لاہور: (ویب ڈیسک) لاہور میں شادی کی تقریب میں ہوائی فائرنگ 2 بھائیوں کی جان لے گئی جن میں ایک پولیس اہلکار بھی شامل ہے۔
لاہور میں شادی والے گھر میں صف ماتم بچھ گئی، نصیر آباد میں شادی کی تقریب میں ہوائی فائرنگ کے دوران چلنے والی گولیاں دو بھائیوں کو جا لگیں جو زخموں کی تاب نہ لا کر چل بسے۔
سی سی پی او لاہور نے پولیس اہلکار کی ہلاکت کا نوٹس لے لیا، انہوں نے متعلقہ تھانے کے انچارج سے رپورٹ طلب کر لی۔

اسلام آباد: (ویب ڈیسک) پیپلز پارٹی کے چیئرمین بلاول بھٹو زرداری نے فی لیٹر پیٹرول پر 3 روپے اضافے پر حکمراں جماعت پاکستان تحریک انصاف (پی ٹی آئی) کو تنقید کا نشانہ بناتے ہوئے اسے عوام کا معاشی قتل قرار دیا ہے۔ انہوں نے کہا کہ بجلی کی قیمتوں میں 4 روپے سے زائد اضافے کے بعد اب پیٹرولیم مصنوعات کی قیمتوں میں اضافہ درحقیقت عوام کا معاشی قتل ہے۔ بلاول بھٹو زرداری نے کہا کہ گیس اور بجلی کے بعد اب پیٹرول کی قیمتوں میں اضافہ عوام کی جیب پر ڈاکا ہے، ریاستِ مدینہ کا دعویٰ کرنے والے حکمراں کو خبر ہو کہ قیمتوں میں اضافے کے اثرات براہ راست عوام پر پڑیں گے۔ انہوں نے کہا کہ عمران خان نے ملک کو عالمی مالیاتی ادارے (آئی ایم ایف) کے پاس گروی رکھ دیا ہے اور اب پاکستان سے متعلق تمام فیصلے بیرون ملک میں ہورہے ہیں۔ چیئرمین پیپلز پارٹی نے کہا کہ پیٹرول مہنگا، بجلی مہنگی، گیس مہنگی، عوام کے صبر کا مزید امتحان نہ لیا جائے اور اب پاکستان پیپلزپارٹی کا لانگ مارچ عوام کو اسی مہنگائی اور معاشی بحران سے نجات دلانے کے لیے ہے۔ ان کا کہنا تھا کہ اگر مہنگائی اور بے روزگاری کا خاتمہ چاہیے تو عمران خان کی حکومت سے نجات ضروری ہے جس کے لیے عوام 27 فروری کو اسلام آباد کے لیے نکلیں گے اور مہنگائی کے ذمہ دار وزیراعظم سے حساب لیں گے۔

کراچی: (ویب ڈیسک) کراچی میں قیدیوں کو انصاف کیلئے عدالت تک لے جانے کے سفر میں انسانی حقوق کی خلاف ورزی کا انکشاف ہوا ہے، پولیس سے تنگ قیدی نے سٹی کورٹ سے رجوع کر لیا۔ کراچی کی عدالتوں میں قیدیوں کو کیسے پیش کیا جاتا ہے، پولیس کے رویئے سے تنگ قیدی معاملہ عدالت میں لے گیا۔ عدالت میں پیشی کیلئے بھی رشوت لینے کا انکشاف ہوا ہے۔ پیسے نہ دینے پر جانوروں کی طرح باندھ کر کورٹ میں پیش کیا جاتا ہے۔ قیدی نےلاعلمی میں کورٹ پولیس کی بجائے جیل حکام کےخلاف درخواست دائر کر دی۔ جیل سے آنے والے قیدیوں کولاک اپ میں ہتھکڑی لگانا، عدالت میں پیش کرنا کورٹ پولیس کی ذمےداری ہے۔ کراچی کی سینٹرل، ملیر اور ویمن جیل سے روزانہ کم وبیش ایک ہزار قیدیوں کو عدالتوں میں پیش کیا جاتا ہے۔ جیل حکام کا کہنا ہے کہ ہم جیل کے گیٹ پر بغیر ہتھکڑی قیدیوں کو کورٹ پولیس کے حوالے کرتے ہیں اور اسی جگہ سے وصول کرلیتے ہیں۔ عدالت کیلئے جیل سے لایا جانے والا قیدی کورٹ پولیس کے رحم وکرم پر ہوتا ہے، جو قیدی رقم خرچ کرتا ہے اسے تین یا چار کی چین یا اکیلے، جو کم یا پیسے نہ دے سکے اسے درجن بھر قیدیوں کے ساتھ اور دو تالے والی ہتھکڑی لگاٰئی جاتی ہے۔ رقم خرچ کرنے پر فیملی کے ساتھ بیٹھنے اور موبائل فون پر گپ شپ کی سہولت بھی مل جاتی ہے اور صبح سے شام تک من پسندجگہ بھی۔ پولیس، کورٹ کچہری اور سرکاری محکموں میں رشوت کوئی نئی بات نہیں حالانکہ یہ بھی قابل سزا جرم ہے لیکن پولیس کی جانب سے قیدیوں کے ساتھ غیرانسانی سلوک شدید قابل مذمت ہے۔ اعلی حکام کو قیدیوں کی روایتی پیشیوں پر نوٹس لینے کی ضرورت ہے۔

لاہور: (ویب ڈیسک) وفاقی وزیر اطلاعات فواد چودھری نے کہا ہے کہ صحت کارڈ کا سب سے زیادہ فائدہ سفید پوش اور مڈل کلاس طبقے کو ہو گا، سندھ حکومت کو بھی صحت کارڈ میں حصہ ڈالنا چاہئے۔
لاہور پریس کلب میں پریس کانفرنس کے دوران وزیر اطلاعات فواد چودھری نے کہا کہ صحت کارڈ سے 10 لاکھ روپے تک علاج کی سہولت ملے گی، اس سے شعبہ صحت میں سرمایہ کاری کو بھی فروغ ملے گا، پروگرام میں نجی شعبے کو بھی شامل کیا گیا ہے۔ صحت کارڈ سے نجی ہسپتالوں میں بھی علاج ہو سکے گا جہاں ہونیوالے اخراجات خرچ حکومت برداشت کرے گی۔
انہوں نے کہا کہ چند لوگوں کا خیال ہے مہنگائی سے عمران خان کی مقبولیت متاثر ہوئی، صرف تحریک انصاف ہی ایسی جماعت ہے جو پورے ملک کی نمائندگی کرتی ہے، آئندہ 5 سال بھی پی ٹی آئی کے ہوں گے۔

ڈوڈوما: (ویب ڈیسک) پاک بحریہ کا جہاز پی این ایس عالمگیر خیر سگالی مشن پر افریقی ملک تنزانیہ پہنچ گیا، بندرگاہ ”دارالسلام“ آمد پر پاکستانی جہاز کا پرتپاک استقبال کیا گیا۔
ترجمان پاک بحریہ کے مطابق دورے کے دوران مشن کمانڈر نے عسکری حکام سے اہم ملاقاتیں کیں، دوران ملاقات باہمی دلچسپی کے امور اور دو طرفہ بحری تعاون پر تبادلہ خیال کیا گیا، پاک بحریہ نے کورونا سے بچاٶ کے حفاظتی اقدامات کے تحت دارالسلام میں میڈیکل کیمپ کا بھی انعقاد کیا، میڈیکل کیمپ میں 2500 سے زائد مریضوں کو علاج اور ادویات کی سہولتیں فراہم کی گئیں۔
تنزانیہ کےعوام نے پاک بحریہ کے اس جذبہ خیر سگالی کو سراہا اور پاکستان کو خراجِ تحسین پیش کیا، دورے کے آخر میں دونوں ممالک کے بحری جہازوں نے مشترکہ مشق میں بھی حصہ لیا، دورے کا مقصد افریقی ممالک کے ساتھ دو طرفہ تعلقات کا فروغ اور تعاون کی نئی راہیں تلاش کرنا ہے۔