لاہور(آئی این پی)پاکستان کرکٹ ٹیم دورہ نیوزی لینڈکیلئے 20دسمبر کو روانہ ہوگی، قومی ٹیم کا مختصر دورانیے کا کیمپ نیوزی لینڈ میں ہی لگایا جائے گا ،پاکستان ٹیم 20دسمبر کو میزبان ملک روانہ ہو گی ۔ ٹیم کو گرانٹ فلاور اور گرانٹ لیوڈن دبئی میں جوائن کریں گے ، اس دوران نئے فزیو تھراپسٹ کی تعیناتی عمل میں لائے گی۔نیوزی لینڈ روانگی سے قبل کھلاڑیوں کی اسکریننگ کی جائے گی جس کی نگرانی بولنگ کوچ اظہر محمود کریں گے، پاکستانی ٹیم نیوزی لینڈ میں ون ڈے سیریز سے قبل 3 جنوری کو پریکٹس میچ بھی کھیلے گی۔پہلا ون ڈے انٹر نیشنل 6 جنوری کو کھیلا جائے گا۔ آئندہ ماہ نیوزی لینڈکے دورے کےلئے پاکستانی ٹیم میں اوپنر احمد شہزاد جگہ برقرار رکھنے میں ناکام ہوگئے ان کی جگہ مکمل فٹ ہونے کے بعد تجربہ کار اظہر علی لیں گے۔ پاکستانی کرکٹ ٹیم کے ہیڈ کوچ مکی آرتھر نیوزی لینڈ کی سیریز کے لئے سلیکٹرز سے بات چیت کرکے وطن واپس چلے گئے۔ ان فٹ فاسٹ بولر عثمان شنواری کی جگہ ایک اور لیفٹ آرم فاسٹ بولر رومان رئیس لیں گے۔ذرائع کا کہنا ہے کہ اظہر علی29نومبر سے شروع ہونےوالے قائد اعظم ٹرافی کے سپر ایٹ مرحلے میں سوئی ناردرن گیس کی نمائندگی کرسکتے ہیں۔ ذرائع کا کہنا ہے کہ مکی آرتھر نے پرتھ روانگی سے قبل لاہور میں انضمام الحق کے ساتھ میٹنگ کی۔ وہ دو دن کےلئے راولپنڈی بھی گئے۔ جہاں انہوں نے قومی ٹی ٹوئنٹی کرکٹ ٹورنامنٹ کے میچوں میں بعض کھلاڑیوں کی کارکردگی کو دیکھا۔ آسٹریلیا جانے سے قبل نیوزی لینڈ کی ٹیم کو حتمی شکل دے دی۔ سلیکٹرز آئندہ ماہ ٹیم کا باضابطہ اعلان کریں گے۔ اس دوران اظہر علی کی فٹنس کی صورتحال بھی واضح ہوجائے گی۔ ٹیم نیوزی لینڈ کے خلاف پانچ ون ڈے انٹر نیشنل اور تین ٹی ٹوئنٹی کھیلے گی۔ ذرائع کا کہنا ہے کہ متحدہ عرب امارات میں سری لنکا کے خلاف سیریزمیں حصہ لینے والی ٹیم میں دو تبدیلیوں پر اتفاق ہوا ہے۔ احمد شہزاد کی مسلسل خراب بیٹنگ فارم کی وجہ سے ٹیم میں ان کی جگہ اظہر علی اور ان فٹ عثمان شنواری کی جگہ رومان رئیس لیں گے۔ رومان فٹ ہوکرقومی ٹی ٹوئنٹی کرکٹ ٹورنامنٹ میں شریک ہیں۔ کمر کے اسٹریس فریکچر میں مبتلا عثمان شنواری قومی اکیڈمی میں علاج کرارہے ہیں ۔
