واشنگٹن:
امریکی صدر ڈونلڈ ٹرمپ نے سوشل میڈیا پر ایک بیان میں کہا ہے کہ یہ سیاسی طور پر درست نہیں سمجھا جاتا کہ حکومت کی تبدیلی کا لفظ استعمال کیا جائے، مگر اگر موجودہ ایرانی حکومت ایران کو دوبارہ عظیم بنانے میں ناکام ہو جاتی ہے، تو حکومت کی تبدیلی کیوں نہیں ہونی چاہیے؟
یہ بیان اس وقت آیا ہے جب ٹرمپ کے دفاعی وزیر پیٹ ہیگسیٹھ نے آج صبح کہا کہ یہ مشن حکومت کی تبدیلی کے لیے نہیں تھا اور نہ ہی ایسا کوئی مقصد تھا۔
اس کے علاوہ نائب صدر جے ڈی وینس نے گزشتہ روز امریکی میڈیا کو بتایا کہ سب سے پہلے ہم حکومت کی تبدیلی نہیں چاہتے، ہمارا مقصد ایرانی جوہری پروگرام کا خاتمہ ہے۔
ریجیم چینج کا مسئلہ ٹرمپ کی ریپبلکن پارٹی میں ہمیشہ سے متنازعہ رہا ہے۔ سابق ریپبلکن صدر جارج بش نے عراق میں حکومت کی تبدیلی پر زور دیا تھا، جس کا مقصد مبینہ طور پر بڑے پیمانے پر تباہی پھیلانے والے ہتھیاروں کا خاتمہ تھا، مگر بعد میں یہ دعویٰ بے بنیاد ثابت ہوا۔
امریکی سیاست میں مشرق وسطیٰ کے جنگوں میں امریکی مداخلت اور حکومت کی تبدیلی کے نظریات اب زیادہ مقبول نہیں رہے۔
واضح رہے کہ صدر ٹرمپ نے بش کے دور کے نیو کنزرویٹو خیالات کی غیر مقبولیت کا فائدہ اٹھاتے ہوئے اپنی انتخابی مہم میں نئی جنگوں کے خاتمے کا وعدہ کیا تھا۔
