لاہور(کرائم رپورٹر)مال روڈ کے بعد یکم اکتوبر سے جیل روڈ پر بھی بغیر ہیلمٹ موٹر سائیکل چلانے پر پابندی ہو گی ، ٹریفک پولیس کا ہیلمٹ نہ پہننے والوں کے خلاف کریک ڈاﺅن جاری ہے اور چار روز میں مجموعی طو رپر 44ہزار455چالان ٹکٹ جاری کئے گئے ،ضلعی حکومت نے ہیلمٹ کی کنٹرولڈریٹ پر فروخت کےلئے مال روڈ پر تین سٹالز لگوا دئیے۔ تفصیلات کے مطابق سٹی ٹریفک پولیس آفیسر نے لاہور ہائیکورٹ کے احکامات پر عملدرآمد کرتے ہوئے دوسرے مرحلے میں یکم اکتوبر سے جیل روڈ پر بھی ہیلمٹ کے بغیر موٹر سائیکل سواروں کے سفر پر پابندی عائد کرتے ہوئے تمام ڈی ایس پیز کو احکامات جاری کر دئیے ہیں۔ جیل روڈ اور اس سے ملحقہ شاہراہوں پر ناکے لگائے جائیں گے اور بغیر ہیلمٹ موٹرسائیکل سواروں کو جیل روڈ پر داخلے کی اجازت نہیں دی جائے گی۔علاوہ ازیں بغیر ہیلمٹ سفر کرنے والوں کے خلاف کریک ڈاﺅن جاری ہے اور مال روڈ پر چار روز میں 8284جبکہ مجموعی طور پر 44ہزار455چالان ٹکٹ جاری کئے گئے ۔ضلعی انتظامیہ نے ہیلمٹ کی قیمتوں میں ہوشربا اضافے کے بعد مال روڈپر کنٹرولڈ ریٹ پر تین سٹالز لگا دئیے ہیں جہاں پر مقامی سطح پر تیار ہونے والا ہیلمٹ 500جبکہ چائنہ سے امپورٹ کیا گیا ہیلمٹ 1150روپے میں فروخت ہوتا رہا ۔ ضلعی انتظامیہ کے مطابق آنے والے دنوں میں سٹالز کی تعداد میں مزید اضافہ کیا جائے گا۔
