پی آئی اے کے پائلٹ نے ڈیوٹی کا وقت ختم ہونے پر پرواز اڑانے سے انکار کردیا اور پرواز کو اسلام آباد کے بجائے دمام ایئرپورٹ پر اتار دیا۔ پی آئی اے پرواز 9754 ریاض سے اسلام آباد میں کئی گھنٹوں تاخیر ۔مسافروں کا عملہ سے تکرار جہاز خالی کرنے سے بھی انکار۔۔۔صورتحال کشیدہ ہونے پر ائیرپورٹ سیکورٹی طلب کر لی گئی۔۔ سعودی عرب سے پاکستان آنے والی پی آئی اے کی پرواز پی کے 9754 گھنٹوں تاخیر کا شکار ہوگئی، پریشان حال مسافروں نے جہاز کے اندر ہی پی آئی اے کے خلاف احتجاج شروع کردیا۔ پی آئی اے انتظامیہ کے مطابق موسم خراب ہونے کے باعث ریاض سے اڑنے والی پرواز سعودی عرب کے شہر دمام میں اتاری گئی تھی، کپتان نے ڈیوٹی ٹائم ختم ہونے پر جہاز کو اسلام آباد لے جانے سے انکار کردیا اور طیارے کا رخ اسلام آباد کے بجائے دمام کی طرف موڑدیا، جہاں مسافروں نے جہاز کے اندر شورشرابہ کرتے ہوئے جہاز سے اترنے سے انکار کردیا، اور صورتحال کشیدہ ہونے پر ریاض ایئرپورٹ پر سیکیورٹی عملے کو طلب کرکے حالات کو قابو کیا گیا۔ ترجمان پی آئی اے کے مطابق فضائی سیفٹی کے لیے کپتان کا مکمل پرسکون اور آرادہ ہونا ضروری ہے، کپتان اور عملے کے آرام کے لیے بندوبست کردیا گیا تھا، اور پی کے 9754 کے مسافروں کو 24 گھنٹے تاخیر کے ساتھ گزشتہ رات 11 بجےاسلام آباد پہنچا دیا گیا۔

وفاقی وزیرتوانائی حماد اظہرکا کہنا ہے کہ سندھ جوگیس پیدا کرتا ہے آدھی تو اس کے پاس ہی رہتی ہے، سندھ حکومت گیس پر پوائنٹ سکورنگ کرتی ہے۔
پریس کانفرنس سے خطاب میں وفاقی وزیر توانائی کا کہنا تھا کہ سندھ حکومت سندھ کارڈکھیل رہی ہے۔سندھ کی آدھی گیس توپائپ میں ڈالنے کے قابل نہیں ہوتی۔ وہاں سے نکلنے والی گیس سندھ میں ہی استعمال ہوتی ہے۔
حماداظہرنے کہا کہ ہمارے لوگوں کی آمدنی میں اضافہ نہیں ہوسکا۔ 1960 کے بعد معیشت مفلوج ہوچکی تھی۔ حکومت نے 3 سال میں بنیادی اصلاحات کی ہیں۔ ملک میں صنعتوں اوربرآمدات کوفروغ ملا ہے۔ گورنر سٹیٹ بینک کوہٹانے کا اختیاروفاقی حکومت کے پاس ہو گا۔ مرکزی بینک کے تمام اثاثے حکومت کی ملکیت رہیں گے۔
اپنی بات کو جاری رکھتے ہوئے ان کا کہنا تھا کہ وفاقی وزیر دفاع پرویز خٹک بڑے ہیں اور انہیں بولنےکا بھی حق ہے۔ گیس کنکشن کے معاملے پر پرویز خٹک کو بریفنگ دی جس کے بعد وہ مطمئن ہوئے۔پرویز خٹک نے بطور عوامی نمائندہ اپنے حلقے میں گیس کا معاملہ اٹھایا تھا۔ یوریا کی کمی کا مسئلہ طلب میں اضافے کی وجہ سے پید ا ہوا۔
انہوں نے کہا کہ ہم نےبجلی کی پیداوارکےبجائےترسیل پرتوجہ دی۔ آئی پی پیزکےساتھ دوبارہ مذاکرات کیےگئےجس سےبہتری آئی۔ ایکس چینج ریٹ کے ہیرپھیرنے معیشت کونقصان پہنچایا۔پاکستان نے کم عرصے میں فیٹف کے27 میں سے26 نکات پرعملدرآمد کیا۔ ہمارے لوگوں کی آمدنی میں اضافہ نہیں ہوا۔

سانحہ مری پر قائم 5 رکنی انکوائری کمیٹی نے تحقیقات مکمل کرلی ہیں جس میں قرار دیا گیا ہے کہ انتظامیہ کی غفلت سے سانحہ مری پیش آیا، محکمہ موسمیات کی وارننگ کو مسلسل نظر انداز کیا گیا اور راستے بھی 2 روز کی تاخیر سے بند کیے گئے۔
ذرائع کے مطابق سانحہ مری پر قائم کی گئی 5 رکنی کمیٹی نے تحقیقاتی کمیٹی نے فائنڈنگز کو ڈرافٹ کی شکل دیدی ہے اور کل وزیر اعلیٰ پنجاب کو اپنی رپورٹ پیش کرے گی ۔
کمیٹی نے مری میں زندہ بچ جانے والوں کے بیانات اور افسران کے بیانات کا جائزہ لیا ، انتظامی محکموں کے 30 سے زائد افسران کے بیانات قلمبند کئے گئے جبکہ سیاحوں نے 7 اور 8 جنوری کی رات کو خوفناک تجربہ قرار دیا۔
ذرائع کے مطابق تحقیقاتی رپورٹ نے قرار دیا کہ انتظامیہ کی غفلت سے سانحہ پیش آیا ، 3 دن بعد مری جانے والے راستے بند کردینے چاہئیے تھے، مری جانے والے راستے 5 دن برفباری ہونے اور 2 دن تاخیر سے بند کئے گئے جبکہ برف ہٹانے والی مشینری ایک جگہ کھڑی تھی اور عملہ غائب تھا، محکمہ موسمیات کی وارننگ کو بھی مسلسل نظر انداز کیا گیا۔

وزیر خارجہ شاہ محمود قریشی نے کہا ہے کہ 2 سال سے عالمی معیشت بھی بحرانو ں کی زد میں ہے، 2023ء سے قبل مہنگائی کے جن کو بوتل میں بند کریں گے۔
ملتان میں میڈیا سے گفتگو کرتے ہوئے شاہ محمود قریشی کا کہنا تھا کہ بیرون ملک نہ کوئی فلیٹس ہیں، نہ کوئی اکاؤنٹس ہیں اور نہ ہی کسی کا باہر جانے کا پروگرام ہے، عوام میں سے ہیں اور عوام کے ساتھ ہی رہیں گے۔
وزیر خارجہ نے مزید کہا کہ اپوزیشن جتنے مرضی مارچ کر لے نہ ان ہاؤس تبدیلی آئیگی اور نہ حکومت ختم ہوگی، اپوزیشن کو شکست ہوگی اور تحریک انصا ف کی جمہوری حکومت اپنی مدت پوری کریگی ۔
شاہ محمود قریشی کا کہنا تھا کہ ماضی میں کرپشن اور اپنو ں کو نوازنے کے چکرمیں قومی خزانے کو بے دردی سے لوٹا گیا، بیرون ملک جائیدادیں بنائی گئیں، 5 سال خلوص نیت سے تمام وسائل اور توانائیاں عوامی ترقی پر صرف کریں گے اور انشاء اللہ 2023ء کے انتخابات میں بھی تحریک انصاف ملک بھر میں پھرپور کامیابی حاصل کریگی۔

نیشنل کبڈی چیمپئن شپ کا فائنل متنازع ہوگیا مہمان خصوصی وزیر مملکت برائے اطلاعات ٹرافی تقسیم کئے بغیر واپس چلے گئے جبکہ انتظامیہ نے دونوں ٹیموں کو مشترکہ فاتح قرار دے دیا۔
لاہور میں کامیاب جوان پروگرام کے تحت نیشنل کبڈی چیمپئن شپ کا فائنل میچ پاکستان واپڈا اور پاکستان ایئر فورس کے مابین کھیلا گیا ۔
پوائنٹس تنازع پر دونوں ٹیموں نے میچ کھیلنے سے انکار کردیا ، انتظامیہ نے واپڈا کو چیمپئن قرار دے دیا، واپڈا اور پی اے ایف کے پوائنٹس 46، 46 سے برابر رہے، جیوری نے واپڈا کو فائنل ریڈ دینے کا اعلان کیا تو پی اے ایف نے ماننے سے انکار کیا۔
پاکستان ائیرفورس نے اس فیصلے پر بائیکاٹ کیا اور آخری لمحات میں گراؤنڈ میں آنے سے انکار کردیا۔ کبڈی چیمپئن شپ کا فائنل متنازع ہونے پر مہمان خصوصی وزیر مملکت برائے اطلاعات ٹرافی تقسیم کئے بغیر واپس چلے گئے۔
بعدازاں پاکستان کبڈی فیڈریشن نے کچھ دیربعد ہی اپنا فیصلہ تبدیل کرلیا اور42 ویں قومی کبڈی چیمپئن شپ کا فاتح دونوں ٹیموں کو مشترکہ قرار دے دیا ۔
ٹرافی 6 ماہ پاکستان واپڈا کے پاس رہے گی اور 6 ماہ پاکستان ائیر فورس کے پاس رہے گی۔