لاہور (مانیٹرنگ ڈیسک) چینل فائیو کے پروگرام نیوز ایٹ سیون میں گفتگو کرتے ہوئے تحریک انصاف کے رہنما ممبر قومی اسمبلی ابراہیم خان نے کہا ہے کہ قومی اسمبلی میں وزیر اطلاعات فواد چوہدری نے دھواں دار تقریر کی لیکن الفاظ کا استعمال غلط تھا۔ جب خورشید شاہ نے اپنی تقریر میں وہی غیر پارلیمانی الفاظ استعمال کیے وہ بھی قومی اسمبلی کے وقار ے خلاف تھا۔ یہ تمام چیزیں ختم کر کے قانون میں اصلاحات کے ذریعے عمل درآمد کیا جائے۔ ملک کو لوٹنے والوں کے لیے سزائیں مقرر کی جائیں کہ انکی نسلیں یاد کریں۔ بیان بازی سے قوم کو کوئی فائدہ نہیں ہوگا۔ ذاتی خیال ہے کہ کرپشن کرنیوالوں کو سزائے موت دی جانی چاہیے۔ دو سے تین بڑے کرپٹ لوگوں کیساتھ ایسا ہوا تو سب ٹھیک ہو جائیں گے۔ چیف جسٹس صاحب خود ہسپتال میں ایک چیز برآمد کر کے آتے ہیں اور لیب کہتی ہے کہ یہ زیتون کا تیل تھا۔ چیف جسٹس کی آنکھوں میں دھول جھونکنے کی کوشش کی گئی‘ انہیں ایکشن لینا چاہیے۔ عمران خان نے کہا تھا کہ اب یہ معاملات ختم ہونگے یا یہ ملک ختم ہوگا۔ اب ہم اسی نہج پر ہیں اور ہمیں اپنے معاملات ٹھیک کرنا ہونگے۔ جہانگیر ترین کی نااہلی پر نظر ثانی کی درخواست خارج ہونے پر انہوں نے کہا کہ ہمیں سپریم کورٹ کے فیصلوں پر اعتماد ہے۔ تاہم ان سے اچھے مشورے لیے جائیں گے۔ نواز شریف منی ٹریل ہی نہیں دے پارہے اور جہانگیر ترین کا منی ٹریل کلیئر ہے۔ حکومت کے منی بجٹ کا بوجھ مالدار لوگوں پر ڈالا گیا ہے۔ وزیراعظم نے بھینسیں بیچ کر پیغام دیا ہے کہ میں عیاشی نہیں کرسکتا تو کوئی دوسرا کیوں کرے گا۔ ابھی صرف گھاس کھانے والی بھینسیں بیچی گئی ہیں مال کھانے والی بھینسیں بیچیں تو پتا تب چلے گا۔ گزشتہ حکومتوں نے دس سال میں پاکستان کی ستر سالہ تاریخ سے دوگنا قرضہ لیا۔ غیر ملکی قرضہ 36ارب سے 92 ارب پر لیجایا گیا‘ جسکی قسط کے لیے بھی پیسے نہیں چھوڑے گئے اور اپنے ایم این ایز کو جاتے ہوئے ایک ارب تک دیدیے۔ انہوں نے ملک کو خزانے کو بھارتی مال سمجھا کہ جیسے چاہے لٹا دو۔ عوام جان گئی ہے کہ ان لوگوں نے ملک کیساتھ کیا گیا تب ہی انہیں اٹھا کر حکومت سے باہر پھینکا گیا۔ ہمیں عوام پر بوجھ کم کرناہے۔ ہمارے پاس ذرائع ہونے کے باوجود ستر فیصد بجلی تیل سے پیدا کی جارہی ہے۔ پاکستان دشمن قوتیں، غیر ملکی فنڈ لینے والے لوگ اٹھ کر کالا باغ ڈیم اور دیگر ڈیموں کی مخالفت کررہے ہیں۔ انکے خلاف آرٹیکل6 کے تحت کارروائی کی سفارش ہے۔ ہمیں عوام کو ریلیف دینے کے لئے ابھی وقت چاہیئے۔ خارجہ پالیسی میں ہماری ترجیح صرف پاکستان ہے۔ وزیر اعظم نے آتے ہی بھارت کو مذاکرات کی پیشکش کی، جس پر بھارت کے منفی جواب کے باوجود عمران خان نے مدبرانہ طور پر کہا کہ مسائل کا حل بات چیت ہی ہے ورنہ بڑا نقصان ہوگا۔ کشمیر ہماری شاہ رگ ہے، کشمیر کے موقف پر کوئی دورائے نہیں۔ مولانا فضل الرحمان نے کشمیر پر ایک لفظ نہیں کہا ایسا لگتا تھا مودی سرکارنے پاکستان پر قبضہ کرلیا ہے۔ پروگرام میں سابق وزیر خزانہ ڈاکٹر سلمان شاہ سے گفتگو کرتے ہوئے کہا کہ منی بجٹ سے ہمیشہ عوام پر بوجھ پڑا ہے۔ اصل معاملہ ہے کہ ہمیں معاشی حالات پر آئی ایم ایف کے پاس جانے نہ جانے کا فیصلہ کرنا ہے۔ حکومت سوچ رہی ہے کہ کوئی اور آپریشن نظر آجائے مگر دورہ سعودی عرب اور چین سے آئی ایم ایف کے پاس نہ جانے کا کوئی اشارہ نہیں ملا۔ قرضے بڑھنے سے ملکی خودمختاری ختم ہوجائے گی۔ آئی ایم ایف بھی مالی خسارے کم کرنے کا کہتا ہے۔ پاکستان کے آئی ایم ایف کے پاس نے سے دنیا کو پیغام ملے گا کہ یہ واقعی اپنی معیشت بہتر کرنا چاہتے ہیں۔ ایکسپورٹ نہ ہونے کے باعث عالمی قرضے لیے جارہے ہیں۔ ڈالر کی آﺅٹ پٹ دے سکتا ہے۔ ہمارے پھل اور سبزیاں دنیا میں بہت مانگ رکھتی ہیں۔ مگر ہماری پیداوار نہیں ہے۔ ڈیم بننے کے بعد پیداوار بڑھانے کی طرف پہلا قدم ہوگا۔ پاکستان کی ٹیکسٹائل کو ٹھیک کرنا بہت ضروری ہے۔ آٹو موبائیل اورالیکٹرانگ انڈسٹری کو دنیا میں پھیلانا پڑے گا۔ نئی کمپنیاں اور ٹیکنالوجی بنانی پڑیں گے جو پوری دنیا میں جا سکیں۔ مگر حکومت کی ترجیح ٹیکس اکٹھے کرنے کی طرف ہے۔ ٹیکس لگایا جارہا ہے مگر ٹیکس بڑھایا نہیں جا رہا۔ ہماری حکومت میں ڈھائی ملین ٹیکس دہندہ تھے جو اب سات سے آٹھ لاکھ رہ گئے ہیں۔ ٹیکس ریٹ کم ہونے چاہیے جو ٹیکس نیٹ بڑھانے سے ہوگا۔ برآمدات کو عالمی معیار کے مطابق لا کر بڑھانے سے قرضے خود بخود کم ہونا شروع ہو جائیں گے۔

فیصل آباد (رپورٹ:یونس چوہدری) فیصل آباد کے نواحی تھانہ روڈالہ کے علاقہ میں جائیداد کی تقسیم کے تنازع پر رشتہ داروں نے زبردستی گھر میں داخل ہو کر خاتون کو تشدد کا نشانہ بنا ڈالا۔ اینٹیں مار کر اس کاسر پھاڑ دیا گیا اور خاتون کے بال نوچ ڈالے“ کپڑے پھاڑ کر برہنہ کر دیا گیا جبکہ ظلم و تشدد اور پولیس کی نا انصافیوں کا شکار خاتون کا کہنا ہے کہ یرے رشتہ دار با اثر ہیں۔”نوٹوں کی چمک“ پر روڈالہ پولیس ان کی حمایتی بن گئی ہے۔ ان کو تھانہ میں پروٹوکول دیا جاتا ہے۔ ایس ایچ او نے مجھے برا بھلا کہہ کر اور بدکار ہونے کا الزام عائد کرتے ہوئے دھکے دےکر تھانہ سے باہر نکال دیا۔ مخالف رشتہ دار میرے گھر اور احاطہ پر قبضہ کر کے مجھے اور میرے اہل خانہ کو گاﺅں بدر کرنے کی کوششیں کر رہے ہیں۔ واقعہ کو تقریباً ایک ہفتہ گزر چکا ہے۔ مگر نہ مقدمہ درج کیا جا رہا ہے اور نہ ہی گرفتاری عمل میں لائی جا رہی ہے اور مجھے سنگین نتائج بھگتنے کی مسلسل دھمکیاں مل رہی ہیں۔ میری کوئی شنوائی نہیں ہو رہی۔ متاثرہ خاتون کا خبریں ہیلپ لائن سے رابطہ اور ”خبریں آفس“ پہنچ گئی۔ یہاں چک نمبر 356گ ب جڑانوالہ کی رہائشی اشرف بی بی زوجہ فاضل نے بتایا کہ احاطہ کی تقسیم کی گئی۔ جس کا میرے رشتہ داروں کو رنج تھا۔ 19ستمبر 2018کو میرے دیور امیر علی، بھتیجے بابر دیورانی ثریا بی بی اور بھتیجی نازیہ نے زبردستی میرے گھر میں داخل ہو کر مجھے ٹھڈے مارنے شروع کر دیئے۔ ہوروں مکوں سے تشدد کا نشانہ بنایا اور اینٹیں مار کر میرا سر پھاڑ دیا۔ کپڑے پھاڑکر برہنہ کر دیا اور میرے سر کے بال کھینچ ڈالے اور للکارے مارتے ہوئے سنگین نتائج بھگتنے کی دھمکیاں دیں اور میرے شور مچانے پر فرار ہو گئے اور ڈنڈے برسا کر گیٹ توڑ دیا۔ اس نے بتایا کہ میں نیم بے ہوشی اور زخمی حالت میں تھانہ روڈالہ پہنچی اور محرروں نے معمولی نوعیت کا ڈاکٹ بنا کر مجھے تھما دیا۔ میں ہسپتال سے میڈیکو لیگل حاصل کر کے تھانہ گئی تو ایس ایچ او علی رضا نے کہا کہ اس پر مقدمہ درج ہو سکتا ہے اور نہ ہی کوئی کارروائی ہو سکتی ہے۔ مجھے گالیاں ، جھڑکیں دیتے ہوئے اور بدکار عورت ہونے کا الزام لگا کر تھانہ سے نکال دیا۔ میرے گھر پر دو بار دھاوا بولا جا چکا ہے۔ ایک سوال کے جواب میں خاتون نے بتایا کہ میں ڈی ایس پی سرکل جڑانوالہ کو درخواستیں دے چکی ہوں۔ مگر ان پر کوئی عملدرآمد نہیں ہو رہا۔ صرف تھانہ بلوا کر مجھے اور میرے خاوند کو ذلیل و خوارکیا جا رہا ہے۔ اس امر پر ظلم و ستم کا شکار خاتون نے وزیراعلیٰ پنجاب، آئی جی پنجاب، آر پی او اور سی پی او فیصل آباد سے مطالبہ کیا ہے کہ نوٹس لےکر مقدمہ درج اور مجھ پر ظلم ڈھانےوالوں کو گرفتار کر کے انصاف و تحفظ فراہم کیا جائے۔

لاہور (مانیٹرنگ ڈیسک)کالم نگار افضال ریحان نے کہا ہے کہ اختلاف جمہوریت کا حسن ہے لیکن مخالف کی مثبت چیزوں کی تعریف بھی کرنی چاہئے وزیراعظم عمران خان کا دورہ سعودی عرب بہت کامیاب رہا ایک مثبت پہلو ابھرا۔چینل فائیو کے پروگرام کالم نگار میں گفتگو کرتے ہوئے انہوں نے کہا سعودی عرب ہمیشہ شکل میں پاکستاان کے ساتھ کھڑا رہا۔انہوں نے کہا سعودی کی سی پیک میں شمولیت پر اعتراض نہیں ۔سی پیک چین کے لئے زیادہ مفید ہے۔امریکہ کا سعودی پر اثر و رسوخ ہے اس سے انکار نہیں کیا جا سکتا۔تجارت کے معاملے میں دشمنی نہیں ہونی چاہئے۔ وزیر اطلاعات فواد چوہدری نے حزب اختلاف کو براہ راست نشانہ بنایا۔کالم نگار توصیف احمد خان نے کہا کہ میں نہیں سمجھتا امریکہ سی پیک کو پسند کرے گا امریکہ اور چین کی بالکل نہیں بنتی تجارتی حوالے سے دونوں آپس میں دشمن ہیں۔دہشتگردی صرف پاکستان نہیں پورے خطے کا مسئلہ ہے۔عمران خان کا کنٹینر پر جو لہجہ تھا وہ اب بدل گیا ہے شائستگی آ گئی ہے۔جہانگیر ترین کے معاملے پر انہوں نے کہا نظرثانی پٹیشن میں نئی شہادتیں پیش نہیں کی جا سکتیں۔احتساب سب کے لئے یکساں ہونا چاہئے۔سینئر صحافی امجد اقبال نے کہا کہ سعودی ہمارے لئے مقدس سرزمین ہے ۔اس وقت عراق دنیا کا بڑا تیل پیدا کرنے والا ملک ہے۔سعودی عرب کبھی نہیں چاہے گا پاکستان کہیں اور جائے جو اس کا تیل خریدنے والا بڑا کسٹمر ہے ۔ سعودی کے اپنے مفادات بھی ہیں۔ انہوں نے کہا کہ پاکستان کی بھارت سے دشمنی یکطرفہ نہیں۔جہانگیر ترین نے تحریک انصاف کے لئے بڑے کام کئے۔پی ٹی آئی کا موقف ہے سیاست میں وہ آئیں جن کے اثاثے باہر نہیں۔ کالم نگارمیاں سیف الرحمان نے کہا سعودی امریکہ کے پیچھے لگ کر اپنا نقصان نہیں کرے گا۔ایک وقت میں بڑی طاقتیں تجارت بھی کرتی ہیں اور اختلافات بھی رکھتی ہیں۔سعودی کئی وجوہات کی بنا پر ہمارے قریب ہے۔جہانگیر ترین جو شواہد لائے وہ بروقت لانے چاہئے تھے۔بہرحال ملک میں جمہوری عمل چلتے رہنا چاہئے تاکہ ملک ترقی کرے۔عوام کو ریلیف حکومتوں کی اولین ترحیح ہونی چاہئے۔