لاہور(نیوزایجنسیاں) سری لنکا کے خلاف سیریز کیلیے قومی کرکٹرز کا تربیتی کیمپ اختتام پذیر ہو گیا۔قذافی اسٹیڈیم لاہور میں لگائے گئے 5 روزہ کیمپ کے آخری روز کھلاڑیوں نے وارم اپ اور ڈرلز کے بعد فٹبال میچ کھیلا جب کہ بیٹنگ اور بولنگ کے سیشن نہیں رکھے گئے۔ ہیڈ کوچ نے کھلاڑیوں کی حوصلہ افزائی کرتے ہوئے مختصر لیکچر میں پلاننگ سے بھی آگاہ کیا۔ قومی ٹیم کے منیجر طلعت علی بھی کھلاڑیوں سے مخاطب ہوئے۔ 19 ستمبر سے شروع ہونے والے کیمپ میں 18 پلیئرز کو مدعو کیا گیا جن میں سے 2 کو ڈراپ کرتے ہوئے حتمی اسکواڈ کا اعلان کر دیا گیا۔یاد رہے کہ دو میچز کی ٹیسٹ سیریز کا آغاز 28 ستمبر کو ابوظبی میں شروع ہونے والے پہلے ٹیسٹ سے ہو گا۔ دوسرا ڈے اینڈ نائٹ ٹیسٹ 6 سے 10 اکتوبر تک دبئی میں کھیلا جائے گا۔ اس کے بعد دونوں ٹیمیں 5 ون ڈے اور 3 ٹی ٹوئنٹی میچز میں بھی مدمقابل ہوں گی۔

لاہور(آئی این پی ) چیف سلیکٹر انضمام الحق نے امید ظاہر کی ہے کہ نوجوان کھلاڑی ریٹائر ہونے والے تجربہ کار کھلاڑیوں مصباح الحق اور یونس خان کا خلا پر کرنے میں کامیاب ہو جائیں گے،سلمان بٹ کو انٹرنیشنل کرکٹ میں لانے سے قبل ڈومیسٹک میں موقع دیں گے،، لیگ اسپنر گزشتہ تین چار سال سے پاکستان کے کامیاب ترین بولر ہیں۔قذافی اسٹیڈیم میں سری لنکا کے خلاف سیریز کیلیے ٹیم کے اعلان کے بعد میڈیا سے گفتگو کرتے ہوئے انضمام الحق نے کہا کہ ہر کھلاڑی کو بتایا گیا ہے کہ سلیکشن کیلیے فٹنس ٹیسٹ پاس کرنا ضروری ہے، یاسر شاہ کو بھی فٹنس ٹیسٹ کلیئر کرنے کیلیے کہا تھا اور اب انہوں نے فٹنس ٹیسٹ کلیئر کر لیا ہے، لیگ اسپنر گزشتہ تین چار سال سے پاکستان کے کامیاب ترین بولر ہیں، یو اے ای کی بیٹنگ کنڈیشنز میں بھی وہ پاکستان کیلیے کافی سازگار ثابت ہوئے ہیں، اظہر علی کو گھٹنے کی تکلیف تھی، ڈاکٹر نے انجکشن لگوا کر کھیلنے کا مشورہ دیا ہے۔ہیڈ کوچ نے کہا کہ یو اے ای کی کنڈیشنز میں نوجوان کھلاڑیوں کو موقع دیا جا رہا ہے، ہمارے پاس اچھے فاسٹ بولرز موجود ہیں، فاسٹ بولنگ کا شعبہ مضبوط ہے اور نئے پیسرز بھی شامل کیے گئے ہیں جس سے بولنگ کا شعبہ مضبوط ہو گا۔ انضمام کا مزید کہنا تھا کہ مصباح الحق اور یونس خان اچھے کھلاڑی تھے، امید ہے ان کے بعد بھی ٹیم اچھا پرفارم کرے گی۔ سلمان بٹ نے ڈومیسٹک میں اچھا پرفارم کیا، تاہم انہیں فوری طور پر انٹرنیشنل کرکٹ میں لانے سے قبل ڈومیسٹک میں موقع دیں گے۔

لاہور (نیوزایجنسیاں) 2010 میں انگلینڈ کے خلاف سیریز میں سامنے آنے والے سپاٹ فکسنگ سکینڈل میں سزا پانے والے محمد عامر تو قومی ٹیم میں واپس آ چکے ہیں لیکن سلمان بٹ اور محمد آصف کے مستقبل پر اب بھی سوالیہ نشان موجود ہیں، چیف سلیکٹر انضمام الحق کا کہنا ہے کہ سلمان بٹ کو عنقریب ٹیم میں شامل کرلیا جائے گا۔سپاٹ فکسنگ کیس میں سزا کاٹ کر بحال ہونے والے سابق کپتان سلمان بٹ کے بارے میں گفتگو کرتے ہوئے چیف سلیکٹر انضمام الحق نے کہا کہ سلمان بٹ کی کیمپ میں پرفارمنس بہت اچھی تھی ، اس کی فٹنس بھی بہترین تھی ، اس کی ساری چیزیں پوری ہیں۔ ہم کوشش کر رہے ہیں کہ اسے 6 سال کے وقفے کے بعد ڈائریکٹ انٹرنیشنل میں ڈالنے کی بجائے ذرا سا آزما لیں اس لیے انہیں پہلے اے ٹیم میں موقع دیا جائے گا۔انہوں نے کہا کہ سلمان بٹ کا معاملہ دیکھ رہے ہیں اسے سائیڈ لائن نہیں کیا ہوا ، وہ جس طرح کی پرفارمنس دے رہا ہے اس کی بنا پر امید ہے کہ وہ ٹیم میں شامل ہو جائے گا۔

لاہور(نیوزایجنسیاں) قومی ٹیسٹ کرکٹ ٹیم کے کپتان سرفراز احمد نے کہا ہے کہ پی ایس ایل اسپاٹ فکسنگ کیس سے شرجیل خان جیسا بہترین کرکٹر ضائع ہوگیا۔لاہور میں اسپورٹس جرنلسٹ ایسوسی ایشن کی جانب سے منعقدہ تقریب سے خطاب کرتے ہوئے سرفراز احمد نے کہا کہ لمبی پلاننگ نہیں کرتا، ایک میچ اور سیریز پر توجہ دیتا ہوں، پوری ٹیم کو ساتھ لے کر چلتے ہوئے اپنے پیش رو مصباح کی طرح فتوحات حاصل کرنے کی کوشش کروں گا۔سرفراز احمد نے کہا کہ مصباح الحق پاکستان کی ٹیسٹ تاریخ کے کامیاب ترین کپتان تھے،ان سے بہت کچھ سیکھنے کا موقع ملا، تجربہ کار یونس خان کے نہ ہونے سے بھی فرق پڑے گا اور میرے لیے یہ ایک نیا چیلنج ہے، پوری کوشش کروں گا کہ ون ڈے اور ٹیسٹ کرکٹ کی طرح طویل فارمیٹ میں بھی ٹیم بہتر کارکردگی کا مظاہرہ کرے، کسی بھی طرز کے کھیل میں کپتان اکیلا کچھ بھی نہیں کرسکتا، ہر کھلاڑی کا کردار اہم ہوتا ہے،سب پلیئرز کو ساتھ لے کر چلوں گا۔قومی کرکٹ ٹیم کے کپتان کا کہنا تھا کہ کھیل کے ہر شعبے میں بتدریج بہتری آرہی ہے، سری لنکا کی ٹیسٹ ٹیم بہت اچھی ہے،دوسری جانب ہمارا فاسٹ بولنگ کا شعبہ مضبوط ہے،وہاب ریاض کی بولنگ اسپیڈ بہت بہتر ہے اور عامر کی رفتار بھی بہتری کی طرف جارہی ہے جب کہ یاسر شاہ نے فٹنس ٹیسٹ پاس کرلیا ہے اور وہ مکمل فٹ ہیں،بلال آصف اور محمد اصغر جیسے نوجوان سپنرز بھی موجود ہونگے۔ بیٹنگ میں اظہر علی اور اسد شفیق کیساتھ باصلاحیت نوجوان کرکٹرز حارث سہیل اور عثمان صلاح الدین کی خدمات حاصل ہیں،اوپنرز سمیع اسلم اور شان مسعود یواے ای کی کنڈیشنز سے واقف اور انٹرنیشنل کرکٹ میں نئے نہیں۔سرفراز احمد کا کہنا تھا کہ ہر کپتان کی کوشش ہوتی ہے کہ پہلے میچ میں کامیابی کیساتھ فاتحانہ آغاز کرے،میری خواہش ہے کہ پہلے میچ میں سنچری سکور کرتے ہوئے قیادت کا حق ادا کروں۔ایک سوال کے جواب میں سرفراز نے کہا کہ ابھی تینوں فارمیٹ کی کرکٹ میں کافی بہتری لانے کی ضرورت ہے جس کیلیے کھلاڑی اور منیجمنٹ پوری کوشش کررہے ہیں، سب کا مقصد یہی ہے کہ پاکستان ٹیم اچھا پرفارم کرے، انضمام الحق بطور چیف سلیکٹر مجھے بہت سپورٹ کرتے اور میری رائے کا بھی خیال رکھتے ہیں،پوری ٹیم اور منیجمنٹ کا ایک ہی پیج پر ہونا خوش آئند ہے۔کپتان کا کہنا تھا کہ چیمپئنز ٹرافی کا فائنل زندگی بھر یاد رہے گا اور اس ٹیم میں شامل کوئی بھی کھلاڑی ان لمحات کو نہیں بھول سکتا، ورلڈ کپ 2019 ابھی دور ہے، اس سے قبل ہمیں ہر شعبے میں آہستہ آہستہ مزید بہتری لانی ہے، تیزی سے جدید کرکٹ کی جانب گامزن ہیں،فٹنس، فیلڈنگ اور اسٹرائیک ریٹ بہتر ہوا ہے،بہتری کا یہ سفر جاری رکھنا ہوگا۔سرفراز نے کہا کہ سری لنکا اور ویسٹ انڈیز کی ٹیمیں پاکستان ضرور آئیں گی اور آنے والے دنوں میں بھارتی ٹیم بھی پاکستان آنے کے بارے میں ضرور سوچے گی، پی ایس ایل اسپاٹ فکسنگ کیس کا سامنا آنا بدقسمتی تھی، شرجیل خان جیسا کرکٹرز ضائع ہوگا،وہ ایک ایسے اوپنر تھے جو ٹیم کو بہترین آغاز دینے کی صلاحیت رکھتے تھے۔

کراچی(آئی این پی ) اپنے دور کے عظیم آل رانڈ اور سابق ٹیسٹ کپتان وسیم اکرم نے کہا ہے کہ پاکستان میں کرکٹ ٹیلنٹ کی کمی نہیں، جنوبی پنجاب میں باصلاحیت کرکٹرز کو دیکھ کر دنگ رہ گیا،پی ایس ایل میں میں اور وقار یونس فاسٹ بولنگ میں اپنی مہارتوں سے کھلاڑیوں کو روشناس کرائیں گے اوران کو رموزسیکھائیں گے۔مقامی ہوٹل میں منعقدہ تقریب میں میڈیا سے گفتگو میں انھوں نے کہا کہ پی ایس ایل کے آئیڈیے کا مقصد ملک میں انٹرنیشنل کرکٹ کی بحالی اور بہتر کرکٹرز کو سامنے لانا تھا، لیگ اپنے مقصد میں کامیاب نظر آتی ہے۔ اس کی وجہ سے باصلاحیت کرکٹز سامنے آئے اور انھوں نے چیمپئنز ٹرافی میں پاکستان کی فتح سے ہمکنار کرانے میں اہم کردارادا کیا، اسی کے بعد ورلڈ الیون نے بھی پاکستان کا رخ کیا، وسیم اکرم نے کہا کہ پاکستان میں ٹیلنٹ کی کمی نہیں، جنوبی پنجاب میں باصلاحیت کرکٹرز کو دیکھ کردنگ رہ گیا۔، ایک سوال کے جواب میں انھوں نے کہاکہ قومی کرکٹرزاپنے طور پر بھرپورمحنت کر رہے ہیں۔پی ایس ایل میں میں اور وقار یونس فاسٹ بولنگ میں اپنی مہارتوں سے کھلاڑیوں کو روشناس کرائیں گے اوران کو رموزسیکھائیں گے، قوی امید ہے کہ ہر فرنچائز میں شامل کیے جانے والے ایمرجنگ پلیئرز مستقبل کے بہترین کرکٹرز میں شامل ہوں گے۔