لاہور (خصوصی رپورٹ) محکمہ داخلہ پنجاب نے 10 سے 12 سال کے بچوں کے ذریعے ممکنہ دہشت گردی کا خطرہ ظاہر کرتے ہوئے متعلقہ اداروں کو چوکنا رہنے کی ہدایت کردی۔ حساس اداروں کی جانب سے فراہم معلومات کے تحت محکمہ داخلہ پنجاب نے متعلقہ اداروں کو مراسلہ جاری کیا ہے کہ افغانستان کے شہر کنڑ میں کالعدم تحریک طالبان سوات نے خودکش بمباروں کو تیار کیا ہے جن میں 10 سے 12 برس کے بچے بھی شامل ہیں۔ ان بچوں کو لاہور سمیت دیگر شہروں میں بھیجا جائے گا۔ لاہور کے ابدالی چوک کے قریب دو منزلہ سکول کی عمارت کو ٹارگٹ کیا جا سکتا ہے۔ مراسلے میں کہا گیا ہے کہ ممکنہ دہشت گردی سے نمٹنے کیلئے فوری اقدامات کیے جائیں، شہر میں ججوں اور عدالتوں کے باہر بھی سکیورٹی بڑھائی جائے، شہر کے داخلی اور خارجی راستوں پر ناکہ بندی کی جائے، افغان بستیوں میں پولیس اور حساس ادارے مشترکہ سرچ آپریشنز کریں۔
