کیف: (ویب ڈیسک) روسی وزارت خارجہ کی ہدایت پر یوکرین کے دارالحکومت میں موجود روسی سفارتخانے سے انخلا کا عمل شروع ہوچکا ہے۔
روسی سرکاری میڈیا کے مطابق یوکرین کے دارالحکومت کیف میں روس نے اپنا سفارت خانہ خالی کرنا شروع کردیا ہے۔ اس سے قبل یوکرین نے بھی روس میں موجود اپنے شہریوں کو ملک چھوڑنے کا حکم دیا تھا۔
میڈیا رپورٹس کے مطابق روسی وزارت خارجہ کی جانب سے سفارت خانے کے انخلا کا حکم ایک دن قبل دیا گیا تھا۔ آج کے بعد کیف میں سفارت خانے کی عمارت پر روسی جھنڈا نہیں لہرایا جائے گا۔
دوسری جانب روسی سفارت کاروں کے محفوظ انخلا کیلئے یوکرین کی پولیس نے سفارت خانے کو حصار میں لے لیا ہے۔
خیال رہے کہ اس سے قبل یوکرینی حکومت اپنی عوام کو پرامن رہنے کی تلقین کرتی آئی ہے تاہم اب حکام کی تشویش میں اضافہ دیکھنے میں آیا ہے۔ وزارت خارجہ کا کہنا تھا کہ ماسکو کی ’جارحیت‘ روس میں بسنے والے شہریوں کیلئے قونصلر کی خدمات حاصل کرنے میں رکاوٹ بن سکتی ہے۔

نیویارک: (ویب ڈیسک) یوکرین کے وزیر خارجہ دمیترو کولیبا نے دنیا کو خبردار کرتے ہوئے کہا ہے کہ روسی صدر ولادی میر پیوٹن کو روکنے کا یہ آخری موقع ہے۔ انہوں ںے کہا کہ روس کے اقدامات سے موجودہ ورلڈ آرڈر کو خطرہ لاحق ہے۔
انہوں نے یہ بات اقوام متحدہ میں خطاب کرتے ہوئے کہی۔ انہوں نے اپنی تقریر میں یوکرین کی موجودہ صورتحال اور روسی اقدامات پر تفصیل سے روشنی ڈالی۔
خبر رساں ایجنسی کے مطابق وزیر خارجہ دمیترو کولیبا نے الزام عائد کیا کہ روس نے عالمی امن پر حملہ کیا ہے۔ انہوں نے کہا کہ مشرقی یوکرین میں روسی ٹینک پھر رہے ہیں۔
یوکرین کے وزیر خارجہ نے واضح طور پر اپنے خطاب میں کہا کہ جوہری ہتھیار بنانے کا کوئی ارادہ نہیں ہے۔
عالمی خبر رساں ایجنسی کے مطابق یوکرین کے وزیر خارجہ نے واضح طور پر دنیا کو آگاہ کیا کہ روسی جارحیت کے جواب میں یوکرین اپنا بھرپور دفاع کرے گا۔
روسی اقدام کے بعد یوکرین میں ایک ماہ کے لیے ہنگامی حالت نافذ کرنے کا اعلان کردیا گیا ہے جس کے تحت یوکرین میں جلسے، جلوس اور ہڑتال پر پابندی عائد کردی گئی ہے۔

یوٹاہ: (ویب ڈیسک) تربیتی پرواز کے دوران امریکا کے یوٹاہ نیشنل گارڈ کے دو بلیک ہاک ہیلی کاپٹر آپس میں ٹکرا کر زمین بوس ہوگئے۔
عالمی خبر رساں ادارے کے مطابق امریکی ریاست یوٹاہ کی معروف سالٹ لیک سٹی میں دو بلیک ہاک ہیلی کاپٹرز گر کر تباہ ہوگئے۔ دونوں ہیلی کاپٹرز میں مجموعی طور پر 5 اہلکار سوار تھے۔
دونوں ہیلی کاپٹر تربیتی پرواز پر مامور تھے اور ممکنہ طور موسم کی خرابی کے باعث فضا میں ایک دوسرے سے ٹکرانے کے بعد ہچکولے کھاتے ہوئے زمین بوس ہوگئے۔
ریسکیو ٹیم کے ترجمان کا کہنا ہے کہ خوش قسمتی اس واقعے میں کوئی جانی نقصان نہیں ہوا۔ دونوں ہیلی کاپٹرز میں موجود پانچوں افراد مکمل طور محفوظ ہیں۔
حادثے کا شکار ہونے والے ہیلی کاپٹرز یوٹاہ کے نیشنل گارڈز کی ملکیت تھے جو کہ ایک طرح کی ریاست کی فوج ہے۔ حادثے سے ہیلی کاپٹرز کو معمولی نقصان پہنچا ہے۔
امریکا کی یوٹاہ نیشنل آرمی گارڈز نے واقعے کی تحقیقات کے لیے انکوائری کمیٹی تشکیل دیدی ہے۔ ہیلی کاپٹر میں موجود افراد کی شناخت ظاہر نہیں کی گئی۔

مقبوضہ بیت القدس: (ویب ڈیسک) ذہنی طور پر معذور فلسطینی کو تشدد کے ذریعے گرفتار کرنے کی کوشش کررہے اسرائیلی اہلکاروں کی ویڈیو نے سوشل میڈیا پر غم و غصے لہر دوڑا دی ہے۔
قطری سرکاری نشریاتی ادارے الجزیرہ کے مطابق فسلطین کے علاقے شیخ جرہ میں ایک فلسطینی خاندان کو اُن کے گھر سے جبراً بےدخل کرنے کے واقعے نے فلسطینیوں کو سراپا احتجاج بنا دیا ہے۔
فلسطین میں واقعے کیخلاف ایک مظاہرہ جاری تھا جس میں محمد العجلونی بھی شامل تھا۔ اسرائیلی اہلکاروں نے ڈاون سنڈروم کے شکار 25 سالہ محمد العجلونی کو پکڑ لیا اور اُسے تشدد کا نشانہ بنایا جس پر محمد کی گردن اور کندھوں پر شدید چوٹیں آئیں۔
مظاہرین نے محمد کو تھاما ہوا تھا اور اہکاروں کو اس کی ذہنی حالت بتا رہے تھے جس پر مظاہرین سے تکرار کے بعد اہلکاروں نے اُسے چھوڑ دیا۔ محمد العجلونی کو قریبی اسپتال لے جایا گیا جہاں اُس کے زخموں کا علاج کیا گیا۔

ماسکو: (ویب ڈیسک) روسی صدر ولادیمر پوٹن نے کہا ہے کہ یوکرین کے معاملے پر مغربی ممالک کے ساتھ سفارتی حل کے لیے کوششیں جاری ہیں لیکن روسی شہریوں کے جان و مال کے تحفظ پر کوئی سمجھوتہ نہیں کریں گے۔
عالمی خبر رساں ادارے کے مطابق روس کے فادر لینڈ ڈے کے موقع پر قوم سے خطاب میں صدر ولادیمیر پوٹن نے کہا کہ ہم اب بھی یوکرین کے تنازع کے حل کے لیے سفارتی کوششیں کر رہے ہیں۔
تاہم روسی صدر نے مغربی ممالک کو خبردار کیا کہ مخلصانہ گفتگو کے لیے ہمیشہ تیار رہتے ہیں لیکن روسی شہریوں کے جان و مال اور عزت و آبرو کے تحفظ پر کوئی سمجھوتہ نہیں کریں گے۔
صدر پوٹن نے یوکرین کے دو صوبوں میں اپنی فوجیں بھیجنے کے فیصلے کو حق بجانب قرار دیتے ہوئے کہا کہ آزادی کا اعلان کرنے والی ریاستوں میں عوام کے تحفظ کے لیے امن دستے بھیجنے درست عمل ہے۔
اس موقع پر انھوں نے آذربائیجان اور آرمینیا کے درمیان جنگ میں امن کے لیے روس کے کردار کا تذکرہ کرتے ہوئے کہا کہ اس وقت بھی روس کے امن دستوں نے خطے کو بڑی جنگ سے بچایا تھا۔
اپنے خطاب کے آخر میں صدر پوٹن نے روسی افواج کی تعریف کی اور ہر قسم کی جارحیت کا مقابلہ کرنے اور ملکی مفاد کے دفاع کے لیے ہر وقت چاک و چوبند رہنے پر فوج کو خراج تحسین پیش کیا۔