ممبئی(شوبز ڈیسک) بالی وڈ سپرسٹار سلمان خان نے مشہور ریئلٹی شو ” بگ باس “ کے سیزن 11 میں ایک قسط کا معاوضہ 11کروڑ وصول کیا ہے جب کہ مجموعی طور پر انہوں نے 330کروڑ کی کمائی کی۔ بگ باس کے سیزن 11 کے لیے انہوں نے ایک قسط کے 11 کروڑ وصول کیے ہیں۔دبنگ خان کا ریئلٹی شو ’ بگ باس ‘ کا 11 واں سیزن بھی اختتام پذیر ہوچکا ہے اور اداکارہ شلپا شندے بگ باس کی فاتح قرار پائی ہیں۔شلپا شندے کو ٹرافی اور 44 لاکھ کی خطیر انعامی رقم دی گئی ہے لیکن سلو میاں کی اس شو سے کمائی نے سب کو حیران کر دیا ہے۔بھارتی میڈیا کے مطابق ’ بگ باس 11‘ 15 ہفتے جاری رہا اور اس کی 30 قسطیں ٹی وی پر نشر کی گئیں۔سلو میاں نے مجموعی طور پر شو سے 330 کروڑ روپے کی کمائی کی اور انہوں نے ٹی وی شو سے کمائی کا اپنا ہی ریکارڈ توڑ ڈالا۔

لاہور(شوبز ڈیسک) معروف اداکار اور میزبان ساحر لودھی کو اپنے شو کے ذریعے بے راہ روی پھیلانے کے الزام پر پاکستانیوں نے ان کو گرفتار کرنے اور شو پر پابندی لگانے کا مطالبہ کردیا۔ تفصیلا ت کے مطابق قصور میں ننھی زینب کے واقعے اور ملک میں بڑھتے ہوئے بچوں کیساتھ زیادتی کے کیسز کے بعد ہر کوئی ایسے واقعات کی بھرپور الفاظ میں مزمت کرتا نظر آتا ہے اور مطالبہ کیا جارہا ہے کہ زینب کے قاتل کو کیفر کردار تک پہنچایا جائے اور اس کو سر عام پھانسی پر لٹکایا جائے۔زینب واقعہ کے بعد ملک بھر میں احتجاج کا سلسلہ جاری ہے اور اسی تناظر میں ایک معروف ٹی وی مارننگ شو آپ کا ساحر نے پاکستانیوں کو شدید غصے میں مبتلا کردیا ہے۔
اور کم سن بچوں کا براہ راست رقص دکھانے اور بے راہ روی کو پھیلانے کے الزام عائد کرتے ہوئے شو کے میزبان ساحر لودھی کو گرفتار کرنے اور شو پر پابندی عائد کرنے کا مطالبہ کردیا ہے۔یہ مطالبہ اس وقت سامنے آیا ہے جب شو میں کم سن لڑکی کی رقص کرنے کی فوٹیج سامنے آئی۔

ممبئی(شوبز ڈیسک) معروف بھارتی اداکار کی گوا کے ساحل سے لاش ملی ہے، پولیس کا کہنا ہے کہ سدھو پلائی کی والدہ نے لاش کو شناخت کرلیا۔بھارتی میڈیا کے مطابق ملائلم فلموں کے اداکار سدھو پلائی گوا میں سمندر میں ڈوب کر ہلاک ہوگئے، 27 سالہ اداکار مشہور فلمساز پی کے آر پلائی کے بیٹے ہیں۔پولیس کے مطابق سدھو کی لاش ان کی والدہ نے شناخت کرلی جس کے بعد اداکار کی لاش ان کے اہل خانہ کے حوالے کردی گئی۔رپورٹ کے مطابق سدھو پلائی 12 جنوری کو گوا آئے تھے جبکہ اتوار 14 جنوری کو ان کے ساتھ حادثہ پیش آیا، پیر 15 جنوری کو ان کی لاش ملی۔

ممبئی(شوبز ڈیسک)بالی وڈ اداکار سیف علی خان کی بہن سوہا علی خان کی بیٹی عنایہ کی تیمور علی خان سے مشابہہ ایک تصویر آج کل انٹرنیٹ پر خوب وائرل ہو رہی ہے۔سیف علی خان اور کرینہ کپور کے بیٹے تیمور علی خان پیدائش کے بعد سے ہی شہ سرخیوں میں ہیں اور ان کی معصومیت بھری تصاویر کو مداح بے حد پسند کرتے ہیں۔گزشتہ سال ستمبر کے آخر میں سیف علی خان کی بہن سوہا علی خان کے ہاں بیٹی عنایہ کی پیدائش ہوئی ہے۔عنایہ کو گزشتہ دنوں ایئرپورٹ پر اپنی والدہ کے ہمراہ دیکھا گیا، اس موقع پر لی گئی تصویر میں دیکھا جاسکتا ہے کہ سوئی ہوئی ننھی عنایہ کو سوہا علی خان نے کندھے سے لگا رکھا ہے۔
۔ اس تصویر میں وہ بالکل اپنے کزن تیمور علی خان سے مشابہہ نظر آرہی ہیں۔عنایہ اور تیمور کی سوتے ہوئے لی گئی یہ تصاویر سوشل میڈیا پر تیزی سے وائرل ہو رہی ہیں اور مداحوں کی جانب سے اس پر دلچسپ قسم کے تبصرے بھی کیے جارہے ہیں۔

نیویارک(شوبز ڈیسک) ہالی وڈ کی کامیڈی اور ایڈونچر سے بھرپور نئی تھری ڈی لائیو ایکشن اینیمیٹیڈ فلم “پیٹر ریبٹ” کی نئی جھلکیاں جاری کر دی گئیں ۔ ہدا یتکاروِل گلوک کی ڈائریکشن میں بننے والی یہ دلچسپ کامیڈی فلم بچوں کی کہانیوں کے مشہورفکشنل کردار پیٹر ریبٹ کے گِرد گھوم رہی ہے جس میں ایک نٹ کھٹ خرگوش اپنی شرارتوں سے سب کی ناک میں دم کئے ہوئے دکھائی دے رہا ہے۔یہ شرارتی خرگوش اپنے مشن کو مکمل کرنے کیلئے ایک کسان کے دلکش کھیتوں کا رخ کرتا ہے جہاں اپنے ساتھیوں سمیت چھپ کر اپنی زندگی کو انجوائے کرنا چاہتا ہے ۔زارے نیل بیدیئن اوروِل گلوک کی مشترکہ پروڈیوس کردہ ایڈونچر اور ڈرامے سے بھرپور اس فلم میں ناچتے گاتے مختلف کرداروں کیلئے ڈائیلاگ ہالی وڈ کی نامور اداکار مارگیٹ روبی، الزبیتھ ڈیبیکی،ڈیزی رِیڈلی،ڈومنال گلیسن،جیمز کورڈن،ٹام گریوس،برنینڈو سینٹوس،ڈیبوراہ راک اور ایما لیوئس سمیت کئی فنکاروں کی آوازوں میں ریکارڈ کئے گئے ہیں۔سونی پکچرز اینیمیشن کی تیار کردہ اس تھری ڈی فلم کے انوکھے مزاحیہ اور دلچسپ کرداردیکھنے والوں کو ہنساتے ہنساتے لوٹ پوٹ کر دینگے جو 50ملین ڈالر لاگت سے مکمل کی گئی ہے اورکولمبیا پکچرز کے تحت 9فروری کو سنیما گھروں کی زینت بنائی جائیگی۔