اسلام آباد(آئی این پی)پی سی بی کے چیئرمین نجم سیٹھی نے کہا ہے کہ انڈر19ورلڈ کپ سیمی فائنل میںبھارت کہ ہاتھوں بڑی شکست پر مایوسی ہوئی،پرانے دشمن بھارت کے ہاتھوں شکست پر خامیوں کا جائزہ لینگے ۔منگل کو اپنے ٹوئٹر پیغام میں چیئرمین پی سی بی نجم سیٹھی نے کہاکہ انڈر19کرکٹ ورلڈ کپ کے سیمی فائنل بھارت کہ ہاتھوں بڑی شکست پر مایوسی ہوئی ،پرانے دشمن بھارت کے ہاتھوں شکست پر خامیوں کا جائزہ لینگے ،2020ورلڈ کپ سے قبل خامیوں کی نشاندہی بھی کرینگے ، انڈر۔19ورلڈ کپ میں جونیئر ٹیم نے سیمی فائنل تک بہترین فائٹ کی۔

دبئی(آئی این پی)انٹرنیشنل کرکٹ کونسل (آئی سی سی)نے ورلڈ ٹی ٹوئنٹی 2020کے وینیوزکا اعلان کردیا۔آئی سی سی کی جانب سے اعلان کردہ وینیوز کے مطابق،ورلڈ ٹی ٹوئنٹی 2020 کے میچزمجموعی طورپر آسٹریلیا کے8شہروں کے13گراونڈزپرہوں گے۔مینزاورویمنزورلڈ ٹی 20 پہلی بارایک ہی ملک میں الگ الگ تاریخوں میں ہوں گے،خواتین کا ایونٹ 21فروری سے 8مارچ تک ہوگا جبکہ مردوں کے میچز 18اکتوبر سے15نومبرتک کھیلے جائیں گے۔مینزٹی 20میں 16اورویمنزایونٹ میں 10ٹیمیں شریک ہوں گی، میچزکی میزبانی کرنے والے شہروں میں ایڈیلیڈ، برسبین، کینبرا، گیلونگ، پرتھ، سڈنی، ہوبارٹ اورمیلبرن شامل ہیں۔دونوں ایونٹس کے فائنل کی میزبانی میلبرن کرکٹ گرانڈ کرے گا۔

اسلام آباد(آئی این پی) ورلڈ باکسنگ چیمپئن محمد وسیم کلاسک فٹبال لیگ کے ایمبیسڈر بن گئے۔فالکن خان کے نام سے جانے جانےوالے موجودہ ورلڈ سلور فلائی ویٹ باکسنگ چیمپئن محمد وسیم نے ایمبیسڈر کی حیثیت سے کلاسک فٹبال لیگ جوائن کرنے کا اعلان کردیا۔

، محمد وسیم پاکستان کی تاریخ کے واحد پروفیشنل باکسر ہیں جنھیں ورلڈ چیمپئن بننے کا اعزاز حاصل ہوا ہے۔واضح رہے کہ فرنچائزکے ماڈل پر سی ایف ایل کا انعقاد روس میں ہونے والے فیفا ورلڈ کپ 2018 کے چند ہفتے بعد اگست میں کراچی میں متوقع ہے۔حیدر داد چیئرمین کلاسک فٹبال لیگ نے محمد وسیم کا شکریہ ادا کرتے ہوئے کہا ہے کہ محمد وسیم دنیا بھر اور پاکستان خصوصا منی برازیل کہلانے والے فٹبال کے گڑھ کراچی کے علاقے لیاری میں بے انتہا مقبول ہیں، وہ فٹبال اور باکسنگ کے نوجوان چاہنے والوں کے یکساں مقبول ہیرو ہیں۔قبل ازیں شاہدکھوکھر ڈائریکٹر کلاسک لیگ سے گفتگو کرتے ہوئے محمد وسیم نے سی ایف ایل مینجمنٹ کی کاوشوں کو سراہتے ہوئے کہا ہے کہ ایونٹ میں ایمبیسڈر کی حیثیت سے شامل ہونا میرے لیے باعث افتخار ہے، پاکستان میں کھیلوں کا فروغ میرا مشن ہے، میں خود بھی فٹبال کھیلنا پسند کرتا ہوں۔

کراچی(آئی این پی) پاکستانی فاسٹ بولر رومان رئیس کا کہنا ہے کہ ٹی ٹوئنٹی میں نمبر ون ٹیم بننے پر خوشی ہے۔رومان رئیس کا کہنا تھا کہ پاکستان کےساتھ سیریز سے قبل نیوزی لینڈ کی ٹیم ویسٹ انڈیز کو شکست دے چکی تھی اور ان کا مورال بلند تھا۔

فاسٹ بولر نے کہا کہ اگرچہ ٹیم نے بھرپور کوشش کی لیکن ون ڈے سیریز میں کبھی بالنگ نہیں چلی تو کبھی بیٹنگ نے دھوکا دے دیا۔واضح رہے کہ اتوار 28 جنوری کو مانٹ مانگنوئی میں 3 ٹی ٹوئنٹی میچوں کی سیریز کے آخری اور فیصلہ کن میچ میں نیوزی لینڈ کو شکست دے کر نہ صرف پاکستان نے سیریز اپنے نام کی بلکہ وہ ٹی ٹوئنٹی کی نمبرون ٹیم بھی بن گئی۔واضح رہے کہ پاکستان نےکیویز کو ان کے ہوم گرانڈ پر ٹی ٹوئنٹی سیریز میں پہلی مرتبہ شکست دی ہے۔اس سے قبل پانچ ایک روزہ میچوں کی سیریز میں نیوزی لینڈ نے پاکستان کو وائٹ واش کردیا تھا۔

ملتان (آئی این پی) سابق کپتان اور سوئنگ کے سلطان وسیم اکرم ایک بار پھر میدان میں اترنے کو تیار ہیں۔تفصیلات کے مطابق وہ چار فروری کو ملتان میں نمائشی میچ میں رنگ جمائیں گے۔ اتوار چار فروری کو ملتان کرکٹ اسٹیڈیم میں اسٹارز کی بھرمار ہوگی۔

پاکستان سپرلیگ میں شامل ہونے والی چھٹی فرنچائز ملتان سلطانز ماضی اور حال کے مایا ناز کرکٹرز کو اکٹھا کرے گی۔پہلے ملتان سلطانز فرنچائز کی زبردست لانچنگ ہوگی۔ جہاں ٹیم کے کھلاڑیوں کو تعارف بھی ہوگا۔ اس کے بعد ملتان دی مقابلہ کے ہیش ٹیگ سے ایک نمائشی میچ کا انعقاد بھی ہوگا۔اس میچ میں سلطان الیون کی ٹیم طوفان الیون کا مقابلہ کرے گی۔ سلطان الیون کے کپتان وسیم اکرم ہونگے۔فرنچائز کے ڈائریکٹر کرکٹر وسیم اکرم بھی سوئنگ کا جادو جگائیں گے۔ ایونٹ کے لیے کافی پرجوش بھی ہیں۔طوفان الیون کی قیادت سینئربلے باز شعیب ملک کریں گے، جو پی ایس ایل تھری میں ملتان سلطانز کے کپتان بھی ہونگے۔نمائشی میچ میں ماضی کے جارح مزاج بلے باز عمران نذیر بھی رنگ جمائیں گے۔ جبکہ ملتان سلطانز ٹیم میں شامل احمد شہزاد، سیف بدر اور دیگرز کرکٹرز کےساتھ شوبز سے جڑی شخصیات اور مقامی نوجوان کھلاڑی بھی ان ایکشن ہونگے۔میچ کے بعد موسیقی کا تڑکا بھی لگے گا جس میں معروف فنکار اپنے فن کا مظاہرہ کرکےسحر طاری کریں گے۔

کراچی(آئی این پی) نیوزی لینڈ کے خلاف ون ڈے سیریز میں شکست اور ٹی ٹوئنٹی سیریز میں کامیابی کے بعد قومی کرکٹ ٹیم کے کپتان سرفراز احمد اور فاسٹ بولر رومان رئیس کراچی پہنچ گئے۔ٹی ٹوئنٹی کی نمبر ون ٹیم کے کپتان سرفراز احمد نے ائرپورٹ پر میڈیا نمائندگان سے بات کرنے سے گریز کیا اور اس کی وجہ بتائی کہ پی سی بی نے انہیں میڈیا سے بات کرنے سے منع کیا ہے۔اس موقع پر بولر رومان رئیس نے میڈیا سے گفتگو کرتے ہوئے کہا کہ بھرپورکوشش کی لیکن ون ڈے میں کبھی بولنگ نہ چلی تو کبھی بیٹنگ۔بولر کا کہنا تھا کہ انہیں ٹی ٹوئنٹی میں نمبر ون ٹیم بننے پر بےحد خوشی ہے۔پاکستان کرکٹ ٹیم دورہ نیوزی لینڈ میں5 ون ڈے میچوں کی سیریز 5-0صفر سے ہاری، لیکن تین میچوں کی ٹی ٹوئنٹی سیریز2-1 سے جیت کر نہ صرف قوم کی تھوڑی بہت لاج رکھی بلکہ آئی سی سی ٹی ٹوئنٹی رینکنگ میں نمبرون ٹیم بھی بن گئی۔

لاہور(آئی این پی)نیوزی لینڈ کے خلاف ون ڈے سیریز میں کلین سویپ شکست کے بعد پی سی بی نے پلئیرز مینجمنٹ پلان ترتیب دے دیا۔ دوران سیریز سکواڈ میں شامل تمام کرکٹرز کو کھیلنے کا موقع ملے گا، کھلاڑی اب تمام لیگز بھی نہیں کھیل سکیں گے۔نیوزی لینڈ کےخلاف ون ڈے سیریز میں کلین سویپ شکست نے پی سی بی کی آنکھیں کھول دی۔ بورڈ نے مشیروں کے مطابق ہار کی وجہ کھلاڑیوں کی انجریز ہے۔ بورڈ نے اب پلئیرز مینجمنٹ پلان ترتیب دے دیا ہے۔اب نیوزی لینڈ اور آسٹریلیا طرز پر روٹیشن پالیسی پر عمل ہوگا۔ سیریز کے دوران سکواڈ میں شامل تمام کھلاڑیوں کو موقع ملے گا۔ خاص کر فاسٹ باﺅلرز کو پوری سیریز کی بجائے مخصوص میچز ملیں گے۔ کرکٹرز کو اب تمام لیگز کے لئے این او سی نہیں دیا جائے گا۔ہارون رشید اور مدثر نذر کے اس مشترکہ پلان کا اعلان چیف سلیکٹر انضمام الحق اور ٹیم منجمنٹ سے مشاورت کے بعد ہوگا۔ پلان میں ٹیسٹ، ون ڈے اور ٹی ٹونٹی 23 کھلاڑیوں کی فہرست تیار کی گئی ہے۔

ان کھلاڑیوں کو مخصوص لیگز میں جانے کی اجازت دی جائے گی۔اور ٹیم میں شامل کھلاڑی سال میں دو سے زائد لیگز نہیں کھیل سکیں گے جبکہ بنگلہ دیش اور ہانگ کانگ طرز کی لیگز میں اہم کھلاڑی نہیں بھیجے جائیں گے۔