پشاور(ویب ڈیسک) سابق وزیراعظم نواز شریف نے کہا ہے کہ عوام وعدہ کریں کہ انتخابات میں مسلم لیگ (ن) کو ووٹ دے کر ووٹ کی توہین کا بدلہ لیں گے۔ پشاور میں ناردرن بائی پاس ٹول پلازہ کے قریب جلسے سے خطاب میں نواز شریف نے کہا کہ اگر میری حکومت ختم نہ ہوتی تو بے روزگاروں کو روزگار مل چکا ہوتا، عمران خان آپ خیبرپختونخوا کے لوگوں کو کیوں دھوکہ دے رہے ہیں۔نواز شریف نے کہا کہ خیبرپختونخوا کے لوگوں آپ کا حکمران جھوٹ بولنے اور الزام تراشی کا ماہر ہے، انہیں سلام پیش کرتا ہوں جنہوں نے عمران خان کو صادق اور امین قرار دیا ہے۔انہوں نے عمران خان پر مزید تنقید کرتے ہوئے کہا کہ ہیلی کاپٹر میں بھی صادق اور امین نے چوری کی، درختوں کے نام پر اربوں روپے خزانے سے نکالے گئے،کہاں گئے وہ پیسے اور کہاں ہے وہ اسکول اور یونیورسٹیاں جن کا عوام سے وعدہ کیا گیا تھا۔سابق وزیراعظم نے کہا کہ انہوں نے کوئی کرپشن نہیں کی اور پیسہ نہیں کھایا، بیٹے سے تنخواہ نہ لینے پر نکالا گیا، 5 لوگوں نے عوام کے فیصلے کے خلاف فیصلہ دیا اور یہ کھیل پچھلے 70 سالوں سے جاری ہے۔نواز شریف کا کہنا تھا کہ ووٹ عوام دیتے ہیں اور چند لوگ اس کو اپنے پاو¿ں کے نیچے روندتے ہیں، کیا چند لوگوں کو حق ہونا چاہیے کہ نواز شریف کو نکال دیں اور اب طلال چوہدری اور دانیال عزیز کو بھی توہین عدالت میں بلایا گیا ہے۔نواز شریف نے کہا کہ ہم کشتیاں جلا کر میدان میں اترے ہیں، نواز شریف کا ساتھ دیں گے تو عوام کو انصاف اور گھر بھی دیں گے۔ مریم نواز نے اپنے خطاب میں کہا کہ خیبرپختونخوا کے عوام بہادر اور دلیر ہیں اور لیڈر بھی دلیر ہونا چاہیے، کیا 5 سال کنٹینر پر بیٹھنے والا خیبرپختونخوا کے عوام کا لیڈر ہوسکتا ہے۔مریم نواز نے کہا کہ عمران خان کہتے تھے امیر اور غریب کو ایک جیسی تعلیم ملے گی،کیا ایسا ہوا اور انہوں نے صوبے میں ایک اسکول بھی نیا نہیں بنایا بلکہ اسکول بند ہوگئے۔مریم نواز نے شدید تنقید کرتے ہوئے کہا کہ کہاں ہے وہ بجلی جو عمران خان نے بنا کر دوسرے ملکوں کو ایکسپورٹ کرنی تھی۔مریم نواز کا مزید کہنا تھا کہ عمران خان نے قصور کی زینب پرسیاست کی،بتائیں کہ اسما اور عاصمہ رانی کے قاتل کہاں ہیں۔

اسلام آباد(ویب ڈیسک )ترجمان دفترخارجہ ڈاکٹرمحمد فیصل کا کہنا ہے کہ لیبیا میں کشتی حادثے میں جاں بحق پاکستانی افراد کی لاشیں وطن واپس لانے کے لئے ٹھوس اقدامات کئے جارہے ہیں۔اسلام آباد میں پریس بریفنگ کرتے ہوئے ترجمان دفترخارجہ ڈاکٹرمحمد فیصل کا کہنا تھا کہ لیبیا میں کشتی حادثے کا واقعہ 31 جنوری کوپیش آیا اور اسی روز پاکستان مشن کے افسران جائے حادثہ پہنچ گئے تھے جنہیں بتایا گیا کہ حادثے میں 13 پاکستانیوں کی لاشیں مل چکی ہیں جب کہ حادثے میں 2 یا 3 افراد ہی زندہ بچے ہیں جن میں سے ایک پاکستانی ہے جس نے بتایا ہے کہ انسانی اسمگلرغیر قانونی طور پر کشتی کے مسافروں کو یورپ لے کرجا رہے تھے اور بدقسمت کشتی میں سوار 80 سے 90 افراد میں سے 32 پاکستانی تھے۔ترجمان دفترخارجہ نے بتایا کہ 13پاکستانیوں میں سے 8 کی شناخت ہوگئی ہے جب کہ 4 پاکستانیوں کی لاشیں نہیں صرف پاسپورٹ ملے ہیں، جاں بحق پاکستانی شہریوں کی میتوں کو واپس لانے کے لیے اقدامات کررہے ہیں اور اس عمل کی نگرانی وزیرِ خارجہ خواجہ آصف اور سیکرٹری خارجہ تہمینہ جنجوعہ خود کررہے ہیں ، میتیں وطن واپس لانے کے لئے پاکستانی سفارت خانے کو فنڈز بھی مہیا کر دیئے گئے ہیں امید ہے ایک ہفتے میں یہ عمل مکمل ہوجائے گا۔ جاں بحق شہریوں سے متعلق معلومات وزارت خارجہ کی ویب سائٹ پردستیاب ہے۔