لاہور(کلچرل رپورٹر) ملک میں بارش اور برفباری کے نئے سلسلے سے ثقافتی سرگرمیاں بھی متاثرہوئی ہیں جس سے شمالی علاقوں میں موجود کئی یونٹ مشکلات کا شکار ہیں۔ذرائع نے بتایا ہے کہ ان دنوں مختلف ڈراموں کی ریکارڈنگ اور فلموں کی شوٹنگ مری،ایبٹ آباد، کالام ،میرپور اور ایبٹ آباد کے علاقوں میں جاری ہے جس میں بہت سے فنکار حصہ لے رہے ہیں۔ گزشتہ روزہونے والی بارش اور برفباری کے باعث کاکول کے نزدیک پروڈیوسر حسن ضیاءکی فلم”مہرالنسا وی لب یو“کے یونٹ کو شدیددشواری کا سامنا کرنا پڑا جہاں دانش تیمور، ثنا جاوید اور نگاہ حسین سمیت دیگر لوگ موجود ہیں۔ فنکار برفباری کی وجہ سے ہوٹلوں میں قید ہوکررہ گئے جبکہ شوٹنگ کینسل کردی گئی۔ بارش کے باعث پی ٹی وی کے پروڈیوسر شوکت چنگیزی کی سیریل”رسمیں“ کی میرپورمیں جاری ریکارڈنگ بھی متاثر ہوئی جہاں اداکارہ صندل،رائدعالم اورعزیقہ ڈینئل سمیت دیر فنکار موجود ہیں۔ لاہور میں بھی بارش کے باعث دوتقریبات ملتوی کردی گئیں۔

جاوید شیخ کا فنی سفر ریڈیو سے شروع ہوا پھر حسینہ معین کے ڈراموں میں بطور ہیرو مرکزی رول کیے مگر رجحان چونکہ فلم کی طرف تھا اس لئے جلد ہی اداکاری کے ساتھ ساتھ فلمساز ی اور پروڈکشن کے شعبے میں آگئے۔ جاوید شیخ 8 اکتوبر 1954ءکو راولپنڈی میں پیدا ہوئے۔ راولپنڈی کی پنجابی فیملی سے ان کا تعلق ہے۔ ڈراموں کی دنیا سے جب فلم کی طرف آئے تو 14 دسمبر 1974ءکو ان کی فلم ”دھماکہ“ ریلیز ہوئی۔ اس کے بعد 1975ءمیں ”مشکل “بنائی۔ 2002ءمیں جاوید شیخ نے ”یہ دل آپ کا ہوا“ بنائی جس میں خود انہوں نے بھی مہمان اداکار کے طور پر کام کیا۔ جب پاکستانی سینما زوال پذیر ہوا تو جاوید شیخ نے بھارت کارخ کیا۔ وہاں 2005ءمیں فلم شکار‘ 2006ءمیں جان من میں کام کیا اور خاصی پذیرائی حاصل ہوئی۔ اس کے بعد نمستے لندن‘ اوم شانتی میں اداکاری کی۔ اسی دوران جب فراغت ملی تو پاکستان آگئے۔ یہاں انہوں نے ”میں ایک دن لوٹ آﺅنگا“ بنائی جس میں جاوید شیخ نے سپورٹنگ رول کیا۔ جاوید شیخ نے اپنا فلمی سفر بطور فلم ساز اور پروڈیوسر جاری رکھا مگر جب بڑے بجٹ کی فلم ”کھلے آسمان کے نیجے “بنائی تو انہیں اس میں 80 ملین یعنی 8 کروڑ کا نقصان ہوا حالانکہ اس فلم کی نمائش پاکستان‘ بھارت‘ امریکہ‘ آسٹریلیا اور عرب امارات میں ہوئی تھی مگر فنی وجوہات اور کمزور کہانی کی وجہ سے کامیاب نہ ہوسکی۔ جاوید شیخ کی ذاتی زندگی بھی خاصی ہنگامہ خیز رہی۔ انہوں نے پہلی شادی زینت منگی سے کی جو اس دور میں ٹی وی اور فلم پر سپورٹنگ رول کرتی رہیں۔ زینت منگی سے بیٹی مومل شیخ اور بیٹاشہزاد شیخ ہیں تاہم زینت منگی سے علیحدگی کے بعد ان کے کئی فلم ایکٹریسوں سے دوستی رہی جن میں نیلی اور سلمیٰ آغا پر فہرست ہیںمگر جاوید شیخ اس الزام کوتسلیم نہیں کرتے۔ جاوید شیخ کے بھائی سلیم شیخ بھی شوبز کی دنیا سے وابستہ ہیں جبکہ ان کے بہنوئی بہروز سبزواری کی ٹیلی ویژن پر اپنی پہچان ہے اور قاچہ ان کی شناخت ہے۔ ان دنوں جاوید شیخ کی بیٹی مومل شیخ بھی بھارتی فلموں میں کام کررہی ہیں، مومل کا کہنا ہے کہ بھارتی فلم انڈسٹری اسے راس آ گئی ہے ۔ عنقریب وہ بڑے ہیروز کے ساتھ جلوہ گر ہونگی اور جاوید شیخ بیٹی کی کامیابی کےلئے خاصی جدوجہد کررہے ہیں۔

لاہور(شوبز ڈیسک) اداکارہ عروہ حسین نے کہا ہے کہ پاکستانی فلموں کا معیاراورکام کرنے والے نوجوانوں کا انداز بہت الگ ہے‘ ان کی شب وروزمحنت کودیکھتے ہوئے اب یہ کہنا غلط نہ ہوگا بہت جلد پاکستان فلم انڈسٹری دنیا کی بڑی فلم انڈسٹریوں کا حصہ بن جائے گی۔اپنے اےک انٹرو ےو مےں عروہ حسےن نے کہا کہ ماڈلنگ اورٹی وی ڈراموں کے ساتھ جب مجھے فلم میں کام کرنے کی پیشکش ہوئی تومیں نے اس آفرکوقبول کیا اورپھرہماری فلم کوبہترین رسپانس بھی ملا اس دوران بھی بہت کچھ سیکھنے کو ملا‘ کامیابی اورناکامی ایک الگ چیز ہے لیکن یہ بات کہنے میں کوئی دقت محسوس نہیں ہورہی ہے کہ ہماری فلموں کے معیار کی وجہ سے ایک مرتبہ پھرسے لوگ اپنی فیملیز کو سینما گھروں تک لارہے ہیں۔

لاہور(کلچرل رپورٹر)بالی وڈ کے معروف کامیڈین جانی لیورنے پاکستانی اداکار اظہررنگیلاکو دورحاضرکا بہترین پرفارمرقراردیا ہے ۔جانی لیور نے گزشتہ روز اپنا ایک وڈیو کلپ اظہر رنگیلاکو بھیجا جس میں انہوں نے کہا کہ آپ کی پرفارمنس نے مجھے پاگل بنادیا ہے، آپ بہت ہی بہترین آرٹسٹ ہیں۔،میں نے آج تک آپ جیسی پرفارمنس اور ٹائمنگ کسی اور فنکارمیں نہیں دیکھی۔انہوں نے اظہر رنگیلا کے ایک ٹی وی شوکا حوالہ دیتے ہوئے کہا کہ انہوں نے جس طرح اس میں مہدی حسن کی کاپی کی ہے وہ شاید آج تک کوئی اور نہ کرسکا۔اس بارے میں اظہررنگیلا نے”خبریں“سے گفتگو کرتے ہوئے کہا کہ جانی لیورکے یہ الفاظ میرے لئے کسی سرمائے سے کم نہیں کیونکہ جس طرح انہوں نے میرے ٹیلنٹ کی تعریف کی ہے کسی اورنے نہیں کی۔ذرائع نے بتایا ہے کہ جانی لیور نے اظہررنگیلا بارے گوونداکو بھی بتایا جو جلد ہی انہیں بھارت مدعوکریں گے۔

لاہور (شوبزڈیسک) اداکارہ و گلوکارہ رابی پیرزادہ کے دفتر میں انڈین پائتھن، بلیک کوبرا، رسل سنیککا بسیرا ہو گیا ۔جہاں لوگ یہاں آتے ہیں تو سانپ ان کے لیے تفریح کا باعث بن جاتے ہیں جن میں بلیک کوبرا نگاہوں کا مرکز بنا ہوا ہے۔رابی پیرزادہ کو سانپ پالنے کا جنون ہے، اس نے لاہور میں واقع اپنے بیوٹی سیلون میں بھی سانپوں کے لئے خاص اہتمام کیا ہے۔ کسٹمر دیکھتے ہیں اور چونک جاتے ہیں۔ بننے سنورنے کیلئے آئی خواتین کا دھیان سانپوں کی طرف ہی رہتا ہے۔ ان خطرناک سانپوں کا خیال رکھنا بھی انتہائی مشکل ہے۔ یہ سانپ بے ضرر ہیںلیکن ان کا خوف سروں پر منڈلاتا رہتا ہے اور کچھ مانوس بھی ہو جاتے ہیں اور سیلفیاں بھی اتارتے ہیں۔