لاہور (خصوصی رپورٹ) محکمہ تعلیم کی جانب سے نئے تعلیمی سال کے لئے ضابطہ اخلاق جاری کیا گیا ہے جس کے مطابق سکول کے سربراہ نئے داخل ہونے والے طلبہ کو خوش آندید کہیں گے، طلبہ کو مفت کتابیں بھی فراہم کی جائیں گی۔ محکمہ تعلیم کے مراسلے میں کہا گیا ہے کہ سکولوں میں صفائی کا معیار بہترین ہونے کے ساتھ ساتھ بچوں سے صرف نصابی سرگرمیوں کرائی جائیں۔ پرائمری سکولوں میں بنیادی مراکز تعلیم بنائے جائیں گے اور سکیورٹی ایس اوپیز پر عمل درآمد کرانا لازمی ہو گا۔ طلبہ کو پینے کا صاف اور ٹھنڈا پانی میسر ہونا چاہئے جبکہ نئے سال کی انرولمنٹ، سکول امپروو منٹ پلان اور 33 نکات کو دفتر میں آویزاں کیا جائے گا۔ مراسلے میں کہا گیا ہے کہ پرائمری اساتذہ گائیڈزڈی ایس ڈی کے مطابق سبق تیار کریں۔ ماہانہ ٹیسٹ سسٹم کو یقینی بنایا جائے جبکہ جسمانی سزا پر پابندی ہو گی۔ نئے ضابطہ اخلاق کے مطابق آئی ٹی اور سائنس لیب کو فعال رکھا جائے اور ٹیچر حاضری کا رجسٹر ہیڈ ٹیچر کی میز پر موجود ہو گا۔ اساتذہ ڈینگی اور کانگو وائرس کی نئی فلیکسز لگوائیں گے اور زیرو پیریڈ میں طلبہ کو اس حوالے سے اگاہی دینگے۔ سکول کے اوقات کار ظاہر کیا جائے گا۔ ضابطہ اخلاق کی خلاف ورزی کرنے والے اساتذہ کے خلاف کارروائی کی جائے گی۔

راولپڈی (خصوصی رپورٹ) حکومت نے پرائمری اور ہائی کے بعد مڈل سکولوں کی بھی نج کاری کرنے کا فیصلہ کرلیا ہے۔ موسم گرما کی چھٹیوں کے دوران یکم جون سے 31 اگست تک 5500 مڈل سکولوںکی نج کاری کردی جائے گی۔ ان تمام سکولوں کی فہرستیں ہنگامی بنیاد پر تیار کرنا شروع کردی گئی ہیں۔ ان تمام سکولوں کے اساتذہ کو سرپلس قرار دیا جائے گا۔ ان میں گرلز اور بوائز دونوں سکول شامل ہیں۔ پہلے مرحلہ میں یہ سکول پنجاب ایجوکیشن فاﺅنڈیشن کے سپرد کئے جائیں گے۔ دوسرے مرحلہ میں ان کی فروخت کردی جائے گی۔

سرگودھا۔2 مارچ(ویب ڈیسک ) سرگودھا ضلع کی تمام تحصیلوں میں حکومت کی جانب سے مفت کتابوں کی تقسیم کا سلسلہ شروع کرنے کےلئے سرکاری سکولزانتظامیہ نے انتظامات مکمل کرنا شروع کردیئے ہیں۔ ذرائع کے مطابق حکومت پنجاب کی جانب پہلی سے میٹرک تک کے طلباءکو مفت کتابیں دینے کا اعلان کیا ہے اور اس سلسلہ میں تمام مضامین کی 6 کروڑ سے زائد کتب کی تیاری آخری مراحل میں ہے، جسے سکول انتظامیہ کو رواں ماہ کے دوران فراہم کردی جائیگی یہ کتابیں تمام سکولوں میں مفت تقسیم کی جائینگی ،جس کےلئے ہیڈ ماسٹرز سے سکولوں میں بچوں کے داخلوں کی رپورٹ طلب کرلی گئی ہے۔

اسلام آباد(خصوصی رپورٹ) سینیٹ قائمہ کمیٹی برائے نیشنل ہیلتھ سروسز اینڈ ریگولیشنز کے چیئرمین سینیٹر سجاد حسین طوری کی صدار ت میں منعقد ہونے والے اجلاس میں کمیٹی کی سفارشات پر عمل درآمد ،اسلام آباد کے تعلیمی اداروں میں طلبا کی بڑی تعداد میں منشیات اور تمباکو کے استعمال میں بڑھتے ہوئے اضافے ، سینیٹر محمد اعظم خان سواتی کی طرف سے انسانی اعضا اور ٹیشوز کی پیوند کاری ترمیمی بل 2016 کا ایجنڈا زیر بحث آیا۔ اجلاس میں قائد اعظم یونیورسٹی کے بعد سکولز ، کالجز میں بھی منشیات کے بے دریغ استعمال کا انکشاف کیا گیا۔ میڈیارپورٹ کے مطابق وزارت صحت حکام نے کمیٹی کو بتایا کہ سروے کے مطابق ، اسلام آباد سمیت پانچ شہروں کے تعلیمی اداروں میں 9.2فیصد طلبا جبکہ 4.1فیصد طالبات منشیات کی عادی ہیں۔ رکن کمیٹی خالدہ پروین نے وزارت کیڈ کی رپورٹ کا حوالہ دیتے ہوئے بتایا کہاسلام آباد کے تین ماڈل کالجز اور تین ماڈل سکولز میںمنشیات کا استعمال عام ہے۔ چیئر مین کمیٹی سینٹر نے تعلیمی اداروں میں منشیات کا استعمال روکنے کیلئے آئندہ اجلاس میں چیف کمشنر اسلام آباد اور اینٹی مارکوٹکس حکام کو طلب کر لیا ۔