کراچی (آن لائن )پاک سرزمین پارٹی پاکستان کے چیئرمین مصطفی کمال نے کہا ہے کہ الطاف حسین شیطانوں کے پیر ہیں ،بڑے بڑے شیطان اس کے مرید بن کر اس کے سامنے ہاتھ جوڑے کھڑے رہتے ہیں ،ابلیس بھی الطاف حسین کے سامنے ہاتھ جوڑ کر کھڑا ہوتا ہوگا،ابلیس بھی اتنی نیچ سوچ نہیں رکھتا جہاں سے الطاف حسین سوچنا شروع کرتا ہے،ان خیالات کا اظہار مصطفیٰ کمال نے پاک سرزمین پارٹی کے مرکزی دفتر پاکستان ہاو¿س میں پاک سرزمین پارٹی کے انتخابی نشان ڈولفن کی تقریب رونمائی کے موقع پر کارکنان سے خطاب کرتے ہوئے کیا،اس موقع پر پی ایس پی کے صدر انیس قائم خانی اور سینئر رہنماءڈاکٹر صغیر احمد و دیگر نے بھی خطاب کیا۔اگرایم کیو ایم پاکستان نہ ہوتی تو ہمارے کارکنان شہید نہ ہوتے ،ایم کیو ایم پاکستان الطاف حسین کا سیاسی ونگ ہے ،ہم ایم کیو ایم پاکستان اور لندن کو الگ الگ نہیں دیکھتے جس بھی پارٹی کے ساتھ ایم کیو ایم کا نام لگا ہوگا وہ الطاف حسین کی ہی پارٹی ہوسکتی ہے،وہ پارٹی انسانیت کی دشمن ہی کہلائے گی،انہوں نے کہاکہ اگر22اگست کو فاروق ستار ایم کیو ایم پاکستان کاڈرامہ نہ کرتا تو الطاف حسین نست ونابود ہوچکا تھا اس کی سیاسی موت ہوچکی تھی ،الطاف حسین کومے میں جاچکا تھا لیکن فاروق ستار اور جن لوگوں نے ایم کیو ایم پاکستان بنائی ہے انہوں نے اس کے مردہ ہوتے جسم کو انجیکشن لگالگا کر اور خون چڑھا چڑھا کر اس کو دوبارہ زندہ کرنے کی کوشش کی ہے۔آج الطاف حسین میں اتنی ہمت نہیں ہے کہ کراچی کو بند کرسکے ،آج وہ آڈیو بیان کے ذریعے بھٹکے ہوئے لوگوں مزید گمراہ کررہا ہے۔مصطفی کمال نے کہا کہ شہداءکی قربانیاں رائیگاں نہیں جانے دیں گے،ہمارے شہید کارکنان کراچی کے بچوں کے لئے پانی مانگ رہے تھے ،کراچی کے حقوق کے لئے جدوجہد کررہے تھے ،وہ ان کے لئے بھی پانی مانگ رہے تھے جنہوں نے انہیں قتل کیا ہے ،ہمارا رب شہداءکی قربانیاں ضائع نہیں ہونے دےگا،اللہ سب سے بہتر انصاف کرنے والا ہے ،ہم پاکستان میں اللہ کی رضا کیلئے آئے تھے،ہم نے سینیٹرشپ اور ایم کیو ایم کے عہدے چھوڑے پاکستان کی عوام کیلئے سب کچھ چھوڑا۔انہوں نے کہاکہ ندیم نصرت کے رشتہ دار کے اٹھنے کے بعد انہوں نے کہاکہ انہیں پاکستان کی عدالتوں میں پیش کیا جائے ،لیکن ندیم نصرت کس منہ سے ایسا کہہ رہے ہیں کیوں کہ وہ تو پاکستان کو مانتے ہی نہیں ہیں ،جب پاکستان کو مانتے ہی نہیں تو پاکستان کی عدالتوں سے انصاف کی بات کس منہ سے کررہے ہیں ۔
