کراچی:(ویب ڈیسک) اسٹیٹ بینک آف پاکستان نے انفرادی سطح پر رقوم کی ڈیجیٹل منتقلی کے لیے پاکستان کا پہلا نظام ’’راست‘‘ متعارف کرادیا۔ ’راست‘ اسٹیٹ بینک کا تیار کردہ پاکستان کا پہلا فوری ادائیگی کا نظام ہے۔ یہ پاکستان کے عوام کوصفر لاگت کے ساتھ ڈیجیٹل ادائیگی کافوری اور معتبر نظام فراہم کرتا ہے۔ اسٹیٹ بینک یہ سمجھتا ہے کہ ’راست‘ فرد تا فرد سروس سے نہ صرف صارفین کو آسان، دشواریوں سے پاک اور مفت ڈجیٹل فنڈ ٹرانسفر کی سہولت ملے گی بلکہ ایک موثر اور سازگار ادائیگیوں کا انفرااسٹرکچر بھی مہیا ہوجائے گا جو معیشت کی ڈجیٹائزیشن اور ملک میں ڈجیٹل مالی خدمات کے فروغ کے لیے راہ ہموار کرے گا۔ ’راست‘ فرد تا فرد رقوم کی منتقلیوں اور سیٹل منٹ کی خدمات کے تحت بینک صارفین اپنے بینک کی موبائل ایپلی کیشن، انٹرنیٹ بینکاری اور اوور دی کاؤ نٹر خدمات استعمال کرتے ہوئے اپنے اکاؤ نٹس میں رقوم بھیجنے اور اسے وصول کرنے کی سہولت سے استفادہ کریں گے۔ صارفین کے لیے یہ آسانی ہے کہ وہ بینک کی موبائل ایپلی کیشن، انٹرنیٹ بینکنگ کے ذریعے یا بینک برانچ میں جاکر اپنے رجسٹرڈ موبائل فون نمبر کو اپنی راست آئی ڈی بنا سکیں گے اور اسے اپنے ترجیحی انٹرنیشنل بینک اکاؤ نٹ نمبر (IBAN) سے منسلک کر سکیں گے۔ جب صارف اپنے موبائل فون نمبر کو اپنی ’راست‘ آئی ڈی بنا لیگا تو دوسرے یہ موبائل فون استعمال کرکے اسے رقم بھیج سکیں گے انہیں اکاؤنٹ نمبر یا کوئی اور تفصیل جاننے کی ضرورت نہیں ہوگی۔اسٹیٹ بینک نے بینکوں کو ہدایت کی ہے کہ وہ موبائل ایپلی کیشن، انٹرنیٹ بینکنگ اور برانچ کاؤنٹرز سمیت کم از کم تین صارفی ذرائع (چینلز)پر ’راست‘ فرد سے فردکو رقم کی منتقلی کی خدمت فراہم کریں۔ اسٹیٹ بینک نے بینکوں کو ہدایت کی ہے کہ ’راست‘ کے ذریعے کامیابی کے ساتھ منتقل کی جانے والی رقوم ’راست‘ سسٹم سے کریڈٹ ایڈوائس ملنے کے 20 سیکنڈ کے اندر وصول کنندگان کے اکاؤنٹس میں پہنچا دینی چاہیے۔ بینکوں پر لازم ہے کہ ان تمام چینلز کی مسلسل اور بلاتعطل دستیابی کو یقینی بنائیں جن پر ’راست‘ کی یہ سہولت پیش کی جا رہی ہے۔ اس مقصد کے لیے بینک اپنے وینڈرز اور سروس پرووائڈرز کے ساتھ اپنے سروس لیول ایگریمنٹ (ایس ایل اے) کو مستحکم بنائیں گے۔ بینکوں کو یہ ہدایت بھی کی گئی ہے کہ وہ اپنے صارفین کو ’راست‘ خدمات کے استعمال کی ترغیب دلانے اور اس میں سہولت دینے کے لیے تمام اقدامات کریں۔ ’راست‘ کے آغاز کے ساتھ پاکستان ان چند منتخب ملکوں میں شامل ہو گیا ہے جنھوں نے فوری ادائیگی کا نظام شروع کردیا ہے یا کررہے ہیں۔

کراچی:(ویب ڈیسک) الائنس فار کلائمیٹ جسٹس اینڈ کلین انرجی نے حکومت سے مطالبہ کیا ہے کہ سماجی طور پر منصفانہ اور ماحول دوست مالیاتی حل مہیا کرنے کے لیے سولر پینلز اور الیکٹرک گاڑیوں پر عائد جنرل سیلز ٹیکس کو منسوخ کیا جائے۔ الائنس فار کلائمیٹ جسٹس اینڈ کلین انرجی (ACJCE) نے پاکستان میں سولر پینلز پر 20 فیصد جنرل سیلز ٹیکس کے حالیہ نفاذ کے بعد، پاکستان کے چھٹے جائزے کے لیے اپنے اجلاس سے قبل IMF بورڈ کو لکھے گئے ایک خط میں یہ مطالبات کیے ہیں۔ ACJCE نے منگل کو منعقدہ ایک میڈیا بریفنگ میں خط کی تفصیلات شیئر کیں۔ جہاں مقررین نے ٹیکس کے نفاذ پر تنقید کی اور اس کے اثرات پر تبادلہ خیال کیا۔بریفنگ سے خطاب کرتے ہوئے، الٹرنیٹو لائکلیکٹو کے ایک عہدیدار زین مولوی نے کہا کہ آئی ایم ایف کی حمایت یافتہ نئی مالی اصلاحات میں سولر پینلز، ونڈ ٹربائنز اور الیکٹرک گاڑیوں پر بھاری ٹیکس شامل ہیں۔