اسلام آباد (ویب ڈیسک) محسود قبائل کے دھرنے میں مشتعل افراد نے پیپلزپارٹی کے وفد پر جوتے اور بوتلیں پھینک دیں۔اسلام آباد میں نیشنل پریس کلب کے سامنے 4 روز سے محسود قبائل کا دھرنا جاری ہے جس میں کراچی میں نقیب اللہ محسود کو ماوارائے عدالت قتل کرنے والے ایس ایس پی راو¿ انوار کی گرفتاری سمیت کئی مطالبات شامل ہیں۔دھرنے میں مختلف سیاسی و مذہبی جماعتوں کے رہنما اور وفود شرکت کے لیے آرہے ہیں۔پیپلزپارٹی کے نمائندہ وفد نے عامر فدا پراچا کی سربراہی میں دھرنے میں شرکت کی اور جیسے ہی وہ تقریر کے لیے اسٹیج پر پہنچے تو مشتعل مظاہرین نے ان کی طرف جوتے اور پانی کی بوتلیں پھینکیں تاہم وہ محفوظ رہے اور ان کی زد میں نہیں آئے۔مشتعل مظاہرین کی جانب سے شیم شیم کے نعرے بھی لگائے گئے مگر وہاں موجود قبائلی عمائدین نے مشتعل نوجوانوں کو اسٹیج کے سامنے سے ہٹا کر معاملہ رفع دفع کیا۔یاد رہے کہ جنوبی وزیرستان، خیبر پختونخوا سمیت ملک کے مختلف علاقوں سے قبائلی عوام اسلام آباد میں جمع ہیں اور راو¿ انوار کی گرفتاری سمیت کئی مطالبات کے حق میں دھرنے دیئے بیٹھے ہیں۔

مظفرآباد(ویب ڈیسک) مسلم لیگ (ن) کی رہنما مریم نواز کا کہنا ہے کہ بندوقوں اور مظالم سے کشمیریوں کی تحریک آزادی کو کچلا نہیں جاسکتا وہ دن ضرور آئے گا جب ہم سری نگر میں کشمیر کی آزادی کا جشن منائیں گے۔مظفر آباد میں مسلم لیگ (ن) کے جلسہ عام سے خطاب کرتے ہوئے مریم نوازنے کہا کہ میرادل نا صرف مصنوعی لکیر کے اس پار بسنے والے کشمیریوں کے ساتھ دھڑکتا ہے بلکہ میری رگوں میں بھی کشمیر کا خون ہے، جو زخم مقبوضہ وادی کے کشمیریوں کو لگتا ہے اس کا درد ہم محسوس کرتے ہیں۔مریم نواز نے کہا کہ اب وقت بدل چکا ہے، کشمیریوں کی جدوجہد آزادی کو جبر سے نہیں دبایا جاسکتا، دعا کریں کہ وہ دن ضرور آئے جب ہم سری نگر میں کشمیر کی آ?زادی منائیں۔ انہوں نے مزید کہا ہے کہ الیکشن میں آزاد کشمیر کی عوام نے مسلم لیگ (ن) پر بھرپور اعتماد کا اظہار کرتے ہوئے کسی مخالف کو ایک نشست بھی جیتنے نہیں دی،یہاں کی عوام میاں نوازشریف اور شیر کے ساتھ ہیں۔

پشاور(ویب ڈیسک) چیئرمین تحریک انصاف عمران خان نے خیبرپختونخوا میں بلین ٹری سونامی منصوبے کو اپنی کامیابی قرار دیا لیکن اب سرکاری دستاویز سے پتہ چلتا ہے کہ صوبے میں صرف 22 کروڑ 14 لاکھ درخت لگائے گئے۔خیبرپختونخوا حکومت نے کچھ عرصہ قبل بلین ٹری نامی منصوبہ شروع کیا جس کے تحت صوبے بھر میں ایک ارب پودے لگائے جانے تھے۔ اس منصوبے کو صوبائی حکومت اور خود عمران خان نے سب سے بڑا کامیاب منصوبہ قرار دیا اور اسی بنا پر ایک مشیر اشتیاق ارمڑ کو وزیر بھی بنایا گیا لیکن سرکاری دستاویز سے پتہ چلا ہے کہ یہ پودے ایک ارب نہیں بلکہ 22 کروڑ 14 لاکھ ہیں۔سرکاری دستاویز کے مطابق مالاکنڈ ڈویڑن میں 11 کروڑ 18 لاکھ 12 ہزا ر 225 جبکہ ڈیرہ اسماعیل خان ڈویڑن میں ایک کروڑ 21 لاکھ 23 ہزار 958 پودے لگائے گئے ہیں۔اسی طرح ہزارہ ڈویڑن میں 8 کروڑ، 27 لاکھ 69 ہزار 908 اور کوہاٹ ڈویڑن میں 84 لاکھ 22 ہزار 861 جبکہ مردان ڈویڑن میں 63 لاکھ 5 ہزار 133 پودے لگائے گئے۔دوسری جانب بلین ٹری منصوبے کے پراجیکٹ ڈائریکٹر 40 کروڑ پودے لگانے کا دعوی کررہے ہیں۔ ان کا کہنا ہے کہ 24 کروڑ پودے حکومت نے لگائےجبکہ 16 کروڑ پودے لوگوں میں تقسیم کئے گئے۔ پراجیکٹ ڈائریکٹر کے مطابق بلین ٹری سونامی منصوبے کا باقی ماندہ 60 فیصد حصہ جنگلات کو محفوظ بناکر حاصل کیا گیا ہے۔

نئی دہلی(ویب ڈیسک) لائن آف کنٹرول پر پاکستان اور بھارت کے جوانوں کے مابین فائرنگ کا تبادلہ ہوا۔ میڈیا کے مطابق فائرنگ کے تبادلے میں بھارتی کیپٹن سمیت 4 اہلکار ہلاک ہو گئے۔ بھارتی میڈیا نے دعویٰ کیا کہ فائرنگ سے بی جی سیکٹر اور پونچ میں موجود اہلکار ہلاک ہوئے۔ ہلاک ہونے والے بھارتی اہلکاروں میں 22 سالہ کیپٹن کپل کندو، 28 سالہ سپاہی رام، 22 سالہ سپاہی شبھام سنگھ اور 42 سالہ حوالدار روشن لال شامل ہیں۔ بھارتی وزیر ہنس راج نے بھارتی اہلکاروں کی ہلاکت پر رد عمل دیتے ہوئے کہا کہ ہم اپنے جوانوں کا خون معاف نہیں کریں گے۔ انہوں نے دھکمی دیتے ہوئے کہا کہ پاکستان کو اس کی بھاری قیمت چکاناہو گی۔

خضدار (ویب ڈیسک): ملک بھر میں 5 فروری کی مناسبت سے یوم یکجہتی کشمیر منایا جا رہا ہے۔ خضدار میں دو تلوار کے قریب دھماکہ ہوا۔ میڈیا رپورٹس کے مطابق پولیس نے بتایا کہ دھماکہ یوم یکجہتی کشمیر کی ریلی گزرنے کے بعد ہوا۔ ابتدائی اطلاعات کے مطابق دھماکے میں ایک شخص زخمی ہوا۔ دھماکے کی نوعیت سے متعلق مزید معلومات اکٹھی کی جا رہی ہیں۔ پولیس کا کہنا ہے کہ دھماکے میں کوئی جانی نقصان نہیں ہوا البتہ بم ڈسپوزل اسکواڈ کو اور ریسکیو حکام کو جائے وقوعہ کی جانب روانہ کر دیا گیا ہے۔

اسلام آباد، کراچی، مظفر آباد (اے پی پی، صباح نیوز) صدر مملکت ممنون حسین نے کہا ہے کہ پاکستان اپنے کشمیری بھائیوں کی بھر پور حمایت کا اعادہ کرتا ہے اور اس عزم کا اظہار کرتا ہے کہ حق خود ارادیت کے حصول کے لیے کشمیریوں کی منصفانہ جدوجہد کو ہماری غیر متزلزل سیاسی، اخلاقی اور سفارتی حمایت ہمیشہ حاصل رہے گی۔ تاکہ اقوام متحدہ کی قرار دادوں کے مطابق یہ دیرینہ مسئلہ پر امن طریقے سے حل ہو سکے۔ یہ بات صدر مملکت ممنون حسین نے آج پیر کو منائے جانے والے یومِ یکجہتی کشمیر کے موقع پر اپنے خصوصی پیغام میں کہی ہے۔ انہوں نے کہا کہ یہ امر نہایت تشویش ناک ہے کہ مقبوضہ جموں و کشمیر کے عوام کی قانونی جدوجہد کو کچلنے کے لیے قابض بھارتی افواج دہشت گردی،سنگین جنگی جرائم اور انسانی حقوق کی خلاف ورزی کی مرتکب ہو رہی ہیں۔ وزیر اعظم شاہد خاقان عباسی نے کہا ہے کہ عالمی برادری بھارت پر انسانی حقوق کے منشور کے احترام کیلئے دباﺅ ڈالے، مقبوضہ کشمیر پیلٹ گن کے سفاکانہ استعمال سے 2 سو سے زائد افراد بشمول معصوم بچے اور خواتین اپنی بینائی سے محروم ہو چکے ہیں۔ معصوم اور بے گناہ کشمیریوں کے انسانی حقوق کی سنگین خلاف ورزیاں فوری طور پر بند کی جائیں۔ پاکستان مظالم کے شکار اپنے کشمیری بھائیوں کی اخلاقی، سفارتی اور سیاسی حمایت جاری رکھے گا اقوام متحدہ کی سلامتی کونسل کی قراردادوں اور کشمیری عوام کی امنگوں کے مطابق جموں وکشمیر تنازعہ کے جلد حل کو یقینی بنایا جائے جو خطہ کے امن اور ترقی کیلئے نہایت ضروری ہے۔ گورنر پنجاب ملک محمد رفیق رجوانہ نے کہا ہے کہ ظلم کبھی پنپ نہیں سکتا اور حق کبھی دبایا نہیں جا سکتا، مظلوم کشمیریوں اور ان کی جدوجہد آزادی کی حمایت ہر پاکستانی اپنا فرض سمجھتا ہے، حکومت اقوام عالم کے ہر فورم،مقام اور سطح پر کشمیروں کی حق خود ارادیت کے لئے اپنی آواز بلند کرتا رہے گا۔ ان خیالات کا اظہار انہوں نے یومِ یکجہتی کشمیر اور وفاقی وزیر برائے امور کشمیر برجیس طاہر کے ساتھ سرکٹ ہاﺅس ملتان میں ملاقات کرتے ہوئے کہی۔ سابق صدر اور پاکستان پیپلزپارٹی پارلیمنٹرینز کے صدر آصف علی زرداری نے یوم کشمیر کے موقع پر کہا کہ پاکستان پیپلزپارٹی کشمیریوں کی حمایت جاری رکھے گی۔ انہوں نے بہادر کشمیریوں کی عظیم جدوجہد کو خراج تحسین پیش کرتے ہوئے کہا کہ اقوام متحدہ کو چاہیے کہ وہ اس مسئلے کے حل کےلئے ٹھوس اقدامات لے۔ تا کہ کشمیریوں پر مصائب کا خاتمہ اور خطے میں امن قائم ہو۔ انہوں نے کہا کہ سات دہائیوں پہلے کشمیریوں سے کیا گیا وعدہ پورا نہیں کیا گیا اور اب وقت آگیا ہے کہ اقوام متحدہ اپنے وعدے پورا کرے اور کشمیریوں کو حق خودارادیت دلائے۔ جے یو آئی کے سر براہ اور قومی کشمیر کمیٹی کے چیئرمین مولانا فضل الرحمن نے کہاہے کہ جے یو آئی آج 5فروری کو قوم کشمیری عوام کے ساتھ یکجہتی کا دن جذبہ ایمانی کے ساتھ مناکر ان کا حق دلوانے کے لیئے پوری دنیا کو متوجہ کرے گی اور یہ ثابت کرے گی قوم کا بچہ بچہ کشمیری عوام کے ساتھ ہے۔ انہوں نے پوری قوم خصوصا جے یو آئی کے کار کنوں پر زور دیا ہے کہ دنیا کے سوئے ہوئے ضمیر کو جگانے کے لیئے 5فروری کو سڑکوں پر نکلیں۔ سپیکر قومی اسمبلی سر دار ایاز صادق نے کہا ہے کہ مسئلہ کشمیر صرف ایک علاقائی تنازعہ نہیں بلکہ حق خودارادیت کشمیری عوام کا بنیادی حق ہے۔ انہوں نے کہا کہ کشمیر میں طاقت کے استعمال سے تحریک آزادی کو دبایا جا سکتا ہے اور نہ ہی اس مسئلہ پر پاکستان کے اصولی موقف کو بدلا جا سکتا ہے۔ ان خیالات کا اظہار یو م یکجہتی کشمیر کے موقع پر اپنے پیغام میں کیا جو ہر سال کشمیر ی بھائیوں کے ساتھ اظہار یکجہتی کے لیے 5فروری کو آزاد کشمیر سمیت پاکستان بھر میں منایا جاتا ہے۔ جنوبی ایشیا اور مسئلہ کشمیر کے مستقبل کا حوالہ دیتے ہوئے سپیکر نے کہا کہ جنوبی ایشیا میں اس وقت تک پائیدار امن کے قیام کا خواب شر مندہ تعبیر نہیں ہو سکتا جب تک دنیا کی سب سے بڑی نام نہاد جمہوریت بھارت مقبوضہ وادی میں طاقت کے استعمال اور جبر وتشدد کو بند نہیں کرتا۔ انہوں نے کہا کہ یہ انتہائی افسوس کا مقام ہے کہ عالمی برادری کی بھارت کی طر ف سے اقوام متحدہ کی قراردادوں کے مسلسل انکار اور مقبوضہ کشمیر میں جبر و تشدد،جعلی مقابلوں ،جبری گمشدگیوں ،عصمت دری ،اور نہتے شہریوں پر پیلٹ گن کے بے دریغ استعمال کے واقعات کے باوجود خاموش تماشائی بنی ہوئی ہے۔ وفاقی بر ائے امور کشمیر و گلگت، بلتستان برجیس طاہر نے کہا ہے ک مسئلہ کشمیر کو حل نہ کیا گیا تو تیسری جنگ عظیم کو کوئی نہیں روک سکتا۔ کشمیر پاکستان کی شہ رگ ہے ،، ہم سمجھتے ہیں کہ جنگوں سے مسائل حل نہیںہوتے ، دو دفعہ جنگ ہوچکی ہے،بھارت نے13قسم کے ظالمانہ قوانین جموں وکشمیر میں کشمیریوں کو کچلنے کےلئے نافذ کئے ہوئے ہیں۔ بھارت نے آٹھ لاکھ سے زائد فوج وہاں تعینات کی ہوئی ہے ، پانچ لاکھ کشمیری اپنی جانوں کا نذرانہ پیش کر چکے ہیں ، 30ہزار خواتین بیوہ ہوچکی ہیں جبکہ ایک لاکھ سے زیادہ بچے یتیم ہوچکے ہیں ، ایک لاکھ سے زیادہ لو گ جیلوں میں بند ہیں لیکن اس کے باوجود کشمیر کے اندر تحریک جاری ہے،ہندوستان کا مو¿قف غلط ہے وہ جھوٹ بولتا ہے۔ آزادجموں وکشمیر کے صدر سردار محمد مسعود خان نے کہا ہے کہ 05فروری کا دن پاکستانیوں اور کشمیریوں کے لازوال رشتہ کی پہچان ہے جسے کئی دہائیوں سے بھرپور طریقے سے منایا جاتا ہے یہ پاکستانیوں اور کشمیریوں کے مذہبی،ثقافتی اور سماجی ہم آہنگی کی پہچان ہے۔ کشمیری مسلمانوں نے قیام پاکستان سے قبل ہی اپنا مستقبل نظریاتی طور پر پاکستان کے ساتھ وابستہ کر دیا تھا۔ ہمیں اس تاریخی فیصلے پر فخر ہے کیونکہ اہل پاکستان نے آزمائش اور مشکل کے ہر لمحے میں کشمیری عوام کو کبھی تنہا نہیں چھوڑا۔یوم یکجہتی کشمیر کے موقع پر اپنے خصوصی پیغام میں صدر آزاد جموں وکشمیر نے کہا کہ پاکستان اور کشمیر لازم وملزوم ہیں۔ وزیر اعظم آزاد حکومت ریاست جموں وکشمیر راجہ محمدفاروق حیدرخان نے کہا ہے کہ پانچ فروری کا دن ریاست جموں و کشمیرکے مظلوم عوام کیلئے ہی نہیں بلکہ ساری دنیا کے مظلوم عوام ، خواہ وہ دنیا کے کسی خطے میں ہوں ان کے ساتھ اظہار یکجہتی کا دن ہے۔ پاکستان کے عوام کی کشمیر کے ساتھ کمٹمنٹ پر ان کا شکر گزار ہوں۔ آج پاکستانی عوام ریاست جموں وکشمیر کے لوگوں کے بنیا دی حق،حق خودارادیت جس کا اقوام عالم نے ان کے ساتھ وعدہ کیا تھاکی تجدید اور ریاست جموں وکشمیر کے مقبوضہ حصے میں جہاں بھارتی افواج نے غاصبانہ قبضہ کیا ہوا ہے اور وہ انکے حق سے ان کو محروم کرنے کیلئے وہاں پر موجود ہیں۔ کشمیر کے بھائیوں،بہنوں ، بیٹوں، مجاہدین، سیاسی کارکنوں اوربزرگوں کے ساتھ اظہار یکجہتی کیلئے منا رہے ہیں۔ یوم یکجہتی کشمیر کے موقع پر اپنے خصوصی بیان میں وزیر اعظم آزادکشمیر نے کہا کہ ستر سال گزرنے کے باجود پاکستان کے عوام کشمیر یوں کے اس حق خودارادیت کے ساتھ اسی طرح قائم ہیں۔