لاہور(خصوصی رپورٹ)الیکشن کمیشن کی جانب سے 2017ءمیں جاری انتخابی فہرستوں میں ایک کروڑ24 لاکھ خواتین اس لیے ووٹر نہ بن سکیں کہ ان کے پاس شناختی کارڈ نہیں تھے جس بنا پر بحیثیت مجموعی مردوں کے مقابلہ میں خواتین ووٹرز کی تعداد کم ہو گئی۔ الیکشن کمیشن کے اعداد و شمار کے مطابق 9کروڑ 70لاکھ 22ہزار 5سو 91 ووٹرز رجسٹرڈ ہوئے جن میں 5کروڑ 45لاکھ 98ہزار مرد جبکہ خواتین کی تعداد 4 کروڑ 2 لاکھ 24 ہزار چار سو اٹھارہ ہے ، جس بنا پر فافن نے الیکشن کمیشن کی توجہ اس جانب مبذول کراتے ہوئے ووٹرز لسٹوں میں خواتین کی کم تعداد کو بڑھانے کیلئے خصوصی اقدامات کو ناگزیر قرار دیتے ہوئے خواتین کی تعداد کے حوالہ سے تفصیلات فراہم کی ہیں، جس کے تحت وفاق کے زیرانتظام علاقہ میں رجسٹرڈ خواتین ووٹرز کی تعداد 8 فیصد پنجاب میں رجسٹرڈ خواتین ووٹرز کی تعداد 12 فیصد، سندھ میں رجسٹرڈ خواتین ووٹرز کی تعداد 10 فیصد بلوچستان میں رجسٹرڈ ووٹرز خواتین کی تعداد 16 فیصد کم ہے ،جس کی بڑی وجہ ان کے پاس شناختی کارڈ کا نہ ہونا ہے جس رفتار سے مردوں کے شناختی کارڈ بنائے جاتے ہیں، اس حوالہ سے کہا جاتا ہے کہ نادرا سنٹرز پر خواتین کے کوائف درج کرنے کے انتظامات ناکافی ہیں گو کہ الیکشن کمیشن نے نادرا سے مل کر خواتین ووٹرز کی تعداد بڑھانے کیلئے شناختی کارڈ بنانے کی مہم شروع کر رکھی ہے لیکن اس میں اصل کردار سیاسی جماعتوں سول سوسائٹی خواتین کی تنظیموں کو ادا کرنا ہو گا ،فافن نے بھی اس ضمن میں اپنا کردار ادا کرتے ہوئے تقریباً 18 لاکھ سے زائد خواتین کو شناختی کارڈ بنانے کی ترکیب اور معاونت فراہم کی ہے ۔

قصور(بیورورپورٹ)ڈسٹرکٹ ہیڈکوارٹر قصور میں ڈاکٹرز اور عملہ کی مجرمانہ غفلت نے ایک اور مریض کی جان لے لی جس پر شہریوں کی بڑی تعداد سارا دن سراپا احتجاج بنی رہی تفصیلات کے مطابق عبدالستار ولد عبدالغفار جو پرانا لاری اڈہ قصور کا رہائشی ہے کو اسکے عزیز نازک حالت میں ایمرجنسی وارڈ لیکر آئے مگر تین گھنٹے تک اہلخانہ اور ورثاءکی منت سماجت کے باوجود کسی ڈاکٹر نے تو دور کی بات پیرا میڈیکل سٹاف کے کسی رکن نے بھی عبدالستار کو طبی امداد فراہم کی اور نہ ہی اس کا میڈیکل چیک اپ کیا جس پر ورثاءنے ایم ایس ڈاکٹر نذیر احمد کو کال کی مگر انہوںنے دانستہ کال وصول نہ کی اور انکا ماتحت عملہ کہتا رہا کہ وہ سو رہے ہیں جس پر بیمار کے ورثاءنے احتجاج شروع کر دیا اور اسی دوران تین گھنٹے تک زندگی موت کی کشمکش میں مبتلا رہنے والا عبدالستار دم توڑ گیا یہ صورتحال دیکھ کر پرانا لاری اڈہ قصو رکے مکینوں کی بڑی تعداد نے ڈاکٹر اور عملہ کی مجرمانہ غفلت کے خلاف احتجاج شروع کر دیا جب ڈی ایم ایس ڈاکٹر فیاض کو حالات کی نزاکت کا علم ہوا تو وہ دم توڑ جانے والے مریض کو ایک گھنٹے تک بلا جواز انجکشن دیتا رہا جبکہ ماتحت عملہ اس سے قبل ہی عبدالستار کی موت کی تصدیق کر چکا تھا واضح رہے کہ ڈی ایچ کیو قصور میں کرپشن بدعنوانی کے کسے ناصرف زبان زد عام ہیں بلکہ آئے روز بچوںاور مریضوںکی عملہ کی غفلت کی وجہ سے ہلاکت بھی معمول کا حصہ بنی ہوئی ہے ممتاز سماجی کارکن قیصر ایوب شیخ ،چوہدری محمد صادق ،میاںفاروق احمد،میاںمقبول احمد ٹولو ایڈووکیٹ اور دیگر نمائندہ شہریوںنے جاری کردہ احتجاجی بیانات میں کہا ہے کہ آئے روز ڈی ایچ کیو میں انسانیت کی تذلیل اور تضحیک معمول بن چکی ہے انہوںنے کہاکہ اگر ڈی ایچ کیو کے حالات کو ہنگامی طور پر درست نہ کیا گیا تو قصور کے شہری سڑکوںپر نکل آئیں گے۔

لاہور (نیا اخبار رپورٹ) مسلم لیگ (ن) کے امیدواران کیلئے سینیٹ کی ٹکٹیں مریم نواز فائنل کریں گی، اعلیٰ قیادت کے اعتماد نے مریم نواز کو قومی سیاسی دھارے کیلئے لازم و ملزم قرار دیدیا، آئندہ عام انتخابات کی ٹکٹیں دینے کا اختیار بھی مریم نواز کے پاس محفوظ رہیگا، پارٹی کی مشاورتی کونسل صرف امیدواران کا ڈیٹا اکٹھا کریگی۔ لیگی ذرائع نے مزید بتایا ہے کہ مسلم لیگ (ن) کی اعلیٰ قیادت مریم نواز کی سیاسی بصیرت کو مکمل طور پر فعال بنانے میں ان کو سیاسی طور پر طاقتور بنا رہی ہے، اس ضمن میں سیاسی جلسے جلوس ، عوامی رابطہ مہم، لیگی ورکرز کو ذمہ داریاں عائد کرنے کیساتھ ساتھ مریم نواز کو سینیٹ کے انتخابات میں مسلم لیگ (ن) کے امیدواران کو ٹکٹ دینے کے علاوہ آئندہ عام انتخابات میں بھی ٹکٹیں دینے کا اختیار دیا جارہا ہے۔ جس سے ان کے سیاسی قد کو قومی سطح پر بڑھایا جارہا ہے، مریم نواز کے سیاسی فیصلوں پر پارٹی متفق ہوگئی، جس کا آغاز سینیٹ کے انتخابات میں ٹکٹوں کی تقسیم سے کیا جارہاہے۔

لاہور(اے این این ) ایف آئی اے نے لیبیا میں کشتی حادثے میں پاکستانی شہریوں کی ہلاکتوں کے بعد غیرقانونی طریقے سے بے روزگار افراد کو بیرون ملک بھیجنے والے ایجنٹس کے خلاف کارروائیاں شروع کردی ہیں۔تفصیلات کے مطابق کے مطابق ایف آئی اے نے لیبیا کے ساحل پر کشتی حادثے میں پاکستانیوں کی ہلاکتوں کے بعد غیرقانونی طریقے سے بیرون ملک بھیجنے والے ایجنٹس کے خلاف کارروائی شروع کردی ہے۔ ڈپٹی ڈائریکٹر ایف آئی اے مفخر عدیل کے مطابق ایف آئی اے نے گجرات، منڈی بہاالدین اور گوجرانوالہ میں کارروائیاں کرتے ہوئے 4 ایجنٹس کو گرفتار کرلیا ہے، گرفتار ملزمان میں نثاراحمد، صفدر حسین، کامران اور اسلم شامل ہیں۔ایف آئی اے حکام کے مطابق 2 فروری کو لیبیا کے ساحل کے قریب کشتی حادثے میں متعدد پاکستانی جاں بحق ہوگئے تھے، اور بیشتر کی شناخت بھی ہوچکی ہے۔ جاں بحق ہونے والوں میں 8 افراد کا تعلق گجرات سے تھا جن میں ایک ہی گھر کے 4 افراد اسماعیل، اہلیہ عظمت بی بی، 5سالہ سعد اور ڈیڑھ ماہ کی بچی بھی شامل ہے۔ لقمان علی اور حمزہ فاروق کا تعلق جلال پور جٹان کے علاقے پیجو سے تھا، کامران اقبال ڈنگہ اور ذبیح اللہ کھوڑی کا تعلق عالم تحصیل سے تھا۔

سرگودھا(این این آئی) پیر آف سیال شریف خواجہ حمیدالدین سیالوی اپنے شیڈول کے مطابق5 فروری (آج) جھنگ میں کانفرنس کریں گے جس میں تحفظ ختم نبوت پر خطاب کرتے ہوئے اپنے موقف پر آئندہ لائحہ عمل کا اعلان کریں گے جس کے بعد 11 فروری کو گجرات، 18 فروری کو امین پور جھنگ، 25 فروری کو کوٹ شاکر چاندنہ،4 مارچ کوکوٹ واساوا،11 مارچ کو شاہ جیونہ،26 مارچ کو منگوآنہ،11 اپریل کوسرکلاں چکوال، اور 18 اپریل کودھنوالہ میں کانفرنسز ہوں گی۔لاہور اجلاس پر پیر آف سیال شریف کے صاحبزادے محمد قاسم سیالوی نے کہاکہ پیرآف سیال کے منع کرنے کے باوجودنظام الدین سیالوی سمیت بعض ممبران نے وزیراعلی ہاو¿س اجلاس میں شریک ہوئے۔جس سے ہمارے موقف اور جزبات سے کھیلا گیا ہے۔اس لئے پیر آف سیال پانچ فروری کو جھنگ کانفرنس میں آئندہ لائحہ عمل کا اعلان کریں گے۔ان کا کہنا ہے کہ حکومت نے معاملات کے حل کیلئے تشکیل دی گئی کمیٹی کااجلاس وزیراعلی ہاو¿س میں بلوایا اور ممبران کا اضافہ کیاجو حکومتی دھوکہ ہے صاحبزادہ قاسم سیالوی اور کنوینرکمیٹی شمس الرحمن مشہدی کے مطابق چھ رکنی کمیٹی کے سامنے رانا ثناءاللہ نے کسی تیسری جگہ پیش ہوناتھا۔کمیٹی میں اضافہ اور اجلاس وزیراعلی ہاو¿س ہونا دونوں باتیں ہی قبول نہیں۔اس لئے آئندہ کے لائحہ عمل کے حوالے سے پانچ فروری کو جھنگ میں منعقدہونے والی سیرت کانفرنس میں اعلان کیاجائے گا۔