لاہور، اسلام آباد (خبرنگار، مانیٹرنگ ڈیسک) پیپلزپارٹی کے سینئر رہنما اعتزاز احسن نے کہا ہے کہ الیکشن اصلاحات بل پر ووٹنگ ہوئی تو کئی حیران کن باتیں سامنے آئیں۔ پی ٹی آئی کے ایک ممبر جو وہاں موجود تھے ووٹنگ کے وقت غائب تھے۔ متحدہ کے میاں عتیق نے حکومت کو ووٹ دے دیا۔ نوازشریف کو روکا نہیں جا سکتا تھا کیونکہ دونوں ایوانوں میں ان کی اکثریت ہے۔ تاہم سینٹ جیسے ادارے میں پالیسی ٹریڈنگ ہوئی جو ایک دھبہ ہے۔ این اے 120 میں شکست کے ذمہ دار، گیلانی ودیگررہنما ہیں۔ پی پی امیدوار کا 1414 ووٹ لینا شرمناک ہے۔ نجی ٹی وی سے خصوصی گفتگو کرتے ہوئے انہوں نے کہا کہ حکومتی ارکان ایوان بالا میں بارگینگ کرتے نظر آئے۔ سعد رفیق نے اچھی سوداگری کی۔ عدالت نواز شریف کے ساتھ نرمی دکھا رہی ہے۔ نواز شریف بڑا دلچسپ کردار ادا کر رہے ہیں۔ حکومت بھی اپنی ہے اور اپوزیشن بھی خود بنے بیٹھے ہیں۔ نواز شریف تاخیری حربے استعمال کر رہے ہیں۔ وہ چاہتے ہیں کہ کچھ عرصہ کیلئے انہیں گرفتار کر لیا جائے۔ سانحہ ماڈل ٹاﺅن کیس شریف برادران کا پیچھا نہیں چھوڑے گا۔ جسٹس نوقی کا نجفی کمیشن عدالت اس سے پیچھے نہیں ہٹے گی۔ سنیٹر اعتزاز احسن نے کہا ہے کہ پانامہ لیکس کی طرح سانحہ ماڈل ٹاﺅن پر عدالتی کمشن کی رپورٹ بھی حکمرانوں کے گلے کا طوق بنے گی، (ن) لیگ کی قیادت جس راہ پر چل رہی ہے اس کے نتائج انتہائی خطرناک ہوں گے۔ پیپلز پارٹی موجودہ حالات پر گہری نظر رکھے ہوئے ہے اور وقت آنے پر فیصلے کئے جائیں گے۔ ایک انٹرویو میں اعتزاز احسن نے کہا کہ سیاست اور حکومت میں ” تجربہ کاری“ کا ڈھنڈورا پیٹنے والے آج جن حالات سے دوچار ہیں وہ سب کے سامنے ہے۔ ملک کے انتظامی امور بری طرح متاثر ہو رہے ہیں لیکن وزراءکہیں اور مصروف ہیں۔ انہوں نے کہا کہ حکمران جماعت کی طرف سے اداروں میں ٹکراﺅ کی صورتحال پیدا کی جارہی ہے جو کسی طرح بھی ملک کے لئے سود مند نہیں۔ انہوں نے کہا کہ پیپلز پارٹی کی قیادت نیب کیسز میں عدالتوں کے سامنے پیش ہوئی اور سر خرو ہوئی جبکہ دوسروں کو عدالتوں کے احترام کا درس دینے والے موجودہ حکمران آج راہ فرار اختیار کئے ہوئے ہیں۔ انہوںنے کہا کہ قوم نواز شریف سے سوال کرتی ہے اب اس سے زیادہ ملک کے حالات کیا خراب ہوں گے۔ صرف اپنے ذاتی مفادات کے لئے مایوسی کی فضاءپیدا کی جارہی ہے۔ انہوں نے کہا کہ جس طرح پانامہ لیکس نے حکمرانوںکا پیچھا نہیں چھوڑا اسی طرح سانحہ ماڈل ٹاﺅن پر عدالتی کمشن کی رپورٹ بھی ان کے گلے کا طوق بنے گی۔

اسلام آباد(مانیٹرنگ ڈیسک)پاکستان تحریک انصاف کے چیئرمین عمران خان نے موجودہ حکومت کو خارجہ داخلہ اور معیشت اوردیگر محاذوں پر ناکام قرار دیتے ہوئے وزیراعظم شاہد خاقان عباسی سے قبل از وقت انتخابات کے اعلان کا مطالبہ کردیا ۔ وزیراعظم شاہد خاقان عباسی کی کوئی حیثیت نہیں ہے وہ نوازشریف کو وزیراعظم قرار دے کر عدالت عظمیٰ کے پانچ رکنی فیصلے کو تسلیم کرنے سے انکار کررہے ہیں ۔ ہمیں خدشہ ہے کہ نااہل وزیراعظم نوازشریف اور ان کے خاندان کو نیب مقدمات میں وزیراعظم شاہد خاقان عباسی کے ذریعے تحفظ دلانے کی کوشش کی جائے گی ۔وفاقی دارالحکومت میں داعش کے جھنڈے لگنے کاذمہ دار کون ہے؟موجودہ حکومت فوج کو گندا کرنے کوشش کررہی ہے، سینیٹر اسحاق ڈار جیسے ہی وطن واپس آئیں ان کا نام ای سی ایل میں ڈال دیا جائے ۔ نیو دہلی کی بولی بولتے ہوئے وزیراعظم شاہد خاقان عباسی وزیر خارجہ خواجہ آصف اور وزیر داخلہ احسن اقبال نے ہاﺅس ان آرڈر کے بیانات دیئے ہیں ۔ ان خیالات کا اظہار انہوںنے اتوار کو اسلام آباد میں پریس کانفرنس سے خطاب کرتے ہوئے کیا ۔ عمران خان نے کہا کہ پاکستان کی معیشت شدید بحران سے دوچار ہوچکی ہے ۔ ملکی و غیر ملکی قرضے غیر معمولی طور پر بڑھ چکے ہیں خارجہ پالیسی کا پتہ نہیں ہے امریکہ کی جانب سے پاکستان کو بدنام کرنے کے خلاف کوئی بولنے والا نہیں ہے اور جب یہ الزامات عائد کئے گئے اس وقت وزیراعظم کو پاناما کی پڑی ہوئی تھی ۔ انہوںنے کہا کہ ہاﺅس ان آرڈر کرنے کے بارے میں وزیراعظم شاہد خاقان عباسی کا فنانشل ٹائمز کو دیا گیا بیان انتہائی حساس معاملہ ہے ۔ وزیرخارجہ اور وزیرداخلہ نے بھی یہی بیان دیا یہ نیو دہلی کی بولی بول رہے ہیں اور یہ کچھ ڈان لیکس میں تھا ۔ انہوںنے کہا کہ یہ بیانات ان الزامات کا تسلسل ہیں اور وزیراعظم شاہد خاقان عباسی کے اس بیان نے پاکستان کو خطرے میں ڈال دیا ہے یہ کابینہ میں کیا کرتے رہے ان کو کس نے نیشنل ایکشن پلان پر عملدرآمد سے روکا تھا ۔ انہوںنے کہا کہ اسلام آباد میں داعش کے جھنڈے لگ گئے ہیں کون اس کا ذمہ دار ہے ۔ باہر سے بھی پاکستان کو بدنام کیا جارہا ہے اور موجودہ حکمران بھی اپنے فوج کو گندا کررہے ہیں ۔ انہوںنے کہا کہ شاہد خاقان عباسی نوازشریف کو اب بھی اپنا وزیراعظم قرار دے رہے ہیں جوکہ پانچ رکنی عدالتی بینچ کے متفقہ فیصلے سے رو گردانی ہیں نوازشریف کو منی لانڈرنگ ، ٹیکس چوری ، غلط بیانی جیسے مقدمات کا سامنا ہے وہ جھوٹ بول رہے ہیں اور ان الزامات کے خلاف وہ کوئی ثبوت ہی پیش نہ کرسکے ۔ ایسی صورتحال میں وزیراعظم کی طرف سے نوازشریف کو اپنا وزیراعظم تسلیم کرنا جمہوریت کو کمزور کرنے کے مترادف ہے اگر وہ ایک نااہل شخص کو اپنا وزیراعظم مانتے ہیں تو جیلوں میں پڑے ہوئے قیدی اپنی سزاﺅں کو تسلیم کرنے سے انکار نہیں کردیں گے ۔ یعنی کہ وزیراعظم شاہد خاقان عباسی کہہ رہے ہیں کہ ان کا آقا جو چوری ڈاکہ ڈالے اسے کچھ نہ کہا جائے انہوںنے کہا کہ اس تو عام آدمی کا انصاف کے نظام پر اعتماد مجروح ہوگایعنی عام آدمی چوری کرے تو اسے کوئی انصاف حاصل نہیں ہوتا ۔ نوازشریف کو تین سو ارب روپے کا حساب کتاب دینا ہے انتخابی بل جمہوریت کے ساتھ مذاق ہے دنیا کا کوئی ایسا ملک بتائیں جہاں نااہل شخص کو سیاسی جماعت کا سربراہ بنانے کی قانون سازی کی جائے ۔چیئر مین تحریک انصاف عمران خان نے کہا ہے کہ سینٹ میں بل کے خلاف موثر نمائندگی نہ کرنے پر دونوں سینیٹرز کو شوز کاز نوٹس جاری کیا گیا ہے ہمارے سینیٹرز پیسے دیکر نہیں بنے۔ انکا سینٹ نہ آنا باعث شرمندگی ہے نجی ٹی وی پروگرام میں گفتگو کرتے ہوئے انہوں نے کہا کہ الیکشن اصلاحات بل تراحیح کا اسمبلی میں کسی کو پتہ نہیں چلا۔ نوازشریف و زرداری دونوں چاہتے ہیں کہ احتساب نہ ہو کیونکہ دونوں کے مفادات ایک ہیں۔ دونوں پر اربوں کے کیسز ہیں قومی اسمبلی میں ن لیگ کی اکثریت ہے کچھ بھی کر سکتے ہیں انہوں نے کہا کہ جنرل حامد نے خود کہا کہ پرویز خٹک کے خلاف کوئی ثبوت نہیں۔ پرویز خٹک نے تمام الزامات کے جواب دیے ہوئے ہیں۔ انہوں نے مزید کہا کہ منی لانڈرنگ نہیں کی کہ مجھے نااہل کردیا جائے ۔مجھے بلیک میل کرنے کےلئے مقدمات بنائے گئے بیرون ملک سے پیسے کمائے اور پاکستان لیکر آیا۔ الیکشن کمیشن میں بھی میرے خلاف کیسز بنائے گئے۔ دونوں کیسز میں نااہل نہیں ہوسکتا ۔ اگر ہو بھی گیا تب بھی تراحیح کی حمایت نہیں کروں گا۔ انہوں نے کہا کہ شریف خاندان کو صفائی پیش کرنے کا پورا موقع ملا۔ کے پی میں سچ چاہتے ہیں کہ پشاور ہائیکورٹ احتساب کمیشن کے سربراہ کا انتخاب کرے۔ انہوں نے کہا کہ این اے 120میں حکومتی وزراءپنجاب حکومت اور فاوق کے تمام ادارے متحرک تھی۔ اسکے باوجود 30فیصد ووٹ گھر گیا۔ڈاکٹر یاسمین راشد نے بہتت زبردست الیکشن لڑا۔ یہ حلقہ ن لیگ کا گڑھ کہلاتا تھا۔ ن لیگ کو فکر کرنی چاہیے عام انتخاباتت میں پر تباہ ہوجائیں گے۔ شریف فیملی جو مرضی کرلے انکا گیم ختم ہوچکا ہے انہوں نے مزید کہا کہ انکے سامنے کھڑے ہوتے ہیں تو یہ کہتے ہیں کہ فوج کو بلا رہے ہیں پاک فوج کو داد دیتا ہوں پہلی بار کسی آرمی چیف نے کہا ہے کہ جمہوریت کے حق میں ہیں۔ انہوں نے کہا کہ اگر میں انکے سامنے کھڑا نہ ہوتا تو اگلے 30سال انکے بچوں نے باریاں لینی تھیں۔

لندن (وجاہت علی خان سے) سابق وزیراعظم نوازشریف پارٹی کی اعلیٰ قیادت سے مشاورت کے بعد پاکستان واپسی کیلئے روانہ ہوگئے ہیں وہ آج صبح آٹھ بجے پی آئی اے کی پرواز پی کے 786کے ذریعے اسلام آباد پہنچیں گے۔ گزشتہ روز وزیراعلیٰ شہبازشریف اور دوسرے پارٹی رہنماﺅں کے مشورے پر پاکستان کیلئے روانہ ہوئے ہیں۔ ن لیگ کے ذرائع نے بتایا ہے کہ وہ احتساب عدالت میں مقدمات کا بھی سامنا کریں گے۔ راولپنڈی کی احتساب عدالت نے انہیں 26ستمبر کو طلب کررکھا ہے جہاں سپریم کورٹ کی ہدایت پر نیب نے ان کے اور ان کے بچوں کے خلاف ریفرنس دائر کررکھے ہیں اس سلسلے میں پیشی کیلئے حتمی سمن کی تعمیل لندن میں پاکستانی ہائی کمشن کے ذریعے کرائی گئی۔ معلوم ہوا ہے کہ وفاقی وزیر خزانہ اسحق ڈار نے بھی وطن واپس آکر مقدمات کا سامنا کرنے کا فیصلہ کیا ہے۔ نوازشریف اور اسحق ڈار کی واپسی کے حوالے سے لندن میں گزشتہ روز پارٹی رہنماﺅں کا جو اجلاس ہوا اسمیں میاں شہبازشریف نے بھی شرکت کی۔ اجلاس میں ملکی سیاسی صورتحال پر غور کے علاوہ شہبازشریف نے اپنے بڑے بھائی کو پاکستان میں ہونے والی ملاقاتوں اور ان کے نتائج سے آگاہ کیا۔ اجلاس میں انہیں پاکستان میں قائم ہونے والے مقدمات اور وکلا کی رائے بارے بتایا گیا رہنماﺅں سے مشورے کے بعد اسحق ڈار نے بھی وطن واپسی کا فیصلہ کیا اور ان سطور کی اشاعت تک وہ وطن پہنچ چکے ہونگے۔ کیونکہ وہ نوازشریف کی روانگی سے قبل ہی وزیراعظم شاہد خاقان عباسی کے ساتھ طیارے میں سوار ہوگئے تھے۔ ذرائع کا یہ بھی کہنا تھا کہ یہ فیصلہ آج لندن میں وزیراعظم شاہد خاقان عباسی اور وزیراعلیٰ پنجاب شہباز شریف کے ساتھ ملاقات کے دوران لیا گیا۔ان کا کہنا تھا کہ کچھ پارٹی رہنماو¿ں نے نواز شریف کو نیب عدالت میں پیش نہ ہونے کا مشورہ دیا تاہم اس کے باوجود انہوں نے پیش ہونے کا فیصلہ کیا۔ذرائع نے بتایا کہ شہباز شریف اپنے شیڈول کے مطابق 28-30 ستمبر کے درمیان وطن واپس آئیں گے جبکہ حسن اور حسین نواز لندن میں والدہ کلثوم نواز کے ساتھ ہی رہیں گے۔انہوں نے بتایا کہ وطن واپسی کے بعد نواز شریف اعلیٰ سطح کا سیاسی اجلاس بھی طلب کریں گے۔ذرائع کا یہ بھی کہنا تھا کہ وطن واپسی کے بعد ن لیگ سیاسی لائحہ عمل کا اعلان کرے گی اور بھرپور انداز میں سامنے آئے گی۔اس حوالے سے جب مسلم ن نواز کے ترجمان سینیٹر مشاہد اللہ سے رابطہ کیا گیا تو انہوں نے نواز شریف کی وطن واپسی کی تصدیق کی۔مشاہد اللہ نے کہا کہ نواز شریف پاکستانی رہنما ہیں اور پاکستان کے سب سے مقبول ترین رہنما ہیں جن کے ساتھ ناانصافی ہوئی۔انہوں نے کہا کہ نواز شریف پاکستانی میں اپنا کردار ادا کرنے آرہے ہیں، وہ ن لیگ اور پاکستانی عوام کے قائد ہیں۔ان کا کہنا تھا کہ ان کی واپسی کے ساتھ ہی لندن سے بیٹھ کر پارٹی چلانے کی باتیں غلط ثابت ہوگئیں۔نواز شریف بیگم کلثوم نواز کی عیادت کے سلسلے میں لندن میں موجود تھے جن کا کینسر کا علاج جاری ہے۔اس سے قبل نواز شریف اور شہباز شریف کی ون آن ون ملاقات ہوئی جس میں مسلم لیگ (ن) کے سیاسی مستقبل اور آئندہ کے لائحہ عمل پر غور کیا گیا۔ذرائع کے مطابق شہباز شریف نے اپنے بڑے بھائی نواز شریف کو پاکستان کے سیاسی حالات اور زمینی حقائق سے آگاہ کیا۔وزیراعلیٰ پنجاب شہباز شریف نے لندن جانے سے قبل مولانا فضل الرحمان، چوہدری نثار علی خان، خواجہ سعد رفیق اور خواجہ حارث سمیت دیگر اہم رہنماو¿ں سے سیاسی امور اور ملکی سیاسی حالات پر صلاح مشورہ کیا تھا جبکہ ایک غیر سیاسی شخصیت سے بھی ان کی اہم ملاقات ہوئی تھی۔ پانامہ کیس میں سابق وزیراعظم نوازشریف کل (منگل) کو احتساب عدالت میں پیش ہوں گے جبکہ وزیرخزانہ سینیٹر اسحاق ڈار کو عدالت نے آمدن سے زائد اثاثوں کے کیس میں آج (پیر) کو طلب کر رکھا ہے ،سابق وزیراعظم کی احتساب عدالت پیشی کے موقع پر خصوصی سیکیورٹی پلان مرتب کیا جائے گا ،جوڈیشل کمپلیکس جی الیون اور احتساب عدالت کی سیکیورٹی رینجرز کے سپرد کردی جائے گی ،جوڈیشل کمپلیکس میں سیاسی کارکنوں کے داخلے پر پابندی ہوگی ،احتساب عدالت نےتین ریفرنسز میں نوازشریف، حسین ، حسن ، مریم اور کیپٹن (ر) صفدر کو طلب کر رکھا ہے ۔ سابق وزیر اعظم نواز شریف نے کہا ہے کہ ہم پر کرپشن یا کمیشن کا کوئی کیس نہیں ہے ، ہم نے قوم کا کوئی پیسہ نہیں کھایا ، ہمارے خلاف 1972 کے کاروبار کے معاملات پر ریفرنس بنائے جا رہے ہیں، ہمارے خلاف بات پانامہ سے شروع ہوئی مگر سزا اقامہ پر کیوں دی گئی، ہمارے خلاف ایک جج نے فیصلہ دیا ، اپیل بھی انہوں نے سنی اور نگران بھی اب وہ خود ہی بن گئے ہیں، یہ انصاف کا کون سا طریقہ ہے کہ ہمیں ناکردہ گناہوں کی سزا دی جا رہی ہے۔ نواز شریف وطن واپسی کے لئے ہیتھرو ائرپورٹ روانہ ہوگئے ہیں، روانگی سے قبل میڈیا نمائندوں سے گفتگو کرتے ہوئے ان کا کہنا تھا کہ میرا ایساارادہ نہیں تھاکہ لندن بیٹھارہوں گااورواپس نہیں جاوں گا ، میں تو یہاں اہلیہ کی تیماردار ی اور علاج کے لئے آیا تھا اور اب میں واپس جا رہاہوں ۔ ہم نے قوم کا پیسہ کھایا ہے اور نہ ہی ٹھیکوں میں کبھی پیسے کمائے ہیں، ہمارے خلاف کوئی بھی بات ثابت نہیں ہوسکی ۔یہ کس قسم کا احتساب ہے کس قسم کا انصاف ہے ؟ ہمارے خلاف دائر کیے گئے ریفرنس کس قسم کے ریفرنس ہیں؟ پیسے کھانے کے یا کمیشن کے ریفرنس ہوتے یاتو ٹھیکے میں پیسا کمایاہوتا، کچھ نہیں ہے ۔ہمارے 1972کے کاروبار کے معاملات کے گرد چیزیں گھمائی جا رہی ہیں۔ :بات پاناما کی تھی تو نا اہلی کی سزا بھی پاناماپر ہونی چاہیے تھی۔سزا پاناما کے بجائے اقامہ پر کیوں ہوئی ، سوچنے کی بات ہے۔ہم نے عدالت میں بار بار کہا کرپشن ،کک بیک یا کمیشن کا کیس نہیں ،ہم نے کوئی کرپشن نہیں کی ،سرکاری پیسا نہیں کھایامگر پھر بھی سزا دے دی گئی۔ عجیب طریقہ کار ہے کہ جن ججوں نے ہمارے خلاف فیصلہ دیا وہی ہماری اپیل سننے کے لئے موجود تھے اسی طرح جہاں بھی یہ یہ معاملہ جائے گا تو آگے بھی خود ہی موجو د ہوں گے ۔