راولپنڈی (مانیٹرنگ ڈیسک) پاکستان اور بھارت کے ڈی جی ایم اوز کا ہاٹ لائن پر ہونے والے رابطے پر پاکستان کا کہنا ہے کہ بھارت کی خلاف ورزیاں امن کے لئے خطرہ ہیں، بھارت کو جارحیت کا بھاری خمیازہ بھگتنا پڑسکتا ہے۔ آئی ایس پی آر کے مطابق پاکستان اور بھارت کے ڈی جی ایم اوز کا ہاٹ لائن پرشیڈول سے ہٹ کر رابطہ ہوا، جس میں پاکستان کی جانب سے کہا گیاکہ بھارتی فوج ایل او سی پر شہری آبادی کو نشانہ بنا رہی ہے، بھارت نے نیزاپیر، چکری کوٹ، بٹل سیکٹر میں شہری آبادی کو نشانہ بنایا۔ پاکستان کا اپنے موقف میں کہنا تھا کہ بھارت کی جانب سے لائن آف کنٹرول کی خلاف ورزیاں غیرپیشہ وارانہ اور غیر اخلاقی ہیں، بھارتی خلاف ورزیوں کی یہ صورت امن کے لئے خطرہ ہے۔
