لاہور (وقائع نگار)سربراہ عوامی مسلم لیگ شیخ رشید احمد نے کہا ہے کہ عمران خان انصاف پر مبنی معاشرہ دیں گے‘ ساری قوم چیف جسٹس پاکستان کو انتخاب کے انعقاد پر ان کو مبارکباد دیتی ہے‘ 2018 کے انتخابات صرف چیف جسٹس‘ آرمی چیف اور چیف الیکشن کمشنر کی وجہ سے ہوئے ہیں‘ 14اگست کو عمران خان جشن آزادی کی تقریب میں بطور وزیراعظم شریک ہوں گے۔ بدھ کو سپریم کورٹ کے باہر میڈیا سے گفتگو کرتے ہوئے شیخ رشید احمد نے کہا کہ ساری قوم چیف جسٹس پاکستان کو انتخاب کے انعقاد پر ان کو مبارکباد دیتی ہے۔ این اے ساٹھ سے الیکشن راشد شفیق لڑیں گے۔ وہ قلم دوات یا بلے سے الیکشن لڑیں گے اس کا فیصلہ عمران خان کریں گے۔ عمران خان ایک کروڑ نوکریاں دیں گے سستی بجلی عمران خان لائیں گے۔ عمران خان انصاف پر مبنی معاشرہ دیں گے۔ 2018 کے انتخابات صرف چیف جسٹس‘ آرمی چیف اور چیف الیکشن کمشنر کی وجہ سے ہوئے ہیں۔ جو لوگ دھاندلی کا رونا رو رہے ہیں ان کی عادت ہوگئی ہے میں سیاست میں بچپن سے ہوں اور آج تک نہیں سنا کہ ہارنے والے نے کہا ہو کہ وہ جائز ہارا ہے۔ جو لوگ جمہوریت کے چیمپئن بنے پھرتے تھے انہیں عوام نے شکست دی ہے لوگ اکتا چکے ہیں پرانی سیاست اور لوگ اب تبدیلی چاہتے ہیں۔ ایک حلقے سے جیت چکا ہوں اور این اے ساٹھ سے جیتیں گے۔ ساری قوم کو عمران خان کے ساتھ کھڑا ہونا چاہئے۔ 14اگست کو عمران خان جشن آزادی کی تقریب میں بطور وزیراعظم شریک ہوں گے۔
