اسلام آباد ( ویب ڈیسک ) چیف اکانومسٹ پاکستان ڈاکٹرندیم جاوید نے کہا ہے کہ چین پاکستان اقتصادی راہداری منصوبے (سی پیک) کے آغاز سے آئندہ دو سال کے دوران 23لاکھ 20ہزار افراد کو روزگار ملے گا جس سے بے روزگاری کی شرح کو کم کرنے میںمعاونت حاصل ہوگی۔ چیف اکانومسٹ پاکستان ڈاکٹرندیم جاوید نے کہا کہ سال 2017-18ءکے دوران بے روزگار افرادی قوت میں2.32 ملین کی کمی واقع ہوگی۔ انہوں نے کہا کہ جولائی2017ءتک ملک میں توانائی کی طلب اور رسد میں موجود فرق ختم ہوجائے گا کیونکہ سی پیک بنیادی طور پر جنوبی ایشیاءکے ممالک کے باہمی رابطوں کا پروگرام ہے جس کے تحت توانائی کے مسائل پربھی قابو پایا جائےگا۔ انہوں نے کہا کہ سال 2018ءتک ملک میں بجلی کی پیداوار مقامی ضروریات سے بڑھنے کی توقع ہے۔ ڈاکٹرندیم جاوید نے کہا کہ سی پیک کی تکمیل سے نہ صرف پاکستان کی اقتصادی ترقی کے فروغ میں مدد ملے گی بلکہ اس سے خطے کے دیگرممالک کی تجارتی سرگرمیوں میں بھی اضافہ ہوگا اورغربت کے خاتمہ میں مدد ملے گی۔

لاہور( ویب ڈیسک ) پاکستان مایہ ناز ایٹمی سائنسدان ڈاکٹرثمرمبارک مند نے کہاہے کہ امریکہ اورروس کے بعدپاکستان کامیزائل سسٹم تیسرے نمبرپرہے۔ایک تقریب سے خطاب کرتے ہوئے ا نہوں نے کہا کہ نصرمیزائل ایسانیوکلیئرمیزائل ہے جوامریکہ کے پاس بھی نہیں، پاکستانی قوم کااصل چہرہ باصلاحیت نوجوان ہیں، ہماراوطن عزیز دنیاکی چھٹی ایٹمی طاقت ہے ۔انہوں نے کہا کہ پاکستان کا دفاع مضبوط سے مضبوط تر ہوتا جارہا ہے اور دشمن کسی غلط فہمی میں نہ رہے اب پاکستان کے دشمن کو ہمارے خلاف کسی مہم جوئی سے پہلے ہزار بار سوچنا پڑے گا۔

پشاور( ویب ڈیسک ) خیبرپختونخواہ میں جعلی کرنسی چھاپنے والے نیٹ ورک کا سراغ لگا لیا گیا ، گرفتار افغان باشندے نے بھارت اور افغانستان کے ملوث ہونے کا اعتراف کرلیا ۔تفصیلات کے مطابق پاکستان پر معاشی یلغار کیلئے بھارت اور افغانستان نے گٹھ جوڑ کر لیا اور ممالک دونوں خیبرپختونخواہ میں جعلی کرنسی کیلئے متحرک ہوگئے۔ پولیس کے مطابق نیٹ ورک صوبے اور قبائلی علاقوں میں کام کر رہا ہے۔ نیٹ ورک کا سراغ لگاکر ایک افغان باشندے کو حراست میں لے لیا جس کے قبضے سے بڑی تعداد میں جعلی کرنسی بھی برآمد کرلی۔ افغان باشندہ این ڈی ایس سے رابطے میں تھا۔ذرائع کے مطابق گرفتار ملزم نے انکشاف کیا ہے کہ جعلی کرنسی کے نیٹ ورک کے پیچھے بھارت اور افغانستان ہیں جو ملکر پاکستان کو معاشی طور پر کمزور کرنا چاہتے ہیں ۔ذرائع کے مطابق ملزم نے مزید انکشافات کی بھی توقع کی جارہی ہے ۔