کراچی(نیٹ نیوز)شوبز سٹارز کو ہم ہمیشہ دلکش روپ میں ہی دیکھتے ہیں، اور خود ان کی بھی کوشش ہوتی ہے کہ ہمیشہ خوبصورت دکھائی دیں، لیکن اس بار کچھ فنکاروں کو ہیلووین تہوار منانے کا شوق چرایا تو ایسے عجیب و غریب روپ دھار کر پارٹی منانے نکل کھڑے ہوئے کہ جس نے دیکھا پریشان ہو کر رہ گیا۔ ویب سائٹ parhloکے مطابق ایک شاندار ہیلو وین پارٹی کا اہتمام گلوکارہ کومل رضوی کے بھائی حسن رضوی کی جانب سے بھی کیا گیا جس میں درجنوں فنکاروں نے شرکت کی۔ اس موقع پر شوبز حسیناں کا وہ روپ دیکھنے کو ملا جس کا ان کے پرستاروں نے یقینا کبھی تصور بھی نہیں کیا ہو گا۔ ایک سپر ماڈل نے چہرے پر زخموں کے نشان بنائے ہوئے تھے اور آنکھوں پر سیاہ و سفید نشان لگائے ہوئے تھے، جبکہ گال پر ٹانکوں کے نشان بھی دکھائی دیئے۔ کومل رضوی نے کلوپترا کا روپ دھار رکھا تھا، جو خوفناک تو نہیں البتہ عجیب و غریب ضرورتھا۔ کسی نے پولیس والوں کا حلیہ اپنا کر دوسروں پر رعب جمانے کی کوشش کی، لیکن معلوم نہیں کوئی ان کے رعب میں آیا بھی یا نہیں۔ کچھ ٹھگوں کے روپ میں بھی پارٹی میں شریک ہوئے، مگر یاد رہے یہ اصلی ٹھگ نہیں ہیں، یہ تو صرف لوگوں کے دل چراتے ہیں۔ایک حسینہ تو خطرناک لیزر ہتھیار اٹھائے نظر آئیں، یقینا بہت سے ہوں گے جو اس کے دلکش سٹائل کا نشانہ بن گئے ہوں گے۔ ان میں سے ایک تو منہ میں سگار دبا کر نصف درجن خنجر لہراتا بھی نظر آیا۔اور کچھ ایسی حسینائیں بھی تھیں جنہوں نے کوئی ایسا ویسا روپ نہیں دھارا بلکہ صرف اپنے حسن کے جلووں سے دیکھنے والوں کو گھائل کرتی رہیں۔ فنکاروں نے تو جی بھر کر ہیلووین نائٹ منا لی، مگر سوشل میڈیا صارفین میں سے اکثر کو ان کا انداز کچھ پسند نہیں آیا۔ ان کی تصاویر پر کڑوے کسیلے تبصرے کئے جا رہے ہیں، جن میں سے کچھ تو بہت ہی سخت ہیں۔ ایک صاحب نے ان کے حلیوں کی مناسبت سے کہا کہ یہ شیطان کے پیرو کار ہیں، توبہ! ایک اور سوشل میڈیا صارف کا کہنا تھا کہ مسلمان ہونے پر یہ سب سے بڑا دھبہ ہیں۔ ایک خاتون نے کہا کہ کبھی ہیلو وین، کبھی دیوالی، یہ احساس کمتری کے مارے لوگ ہیں جو خود کو ماڈرن کہتے ہیں۔ انہیں چاہیے کہ اپنا مذہب بھی تبدیل کر لیں کیونکہ اب اسی کی کثر رہ گئی ہے۔ اور ایک صاحب نے تو اس واقعے کو قیامت کی نشانی قرار دے دیا۔ ان کا کہنا تھا کہ لعنتی لوگ ہیں یہ سب۔ بس قیامت نزدیک ہے۔
