اسلام آباد (صباح نیوز+ مانیٹرنگ ڈیسک) آرمی چیف جنرل قمر جاوید باجوہ نے وزیراعظم عمران خان سے وزیراعظم آفس میں ملاقات کی۔ ملاقات کے دوران ڈی جی آئی ایس آئی لیفٹیننٹ جنرل نوید مختار بھی موجود تھے۔ ملاقات کے دوران خطہ کی مجموعی صورتحال، سلامتی صورتحال اور سکیورٹی کے حوالے سے گفتگو ہوئی۔ترجمان وزیراعظم ہاوس کا کہنا ہے کہ وزیراعظم عمران خان اور آرمی چیف جنرل قمر جاوید باجوہ کے درمیان ملاقات میں خطے کی سیکیورٹی صورتحال پر تبادلہ خیال کیا گیا۔ جبکہ نجی ٹی وی کے مطابق ملاقات کے دوران ملک کی مشرقی اور مغربی سرحدوں کی صورتحال پر بھی غور کیا گیا۔ عسکری قیادت نے دہشت گردی کے خلاف آپریشنز میں پیش رفت پر وزیراعظم کو آگاہ کیا جبکہ ملاقات کے دوران نیشنل ایکشن پلان پر عملدرآمد کا بھی جائزہ لیا گیا جبکہ ملاقات میں بھارتی دھمکیوں کے بعد کی صورتحال پر بھی غور کیا گیا۔ ملاقات میں سیاسی اور عسکری قیادت نے اس عزم کا اعادہ کیا کہ پاکستان خطہ کی سلامتی کے لئے اپنا کردار ادا کرتا رہے گا۔ نجی ٹی وی کے مطابق فاٹا ریفارمز کے حوالے سے حکومت نے جو حکمت عملی مرتب کی ہے کہ وہاں پر ترقیاتی کام فوری طور پر شروع ہو سکے۔ اس پر بھی میٹنگ میں تفصیلی بات چیت کی گئی ہے۔ ملاقات کے دوران وزیراعظم اورآرمی چیف نے بیرون ملک دوروں کے حوالے سے بھی تبادلہ خیال کیا ۔وزیر اعظم عمران خان آئندہ ماہ اکتوبر کے وسط میں چین کا دورہ کریں گے، دورہ کی حتمی تاریخ اور دوسری تفصیلات کو حتمی شکل دی جارہی ہے۔چین کا دورہ عمران خان کا وزارت عظمی کا منصب سنبھالنے کے بعد دوسرا غیر ملکی دورہ ہو گا۔حکومتی ذرائع کے مطابق عمران خان اکتوبر کے وسط میں چین کا دورہ کریں گے۔ دورہ میں وزیر اعظم کے ہمراہ اعلی سطحی وفد بھی چین جائے گا۔ تاحال یہ بات واضح نہیں کہ وزیراعظم کے ہمراہ جانے والے وفد میں کون کون شامل ہو گا۔پاکستانی وفد چین میں منعقد ہونے والی کانفرنس میں بھی شرکت کرے گا۔وزیراعظم اپنے دورہ کے دوران سی پیک کے منصوبوں میں تیزی لانے اور اور دو طرفہ معاشی تعاون پر بھی بات کریں گے۔دورہ چین میں چین کی قادت کے ساتھ اقتصادی شعبے میں تعاون بڑھانے کے موضوع پر بھی تبادلہ خیال کیا جائے گا۔ اقتدار سنبھالنے کے بعد وزیراعظم پاکستان عمران خان نے رواں ماہ کے وسط میں پہلا غیر ملکی دورہ سعودی عرب کا کیا تھا۔ دو روزہ دورہ کے دوران عمران خان متحدہ عرب امارات بھی گئے تھے۔وفاقی وزیر خارجہ شاہ محمود قریشی، وزیرخزانہ اسد عمر اور وزیراطلاعات فواد چوہدری بھی عمران خان کے ہمراہ گئے تھے۔وزیراعظم کی سعودی عرب کے دورہ کے دوران سعودی قیادت سے دونوں ملکوں کے درمیان دو طرفہ تعلقات بہتر بنانے پر بات چیت ہوئی تھی۔ عمران خان نے سعودی فرماں روا شاہ سلمان بن عبدالعزیز اور ولی عہد محمد بن سلمان کی دعوت پر سعودی عرب کا دورہ کیا تھا۔دورہ سے واپسی پر ذرائع ابلاغ سے گفتگو کرتے ہوئے وزیراطلاعات فواد چوہدری کا کہنا تھا کہ سعودی عرب کو سی پیک میں اسٹریٹیجک پارٹنرشپ کی دعوت دی گئی ہے۔ جس کے تحت برادر اسلامی ملک مختلف منصوبوں میں اربوں ڈالر کی سرمایہ کاری کرے گا۔وفاقی وزیرخزانہ اسد عمر نے بھی اپنے ایک بیان میں تصدیق کی تھیں کہ سعودی عرب مختلف منصوبوں پر سرمایہ کاری کرے گا تاہم ان کا کہنا تھا کہ ابھی سرمایہ کاری کی مقدار کا تعین نہیں کیا گیا ہے۔

راولپنڈی (این این آئی)پاک فوج کے چھ میجر جنرلز کو لیفٹیننٹ جنرل کے عہدے پر ترقی دے دی گئی ہے ۔جمعہ کو آئی ایس پی آر کے مطابق لیفٹیننٹ جنرل کے عہدے پرترقی پانے والوں میں میجر جنرل شاہین مظہر ¾ میجر جنرل ندیم ذکی منج ¾میجر جنرل عبد العزیز ¾ میجر جنرل عاصم منیر ¾ میجر جنرل عدنان اور میجر جنرل وسیم اشرف شامل ہیں ۔

لاہور (مانیٹرنگ ڈیسک) سینئر صحافی اور تجزیہ کار ضیا شاہد نے کہا ہے کہ پاکستان عوامی تحریک کے سربراہ ڈاکٹر طاہرالقادری کے ساتھ نشست میں سربراہ پیٹ نے بتایا کہ عمران خان نے فون پر ان سے بات کی اور سانحہ ماڈل ٹاﺅن کے حوالے سے بڑی تسلی دی ہے کہ ذمہ داروں کو انجام تک پہنچایا جائے گا۔ وزیراعلیٰ پنجاب نے بھی تسلی دی اور چند دن کی مہلت طلب کی ہے کیونکہ اس واقعہ میں ملوث سول، پولیس افسران اور اہلکاروں کی معلومات اکٹھی کی جا رہی ہیں، اس سانحہ کے دوران ایک خاتون کے منہ میں گن کی نالی رکھ کر فائر کرنے والے ایس پی عبدالرحیم لاشاری کو ابھی تک گرفتار نہیں کیا گیا بلکہ اس سفاک افسر کو پنجاب پولیس نے انعام و کرام سے نوازا اور ایک سال کے لئے سکالر شپ پر برطانیہ بھجوا دیا، اسی افسر نے وہاں سیاسی پناہ بھی لینے کی کوشش کی جس میں ناکام رہا اور واپس پاکستان آ چکا ہے اور لاہور میں ہی تعینات ہے۔ طاہر القادری نے بتایا کہ ایک کال ٹریس ہوئی جس کا انکوائری رپورٹ میں بھی ذکر ہے اس کال میں پولیس افسر ایک بڑی شخصیت سے گفتگو میں کہتا ہے کہ سر مشن مکمل ہو گیا ہے اور جواب میںاسے شاباش دی جاتی ہے۔ سانحہ ماڈل ٹاﺅن سوچے سمجھے منصوبے کے تحت ہوا کیونکہ میں لندن میں چودھری برادران سے ملاقات کر رہا تھا تحریک انصاف سے بھی رابطہ تھا جس کے باعث ن لیگ کی حکومت کو خدشہ تھا کہ اگر یہ تینوں جماعتیں مل جاتی ہیں تو ان کے لئے خطرات بڑھ جائیں گے اس لئے ہمیں خوفزدہ کرنے کیلئے یہ سانحہ بپا کیا گیا خرم نواز گنڈا پور نے بتایا کہ پنجاب حکومت نے تین چار دن مانگے ہیں کیونکہ سانحہ میں ملوث سوا سو سے زائد افراد میں کچھ وفاق میں چلے گئے ہیں کچھ پنجاب میں ہیں اور زیادہ تر لاہور میں ہی ہیں ان سب کو ٹریس کیا جانا ہے۔ جن افسران کا ذکر رپورٹوں میں آ چکا ہے انہیں چار پانچ دن یا ایک ہفتہ میں عہدوں سے ہٹا دیا جائے گا۔

لاہور (جنر ل ر پو رٹر)17جون 2014 بروز بدھ نماز فجر کے بعد پی پی کے انچارج طارق الطاف کا ٹیلی فون آیا کہ منہاج القران سےکرٹریٹ پر پولیس گردی کر رہی ہے تمام ورکر ز وہاں جارہے ہیں تو ہم بھی چلے گئے۔تقریباً صبح 6بجے ہم لوگ وہاں پہنچے جبکہ مرحومہ تنزیلہ اور شازیہ بھی ساڑھے 10بجے کے قریب وہاں پہنچ گئیں ۔انہوں نے کہا کہ پولیس خود کوئی بھی ایسا ایکشن نہیں لے سکتی ان سے یہ سب ن لیگ کی حکومت نے کروایا ہے۔ ڈی آئی جی اور دیگر پولیس آفیسروں سے ہماری کوئی دشمنی نہ تھی تو پھر وہ کس کے حکم پر عام شہریوں پر گولیاں برسا رہے تھے ۔ اگر بیرئیر کا مسئلہ تھا تو انہیں اس بات سے آگاہ بھی کیا گیا تھا کہ وہ بیر ئیر ہائیکورٹ کی اجازت کے ساتھ لگائیں گئے ہیں ۔ ان کا مقصد صرف ڈاکٹر طاہرالقادری کو خوفزدہ کرنا تھا ۔انہوں نے کہا کہ ان کو میڈیا سے پتا چلا کہ شازیہ کے والد اور تنزیلہ کے سسر محمد اقبال سے جب سانحہ ماڈل ٹاﺅن کے بارے میں پوچھا گیا تو انہوں نے اشکبار ہوتے ہوئے بتا یا کہ جدوجہد کرتے ہوئے 4سال کا عرصہ بیت گیا مگر انصاف کہیں سے نہ ملا ۔اللہ تعالیٰ ضرور آخرت میں ایسے لوگوں کو احتساب کرے گا مگر کیا ایسے ظالم لوگوں کا کڑا احتساب اس دنیا میں کرنے والا کو ئی نہیں ۔ وہ آج بھی وزیر اعظم عمران خان ، چیف جسٹس آف پاکستان سے انصاف کی امید لگائے بیٹھے ہیں ل۔ بسمہ نے کہا کہ جب میں پہلی بار قائد تحریک ڈاکٹر طاہر القادری سے ملی تو انہوں نے سر پر اپنا دست شفقت رکھتے ہوئے کہا کہ تمھیں فخر ہونا چاہیے کہ اس کی والدہ نے وقت کے یزیدوں کے سامنے کلمہ حق بلند کیا ہے ۔ اس نے کہا کہ اسے قائد نے صبر اور محنت سے زندگی گزارنے کی تلقین بھی کی ۔