لاہور (خصوصی رپورٹ)محکمہ داخلہ پنجاب نے تحریک لبیک کے رہنماﺅں کے نام فورتھ شیڈول سے نکالنے کافیصلہ کیا ہےجس کی لسٹ بھی مرتب کرنا شروع کر دی ہے۔ محکمہ داخلہ پنجاب نے فیصلہ کیا ہے ان تمام افراد کی سرویلنس کی جائے گی لیکن فورتھ شیڈول میں دوسرے افراد کی طرح پولیس ان کے کسی کام میں مداخلت نہیں کرے گی اور نہ ہی ان کی روک ٹوک کی جائے گی۔ ذرائع نے بتایا کہ خادم رضوی اور آصف جلالی سمیت تحریک لبیک کے 30اہم رہنماﺅں کے نام فورتھ شیڈول میں شامل کئے گئے تھے۔ ذرائع کے مطابق تحریک لبیک کے رہنماﺅں کی محکمہ داخلہ کے سینئر افسران کے درمیان ملاقات اگلے دو روز میں ہوگی جس میں معاملات طے کر لئے جائیں گے۔ محکمہ داخلہ پنجاب کے حکم پر دھرنے کے دوران گرفتار ہونے والے تحریک لبیک کے 1500سے زائد کارکنوں کو رہا کرنے کا باقاعدہ نوٹیفکیشن بھی کر دیا گیا ہے۔ حکومت کی جانب سے فورتھ شیڈول میں دیئےگئے ضوابط کی پابندی نہ کرنا کافی مہنگا پڑ رہاہے اور پابندی کاشکار افراد کیلئے اس طرح کی لاپرواہی کسی بھی بڑے سانحے کا سبب بن سکتی ہے۔ فیض آباد میں دارالحکومت کے شہریوں اور حکمرانوں کی زندگی مشکل بنانے کےفوری بعد علامہ خادم حسین رضوی نےجنوری میں لاہور-اسلام آباد مارچ کرنے کا اعلان کردیاہے۔ جبکہ اشرف آصف جلالی نے کم وبیش دوسو افراد کے ساتھ صوبائی دارالحکومت کی ایک مصروف ترین شاہراہ کو بند کیا۔ دونوں کےنام فورتھ شیڈول میں شامل ہیں۔ ان دونوں کے ساتھ فورتھ شیڈول کی فہرست میں دیگر مذہبی علما علمائے تنظیمِ اہلِ سنت کےپیرافضل قادری، تحریک لبیکِ پاکستان کے پیر اشرف جلالی، سپائےصحابہ کے اورنگزیب فاروقی، ساہیوال کے پیر نصیر رضا صفدر، سیالکوٹ کے پیر سخاوت علی، گوجرانوالہ کے صابرعلوی، علامہ ساجد فاروقی وغیرہ شامل ہیں۔ جبکہ وہ افراد جنھیں پہلے اس فہرست میں شامل کیاگیا وہ بھی اس سے مستثنی نظرآتے ہیں، مزید افراد کو بھی روزانہ اس میں شامل کیاجاتاہے۔ نیشنل کاﺅنٹر ٹیررازم اتھارٹی(نیکٹا) پاس دستیاب ڈیٹا کے مطابق چاروں صوبوں کی وزارت داخلہ نے10اکتوبر2017 تک مختلف وجوہات کی بناپر کم از کم 8633افراد کو فورتھ شیڈول میں شامل کیا۔ مختلف فرقہ ورانہ گروہوں سے تعلق رکھنے والے 1500افراد کو فورتھ شیڈول کی فہرست میں شامل کیاگیا۔ 1500 میں سے 350افراد کا تعلق شعیہ مکتب فکرسےہے۔ فورتھ شیڈول کی فہرست میں ایسے افراد شامل کیے جاتے ہیں، جن پراینٹی ٹیررازم ایکٹ 1997کے تحت دہشت گردی یا فرقہ ورانہ کارروائیوں میں ملوث ہونے کا الزام ہوتاہے۔ قابلِ اعتماد انٹلیجنس معلومات کے مطابق جن افراد کے نام کسی صوبے کی وزارت داخلہ کی جانب سے فورتھ شیڈول میں شامل کیےجاتے ہیں ان پرسفرکرنے، تقریر کرنے اور کاروبار کرنے کی پابندی عائد کی جاسکتی ہے۔ فورتھ شیڈول کے طور پران افراد کے نام مقامی تھانوں یا قانون نافذ کرنےوالی ایجنسیوں کو بھی دیئےجاسکتےہیں۔ کسی بھی ایسے شخص کا نام جس کاکبھی کالعدم تنظیم سے تعلق رہاہو، اس کا نام فورتھ شڈول کے لیے تجویز کیاجاسکتاہے۔ یہاں یہ بات قابل ذکر ہےکہ عام طور پر فورتھ شیڈول میں کوئی بھی نام تین سال کیلئے شامل کیاجاتاہے۔ تین سال مکمل ہونے پر اس عرصے میں توسیع کی جاسکتی ہے۔ وزارت داخلہ فورتھ شیڈول میں شامل شخص کے بینک اکاﺅنٹس منجمد کرتی ہے۔ حکومت ان کے شناختی کارڈ اور پاسپورٹ منسوخ کرتی ہے۔ مزیدبرآں فورتھ شیڈول میں شامل شخص کو متعلقہ ایس ایچ او کی اجازت کے بغیر اپنی جگہ چھوڑنے کی اجازت نہیں ہوتی۔ تاہم فورتھ شیڈول میں شامل افراد الیکشن میں حصہ لے سکتے ہیں۔ 2014 میں مسرور احمد جھنگوی کانام فورتھ شیڈول میں شامل کیاگیا۔ 2016 میں مسرور نے جھنگ سے ضمنی انتخابات میں حصہ لیا۔ انھوں نے انتخابات میں کامیابی حاصل کی۔ الیکشن کمیشن آف پاکستان نے انھیں انتخابات لڑنےکیلئے اہل قراردیاتھا۔ لہذا دھرنے سے قبل حکومت کے پاس ڈاکٹرجلالی کی نگرانی کرنے اور ان کے ارادے کو جاننے کا اختیار تھا۔ ساﺅتھ ایشیاپارٹنرشپ پاکستان (ایس اےپی-پی کے) کےایگزیکٹوی ڈائریکٹر محمد تحسین کہتے ہیں کہ ایسا نہیں ہے کہ ان کے پاس اس تباہی کو روکنےکاکوئی اختیار یا کوئی قانونی جواز نہیں تھا، ان کے پاس جرات اور حوصلے کی کمی تھی۔ ایسا نہیں ہے کہ اسلام آباد روانگی سے قبل خادم حسین رضوی کے ارادے معلوم نہیں تھے۔ انھوں نے اس بارے میں ایک پریس کانفرنس کی تھی کہ وہ کیا اعلان کرنے والے ہیں اور کیا منصوبہ بندی کررہے ہیں۔ لیکن حکومت نے انھیں نہیں روکا۔ سابق سیکریٹری داخلہ تحسین نورانی نے بتایا، فورتھ شیڈول کے تحت پابندی کا شکار افراد کیلئے قانون میں کچھ غلط یا کمی نہیں ہے۔ ملا فضل اللہ اس وقت ایک معمولی عالم تھا جب اس کا نام فورتھ شیڈول میں شامل کیاگیا۔ بدقسمتی سےاس مرحلے پرحکومت نے فورتھ شیڈول کے ضوابظ پر کبھی عمل ہی نہیں کیا اور وہ ریاست کیلئے ایک عذاب بن گیا۔ سابق سیکریٹری داخلہ اور ساﺅتھ ایشیا پارٹنرشپ پاکستان کے ایگزیکٹوڈائریکٹر محمد تحسین دونوں کا خیال ہے کہ لاہور اور اسلام آباد کے دھرنوں کو روکا جاسکتاتھا، اگر فورتھ شیڈول کےپروٹوکالز کی مکمل پابندی کی جاتی۔ ترجمان سی ٹی ڈی نے بتایا کہ فورتھ شیڈول میں شامل افراد کی نگرانی کیلئے مناسب اقدامات کیے جارہے ہیں ان میں جسمانی اور ٹیکنیکل نگرانی شامل ہے۔ قانون کی حکمرانی کو یقینی بنانےکیلئے فورتھ شیڈول میں شامل افراد کو زرِ ضمانت جمع کراناہوگا۔ ڈپٹی انسپکٹرجنرل آپریشنز پنجاب پولیس عامرذوالفقار نے بتایاکہ فورتھ شیڈول میں شامل افراد متعلقہ تھانوں میں زرِ ضمانت جمع کرانے کے پابند ہیں۔ انھوں نے کہاکہ اگر فورتھ شیڈول میں شامل کوئی شخص کوئی غیرقانونی کام کرتاہے تواسے اینٹی ٹیررازم ایکٹ کے تحت گرفتارکیاجاتاہے۔ مزید برآں فورتھ شیڈول میں شامل افرادکواپنی جگہ چھوڑنے اور واپسی سے پہلے متعلقہ پولیس اسٹیشنز میں اطلاع دینی پڑتی ہے۔ پنجاب حکومت کے ترجمان ملک محمد احمد خان سے جب اس بارے میں پوچھاگیاکہ فورتھ شیڈول میں شامل ہونے کے باوجود یہ افراد غیرقانونی کاموں کے واضح ارادےکےساتھ آزادانہ نقل وحرکت کیسےکرتے ہیں۔ انھوں نے کہاکہ حکومت صوبائی سطح سے ڈسٹرکٹ تک اس معاملے کو مسلسل دیکھ رہی ہے۔ ترجمان نے بتایا کہ وزارت داخلہ اور متعلقہ ڈپٹی کمشنر انٹلیجنس رپورٹس کی بنیاد پر فیصلہ کرتے ہیں کہ کسی بھی شخص کا نام فورتھ شیڈول میں نگرانی کے لیے شامل ہونا چاہیئے یا خارج ہوناچاہیئے۔ پنجاب حکومت نیشنل ایکشن پلان میں شامل ضوابط کی سختی سے پابندی کررہی ہے اور کسی بھی ریاست مخالف عنصر کو آزادانہ کام کرنے یا قانون کا مذاق اڑانے کی اجازت نہیں دی جائےگی۔

اسلام کوٹ (خصوصی رپورٹ)تھرپارکر میں غذائی قلت و بیماریوں کے باعث ایک روز میں 6شیرخواربچے دم توڑ گئے ،دسمبر کے مہینے میں 43 ہلاک ہوئے،رواں سال کے دوران جاں بحق ہونیوالے بچوں کی تعداد 516 ہوچکی ہے۔تفصیلات کے مطابق صحرائے تھرپارکر میں گذشتہ 24 گھنٹوں کے دوران مزید 6بچے دم توڑ گئے ہیں۔ سول اسپتال مٹھی میں زیرِعلاج چیلہار کا رھائشی 12 ماھ کا ثنااللہ، 16 روزہ ھریش گوتم، کلوئی کے گاوں جمعون خاصخیلی کے حسن علی کا پانچ روزہ بچے سمیت تین نومولود بچے شامل ہیں۔تمام بچوں کو تھر کے دیھی علاقوں سے تشویش ناک حالت میں مٹھی ھسپتال لایا گیا تھا۔ دریں اثنا صحرائے تھر میں سردیوں کی آمد سے غذائی قلت کے شکار بچوں کی اموات میں اضافہ ہو گیا ہے۔ والدین کے مطابق کمزور بچے مختلف بیماریوں میں مبتلا ہو گئے ہیں ۔جن کو اسپتال لایا جاتا ہے تو وہاں معیاری ادویات اور بہتر علاج کی سہولیات میسر نہیں چنانچہ بچوں کی اموات بڑھتی جا رہی ہیں۔علاقہ مکینوں کا کہنا ہے کہ اگر فوری طور اقدامات نہیں کئے گئے تو سردیوں میں بچوں کی اموات مزید بڑھ سکتی ہیں۔

ڈی جی خان (نیا اخبار رپورٹ) صدر علما مشائخ اتحاد پاکستان اور سجادہ نشین دربار عالیہ سلیمانیہ تونسہ خواجہ عطا اﷲ تو نسوی نے کہا ہے حکومت ختم نبوت معاملے پر ہوش کے ناخن لے، ہم انتشار نہیں پھیلانا چاہئے، حکومت رانا ثنا اﷲ سمیت تمام ذمہ داراں کو بے نقاب کر کے ان کے خلاف سخت سے سخت کارروائی کرے، ختم نبوت کے حلف نامہ میں ترمیم کرنیوالے مجرموں کو بے نقاب کرنے کیلئے حکومت کو چند دن کی مہلت دیتے ہیں، ایسا نہ ہوا تو کشمیر سے کراچی تک پہیہ جام کر دینگے عالیہ سلیمانیہ تونسہ میں سجادہ نشین حضرت خواجہ عطا اﷲ تو نسوی کی زیر صدارت ہنگامی اجلاس ہوا جس میں ملک بھر سے درجنوں سجادہ نشینوں نے شرکت کی۔ اس موقع پر خطاب کرتے ہوئے انہوں نے کہا ابھی پیر حمید الدین سیالوی نے صرف رانا ثنا اﷲ کے استعفی کا مطالبہ کیا ہے جبکہ ابھی ہم میں سے کسی اور سجادہ نشین نے باقاعدہ استعفے نہیں مانگے، اگر ہم سب سے استعفے مانگے تو 65 سے زائد استعفے تیار ہیں۔ ختم نبوت کے ذمہ داران کا تعین کرنے کے لئے حکومت کو وقت دیتے ہیں۔ حکومت کو درگاہوں اور گدی نشینوں کی سکیورٹی سے کوئی مطلب ہے نہ ہی درگاہوں اور گدی نشینوں کی سکیورٹی سے کوئی مطلب ہے نہ ہی درگاہوں کے کروڑوں عقیدت مند حکومت کو نظر آرہے ہیں۔ حکومت حساس معاملے کی اہمیت کا ادارک نہیں کر پا رہی، اگر پاکستان کے گدی نشینوں نے کال دی تو آزاد کشمیر سے کراچی تک پہیہ جام ہو گا۔ کم عقل مشیروں کی وجہ ملک میں انتشار پھیلنے کا خطرہ ہے جس کی ذمہ دار حکومت خود ہو گی۔ پیر حمیدالدین سیالوی نے کہا رانا ثنا اﷲ کے استعفی سے پیچھے ہٹنے کا سوال ہی پیدا نہیں ہوتا ، وہ دوبارہ کلمہ پڑھ کر اﷲ سے اپنے گناہوں کی معافی مانگیں، وزیر اعلیٰ پنجاب شہباز شریف سے واضح کہا ہے کہ رانا ثنا اﷲ کو مستفی ہونا پڑے گا۔ اس موقع پر گدی نشین گڑھی شریف پیر محمد اکرم شاہ، گدی نشین سیال شریف پیر حمید الدین سیالوی، گدی نشین چور اشریف سید سعادت شاہ، گدی نشین مہرا شریف فاروق احمد، گدی نشین بسال شریف پیر قیصر، گدی نشین پیر کرماں والا، پیر شوکت، سید لیاقت علی، پیر صابر شاہ، پیر فیاض شاہ، سید مرید کا ظلم سمیت پچیس درباروں کے گدی نشینوں نے خواجہ عطا اﷲ تو نسوی پر مکمل اعتماد کا اظہار کیا۔

لاہور (نیا اخبار رپورٹ) اہل بیت کے بارے میں ایک صحافی کے توہین آمیز ریمارکس پر احتجاج پھوٹ پڑا، جموں اور کشمیر میں احتجاجی مظاہرے کئے گئے اور صحافی کے خلاف کارروائی کا مطالبہ کیاجارہا ہے۔ بھارتی ٹی وی صحافی روہت سردانہ کے بیان پر پریس کلب جموں کے باہر احتجاج کیاگیا جس میں بڑی تعداد میں لوگوں نے شرکت کی۔ اس احتجاج کا اہتمام شیعہ فیڈریشن، مسلم کو آرڈی نیشن کمیٹی، انجمن حسین بٹھنڈی، گوجر اصلاحی کمیٹی، گوجر بکروال اسٹوڈنٹس ویلفیئر ایسوسی ایشن ، شیعہ اسٹوڈنٹس یونین جموں ، جموں کشمیر یوتھ دیش اور لداخ اسٹوڈنٹس نے کیا تھا۔ مظاہرین سے خطاب کرتے ہوئے مسلم ایکشن کمیٹی جموں کے صدر محمد شریف سرتاج نے سرکار کو وارننگ دیتے ہوئے کہا اگر سرکار نے حضور اکرم کی اہلیہ اور لخت جگر کے گستاخ کے خلاف ایک ہفتے کے اندر اندر قانونی کارروائی نہ کی تو ہم بڑے پیمانے پر احتجاج پر مجبور ہوجائیں گے۔ اس موقع پر شیعہ فیڈریشن کے صدر عاشق حسین خان نے کہا کہ یہ آزادی اظہار رائے کا ناجائز استعمال ہے۔ انہوں نے کہا کہ مسلمان اسلام کی برگزیدہ شخصیات سے متعلق توہین آمیز بیان کبھی برداشت نہیں کرسکتا۔

لاہور (نیا اخبار رپورٹ)پنجاب پولیس پرانی وردی (کالی شرٹ،خاکی پتلون)استعمال کریگی،فیصلہ کر لیا گیا،آئی جی مارچ کے پہلے ہفتے میں پرانی وردی کو بحال کرنے کا نوٹیفکیشن جاری کرینگے۔تفصیلات کے مطابق افسروں اور جوانوں کو اولیو گرین رنگ پر تحفظات تھے،سابق آئی جی مشاق کھیرا کی ریٹائرمنٹ کے بعد کھل کر یونیفارم کی تبدیلی کی بات شروع ہو گئی جس پر موجودہ آئی جی عارف نواز نے اعلیٰ سطح کی کمیٹی رپورٹ دی کہ فیلڈ افسر اہلکار پرانی وردی پر جانا چاہتے ہیں۔ بعدازاں ایڈیشنل آئی جی فنانس نے ڈی آئی جی کی سربراہی میں دوٹیمیں بنا دیں جو افسروں،جوانوں اور سول سوسائٹی سے رائے لیکر رپورٹ آئی جی کو بھجوائیں گی۔موجودہ آئی جی اولیو گرین یونیفارم کیلئے خریداکپڑا ضائع ہونے سے بچانا چاہتے ہیں ۔