ممبئی /لاہور(ویب ڈیسک ) بھارت نے پاکستان ہاکی فیڈریشن (پی ایچ ایف)پر غلط بیانی کا الزام عائد کرتے ہوئے دھمکی دی ہے کہ تحریری طور پر غیر مشروط معافی مانگنے تک بھارت پاکستان ہاکی ٹیم کے ساتھ کوئی دو طرفہ سیریز نہیں کھیلے گا۔ ہاکی انڈیا کے ترجمان ڈاکٹر آر پی سنگھ نے کہا کہ یہ انتہائی شرمناک بات ہے کہ پاکستان ہاکی فیڈریشن نے ایک بار پھر 2014 کے ایف آئی ایچ چیمپئنز ٹرافی کے سیمی فائنل کے بعد پیش آنے والے واقعے کو بہانے کے طور پر استعمال کیا اور جونیئر ورلڈ کپ 2016 میں پاکستان ٹیم کی عدم شرکت کے پیچھے اپنی نااہلی کو بھارت پر الزام تراشی کرکے چھپانے کی کوشش کی۔ اس غلط بیانی کو مدنظر رکھتے ہوئے ہاکی انڈیا نے یہ فیصلہ کیا ہے کہ جب تک پاکستان 2014 چیمپئنز ٹرافی میں اپنی ٹیم کے غیر پیشہ وارانہ روئیے اور ہاکی انڈیا کے خلاف مسلسل جھوٹ بولنے پر تحریری و غیر مشروط معافی نامہ جمع نہیں کراتا بھارت پاکستان سے کوئی بھی دو طرفہ سیریز نہیں کھیلے گا۔ پی ایچ ایف کو اپنی نااہلی کی ذمہ داری قبول کرنی چاہیے اور اپنے شائقین کو خوش کرنے کے لیے بھارت پر الزام تراشیاں کرنے سے گریز کرنا چاہیے۔ ترجمان نے کہا کہ پاکستان ہاکی فیڈریشن کو چاہیے کہ وہ ایک ادارے کے طور پر کام کرنا سیکھے اور اپنے داخلی مسائل کا ذمہ دار دوسروں کا ٹھہرانا بند کرے۔ پاکستان ہاکی فیڈریشن (پی ایچ ایف)کے سیکریٹری شہباز احمد نےکہا ہے کہ بھارت کی جانب سے جاری کئے جانے والے بیان کا جائزہ لیا جا رہا ہے اور جلد پاکستان اپنے لائحہ عمل کا اعلان کرے گا۔ واضح رہے کہ ہاکی انڈیا کی جانب سے وضاحتی بیان پاکستان ہاکی فیڈریشن کے سیکریٹری شہباز احمد کے دسمبر میں دئیے جانے والے بیانات کے تقریبا ایک ماہ بعد جاری کیا گیا تھا۔

لاہور(ویب ڈیسک ) پاکستان کرکٹ بورڈ کے چیئرمین شہریار خان نے کہا ہے کہ اگلے ماہ کے دوران پاکستان کرکٹ کی بہتری کے لئے اہم ترین فیصلے کریں گے۔ آسٹریلیا میں شکست سے مایوس ہوئی لیکن ایک سیریز کے نتائج کی بنیاد پر اکھاڑ پچھاڑ نہیں کی جائے گی۔ ٹیسٹ اور ون ڈے کپتان کی تبدیلی کا آپشن موجود ہے لیکن جلد بازی میں کوئی جذباتی فیصلہ نہیں کریں گے۔ مصباح الحق نے وقت مانگا ہے۔ وہ اپنے مستقبل کا اعلان کریں پھر بورڈ بھی اپنا لائحہ عمل اعلان کرے گا۔ مصباح الحق اوراظہر علی کو تبدیل کرنے کا فیصلہ کوچ مکی آرتھر کی مشاورت سے کریں گے۔ان خیالات کا اظہار انہوںنے اپنے ایک انٹرویو میں کیا ۔ا نہوںنے کہا کہ چیف سلیکٹر انضمام الحق کپتان کے بارے میں اپنی رائے ضرور دے سکتے ہیں لیکن کپتان کی تبدیلی میرا استحقاق ہے۔ ٹیسٹ کپتان مصباح الحق اور ون ڈے کپتان اظہر علی کی تبدیلی کے حوالے سے جلد بازی میں کوئی فیصلہ نہیں کرنا چاہتے اور نہ ہی کپتان کی تبدیلی کی قیاس آرائیوں کو پر کوئی تبصرہ کروں گا۔ شہریار خان نے کہا کہ پاکستان کرکٹ ٹیم کا دورہ آسٹریلیا مایوس کن ضرور رہا ہے لیکن اسے تباہ کن قرار نہیں دیا جاسکتا۔ آسٹریلیا کی سیریز سے کچھ مثبت باتیں بھی سامنے آئی ہیں۔ یہ پہلا موقع نہیں ہے جب پاکستان ٹیم آسٹریلیا میں سیریز ہاری ہے۔ ایشیائی ٹیمیں ماضی میں بھی آسٹریلیا میں ہارتی رہی ہیں اس لئے ایک سیریز کی ہار پر اکھاڑ پچھاڑ نہیں کریں گے۔ شہریار خان نے کہا کہ پاکستان ٹیم میں آئے دن نیا ٹیلنٹ آتا رہتا ہے اگر مستقبل میں بھی نئے خون کی ضرورت ہے تو نئے کھلاڑیوں کو ضرور شامل کریں گے۔ پاکستان سپر لیگ کے دوران دبئی میں مکی آرتھر، انضمام الحق اور دیگر اہم لوگوں سے مشاروت کروں گا۔ مصباح الحق سے پوچھا ہے کہ آپ کے کیا ارادے ہیں۔ ان سے پوچھا گیا کہ پاکستان کرکٹ بورڈ نے ٹیسٹ کپتان کو تبدیل کرنے کا ارادہ کر لیا ہے تو نہوں نے کہا کہ مصباح الحق کے اعلان کے بعد بورڈ اپنے آپشن اوپن کرے گا۔ ایک سوال کے جواب میں شہر یار خان نے کہا کہ کپتان کا اعلان میرا استحقاق ہے۔ انضمام اپنی رائے ضرور دیں لیکن کپتان کو کسی کے کہنے پر تبدیل نہیں کروں گا۔

انگلینڈ (اے این این)باکسر عامر خان نے والد اور اہل خانہ کو کاروبار سے نکال دیا ۔بیوی اور والدین کے درمیان جاری تنازع میں مبتلا باکسر عامر خان مسائل سے تنگ آگئے ہیں ۔غیر ملکی میڈیا رپورٹس کے مطابق باکسر عامر خان نے غیر اخلاقی ویڈیو منظر عام پر لانے کی پاداش میں والدشاہ خان اور خاندان کے دیگر افراد کو اپنی مینجمنٹ ٹیم سے نکال دیا ہے ۔ شاہ خان 2004سے ایتھن اولمپکس کے بعد سے عامر خان کی ٹیم کا حصہ تھے تاہم اب باکسر نے انکشاف کیا ہے کہ انہوں نے اپنے والد شاہ خان ، چچا طاہر اور ساج محمد کو باکسنگ مینجمنٹ ٹیم سے الگ کر دیا ہے ۔میں اپنے اہل خانہ سے بے حد محبت کرتا ہوں مگر میرا کاروبار باکسنگ ہے اور اس کو چلانے کیلئے نئی ٹیم بنائی جائے گی ۔باکسر عامر خان نے مزید کہا کہ میں اپنے والد اور والدہ کا بے پناہ احترام کرتا ہوں اور ان سے کاروباری تعلقات کی بجائے خاندانی تعلقات قائم رکھنا چاہتا ہوں ۔میں اپنے والدہ کو الگے میچ پر مدعو کروں گا اور امید ہے وہ میچ دیکھنے ضرور آئیں گے ۔عامر خان نے کہا کہ جب کاروبار اور خاندان کو اکٹھا کیا جاتا ہے تو مشکلات پیدا ہوتی ہیں اس لیے میں انہیں الگ الگ رکھنا چاہتا ہوں ۔

ناگپور(ویب ڈیسک ) دوسرے ٹوئنٹی 20 میں بھارتی امپائر کی دھاندلی پر انگلش ٹیم بھڑک اٹھی۔بھارت اور انگلینڈ کے درمیان ناگپور میں کھیلے گئے دوسرے ٹوئنٹی 20میں امپائرنگ کا معیار انتہائی ناقص تھا خاص طور پر مقامی امپائر شمس الدین نے 2اہم مواقع پر بھارت کو بھرپور مدد فراہم کی۔ پہلے انہوں نے ویرات کوہلی کو کرس جورڈن کی گیند پر ناٹ آﺅٹ قرار دیا جبکہ وہ واضح ایل بی ڈبلیو تھے۔ اس وقت بھارتی کپتان کا اسکور7 تھا، چانس ملنے کے بعد انھوں نے مزید 14 قیمتی رنز کا اضافہ کیا، پھر شمس الدین نے ہی آخری اوور میں جوئے روٹ کے خلاف غلط فیصلہ دے کر میچ بھارت کی جھولی میں ڈال دیا، اس وقت مہمان ٹیم کو فتح کیلئے آخری 6 بالز پر 8 رنز چاہیے تھے، امپائر نے روٹ کو جسپریت بمراہ کی گیند پر ایل بی ڈبلیو قرار دیا جبکہ گیند کو پیڈ سے قبل بیٹ کے اندرونی کنارے سے ٹکراتے صاف دیکھا گیا تھا۔ ویسے بھی گیند کی ڈائریکشن ایسی تھی کہ وہ پیڈ پر لگتی تب بھی ایل بی ڈبلیو نہ ہوتا۔ادھر سیٹ بیٹسمین کے آٹ ہونے کے بعد انگلش ٹیم مطلوبہ ہدف حاصل نہ کرپائی اور 6 رنز سے ہارگئی تھی۔ اس دھاندلی پر برہم انگلش کپتان ایون مورگن نے معاملہ میچ ریفری اینڈی پائی کرافٹ کے سامنے اٹھانے کا اعلان کرنے کے ساتھ مختصر ترین فارمیٹ میں بھی ڈی آر ایس کے نفاذ کا مطالبہ کیا۔ انہوں نے کہا کہ جب دیگر فارمیٹس میں ٹیکنالوجی استعمال ہورہی ہے توپھر اس طرز میں کیا مسئلہ ہے؟واضح رہے کہ اگر یہ باہمی سیریز کے بجائے کسی ورلڈ کپ کا مقابلہ ہوتا یا پھر فائنل کھیلا جارہا ہوتا تو کتنا بڑا نقصان ہوسکتا تھا۔