گئے تین بنچ میں شامل معزز جج صاحبان کی سماعت سے معذرت کے باعث بنچ ٹوٹ گئے۔

اسلام آباد: (ویب ڈیسک) شیخ رشید نے کہا کہ سو ملزم اور منی لانڈرر کیسوں میں مطلوب چارٹر طیاروں میں سعودی عرب جا رہے ہیں، علماء کرام بتائیں کہ عمرے کی دینی، آئینی اور قانونی حیثیت کیا ہوگی۔
سابق وفاقی وزیر داخلہ شیخ رشید احمد نے اپنے بیان میں مزید کہا کہ چور چور ہوتا ہے چاہے مکہ مدینہ کیوں نہ چلا جائے، کم وپیش سو ملزم اور منی لانڈرر کیسوں میں مطلوب چارٹر طیاروں میں اور سٹینڈ ہائی 777 جہاز کے انتظامات کے ساتھ سعودی عرب جا رہے ہیں۔
شیخ رشید کا کہنا تھا کہ علماء کرام ہی بتاہیں کہ اس عمرے کی دینی، آئینی اور قانونی حیثیت کیا ہوگی لیکن عمرہ پر موجود پاکستانی قوم کے اس امیورٹڈ حکومت کے بارے میں نفرت بھرے جذبات، ان کی آنکھوں میں دیکھے اور زبان سے ٹی وی پر باآسانی محسوس کئے جاسکتے ہیں۔

لاہور: (ویب ڈیسک) لاہور سمیت پنجاب کے میدانی علاقوں میں جاری ہیٹ ویو نے شہریوں کا امتحان لینا شروع کر دیا۔ لاہور کا کم سے کم درجہ حرارت 24.3 ڈگری سینٹی گریڈ تک جا پہنچا۔ ہیٹ ویو 2 مئی تک جاری رہنے کا امکان ظاہر کیا گیا ہے۔
ماہ مارچ کے دوران ہی تیکھے تیور دکھانے والی گرمی نے اپریل کے اختتام پر مزید شدت اختیار کرلی ہے۔ لاہور سمیت پنجاب کے میدانی علاقوں میں جاری ہیٹ ویو کے باعث سورج کے مزاج مزید برہم ہوگئے ہیں کہ لاہور میں کم سے کم درجہ حرارت 24.3 ڈگری سینٹی گریڈ تک جا پہنچا ہے جس میں مزید اضافے کا امکان ہے۔
موسم کا حال بتانے والوں کے مطابق ہیٹ ویو کا سلسلہ 2 مئی تک جاری رہنے کا امکان ہے جس کےدوران زیادہ سے زیادہ درجہ حرارت 44 ڈگری سینٹی گریڈ تک پہنچ سکتا ہے۔ اعدادوشمار کے مطابق گزشتہ 30 برسوں کے دوران ماہ اپریل کے دوران سب سے زیادہ گرمی 2010 میں ریکارڈ کی گئی تھی۔
ماہرین موجودہ صورت حال کو موسمیاتی تبدیلیوں کا نتیجہ بھی قرار دے رہے ہیں۔

اسلام آباد: (ویب ڈیسک) وزیراعظم محمد شہباز شریف 28 سے 30 اپریل تک سعودی عرب کا دورہ کریں گے۔
ترجمان دفتر خارجہ کا کہنا ہے کہ وزیراعظم، سعودی ولی عہد شہزادہ محمد بن سلمان کی دعوت پر دورہ کر رہے ہیں۔رواں ماہ کے اوائل میں عہدہ سنبھالنے کے بعد وزیراعظم کا یہ پہلا بیرون ملک دورہ ہوگا۔
ترجمان دفتر خارجہ کے مطابق وزیراعظم کے ہمراہ کابینہ کے اہم ارکان سمیت اعلیٰ سطح کا وفد بھی ہوگا۔ دورے کے دوران وزیراعظم سعودی قیادت کے ساتھ دوطرفہ بات چیت کریں گے۔
انہوں نے کہا ہے کہ وزیراعظم کے دورہ سعودی عرب سے مختلف شعبوں میں دوطرفہ تعاون کو مزید بڑھے گا۔دورے سے دوطرفہ بڑھتی شراکت داری کو مزید تقویت ملے گی۔
ان کا کہنا ہے کہ اقتصادی، تجارتی تعلقات کے فروغ، سرمایہ کاری بڑھانے پر گفتگو ہو گی۔سعودی عرب میں پاکستانی افرادی قوت کے لیے زیادہ مواقع پیدا کرنے پر توجہ مرکوز کی جائے گی۔
ترجمان دفتر خارجہ نے بیان میں کہا ہے کہ فریقین باہمی دلچسپی کے متعدد علاقائی اور بین الاقوامی امور پر بھی گفتگو کریں گے۔پاکستان، سعودی عرب برادرانہ تعلقات باہمی اعتماد، افہام و تفہیم، قریبی تعاون پر مبنی ہیں۔
انہوں نے کہا ہے کہپاکستان کے عوام خادم حرمین شریفین کو انتہائی قدر کی نگاہ سے دیکھتے ہیں۔دونوں ممالک کا علاقائی اور بین الاقوامی فورمز پر قریبی باہمی تعاون موجود ہے۔
ان کا کہنا ہے کہ سعودی عرب جموں و کشمیر پر اسلامی تعاون تنظیم رابطہ گروپ کا رکن ہے ۔سعودی عرب میں 20 لاکھ سے زائد پاکستانی آباد ہیں،۔سعودیہ میں مقیم پاکستانی دونوں ممالک کی خوشحالی اور معاشی ترقی میں اپنا کردار ادا کر رہے ہیں۔