اسلام آباد(صباح نیوز)قومی احتساب بیورو میں بڑے پیمانے پر تقرریاں اورتبادلے کیے گئے ہیں ڈی جی نیب بلوچستان عرفان نعیم منگی کا تبادلہ کرکے انہیں ڈی جی نیب راولپنڈی تعینات کر دیا گیا ہے جبکہ ڈی جی نیب راولپنڈی ناصر اقبال اور ڈی جی نیب خیبرپختونخوا بریگیڈیئر (ر) فاروق ناصر کو نیب ہیڈ کوارٹر بھیج دیا گیا ہے۔ نجی ٹی وی کے مطابق ڈی جی نیب راولپنڈی ناصر اقبال شریف خاندان کے خلاف دو کیسز کی نگرانی کررہے ہیں مگر حال ہی میں ناصر اقبال کے خلاف ایک شکایت سامنے آئی تھی کہ ا نہوں نے اپنے ہی ماتحت کو جس بے جا میں رکھا تھا جس کی شکایت چیئرمین نیب جسٹس(ر) جاوید اقبال کے پاس گئی تھی اس لیے انہیں تبدیل کر دیا گیا ہے عرفان نعیم منگی سپریم کورٹ کی جانب سے شریف خاندان کے خلاف تحقیقات کے لیے بنائی جانے والی چھ رکنی جے آئی ٹی کے ممبر تھے اب انہیں ڈی جی نیب راولپنڈی تعینات کر دیا گیا ہے۔اب وہ شریف خاندان کے خلاف دو نیب ریفرنسز کی تحقیقات اور پراسیکیوشن کی نگرانی کریں گے جبکہ مرزا عرفان بیگ کو ڈی جی نیب بلوچستان تعینات کر دیا گیا ہے جبکہ فرمان اﷲ کو ڈی جی نیب خیبر پختونخوا تعینات کر دیا گیا ہے جبکہ ناصر اقبال کو ڈی جی آگاہی تعینات کر دیا گیا ہے جبکہ فاروق ناصر اعوان کو ڈی جی ٹریننگ تعینات کر دیا گیا ہے۔

کراچی (این این آئی) قومی ایئر لائن نے گزشتہ سال کیا کمایا کیا گنوایا منظر عام پر آگیا ایئر لائن نے جتنے پیسے کمائے اس کے آدھے کے نقصان میں رہے خسارے کے سبب تنخواہوں کی ادائیگی بھی خطرے میں پڑگئی ہے۔ذرائع کے مطابق پی آئی اے نے سال 2017 میں اٹھاسی ارب روپے کا ریونیو حاصل کیا تاہم ایئر لائن کو چھیالیس ارب روپے نقصان کا بھی سامنا کرنا پڑا۔ذرائع کا کہنا ہے کہ پی آئی اے کی ناقص تجارتی پالیسی اوراضافی اخراجات کی وجہ سے ادارے کو ایک سال میں کل آمدن کے نصف سے زائد کا نقصان برداشت کرنا پڑا ہے۔ پی آئی اے نے پہلی سہہ ماہی میں 21 ارب روپے کمائے اور 11 ارب روپے کا نقصان کیا۔دوسری سہ ماہی میں ادارے نے22ارب روپے کا روینیو حاصل کیا11.5ارب روپے کا نقصان اٹھایا۔ تیسری سہ ماہی میں پی آئی اے کا ریوینیو 24ارب روپے رہا اور نقصان کا تخمینہ 8ارب روپے لگایا گیا ہے۔

کراچی (آن لائن) حروں کے روحانی پیشوا پیرپگاڑا نے نوازشریف سے ملاقات کرنے سے معذرت کرلی۔ تفصیلات کے مطابق نواز شریف یکم فروری کو کراچی کے دو روزہ دورے پر آرہے ہیں، اس دوران وہ مسلم لیگ سندھ کے رہنماو¿ں سے ملاقاتیں کریں گے،جبکہ ن لیگ کی جانب سے حروں کے روحانی پیشوا پیر پگارا سے بھی رابطہ کیا ہے اور نواز شریف سے فوری ملاقات کیلئے وقت مانگا ہے ،ذرائع کا کہنا ہے کہ حروں کے روحانی پیشوا نے نوااز شریف نے نوازشریف سے فوری ملاقات سے معذرت کرلی ہے ۔ذرائع کے مطابق پیر پگارا نے جواب دیا ہے کہ ابھی روحانی سفر پر مصروف ہوں۔ اس لئے فوری ملاقات ممکن نہیں ہے ، ذرائع کا کہنا ہے کہ نواز لیگ کی جانب سے پیرپگارا سے دو مرتبہ رابطے کیے گیے۔ ن لیگ نے یکم یا دو فروری کو ملاقات کیلئے وقت دینے کی درخواست کی ہے ،ذرائع کے مطابق حروں کے روحانی پیشوا پیر پگارا چولستان میں حرجماعت کی دعوت پر ہیں،پیرپگارا ناراضگی کے سبب بھی ملنے کے فوری خواہشمند نہیں۔

لاہور( نیٹ نیوز) قصور میں زینب قتل کیس میں تفتیش کے دوران گرفتاری کے بعد رہا کئے جانے والے روحانی پیشوا نے مبینہ طور پر خودکشی کرلی، قصور میں پیرaو والا محلے میں صدر تھانے کی حدود میں روحانی پیشوا کی لاش ان کے مکان کے کمرے میں لگے پنکھے سے لٹکی ہوئی ملی، روحانی پیشوا بابا شبیر عرف چنی پیر کے ماننے والوں کی جانب سے پولیس کو واقعے سے مطلع کیا گیا، جس پر پولیس نے موقع پر پہنچ کر لاش کو پوسٹ مارٹم کیلئے ہسپتال منتقل کیا، پولیس کے مطابق واقعے کی تحقیقات کا آغاز کردیا گیا ہے، مبینہ طور پر خودکشی کرنے والے روحانی پیشوا کے اہل خانہ کے مطابق پولیس نے دوہفتے قبل بابا شبیر کو زینب قتل کیس کی تفتیش کے دوران گرفتار کیا تھا، بابا شبیر کے بھتیجے محمد عمر نے بتایا کہ پولیس کی جانب سے انہیں10 روز تک حراست میں رکھے جانے، تفتیش اور ڈی این اے کے نمونے حاصل کئے جانے کے باعث بابا شبیر ذہنی طور پر بہت پریشان تھے، انہوں نے مزید بتایا کہ واقعے سے قبل بابا شبیر نے وضو کیا اور میں سمجھا کہ شاید وہ ہمیشہ کی طرح عبادت کیلئے جارہے ہیں۔

قصور (بیورو رپورٹ) قصور میں ایک اور نوعمر لڑکے کو اغواءکرنے کے بعد جنسی درندگی کا نشانہ بنا ڈالا گیا نظام پورہ روڈ قصور کے شہباز احمد کے بیان کے مطابق وہ اپنے گھر میں موجود تھا کہ اس دوران خرم شریف اور احمد وغیرہ اس کے گھر میں آئے اور اس کے بھائی محمد عباس بعمر 13 سال کو اپنے ساتھ لے گئے ملزمان نے محمد عباس کو اپنے ڈیرہ پر لیجا کر اس پر اسلحہ تان لیا اور زبردستی اسکے کپڑے اتار کر جنسی زیادتی کرتے رہے بچے کی چیخ و پکار سن کر علاقہ کے لوگ وہاں پر پہنچے تو ملزمان اسلحہ لہراتے ہوئے فرار ہوگئے محمد عباس کو خون میں لت پت بیہوشی کی حالت میں ہسپتال پہنچایا گیا پولیس نے مقدمہ درج کر کے کارروائی شروع کر دی ہے جب اس سلسلہ میں پولیس سے رابطہ کیا گیا تو تفتیشی افسران نے بتایا کہ ملزمان کو حراست میں لے لیا گیا ہے تاہم یہ معاملہ زیادتی کی بجائے لڑائی جھگڑے کا معلوم ہوتا ہے۔

مدینہ (مانیٹرنگ ڈیسک) آرمی چیف فیملی کے ہمراہ مدینہ منورہ پہنچے، باب جبرائیل میں نماز ادا کی، پاکستانیوں نے انہیں دیکھ کر خوشی کا اظہار کیا۔ نجی ٹی وی کے مطابق آرمی چیف جنرل قمر جاوید باجوہ اپنی فیملی کے ساتھ مدینہ منورہ پہنچے جہاں انہوں نے باب جبرائیل میں نماز ادا کی، وہاں موجود پاکستانی آرمی چیف کو اپنے بیچ پا کر بڑے خوش ہوئے۔

اسلام آباد (مانیٹرنگ ڈیسک) سپریم کورٹ آف پاکستان میں 62ون ایف کے تحت نااہلی کی مدت کی تشریح کا معاملے پر آج سے شروع ہونے والے کیس کی سماعت میں سابق وزیراعظم نوازشریف نے بذریعہ وکیل پیش ہونے کا فیصلہ کیا ہے۔ نجی چینل کا اپنے ذرائع کے حوالے سے دعوی ہے کہ نوازشریف 62ون ایف کے تحت نااہلی کی مدت کی تشریح کا معاملے میں بذریعہ وکیل پیش ہونگے جس کیلئے انہوں نے اعظم تارڑ ایڈووکیٹ کو سپریم کورٹ میں پیش ہونے کی ہدایات کردی ہیں نوازشریف کے وکیل کل سپریم کورٹ میں پیش ہوکر عدالت سے وقت مانگیں گے۔