ممبئی (خصوصی رپورٹ) بالی ووڈ اداکارہ پرینیتی چوپڑا نے کم عمری میں جنسی طور پر ہراساں کیے جانے کا انکشاف کیا ہے۔ بالی ووڈ میں کئی اداکارائیں جنسی طور پر ہراساں کئے جانے کا اعتراف کر چکی ہیں جس میں سونم کپور بھی شامل ہیں لیکن اب ایک اور اداکارہ نے اپنے ساتھ پیش آنے والا واقعہ بیان کر کے بھارت میں ہوس کے پجاریوں کو بے نقاب کیا ہے۔ بالی ووڈ کی صف اول کی اداکارہ پریانکا چوپڑا کی کزن اور اداکارہ پرینیتی چوپڑا نے ممبئی میں ”ویمن سیلف ڈیفنس گریجویشن ڈے“ کے سلسلے میں منعقدہ تقریب میں شرکت کی جہاں انہوں نے بچپن میں جنسی طور پر ہراساں کئے جانے کا انکشاف کیا ہے۔ اداکارہ کا کہنا تھا کہ مجھے سکول جانے سے ڈر لگتا تھا جس کی اصل وجہ پڑھائی نہیں بلکہ راستے میں لڑکوں کی چھیڑخانی تھی جبکہ غربت کی وجہ سے بس یا گاڑی کی بجائے سائیکل کے ذریعے سکول جاتی تھی اور راستے میں لڑکے نازیبا حرکت کرنے کی کوشش کرتے جس سے انتہائی خوفزدہ ہو جاتی تھی۔ والدین سے شکایت کے باوجود بھی روز اسی عمل سے گزرنا پڑتا تھا جس کے باعث اپنے والدین سے نفرت ہوگئی تھی لیکن شاید ان کا یہ عمل مجھے مضبوط بنانے کے لیے تھا۔
