اسلام آباد: معروف عالم دین اور رویت ہلال کمیٹی کے سابق چیئرمین مفتی منیب الرحمان نے کہا ہے کہ حکومت اور کالعدم تحریک لبیک پاکستان میں معاہدہ طے پا گیا ہے ۔

اسلام آباد میں اسپیکر قومی اسمبلی اسد قیصر، وزیر خارجہ شاہ محمود قریشی، وزیر مملکت علی محمد خان، کالعدم ٹی ایل پی کی مجلس شوری کے رکن علامہ غلام عباس فیضی اور مفتی محمد عمیر کے ہمراہ پریس کانفرنس میں سابق چیئرمین رویت ہلال کمیٹی مفتی منیب الرحمان کا کہنا تھا کہ حکومت اور تحریک لبیک پاکستان میں معاہدہ طے پا گیا ہے، حکومت اور ٹی ایل پی معاہدے کو حافظ سعد رضوی کی تائید حاصل ہے۔

مفتی منیب الرحمان کا کہنا تھا کہ وزیراعظم نے ٹی ایل پی دھرنے سے متعلق خصوصی کمیٹی تشکیل دی، جس میں سنجیدہ، مدبر اراکین پر مشتمل ہے، کمیٹی کو اختیارات دینے پر وزیراعظم کے مشکور ہیں، فریقین کے درمیان اتفاق رائے سے طے ہونے والا معاہدہ کسی کی فتح یا شکست نہیں بلکہ یہ پاکستان، اسلام اور انسانی جانوں کی حرمت کی فتح ہے، اور یہ مذاکرات جبر اور تنائو کے ماحول میں نہیں بلکہ سنجیدہ ماحول میں ہوئے، دونوں فریقین کی جانب سے مذاکرات میں سنجیدہ رویہ اختیارکیا گیا، تنائو کی فضا میں جذبات کو قابو میں رکھنا دانشمندی ہے۔

مفتی منیب الرحمان کا کہنا تھا کہ ہم نے مصالحت کا ر کے فرائض انجام دیئے، مذاکرات کے لیے ہم نے12، 13 گھنٹے محنت کی، معاہدے سے ملک میں امن و سلامتی کو فروغ ملے گا، معاہدے کی تفصیلات مناسب وقت پر سامنے آئیں گی، اور آئندہ ہفتے معاہدے کے مثبت نتائج سامنے آئیں گے۔

مفتی منیب الرحمان نے کہا کہ معاہدے کے نتیجے میں ایک اسٹیرنگ کمیٹی بنا دی گئی ہے، کمیٹی کی سربراہی علی محمد خان کریں گے، اور اس میں حکومت کی جانب سے راجہ بشارت، سیکرٹری داخلہ، ہوم سیکرٹری پنجاب کمیٹی جب کہ مفتی غلام غوث بغدادی، انجینیئر حفیظ اللہ قلبی اسٹیئرنگ کمیٹی کا حصہ ہوں گے، یہ کمیٹی آج سے کام شروع کرے گی۔

وزیرخارجہ شاہ محمود قریشی کا کہنا تھا کہ قومی سلامتی کمیٹی کے اجلاس میں مذکرات کو ترجیح دینے کا فیصلہ ہوا، قوم میں ایک اضطراب کی کیفیت تھی، لوگوں کو زخمی ہوتے اور املاک کو نقصان پہنچتے دیکھا، تمام مسائل کو سامنے رکھتے ہوئے امن کا راستہ تلاش کیا گیا ہے، مفتی منیب الرحمان، مولانا بشیرفاروقی، صاحبزادہ حامد رضا اور ثروت اعجاز قادری کے شکرگزار ہیں، ان علما نے وزیراعظم عمران خان سے ملاقات کی، علما و مشائخ نے اپنے اثر و رسوخ اور رہنمائی سے ہمیں مستفید کیا، انتشار میں پاکستان کا فائدہ نہیں ،اللہ نے ہمیں سرخرو کیا۔

لاہور(جنرل رپورٹر)دنیا کے آلودہ ترین شہروں کی فہرست میں لاہور نمبر ون جبکہ کراچی دسویں نمبر پر ہے۔میڈیا رپورٹ کے مطابق ائیرکوالٹی انڈیکس کے مطابق دنیا کے آلودہ ترین شہروں کی فہرست میں لاہور پہلے نمبر پر رہا اور لاہور کی فضا انتہائی آلودہ رہی جس میں پرٹیکیولیٹ میٹرز کی تعداد 236 تک جاپہنچی جبکہ کراچی کی فضا میں آلودہ ذرات کی مقدار 153 پرٹیکیولیٹ میٹرز

ریکارڈکی گئی۔ دنیا کے آلودہ شہروں کی فہرست میں دہلی دوسرے نمبر پر موجود رہا، درجہ بندی کے مطابق 151 سے 200 درجے تک آلودگی مضر صحت ہے، 201 سے 300 درجے تک آلودگی انتہائی مضر صحت ہے، 301 سے زائد درجہ خطرناک آلودگی کوظاہر کرتاہے۔

نیشنل کمانڈ اینڈ آپریشن سینٹر (این سی او سی)نے کورونا ویکسی نیشن میں کارکردگی دکھانے والے شہروں میں معاملات زندگی درجہ بدرجہ معمول پر لانے کا فیصلہ کر لیا جس کے تحت 60فیصد ویکسی نیشن والے شہروں سے پابندیاں اٹھانے کا اعلان کیا گیا ہے، تفصیلات کے مطابق ہفتہ کو این سی او سی کے سربراہ اسد عمر کی سربراہی میں اجلاس ہوا جس میں ملک میں کورونا اور شہروں میں ویکسی نیشن کی صورتحال کا تفصیلی جائزہ لیا گیا،این سی او سی کی جانب سے جاری اعلامیے کے مطابق ویکسی نیشن میں کارکردگی دکھانے والے شہرں میں معاملات زندگی درجہ بدرجہ معمول پر لانے کا فیصلہ کیا گیا ،اعلامیے کے مطابق اسلام آباد، منڈی بہاﺅالدین، گلگت اور میرپور 60فیصد آبادی کو ویکسین لگانے پر بہترین شہر قرار دیا گیا جب کہ 40سے 60 فیصد آبادی کوویکسین لگانے پر راولپنڈی، اسکردو، ہنزہ، باغ، بھمبر، جہلم، پشاور، غذر اور کھرمنگ کو بھی ویکسین شدہ شہر قرار دیا گیا ،اس کے علاوہ دیگر شہروں میں 40 فیصد آبادی کی کم ویکسی نیشن کے باعث ویکسین کی شرح کم قرار دی گئی ، بہترین ویکسین شدہ شہروں میں اجتماعات اور شادی بیاہ میں نافذ پابندیاں ہٹادی گئیں جب کہ ان شہروں میں اسپورٹس گراونڈز، تجارت، ان ڈور ڈائننگ اور کاروبار سے بھی پابندیاں اٹھالی گئیں،این سی او سی کے مطابق بہترین ویکسین شدہ شہروں میں اندرون، بین الاضلاعی سفر میں مسافروں کی تعداد 100فیصد کردی گئی جب کہ کم ویکسین شدہ شہروں میں مسافروں کی تعداد کو 80فیصد تک رکھا گیا ہے ، کم ویکسین شدہ شہروں میں اجتماعات، شادی بیاہ اور اسپورٹس گراﺅنڈز میں پابندیاں 15نومبر تک رہیں گی، ان شہروں میں تجارت،کاروبار، ان ڈورڈائننگ، سنیما،جم، مزارات اور ٹرانسپورٹ سیکٹر میں پابندیاں رہیں گے،کم ویکسین شدہ شہروں میں عوامی اجتماعات بالترتیب 500،300تک برقراررکھنے کا فیصلہ کیا گیا ہے جب کہ تمام سہولیات کا تسلسل مکمل ویکسین لگوانے اور ماسک کے لازمی استعمال سے مشروط ہے،این سی او سی کا کہنا تھا کہ 12نومبر کو ہونے والے اجلاس میں فیصلوں پر نظر ثانی کی جائے گی۔

ملتان (خبر نگار خصوصی) گیس چوری سے لیکرغریبوں کیلئے ملنے والی چینی اور ویجیٹیبل گھی اور کوکنگ آئل استعمال کر کے مختصر عرصے میں ارب پتی بننے والے ایس ایم فوڈ کے مالک چوہدری ذوالفقار انجم حالیہ چوری پکڑی گئی۔ڈ پٹی کمشنر ملتان عامر کریم خان کی ہدایت پر ضلعی انتظامیہ نے عوام کے لئے امپورٹ کی گئی سستی چینی کی ایک بڑی کھیپ اس کی فیکٹری میں اتارتے ہوئے پکڑ لی اور ایک ملزم کو موقع پر گرفتار کر لیا گیا۔ یہ چھاپا اسسٹنٹ کمشنر سٹی خواجہ عمیر محمود کی سرکردگی میں میں نیو سینٹرل جیل ملتان کے قریب واقع ایسایم فوڈ کی بسکٹ فیکٹری مارا گیا اور40ہزار کلوسرکاری امپورٹیڈ چینی برآمد کر لی گئی جس کے بارے میں فیکٹری کا عملا تسلی بخش جواب نہ دے سکا ۔ضلعی انتظامیہ کے مطابق اس امپورٹیڈ چینی کی مالیت 35 لاکھ روپے بتائی جاتی ہے۔ بعد ازاں ڈپٹی کمشنر ملتان کے حکم پر پر چینی مافیا کی سپلائی چین کو ٹریس کرنے کے لئے اے سی سٹی نے فوری کارروائی کرتے ہوئے گلہ منڈی میںبھی چھاپہ مار اور بسکٹ فیکٹری کو چینی سپلائی کرنے والے ڈیلر کا گودام بھی سر بمہر کر دیا گیا ہے تاہم کاروائی کے دوران ڈیلرمیاں محمد شکیل موقع سے فرار ہونے میں کامیاب ہو گیا تاہم ضلعی انتظامیہ نے حاجی خورشید اینڈ سنز کے نام سے قائم میاں شکیل کی آڑھت کو بھیسیل کر کے قانونی کاروائی کا آغاز کردیا کیا ہے اس موقع پر اسسٹنٹ کمشنرسٹی خواجہ عمیر محمود نے بتایا کہ ڈیلر میاں محمدشکیل جو چودھری ذوالفقارانجم کا دست راست بتایا جاتا ہے نے غیر قانونی طور پر پر ایس ایم فوڈ کو 725 بوری چینی فراہم کی۔بعد ازاں ڈپٹی کمشنرعامر کریم خان نے کہا کہ حکومت نے غریبوں کے لئے لئے جوچینی درآمدکی ہے تاکہ انہیں ریلیف مل سکے ۔ اس کا ایک ایک دانہ مستحقین تک پہنچایا جائے گا۔ اعوام کے حق پر ڈاکہ ڈالنے والے جے اور اپنی تجوریاں بھرنے کے لئے غریبوں پر شب خون مارنے والے اب سزا سے نہیں بچ سکیں گے۔ان نے خلاف فوجداری مقدمات درج کرائے جارہے ہیں انہوں نے کہا کہ اس گینگ میں شامل تمام با اثر افراد کے خلافکاروائی کی جائے گی۔

اسلام آباد: وزیراعظم عمران خان نے پیٹرولیم مصنوعات کی قیمتوں میں اضافے کی تجویز مسترد کردی۔

وزیراعظم آفس کی جانب سے جاری اعلامیے میں کہا گیا ہےکہ وزیراعظم نے عوامی ریلیف کے لیے پیٹرولیم مصنوعات کی قیمتوں میں اضافے کی تجویز مسترد کی ہے۔

اعلامیے کے مطابق اوگرا نے پیٹرولیم کی بڑھتی عالمی قیمتوں کے باعث قیمتیں بڑھانےکی تجویزدی تھی لیکن  وزیراعظم نے تجویزکردہ اضافہ مسترد کرکے پیٹرولیم مصنوعات کی قیمتیں برقرار رکھنے کا حکم دیا۔

اعلامیے میں مزید کہا گیا ہےکہ حکومت عالمی سطح پربڑھتی مہنگائی کا بوجھ منتقل کرنےکی بجائے عوامی ریلیف کو ترجیح دےرہی ہے لہٰذا اوگراکے تجویز کردہ حالیہ اضافےکی مد میں عوام پربوجھ کو حکومت خودبرداشت کررہی ہے۔

پیپلزپارٹی کے چیئرمین بلاول بھٹوزرداری کی اپیل پر سندھ بھر میں مہنگائی کے خلاف مظاہرے کئے گئے، کارکنوں نے پارٹی پرچم اور بینرز اٹھا کر حکومت مخالف نعرے لگائے۔ 

ملک میں مہنگائی کے خلاف بلاول بھٹو کی اپیل پر سندھ میں مظاہرے کیے گئے۔ حیدرآباد میں پیپلزپارٹی کی کارکنوں نے پریس کلب کے سامنے مظاہرہ کیا۔ پارٹی پرچم اٹھائے کارکنوں نے مہنگائی اور حکومت کے خلاف نعرے بازی کی۔

سکھر میں بھی پیپلزپارٹی نے مہنگائی کے خلاف ریلی نکالی، ریلی مختلف راستوں سےہوتے ہوئےپریس کلب پہنچی۔ جیالوں نے خوب نعرے بازی کی۔ مرکزی رہنماوں نے کہا کہ وفاقی حکومت نےعوام کے لئے روٹی کا حصول بھی مشکل کردیا ہے۔

لاڑکانہ میں بھی پیپلز پارٹی نے مہنگائی کے خلاف احتجاج کیا۔ غالب نگرسے جناح باغ تک ریلی نکالی گئی۔ مظاہرین نے مہنگائی اور وفاقی حکومت کے خلاف نعرے لگائے۔

ٹنڈوجام میں پیپلزپارٹی نے مہنگائی کے خلاف احتجاج کیا۔ پارٹی پرچم اٹھا کر وفاقی حکومت پر تنقید کے تیر چلائے۔

دادومیں بھی پیپلزپارٹی نے مہنگائی کے خلاف احتجاجی ریلی نکالی، پیر ہائوس سے شروع ہونے والی ریلی دادو پریس کلب پہنچی، جہاں رہنماؤں نے خطاب کیا۔

شکارپورمیں بھی مہنگائی کےخلاف مظاہرہ کیا گیا۔ مظاہرین کا کہنا تھا کہ مہنگائی نے زندگی اجیرن کردی ہے۔

سندھ کے دیگر اضلاع میں بھی جیالوں نے ریلیاں نکالیں اور مظاہرے کئے