لاہور: (ویب ڈیسک) پیکا ترمیمی آرڈیننس پر حکومتی اتحادی جماعت ایم کیو ایم نے بھی تحفظات کا اظہار کر دیا۔
وفاقی وزیر آئی ٹی امین الحق نے پیکا ترمیمی آرڈیننس سے متعلق وزیر اعظم کو خط لکھ دیا۔ امین الحق نے خط میں کہا ہے کہ پیکا ایکٹ میں ترامیم سے متفق نہیں ، اسٹیک ہولڈرز کو اعتماد میں نہیں لیا گیا۔
ان کا کہنا ہے کہ بنیادی حقوق کےخلاف قوانین کی حمایت کسی صورت نہیں کرسکتے۔ ترامیم میں بلاضمانت گرفتاری اور فیک نیوز کی تشریح نہ ہونے سےبے چینی پھیل رہی ہے۔
انہوں نے آرڈیننس کو حکومت کی عوامی حمایت کے لیے خطرہ اور آزادی اظہار رائے کے خلاف قرار دیتے ہوئے اسے واپس لینے کا مطالبہ کیا ہے۔
امین الحق کا کہنا ہے کہ وزیر اعظم پیکا ترمیمی ایکٹ کے خلاف احتجاج پر غور کریں اور پیکا آرڈیننس فوری واپس لیں۔
وفاقی وزیر نے خط میں مزید لکھا کہ امید ہے وزیراعظم صحافتی تنظیموں اور اسٹیک ہولڈرز سے مشاورت کر کے نئی ترامیم جاری کرائیں گے۔
انہوں نے کہا ہے کہ ترامیم میں بلاضمانت گرفتاری اور فیک نیوز کی تشریح نہ ہونے سے ملک میں بےچینی پھیل رہی ہے۔ صحافتی تنظیموں، انسانی حقوق کی تنظیموں اور ماہرین کی رائے لی جاتی تو بہتر ترامیم ہو سکتی تھیں۔

اسلام آباد: (ویب ڈیسک) پاکستان مسلم لیگ ن نے پیکا ترمیمی آرڈیننس کو اسلام آباد ہائی کورٹ میں چیلنج کرنے کا فیصلہ کر لیا۔
مسلم لیگ ن کی رہنما مریم اورنگزیب اور سینیٹر اعظم نزیر تارڑ کی طرف سے عدالت میں پٹیشن دائر کی جائے گی۔
اس حوالے سے مریم اورنگزیب نے کہا کہ مسلم لیگ ن نے میڈیا اور اظہار رائے کی آزادیوں کے خلاف قانون کو چیلنج کرنے کے لیے پٹیشن تیار کر لی ہے جبکہ مسلم لیگ ن نے حکومت کی جانب سے پیکا ترمیمی آرڈیننس کو آئین اور بنیادی انسانی حقوق کے منافی قرار دیتے ہوئے مسترد کیا تھا۔
اس سے قبل چیف جسٹس اسلام آباد ہائی کورٹ اطہر من اللہ نے پیکا ترمیمی آرڈیننس کے خلاف پاکستان فیڈرل یونین آف جرنلسٹ کی درخواست پر سماعت کرتے ہوئے پیکا ایکٹ کی سیکشن 20 کے تحت گرفتاریوں سے روک دیا۔
عدالت نے پی ایف یو جے کی درخواست پر اٹارنی جنرل کو معاونت کا نوٹس بھی جاری کیا۔
دوسری جانب پیکا ایکٹ ترمیمی آرڈیننس سے متعلق وفاقی وزیر آئی ٹی سید امین الحق نے ایک خط وزیراعظم کو ارسال کر دیا۔ جس میں لکھا گیا ہے کہ ترامیم سے متفق نہیں کیونکہ اس میں اسٹیک ہولڈرز کو اعتماد میں نہیں لیا گیا۔

کوئٹہ: (ویب ڈیسک) وزیر اعلیٰ بلوچستان میر عبدالقدوس بزنجو کا کوڈ ٹیسٹ پازیٹو آگیا ہے۔ جس کی تصدیق ترجمان وزیراعلی سیکریٹریٹ نے تصدیق کی ہے۔ وزیراعلیٰ نے ٹیسٹ کے بعد خود کو گھر میں آئیسو لیٹ کرلیا۔
ترجمان وزیراعلی سیکریٹریٹ کے مطابق وزیراعلیٰ کی طبیعت ٹھیک ہے تاہم کوڈ کی علامات ہیں۔ ڈاکٹروں نے وزیراعلیٰ کو مکمل آرام کا مشورہ دیا ہے۔ وزیراعلٰی اہم سرکاری امور کی انجام دہی کے لیے آن لائن اجلاس جاری رکھیں گے۔

لاہور : (ویب ڈیسک) پیپلز پارٹی کے رہنما اعتزاز احسن کا کہنا ہے کہ سب سے زیادہ جعلی خبریں مریم نواز کے پاس ہوتی ہیں۔
پیپلز پارٹی کے رہنما اعتزاز احسن نے ایک بار پھر مسلم لیگ ن کی قیادت کو نشانے پر رکھ لیا۔ کہتے ہیں سب سے زیادہ جعلی خبریں مریم نواز کے پاس ہوتی ہیں۔
لاہور ہائی کورٹ کے باہر میڈیا سے گفتگو میں انہوں نے کہا کہ پی ڈی ایم میں شامل جماعتیں سچے دل سے ایک دوسرے کے ساتھ نہیں ہیں۔ میرا مشورہ ہے ان پر اعتبار نہ کیا جائے۔
ان کا کہنا ہے کہ اگر مریم نواز کے پاس جج کی ویڈیوز تھیں تو انکو کسی عدالت میں پیش کیوں نہیں کیا گیا؟ مریم نواز دعویٰ کرتی ہیں کہ میرے پاس اور بھی ثبوت ہیں ۔ مریم نواز کے پاس جو ثبوت ہیں وہ عدالت میں پیش کیوں نہیں کرتیں۔
انہوں نے کہا کہ نواز شریف کو سچا ثابت کرنے کے لیےثاقب نثار کی آڈیو فیک نیوز ہے۔ نواز شریف کو وطن واپس لانا حکومت کے بس کی بات نہیں۔ نواز شریف کی میڈیکل رپورٹس لیباٹری سے جعلی بنوائی گئیں۔

لاہور: (ویب ڈیسک) بلاول ہاؤس میں مسلم لیگ ن، پیپلزپارٹی اور جے یو آئی نے نمبرز گیم پر اطمینان کا اظہار کر دیا۔ نمبرز گیم پوری ہوگئی، تاریخ کا فیصلہ مرکزی قیادت کرے گی۔
آصف زرداری اور شہباز شریف کی ملاقات کی اندرونی کہانی سامنے آگئی۔ ذرائع کے مطابق اپوزیشن نے براہ راست پہلے وزیراعظم کے خلاف تحریک عدم اعتماد لانے کا مشورہ دے دیا۔ شرکا کی زیادہ تر تعداد نے پہلے مرکز میں عدم اعتماد کا مشورے پر اتفاق کیا۔
ذرائع کے مطابق مشترکہ ملاقات کے علاوہ آصف زرداری، شہباز شریف اور بلاول بھٹو کی الگ ملاقات کا بھی ایک دور ہوا، 20 منٹ جاری رہنے والی الگ ملاقات میں تینوں رہنماؤں نے سیاسی رابطوں میں پیش رفت پر مشاورت کی۔ بلاول ہاؤس میں پی پی پی اور جے یو آئی قیادت کے ملاقاتوں کے الگ الگ دور بھی ہوئے۔
شرکاء نے اجلاس میں مشورہ دیا کہ حتمی فیصلہ مرکزی قیادت کرے گی، نمبر ون کو ہدف بنایا جائے، باقی خود ہی گر جائیں گے، اتحادیوں سے بات چیت جاری رہے گی، نمبرز گیم اتحادیوں کے بغیر بھی پورا ہوگا۔
اس موقع پر سابق صدر آصف زرداری کا کہنا تھا کہ اب وقت کم ہے، براہ راست عمران خان کے خلاف تحریک عدم اعتماد لائی جائے، بزدار یا اسد قیصر کو بعد میں دیکھا جائے گا، اب اگر پہلے کسی اسپیکر یا وزیراعلی کو فوکس کیا تو وزیراعظم کو وقت مل جائے گا۔

کراچی: (ویب ڈیسک) پی ٹی آئی سندھ کے نائب صدر راجہ اظہر نے متنازعہ بیانات پر عامر لیاقت پر پابندی کا مطالبہ کر دیا۔
سیکریٹری جنرل پی ٹی آئی اسد عمر کو خط میں راجہ اظہر نے عامر لیاقت کیخلاف ایکشن لینے کا مطالبہ کیا۔ ان کا کہنا ہے کہ عامر لیاقت نے کئی ویڈیوز میں بانی ایم کیو ایم سے یکجہتی ظاہر کی، وہ پی ٹی آئی کو نقصان پہنچا رہے ہیں، عامر لیاقت کی نامناسب حرکات اور غلیظ زبان استعمال کرتے ہیں۔ راجہ اظہر نے عامر لیاقت کی پارٹی ممبرشپ ختم کرنے کی درخواست بھی کی ہے۔