اسلام آباد (مانیٹرنگ ڈیسک) قومی احتساب بیورو نیب کے چیئرمین قمر زمان چوہدری کا کہنا ہے کہ پاناما پیپرز کیس میں سپریم کورٹ کے فیصلے کی روشنی میں شریف خاندان کے خلاف ریفرنسز بہت جلد دائر کر دیے جائیں گے۔ نیب ہیڈ کوارٹر میں صحافیوں سے بات چیت کرتے ہوئے چیئرمین نیب نے کہا کہ شریف خاندان کے خلاف پاناما پیپرز کیس میں سپریم کورٹ کے فیصلے پر قانون کے مطابق عملدرآمد کیا جائے گا۔ چیئرمین نیب کی بات کی وضاحت کرتے ہوئے ایک سینئر عہدیدار نے بتایا کہ نیب عید الاضحی کے فورا بعد 4 کرپشن ریفرنسز دائر کرے گا جو سابق وزیراعظم نواز شریف، ان کے دونوں بیٹوں حسین نواز، حسن نواز اور وزیر خزانہ اسحق ڈار کے خلاف ہوں گے۔نیب عہدیدار نے بتایا کہ عدالت عظمی نے نیب کو 11 ستمبر کی ڈیڈ لائن دی ہے لہذا شریف خاندان کے مذکورہ افراد کے خلاف اسلام آباد کی احتساب عدالت میں ستمبر کے دوسرے ہفتے میں ریفرنسز دائر کر دیے جائیں گے۔ انہوں نے مزید بتایا کہ نیب یہ ریفرنسز سابق وزیر اعظم نواز شریف، ان کی صاحبزادی مریم نواز، ان کے بیٹے حسن نواز اور حسین نواز اور وزیر خزانہ اسحق ڈار کی جانب سے پاناما پیپرز کیس میں تحقیقات کرنے والی مشترکہ تحقیقاتی ٹیم (جے آئی ٹی) کے سامنے دیے جانے والے بیانات کی بنیاد پر دائر کرے گا۔نیب اپنے ان ریفرنسز میں وفاقی تحقیقاتی ادارے (ایف آئی اے)، فیڈرل بورڈ آف ریونیو (ایف بی آر)، سیکیورٹیز اینڈ ایکسچینج کمیشن آف پاکستان (ایس ای سی پی) اور اسٹیٹ بینک آف پاکستان (ایس بی پی) کی جانب سے حاصل کردہ دستاویزی مواد پر بھی غور کرے گا۔ مذکورہ عہدیدار نے بتایا کہ نیب نے شریف خاندان کو 3 نوٹسز جاری کیے لیکن شریف خاندان کا کوئی بھی فرد نیب کے تحقیقاتی افسران کے سامنے پیش نہیں ہوا۔ انہوں نے بتایا کہ جے آئی ٹی اراکین کو بھی اپنے بیانات نیب کی مشترکہ تحقیقاتی ٹیم کے سامنے ریکارڈ کرانے کے لیے طلب کیا جائے گا۔نیب حکام نے یہ بھی بتایا کہ دیگر ممالک کے ساتھ باہمی قانونی معاونت (ایم ایل اے) کی روشنی میں ریفرنسز تیار کرنے کے لیے نیب ہیڈ کوارٹر کو جے آئی ٹی رپورٹ کی جِلد 10 کی کاپی موصول ہو چکی ہے۔دوسری جانب افتتاحی تقریب سے خطاب کرتے ہوئے چیئرمین نیب کا کہنا تھا کہ یہ ادارہ اپنی اہمیت اور اپنے سائز کے ساتھ وسیع ہوتا جارہا ہے اور آہستہ آہستہ اپنے آپ کو قومی اور بین الاقوامی سطح پر ایک تسلیم شدہ انسداد کرپشن ادارے کے طور پر منوا رہا ہے۔نیب کے سربراہ نے کہا کہ کرپشن پرسیپشن انڈیکس (سی پی آئی) کے مطابق پاکستان کی حالت بتدریج بہتر ہوتی جارہی ہے لیکن پاکستان سے کرپشن کی لعنت کو مکمل طور پر ختم کرنے کے لیے ریاست اور معاشرے کو ساتھ مل کر کام کرنا ہوگا۔

اسلام آباد (اے این این ) چیرمین تحریک انصاف عمران خان نے یکم اگست کو پارٹی کو خیرباد کہنے والی رکن عائشہ گلالئی کے نام خط لکھا ہے جس میں انہیں پارٹی کا منحرف رکن قرار دیا گیا ہے۔عمران خان کی جانب سے لکھے گئے خط کے متن کے مطابق پارٹی سے انحراف کے بعد عائشہ گلالئی پارٹی کی ذمہ داری نہیں رہیں۔تحریک انصاف کی جانب سے جاری خط کے متن میں کہا گیا ہے کہ عائشہ گلالئی کے خلاف کارروائی کا فیصلہ پارٹی قیادت کی مشاورت سے کیا جارہا ہے جب کہ عمران خان نے فیصلے میں بطور پارٹی چیرمین اختیارات کا استعمال کیا۔خط کے متن کے مطابق عائشہ گلالئی آئین کے آرٹیکل 63 کے تحت پارٹی کی منحرف رکن قرار دی گئیں اور وہ معطلی کے بعد شو کاز نوٹس کا جواب دینے میں بھی ناکام رہیں۔خط میں عائشہ گلالئی کی جانب سے یکم اگست کو کی گئی پریس کانفرنس کا بھی حوالہ دیا گیا ہے جس میں انہوں نے پارٹی سے مستعفی ہونے کا اعلان کیا تھا۔خیال رہے کہ یکم اگست کو عائشہ گلالئی نے اسلام آباد پریس کلب میں پریس کانفرنس کے دوران عمران خان پر سنگین الزامات لگاتے ہوئے کہا تھا کہ ان کی وجہ سے پارٹی میں ماں، بہنوں اور بیٹیوں کی عزت محفوظ نہیں۔

لاہور (اپنے سٹاف رپورٹر سے) نوازشریف آج غیرملکی ائرلائنز کی پرواز ای کے 625 کے ذریعے لندن روانہ ہونگے، کلثوم نواز کی کیموتھراپی آئندہ ہفتے شروع ہوگی- لندن میں زیر علاج بیگم کلثوم نوازکے حوالے سے ذرائع نے بتایا کہ ڈاکٹروں کو کچھ ضروری سکین اور ٹیسٹوں کے نتائج کا انتظار ہے جس کے بعد انکی کیموتھراپی اس ہفتے کے آخر میں یا آئندہ ہفتے شروع ہوگی جبکہ نوازشریف (آج)بدھ کو غیرملکی ائرلائنزکی پرواز ای کے 625 کے ذریعے لندن روانہ ہونگے، توقع ہے کہ وہ لندن میں 10 دن قیام کرینگے جبکہ انکی آمدپر(ن) لیگ ویسٹ لندن میں ریلی نکالے گی۔واضح رہے حمزہ شہباز، نواز شریف کی دوسری بیٹی اور وزیر خزانہ اسحاق ڈار کی بہو اسماء علی، شہباز شریف کی بیٹی، حمزہ شہباز کے بیوی بچے اور وزیر اعلیٰ پنجاب شہباز شریف کے صاحبزادے سلیمان شہباز پہلے ہی لندن میں موجود ہیں۔ سابق وزیر اعظم نواز شریف کی اہلیہ کلثوم نواز شریف جو علاج کے لئے لندن گئی ہیں، ان کے گلے میں کینسر کی تشخیص کی گئی ہے جس کا علاج کیا جا رہا ہے۔

لاہور (اپنے سٹاف رپورٹر سے) سپریم کورٹ آف پاکستان کے سینئر جج جسٹس آصف سعید کھوسہ کی پنجاب انسٹی ٹیوٹ آف کارڈیالوجی میں انجیو پلاسٹی کی گئی ،چیف جسٹس آف پاکستان جسٹس میاں ثاقب نثار نے ہسپتال جا کر جسٹس آصف سعید کھوسہ کی عیادت کی ۔تفصیلات کے مطابق سپریم کورٹ کے سینئر ترین جج جسٹس آصف سعید کھوسہ کو گزشتہ روز سینے میں شدید تکلیف کے باعث پنجاب انسٹی ٹیوٹ آف کارڈیالوجی منتقل کیا گیا جہاں ڈاکٹرز نے دل کے دورے کی تصدیق کرتے ہوئے ان کی انجیو گرافی کی جس میں دو شریانیں بند ہونے کی تشخیص کرتے ہوئے فوری انجیو پلاسٹی تجویز کی ۔ڈاکٹر ندیم حیات اور شاہد ندیم نے جسٹس آصف سعید کھوسہ کی انجیو پلاسٹی کی جس کے بعد انہیں کمرے میں منتقل کر دیا گیا ۔ ڈاکٹرز کے مطابق انجیو پلاسٹی کے بعد جسٹس آصف سعید کھوسہ بالکل خیریت سے ہیں۔ بتایاگیا ہے کہ چیف جسٹس آف پاکستان جسٹس میاں ثاقب نثار نے پنجاب انسٹی ٹیوٹ آف کارڈیالوجی پہنچ کر جسٹس آصف سعید کھوسہ کی عیادت کی اور ان کی جلد صحتیابی کےلئے نیک خواہشات کا اظہار کیا۔

لاہور (مانیٹرنگ ڈیسک) چینل ۵ کے تجزیوں اور تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے معروف صحافی و تجزیہ کار ضیا شاہد نے کہا ہے کہ میاں نوازشریف کی نااہلی کا فیصلہ سپریم کورٹ نے کیا ہے۔ مریم نواز صاحبہ کو سپریم کورٹ کے پانچ ججوں سے پوچھنا چاہئے کہ ان کے والد محترم کو کیوں نااہل کیا گیا ہے۔ اس کا جواب عدلیہ یا جے آئی ٹی ہی دے سکتی ہے۔ این اے 120 میں اس وقت دو بڑی پارٹیاں منظر عام پر ہیں۔ ایک (ن) لیگ اور دوسری پی ٹی آئی۔ ن لیگ کی مرکز میں حکومت ہے اور پنجاب میں بھی ہے قومی اسمبلی میں سب سے زیادہ ان کی سیٹیں ہیں اس لئے انہیں ایک نفسیاتی حمایت تو حاصل ہے۔ میاں نوازشریف شاید آخری جلسے سے اس حلقے میں خود بھی خطاب کریں گے۔ آصف علی زرداری کے آج کے بیان میں کسی حد تک صداقت نظر آتی ہے۔ تاریخ گواہ ہے عدلیہ سے جتنے فیصلے پی پی پی کے خلاف آئے ہیں اتنے ن لیگ کے خلاف نہیں آئے۔ جبکہ مسلم لیگ (ن) کے خلاف جب بھی فیصلے آئے انہوں نے احتجاج کئے اور سپریم کورٹ پر حملہ تک کا الزام ان پر لگا۔ اس کے مقابلے میں پی پی پی پر جب بھی الزام لگے یا ان کے خلاف فیصلے آئے انہوں نے کوئی ردعمل نہیں دیا۔ یوسف رضا گیلانی کی نااہلی کے بعد وہ خاموشی سے گھر چلے گئے اور کوئی ردعمل نہیں دیا۔ یوسف رضا گیلانی کی نااہلی کے بعد وہ خاموشی سے گھر چلے گئے اور کوئی احتجاج نہیں کیا۔ حالانکہ مرکز میں ان کی حکومت تھی۔ اور جنوبی پنجاب اور سندھ میں بھی ان کی حکومت تھی۔ حقائق کو تبدیل نہیں تو نہیں کیا جا سکتا۔ نوازشریف کو جب اسحاق خان نے نااہل کیا تو انہوں نے احتجاج کیا، اس کے مقابلے میں جب پی پی پی اپنی حکومت کی برطرفی پر سپریم کورٹ گئی تو عدالت نے اس کے خلاف فیصلہ دیا جبکہ میاں نوازشریف کی حکومت کو بحال کر دیا گیا۔ ملک میں (ن) لیگ کی حکومت ہے لیکن سیاسی جماعتوں کے رویے سے لگتا ہے کہ ملک میں وقت سے قبل ہی الیکشن ہونے ضروری ہو گئے ہیں۔ لگتا ہے تمام سیاسی جماعتیں الیکشن8 ماہ پہلے ہی کروانا چاہتی ہیں۔ آصف زرداری واپس آ چکے ہیں اور بھرپور مہم چلانا شروع ہو گئے ہیں اسی طرح تحریک انصاف بنی گالہ میں بھرپور مہم چلا رہی ہے۔ عمران خان نے عدالت میں اپنے کیس کی بھرپور پیروی کی۔ اور بالآخر میاں صاحب کو نااہل کروا کر چھوڑا۔ ایک نجی ٹی وی چینل نے شریف فیملی کے خلاف مہم شروع کر رکھی ہے۔ کسی حد تک تو ان سے اتفاق کیا جا سکتا ہے لیکن شہباز شریف پر جو انہوں نے کرپشن کا الزام لگایا ہے وہ اتنا مضبوط دکھائی نہیں دیتا۔ پنجاب کے وزیراعلیٰ صرف پونے دو کروڑ ڈالر تو نہیں کھائے گا۔ اگر الزام 20، پچیس ارب کا ہوتا تو سمجھ بھی آتا۔ جتنا الزام انہوں نے لگایا وہ تو گلی محلوں میں نالیاں ٹھیک کروانے والے کھا سکتے ہیں۔ اس رقم سے ہی لگتا ہے کہ یہ الزام انتہائی غلط ہے۔ بلدیاتی حلقوں کے چھوٹے چھوٹے رکن گلی، نالی، گٹر ٹھیک کروانے والے بھی پانچ، چھ کروڑ سے کم کی کرپشن نہیں کرتے۔ میاں شہباز شریف پر لگنے والے الزامات بالکل غلط دکھائی دیتے ہیں۔ سابق صدر سپریم کورٹ بار علی ظفر نے کہا ہے کہ کارکردگی ایک علیحدہ چیز ہے اور عدلیہ کی جانب سے نااہلی دوسری چیز ہے۔ عدالت نے اگر کچھ چھپانے یا نہ بتانے پر نااہل کیا ہے تو آپ کی کارکردگی اس کا جواز نہیں بن سکتا کہ وہ آپ کی اچھی کارکردگی کی وجہ سے اپنے فیصلے تبدیل کر لے۔ پی پی پی کے مصطفی نواز کھوکھر نے کہا ہے کہ سابق صدر آصف علی زرداری نے آج کی تقریر میں حقائق بیان کئے ہیں۔ انہوں نے 58/2B ختم کر کے تمام اختیارات پارلیمنٹ کو دے دیئے۔ پی پی پی نے کبھی اداروں کے خلاف اقدام نہیں اٹھائے۔ ڈاکٹر عاصم کو عدالت نے علاج کے لئے باہر جانے کی اجازت دی ہے۔ یہ الزام لگانا کہ کسی مک مکا کا نتیجہ ہے۔ بالکل غلط ہے۔ ڈاکٹر عاصم کے سلسلے میں عدالت نے حکم دیا ہے کہ وہ علاج کے لئے ایک ماہ کے لئے باہر جا سکتے ہیں۔ ڈاکٹر عاصم کا مقدمہ ہی غلط تھا۔ آصف زرداری نے آج کی تقریر میں کہا ہے کہ ہمارے دور میں کوئی سیاسی قیدی نہیں تھا۔ ہم نے اپنی حکومت ہونے کے باوجود کوئی ریلی نہیں نکالی۔ اداروں کا ہمیشہ احترام کیا۔ نہ کوئی جلوس نکالا اور نہ احتجاجاً اداروں پر حملے کئے۔ تحریک انصاف کے فواد چودھری نے کہا ہے کہ تحریک انصاف نے ہمیشہ آئین اور قانون کے احترام کی خاطر سر جھکایا ہے۔ ملک میں (ن) لیگ کی حکومت ہے۔ ہم آئین کے تحت چاہتے ہیں کہ وہ اپنی مدت پورے کری۔ شاہد خاقان عباسی جب سے وزیراعظم بنے ہیں وہ اپنے ہاﺅس میں کم اور جاتی امراءمیں زیادہ رہتے ہیں۔ اسی طرح ان کے وزراءبھی ملک کا بیڑا غرق کرنے پر تلے ہوئے ہیں، اسحاق ڈار صاحب نے اکانمی کا ستیا ناس کر کے رکھ دیا ہے۔ ہم نے بہت سے سوالات اٹھا رکھے ہیں۔ لگتا ہے کہ حکومت وقت سے پہلے ہی الیکشن کی طرف لے کر جا رہی ہے۔ آرٹیکل 63 کے مطابق اپنی سیاسی پارٹی سے انحراف کر کے ممبر اسمبلی نہیں رہ سکتے عائشہ گلا لئی اس آرٹیکل کے تحت اب ممبر اسمبلی نہیں رہیں۔ ہم نے سپیکر کو یہی درخواست دی ہے کہ ان سے سیٹ خالی کروائی جائے۔ اسی طرح ہم ضیاءاللہ آفریدی کے خلاف بھی ریفرنس دائر کرنے جا رہے ہیں۔ ضیاءاللہ آفریدی کرپشن میں پکڑے گئے تھے۔ انہوں نے پرویز خٹک کے خلاف مہم شروع کر رکھی ہے جس کے خلاف کوئی ایکشن ہوتا ہے وہ آپ کے خلاف ہو جاتا ہے۔ پی ٹی آئی سے جانے والے وہ لوگ ہیں جو دوسری پارٹیوں سے یہاں آئے تھے۔ نہ ان کا کوئی قد ہے نہ حلقہ انتخاب۔ آفریدی قبیلہ پی ٹی آئی کے ساتھ کھڑا ہے۔ ضیاءاللہ آفریدی پر مقدمے میں پی پی پی اب انہیں سوٹ کرے گی وہ صحیح جماعت میں چلے گئے ہیں۔ انہیں 2015ءمیں پارٹی نے نکال دیا گیا تھا۔ پارٹی نے ان کے خلاف ایکشن لے لیا تھا اب ایک کردار سپیکر کا ہے اور دوسرا پارلیمنٹ کا بھی ہے۔ آرٹیکل 63 کے تحت وہ پارٹی چھوڑنے کا اعلان کر چکے ہیں اس لئے وہ اسمبلی کے ممبر نہیں رہے۔

اسلام آباد (مانیٹرنگ ڈیسک) سابق صدر پرویز مشرف نے کہا ہے کہ نوازشریف کے نااہل ہونے پر لوگ بڑے خوش ہوئے، بھارت دہشتگردوں کو پاکستان کے خلاف استعمال کرتا ہے، بلوچستان اور افغانستان میں مداخلت کر رہا ہے نجی ٹی وی کو خصوصی انٹرویو دیتے ہوئے انہوں نے کہا کہ امریکی صدر ٹرمپ کو پاکستان، افغانستان اور کشمیر کے بارے میں کچھ معلوم نہیں ہے۔ نوازشریف نے ذاتی مفادات کے لئے بھارت سے تعلقات قائم کئے، ملکی مفاد کو پس پشت ڈال دیا، 2013ءسے اب تک ہر سال چار پانچ ارب ترسیلات زر بھارت جا رہا ہے۔ بھارت سے تعلقات بہتر بنانے کا مقصد ایک دوسرے کے شادی بیاہ میں شرکت نہیں بلکہ مسئلہ کشمیر کو حل کرانا ہونا چاہئے۔ ڈاکٹر قدیر خان جب میرے خلاف باتیں کرتے ہیں تو افسوس ہوتا ہے، عالمی طاقتیں ڈاکٹر قدیر کو مانگ رہی تھیں میں نے انکار کر کے انہیں بچایا، ڈاکٹر قدیر شرمسار تھے روتے ہوئے میرے گھٹنوں کو ہاتھ لگایا۔ اب میرے خلاف باتیں کرتے ہیں۔ پرویز مشرف نے کہا کہ مجھے نہیں پتہ تھا کہ اسامہ بن لادن پاکستان میں ہے۔