اسلام آباد (صباح نیوز) مقبوضہ کشمیر میں بھارتی جارحیت اور نہتے کشمیریوں پر مظالم کے خلاف اسلام آباد میں احتجاجی مظاہرہ کیا گیا۔ حریت رہنما یاسین ملک کی اہلیہ کا کہنا ہے کہ یاسین ملک کو زندہ لاش بنا کر چھوڑ دیا گیا ہے۔اتوار کواسلام آباد نیشنل پریس کلب کے باہر مقبوضہ کشمیر میں بھارتی جارحیت اورکشمیریوں پر مظالم کے خلاف احتجاجی مظاہرہ کیا گیا۔حریت رہنما یاسین ملک کی اہلیہ مشال ملک نے مظاہرین سے خطاب میں کہا کہ مقبوضہ کشمیر میں لوگوں کو زہر دے کر مارا جا رہا ہے ،یاسین ملک کو بھی زہر دے کرزندہ لاش بنا دیا گیا ہے۔ عوامی مسیحا پارٹی کے آرگنائزر جے سالک نے کہا ہے کہ بھارت کو کشمیر میں مسلمانوں کے ساتھ ظلم و زیادتی کاسلسلہ روکنا ہوگا۔ بھارت مقبوضہ کمشیر میں انسانی حقوق کی پامالی کا مرتکب ہورہا ہے۔کشمیری رہنماﺅں نے اقوام متحدہ سے کشمیر میں بھارتی مظالم کا نوٹس لینے اور کشمیری کے حق کو تسلیم کرنے کا مطالبہ کیا ہے۔
