تہران: (ویب ڈیسک) ایران میں سیکورٹی ایجنسی نے دو یورپی شہریوں کو عوام میں انتشار اور فسادات کی منصوبہ بندی کرنے کے الزام میں گرفتار کرلیا ہے۔
ایران کی وزارتِ انٹیلی جنس نے کہا کہ اس نے دو یورپی شہریوں کو اسلامی جمہوریہ میں مبینہ عدم تحفظ کی منصوبہ بندی کے الزام میں گرفتار کیا ہے۔
رائٹرز کے مطابق ایران کی نیم سرکاری نیوز ایجنسی (ISNA) نے اطلاع دی کہ 2 افراد کو ملک میں عدم استحکام پیدا کرنے کے لیے فسادات اور عوام سطح پر انتشار پھیلانے کے الزام میں گرفتار کیا گیا ہے۔
واضح رہے کہ امریکی پابندیوں کی وجہ سے ایران کی حکومت کو حالیہ مہینوں میں تباہ حال معیشت، بیروزگاری، مہنگائی کی شرح 40 فیصد سے زائد ہونے اور بدانتظامی کی وجہ سے شہریوں اور سرکاری ملازمین کی جانب سے احتجاج کا سامنا ہے۔

برلن: (ویب ڈیسک) جرمن چانسلر اولاف شولس نے کہا ہے کہ یوکرین کو روس کے ساتھ جنگ کے 100 سال تک اثرات محسوس کرنے ہوں گے۔
میڈیا سے گفتگو میں جرمن چانسلر کا کہنا تھاکہ روس کے ساتھ جنگ کے یوکرین پر 100 سال تک اثرات کی وجہ مختلف شہروں میں گرائے گئے وہ بم ہیں جو پھٹ نہیں سکے ہیں۔
انہوں نے کہا کہ جرمن شہری جانتے ہیں کہ جنگ عظیم دوئم کے وقت گرائے گئے بم اب بھی مختلف مقامات سے برآمد ہو تے ہیں۔
ان کا کہنا تھاکہ یوکرین کو 100 سال تک جنگ کے نتائج کو برداشت کرنے کیلئے تیار رہنا چاہیے۔
خیال رہے کہ روس اور یوکرین کے درمیان جنگ کئی روز سے جاری ہے اور متعدد شہر تباہ ہوچکے ہیں۔
جنگ میں اب تک سیکڑوں افراد ہلاک اور لاکھوں بے گھر ہوچکے ہیں۔

ابوجا: (ویب ڈیسک) نائجیرین فوج پر گشت کے دوران مسلح افراد نے بھاری ہتھیاروں سے حملہ کردیا، جس کے نتیجے میں متعدد فوجی ہلاک جب کہ دو لاپتہ ہوگئے۔
غیر ملکی میڈیا کے مطابق خانہ جنگی کا شکار افریقی ملک نائجیریا کی فوج پر مسلح افراد نے ایک اور حملہ کیا ہے جس کی زد آکر نائجیرین فوج کی 93 بٹالین کے 7 اہلکار زندگی کی بازی ہار گئے۔
دہشت گردوں نے رات گئے نائجیریا کے ٹاٹی نامی گاؤں میں فوجی قافلے پر بھاری ہتھیاروں سے حملہ کیا تھا۔
عرب خبر رساں ادارے کا کہنا ہے کہ 93 بٹالین پر حملے کے بعد سے بریگیڈئر جنرل اور ان کے معاون لاپتہ ہیں، جن کی تلاش کیلئے فوج نے سرچ آپریشن کا آغاز کردیا ہے۔
رپورٹ میں کہا گیا ہے کہ ابھی تک کسی بھی مسلح گروہ نے حملے کی ذمہ داری قبول نہیں کی ہے جب کہ آرمی کے ترجمان بھی حملے سے متعلق تبصرہ کرنے سے گریز کررہے ہیں۔
خیال رہے کہ گزشتہ ماہ نائجیریا کے علاقے ترابا میں داعش کے حملے میں تین افراد ہلاک اور 30 سے زائد زخمی ہوگئے تھے۔
گزشتہ دس برس سے نائجیریا میں مختلف مسلح گروہ سرگرم ہیں جو مختلف قوموں اور سیکیورٹی فورسز کو دہشت گردانہ کارروائیوں کا نشانہ بناتے رہتے ہیں۔

تل ابیب: (ویب ڈیسک) اسرائیلی وزیر خارجہ یائر لاپد نے کہا کہ تل ابیب کو مقبوضہ مغربی کنارے میں بستیوں کی تعمیر کے لیے امریکہ سے اجازت لینے کی ضرورت نہیں ہے۔
یروشلم پوسٹ کے مطابق یائر لاپد نے صحافیوں سے گفتگو کرتے ہوئے کہا کہ اسرائیل ایک خودمختار ریاست ہے اور وہ خطے میں تعمیرات کیلئے امریکا سے اجازت لینے کا ذمہ دار نہیں۔
لاپد کا یہ بیان مغربی کنارے میں 3,988 غیر قانونی بستیوں کے منصوبوں کو آگے بڑھانے کے لیے اسرائیل اور امریکہ کے درمیان تازہ ترین سفارتی تنازع کے دوران سامنے آیا ہے۔
اسرائیلی وزیر خارجہ نے کہا کہ جب بستیوں کی تعمیر کی بات آتی ہے تو ہم ہمیشہ امریکیوں کو آگاہ کرتے ہیں لیکن اس کا مطلب یہ نہیں کہ ہم واشنگٹن کی منظوری حاصل کرنے کیلئے ایسا کرتے ہیں۔
واضح رہے کہ اسرائیل میں امریکی سفیر ٹام نائیڈز، وزیر خارجہ انتھونی بلنکن اور وزارت خارجہ کے ترجمان نیڈ پرائس کہہ چکے ہیں کہ ایسی بستیوں کی تعمیرات سے تنازع کا دو ریاستی حل کے امکان کو نقصان پہنچتا ہے۔

دمشق: (ویب ڈیسک) شام میں اسرائیل نے جنوبی صوبے القنیطرہ میں میزائل حملہ کیا۔ تاہم کسی جانی نقصان کی اطلاع نہیں ملی۔
عرب میڈیا کے مطابق دیہی علاقے کے اطراف ہونے والے اسرائیلی حملے میں حزب اللہ ملیشیا کے زیر استعمال ایک ٹھکانے کو نشانہ بنایا گیا۔
شامی خبر رساں ایجنسی نے بتایا کہ حملے میں صرف مادی نقصان ہوا۔ اسرائیلی فوج نے کارروائی پر تبصرہ کرنے سے منع کر دیا۔
یاد رہے کہ اسرائیل کئی برس سے شام میں حملے کر رہا ہے جن میں اس کے مطابق ایران کے ساتھ مربوط اہداف کو نشانہ بنایا جاتا ہے۔ اسرائیل بہت کم ان حملوں کا اعتراف کرتا ہے البتہ وہ متعدد بار باور کرا چکا ہے کہ شام میں ایران کے عسکری وجود کو قدم مضبوط بنانے کی اجازت نہیں دے گا۔
شام میں انسانی حقوق کے نگراں گروپ المرصد کے مطابق چند روز قبل دارالحکومت دمشق کے اطراف ہونے والے اسرائیلی حملے میں 9 افراد مارے گئے تھے جن میں 5 شامی فوجی تھے۔ شامی سرکاری میڈیا میں ہلاکتوں کی تعداد 4 فوجی اہل کاروں تک محدود رکھی گئی تھی۔
خیال رہے کہ شام میں 2011ء سے خون ریز تنازع جاری ہے۔ اس کے نتیجے میں تقریاب 5 لاکھ افراد اپنی جانوں سے ہاتھ دھو بیٹھے۔ ملک کے بنیادی ڈھانچے کو بڑی تباہی کا سامنا کرنا پڑا۔ لاکھوں لوگ بے گھر ہو کر اندرون و بیرون ملک جبری ہجرت پر مجبور ہو گئے۔