ممبئی(شوبز ڈیسک) بھارتی اداکارہ کلکی کو چلن نے کہا ہے کہ پاکستان میں ان کا گذرا ہوا وقت ہمیشہ کیلئے انکی یادوں میں رہے گا۔ پاکستان کے دورے کے دوران انہوں نے بہت کچھ سیکھا اور پاکستانیوں کارویہ بہت شاندار رہا۔ کلکی جو صبیحہ سومر وکی دستاویزی فلم ” آزمائش ٹریلز آف لائف “ میں کام کیلئے پاکستان آئی تھیں نے انٹرویو میں کہا کہ انہوں نے صبیحہ سے بہت کچھ سیکھا ۔ انہیں صبیحہ نہایت حساس ہدایتکار ہ لگیں ۔ پاکستان ایک خوبصورت ملک ہے جو دلکش مناظر سے بھرا ہوا ہے ، اس ملک کی بہت سی جہتیں اور پرت ہیں ۔ کلکی نے کہا کہ وہاں عکسبندی کے دوران دو ایسے لمحات آئے جو تا حیات ان کی یادوں میں ثبت ہوگئے ہیں ۔ ایک سندھ کے صحرا میں شوٹنگ کا وقت ہے جہاں غریبوں سے بھی غریب لوگ دیکھے جو پانی کے حصول کیلئے گھنٹوں سفر کرتے ہیں۔ ان لوگوں کے ساتھ میل جول نے مجھے بہت کچھ سکھایا اور اس کا بے حد اثر میرے پر ہے ۔ دوسرا یاد گار تجربہ اسلام آباد کے مضافات میں پہاڑ کی چوٹی چڑھتے ہوئے ہوا جب ہم چوٹی پر سخت محنت کے بعد پہنچے تو بڑا اچھا لگا ۔ کلکی نے کہا کہ ان کی فلم یقیناً کامیاب ہوگی۔
