لاہور (وقائع نگار) جماعت اسلامی پاکستان کے امیر سینیٹر سراج الحق نے کہا ہے کہ کسی ایک جماعت کی خواہش پر قبل ازوقت انتخابات نہیں ہو سکتے، قبل از وقت انتخابات کرائے گئے کہ موجودہ حکمران جماعت کو سیاسی شہید بننے کا موقع ملے گا۔ انہوں نے کہا کہ برمامیں مسلمانوں کے قتل عام اور نسل کشی کے خلاف حکومت پاکستان سمیت 56 اسلامی ممالک کو برما کے سفیروں کو نکال دینا چاہیے۔ ایک نا اہل شخص جو آئین کی 62، 63 پر پورا نہیں اترتا اسے سیاسی جماعت کا سربراہ بنانا سپریم کورٹ کے فیصلوں پر شب خون مارنے کے مترادف ہے۔ ان خیالات کا اظہار انہوں نے گزشتہ روز جماعت اسلامی کے ہیڈکوارٹر منصورہ میں جماعت اسلامی پاکستان کی مجلس عاملہ کے اجلاس کے بعد میڈیا سے گفتگو کرتے ہوئے کیا۔ اس موقع پر جماعت اسلامی پاکستان کے سیکرٹری جنرل لیاقت بلوچ، اسد اللہ بھٹو اور دیگر رہنما بھی موجود تھے۔ سینیٹر سراج الحق نے کہا کہ انتخابی اصلاحات کے لئے حکومت نے پارلیمنٹ کے اندر کمیٹی تشکیل دی تھی لیکن اس حوالے سے سینٹ میں جو بل منظور کیا گیا ہے اس نے انتخابی اصلاحات کو مشکوک بنا دیا ہے۔ انہوں نے کہا کہ ایک ایسا شخص جو آئین کی دفعہ کی 62، 63 پر پورا نہیں اترتا اور اسے سپریم کورٹ نا اہل قرار دے چکی ہے اسے سیاسی جماعت کا سربراہ بنانا سپریم کورٹ کے فیصلوں پر شب خون مارنے کے مترادف ہو گا، ایسا بل فی الفور واپس ہونا چاہیے۔ جمہوری اور مہذب معاشروں میں حق کے فیصلہ پر مٹھائیاں تقیم کی جاتی ہیں جبکہ ایسے بلوں کی منظوری پر احتجاج کیا جاتا ہے ۔ انہوں نے کہا کہ ایک نا اہل فرد کیلئے ترمیم بادشاہت میں ممکن ہے جمہوریت میں نہیں۔ سرحد پار سے فائرنگ کر کے لیفٹیننٹ ارسلان کو شہید کرنے پر انہوں نے کہا کہ ہماری حکومت کی جانب سے بھارت کو جواب نہیں مل رہا اور وہ ہمیں مسلسل حملہ کی دھمکیاں دے رہا ہے۔ انہوں نے کہا کہ حکومت کو اپنی پالیسی کو واضح کرنا چاہیے کہ دشمن کے ساتھ دوستی اور تجارت کی پالیسی اپنائی نہیں جا سکتی۔ بھارت کشمیر سے بھی نکلنے کیلئے تیار نہیں اور نہتے کشمیریوں کو مسلسل ظلم و ستم کا نشانہ بنانے کے ساتھ ساتھ شہید کر رہا ہے۔ ایسی حکومت کے ساتھ تعلقات قائم نہیں رکھے جانے چاہیئں۔ روہنگیا میں مسلمانوں کے قتل عام اور نسل کشی کے حوالے سے انہوں نے کہا کہ روہنگیا میں پاکستان کو ترکی کی طرح کردار ادا کرتے ہوئے امت مسلمہ کی امامت کا کردار ادا کرنا چاہیے۔ انہوں نے پاکستان سمیت 56 اسلامی ممالک سے اپیل کی کہ اپنے ممالک سے برما کے سفیروں کو نکال دیں۔ ایک سوال کے جواب میں سینیٹر سراج الحق نے کہا کہ پیپلز پارٹی نے انتخابی اصلاحات سے متعلق جو ترامیم دیں وہ پوری انتخابی اصلاحات کی خلاف ورزی ہے ۔ انہوں نے کہا کہ عمران خان کی جانب سے ملک میں قبل از وقت انتخابات کا مطالبہ درست نہیں ہے ۔ الیکشن ایک پارٹی نہیں بلکہ تمام جماعتوں کی مرضی کے مطابق ہوتے ہیں۔ انہوں نے کہا کہ اگر قبل از وقت انتخابات ہوئے تو اسے حکمران جماعت مسلم لیگ ن کو سیاسی شہادتوں کا موقع ملے گا اور موجودہ حکمرانوں کو یہ کہنے کا موقع ملے گا کہ انہیں اپنی مدت پوری نہیں کرنے دی گئی ورنہ وہ آسمان سے تارے توڑلاتے ۔ انہوں نے کہا کہ انہیں سیاسی شہید بننے کا موقع نہیں دینا چاہیے۔ ہماری خواہش ہے کہ ن لیگ کارکردگی کی بنیاد پر انتخابات میں جائے، پھر دودھ کا دودھ اور پانی کا پانی ہو جائے گا۔

لاہور (ویب ڈیسک) بہت سے رجحانات کے ساتھ ہمارے سیاستدانوں میں کتے پالنے کا شوق بھی بڑھتا جارہا ہے کچھ عرصہ پہلے عمران خان کے کتے ”شیرو“ کو میڈیا پر بہت اہمیت حاصل رہی اور سب کی توجہ کا مرکز بنا رہا۔ ”شیرو“ عمران خان کا لاڈلہ اور وفادار کتا ہے جس کے بارے میں سنا گیا ہے کہ وہ اس کو گھر میں آزادانہ چھوڑتے ہیں اور وہ ایک فرد کی طرح بنی گالہ میں عمران خان کے ساتھ رہتا ہے حتیٰ کہ سوتا بھی عمران خان کے بیڈروم میں ہے۔ عمران خان تو اپنے ”شیرو“ سے بہت پیار کرتے ہیں لیکن جو لوگ عمران خان سے ملنے جاتے ہیں ان کو ضرور ان کے کتے سے مسئلہ ہوتا ہے کیونکہ وہ مہمانوں کے ساتھ آ کر بیٹھ جاتا ہے اور ان سے بھی لاڈیاں کرنے کی کوشش کرتا ہے۔ اب سب کو تو خان صاحب کی طرح کتوں سے پیار نہیں ہوتا۔ ایک مرتبہ عمران خان سے ملاقات کے بعد جسٹس وجیہہ الدین نے یہ بیان بھی دیا تھا کہ ہم عمران خان سے تو محبت کر سکتے ہیں لیکن ان کے کتوں سے نہیں اور خان صاحب کی سابقہ بیوی ریحام خان کو بھی ان کے کتوں سے پریشانی رہتی تھی کیونکہ وہ کتے اکثر خان صاحب کے بستر پر رہتے تھے۔ صرف خان صاحب ہی نہیں بلکہ بے نظیر بھٹو (شہید)، وسیم اختر، جنرل پرویز مشرف اور بہت سے سیاستدان اور معروف شخصیات بھی گھر میں کتے پالنے کی شوقین ہیں۔ جنرل پرویز مشرف کو ہر نسل کے کتے پالنے کا شوق ہے اور وہ اپنے عزیز و ا قارب کو اگر تحفہ دینا چاہیں تو تحفے میں کتا دیتے ہیں ان کے لئے یہ بہت بڑا تحفہ ہے اور اپنے قریبی دوستوں سے کتا تحفے میں لیکر بہت خوش بھی ہوتے ہیں۔ اپنی روزمرہ کی زندگی سے وہ اپنے کتوں کو بھی وقت دیتے ہیں اور ان کے ساتھ خوش رہتے ہیں۔ آج کل جہاں بہت سی بڑی شخصیات اور سیاستدانوں کی تصاویر پالتو جانوروں کے ساتھ سوشل میڈیا پر وائرل ہو رہی ہیں اسی طرح بختاور بھٹو کی ایک تصویر ہے جس میں وہ تین کتوں کے ساتھ کھیلتے ہوئے مسکرا رہی ہیں یہ تصویر بہت توجہ کا مرکز بنی ہوئی ہے۔ بختاور بھٹو کو بھی اپنے والدین کی طرح کتے پالنے اور ان کے ساتھ وقت گزارنے کا بے حد شوق ہے۔ انہوں نے اپنے کتوں کے لئے ڈاکٹر بھی رکھا ہے۔ اس کے ساتھ ساتھ ان کا کہنا ہے کہ وہ ایک سے زیادہ نسل کے کتے رکھنا پسند کرتی ہیں۔ کتوں کے کھانے کا وہ خود خیال رکھتی ہیں۔ آج کل سیاست کا ماحول بہت گرم رہنے کی وجہ سے شاید سیاستدانوں نے کتوں سے دل لگانا شروع کر دیا ہے اور اپنے اپنے کتوں کے ساتھ روزانہ سوشل میڈیا پر تصاویر جاری کر کے خوشی کا اظہار کیا جاتا ہے۔

لاہور (خصوصی نامہ نگار) مقامی عدالت نے تحریک انصاف کے چیئرمین عمران خان کی جانب سے پانامہ کیس میں خاموشی پر 10 ارب روپے کی پیشکش کے الزام پر وزیر اعلیٰ پنجاب محمد شہباز شریف کی جانب سے دائر ہرجانے کے دعوے کی سماعت 9 اکتوبر تک ملتوی کردی، ڈاکٹر بابر اعوان نے عمران خان کی جانب سے وکالت نامہ جمع کروا دیا۔ گزشتہ روز لاہور کے ایڈیشنل سیشن جج اظفر سلطان نے وزیر اعلیٰ پنجاب محمد شہباز شریف کی جانب سے دائر 10ارب روپے ہرجانے کے دعوے کی سماعت کی۔ شہباز شریف کی جانب سے موقف اختیار کیا گیا کہ عمران خان نے پانامہ لیکس کے معاملے پر دس ارب روپے رشوت کی پیشکش کا جھوٹا الزام عائد کیا جس کی وجہ سے نہ صرف ان کی ساکھ متاثر ہوئی بلکہ ان کو اور گھرانے کو شدید ذہنی اذیت کا سامنا بھی کرنا پڑا۔ عمران خان نے الزام عائد کیا تاہم اس کا کوئی ثبوت پیش نہیں کیا لہٰذا عمران خان کے بے بنیاد الزامات پر عدالت دس ارب ہرجانہ ادا کرنے کا حکم دے۔ ڈاکٹر بابر اعوان کی جانب سے عمران خان کے وکیل کی حیثیت سے وکالت نامہ جمع کروایا گیا جس پر عدالت نے جواب داخل کروانے کی ہدایت کرتے ہوئے سماعت 9 اکتوبر تک ملتوی کر دی۔ یاد رہے کہ تحریک انصاف کے چیئرمین عمران خان نے الزام عائد کیا تھا کہ پاناما کیس پر خاموشی اختیار کرنے کے لیے شہباز شریف کے قریبی ساتھی نے انہیں 10 ارب روپے بطور رشوت کی پیش کش کی تھی۔

اسلام آباد (مانیٹرنگ ڈیسک) عمران خان نے نا اہلی کیس میں منی ٹریل کی اصل دستاویزات سپریم کورٹ میں جمع کرا دیں۔ دستاویزات کےمطابق بنی گالہ اراضی شروع سےہی جمائمہ کی تھی۔ رقم بھی انہوں نے فراہم کی۔ چیئرمین پاکستان تحریک انصاف نے اپنے خلاف نااہلی کیس میں منی ٹریل کی اصل دستاویزات سپریم کورٹ میں جمع کرا دی ہیں۔ جمع کرائی جانے والی دستاویزات کے مطابق رقم کی واپسی میاں بیوی کے درمیان ادائیگی تھی ۔ کسی مجاز اتھارٹی کو ظاہر کرنا ضروری نہیں ۔ بنی گالہ اراضی کی منی ٹریل کی اصل دستاویزات متفرق دستاویزات کے ساتھ جمع کرائی گئی ہیں۔ دستاویزات میں بتایا گیا ہے کہ بنی گالہ اراضی پر موقف میں کبھی تبدیلی نہیں آئی بنی گالہ اراضی بے نامی نہیں بلکہ روز اول سے جمائمہ ہی کے نام تھی۔ پاورآف اٹارنی میں بے نامی کا لفظ حقائق کے مطابق نہیں۔عمران خان کی جانب سے بتایا گیا کہ بنی گالہ اراضی کی ابتدائی دو اقساط اپنے ذرائع سے جمع کرائیں۔ 65 لاکھ روہے ابتدائی اور 8 لاکھ آخری قسط کے علاوہ بقیہ تمام رقم کی ادائیگی جمائمہ نے کی۔ ابتدائی ادائیگی کو ٹیکس گوشواروں میں بھی ظاہر کیا گیا۔ ٹیکس گوشواروں میں 65 لاکھ روپے کی رقم جمائمہ کو بطور تحفہ ظاہرکی گئی۔دستاویزات کے مطابق جمائمہ کو رقم واپسی میاں بیوی کے درمیان ادائیگی تھی جو الیکشن کمیشن سمیت کسی مجاز اتھارٹی کو ظاہر کرنا ضروری نہیں۔ لندن فلیٹ 1 لاکھ 17 ہزار 500 پاﺅنڈ میں فروخت ہو، فلیٹ غیر ملکی آمدن سے خریدا گیا تھا جسے پاکستان میں ظاہر کرنا ضروری نہیں تھا۔عمران خان نے نیازی سروسز کے اکاﺅنٹس اور غیرملکی آمدن کا دستیاب ریکارڈ بھی جمع کرا دیا۔ دستاویزات میں جمائمہ کو رقم واپسی کی ادائیگی کی تفصیلات بھی شامل ہیں۔سپریم کورٹ نے عمران خان کے خلاف نااہلی کیس کی سماعت کل تک ملتوی کردی۔