لاہور(شوبزڈیسک)عامر خان اور امیتابھ بچن کی ایک ساتھ اکٹھے پہلی فلم ” ٹھگز آف ہندوستان “ سنیماﺅں کی زینت بنے گی ۔ہیوی بجٹ فلم میں بیوٹی کوئین کترینہ کیف رقاصہ جبکہ فاطمہ ثنا ءشیخ لڑاکا ٹھگ کے کردار میں جلوہ گر نظر آئیں گی ۔ ڈسٹری بیوشن کلب کے زیر اہتمام بالی وڈ کی تاریخ کی مہنگی ترین فلم ” ٹھگز آف ہندوستان“ امریکہ ، برطانیہ ، متحدہ عرب امارات اور بھارت کے ساتھ ساتھ آٹھ نومبر کو پاکستانی سنیماﺅں کی زینت بنے گی ۔ ثقافتی تہوار دیوالی کے موقع ریلیز کی جانے والی فلم کا مجموعی بجٹ تین سو کروڑ سے زائد ہے جبکہ اس تاریخی فلم کی عکسبندی یورپی ملک مالٹا کے دلفریب ساحل پر کی گئی ہے ۔ فلم میں امیتابھ بچن نے ابوبکر آزادنامی لڑاکا لیڈرکا کردار ادا کیا ہے جبکہ عامر خان فرنگی ملاح نامی ٹھگ کے کردار میں نظر آئیں گے جسے انگریز سرکار اور ٹھگوں کے گروپ کے درمیان صلح کا معاہدہ کروانے کا ٹاسک ملتا ہے۔ ڈائریکٹر وجے کرشنا اچاریہ کی زیر ہدایت بنی اس فلم کی عکسبندی خصوصی طور پر تیار کئے گئے سینکڑوں ٹن وزنی دیو ہیکل بحری جہازوں پر کی گئی ہے۔
جسے فلم کے کلائمکس سین میں دھماکے سے اڑا دیا جاتا ہے ۔ فلم میں قطرینہ کیف کے دو سپر ہٹ ڈانس نمبرز بھی شامل ہیں جو میوزک چارٹس پر سر فہرست جا رہے ہیں ۔ ڈسٹری بیوشن کلب کے زیر اہتمام لاہوراور کراچی میں فلم کے پریس شوز کا اہتمام بھی کیا جائے گا۔

ممبئی (شوبزڈیسک) بالی وڈ اداکارہ اور سابقہ حسینہ عالم سشمیتا سین 27سالہ ماڈل روہمن شاول کے ساتھ آئندہ سال شادی کریں گی۔ بھارتی زرائع ابلاغ کے مطابق سشمیتا سین نے اپنے پیار کا اعلان کر دیا ہے،سشمیتاسین کی دو ماہ قبل ماڈل روہمن شاول سے فیشن گالا میں ملاقات ہوئی اور اب انہوں نے روہمن شاول کے ساتھ بنائی گئی تصویر انسٹاگرام پر شئیر کرتے ہوئے اپنے رشتے کا اعلان کیا ہے اور امکان ظاہر کیا جا رہا ہے کہ دونوں آئندہ سال شادی کریں گے۔

ممبئی(شوبزڈیسک) بھارت میں سکھوں کے بعد اب ملک کی دوسری بڑی سیاسی جماعت کانگریس بھی فلم زیرو کے خلاف میدان میں آگئی۔ گزشتہ روز بھارتی سکھ کمیونٹی کے جنرل سیکریٹری نے شاہ رخ خان اور فلم زیرو کے ہدایتکار آنند لال رائے کے خلاف پولیس میں شکایت درج کراتے ہوئے کہا تھا کہ کنگ خان نے ٹریلر اورپوسٹر میں جس طرح کرپان کو ایک عام چاقو کی طرح پہنا ہوا ہے اس سے سکھوں کے جذبات مجروح ہوئے ہیں لہذا فورا پوسٹر اور ٹریلر سے یہ سین ہٹایا جائے۔سکھوں کے بعد بھارتی سیاسی جماعت کانگریس کے لیڈر چرن سنگھ ساپرا نے بھی سکھوں کے موقف کی حمایت کرتے ہوئے کہا ہے کہ ٹریلر اور پوسٹر میں جس طرح کرپان کا غلط طریقے سے استعمال ہوا ہے۔ اس کے خلاف انہیں کئی شکایات موصول ہوئی ہیں لہذا انہوں نے پولیس سے فلم میکرز کے خلاف ایکشن لینے کا مطالبہ کیا ہے۔اس کے ساتھ ہی ساپرا نے پروڈکشن کمپنیز ریڈ چلی انٹرٹینمنٹ اور کلر یلو پروڈکشن کو فورا پوسٹر ہٹانے کی بھی تنبیہ کی ہے۔واضح رہے کہ فلم زیرو کا ٹریلر ریلیز ہوتے ہی مقبول ہوگیا تھا اور 4 دن میں 100 ملین ویوز کے ساتھ یوٹیوب پر ٹاپ ٹرینڈ کررہا ہے، شاہ رخ خان، کترینہ کیف اور انوشکا شرما کی فلم زیرو کرسمس کے موقع پر 21 دسمبر کو نمائش کے لیے پیش کی جائے گی۔

لاہور(شوبزڈیسک)اداکارہ کبری خان کو گرم ملبوسات کے بغیر نتھیا گلی جانا مہنگا پڑ گیا ۔ تفصیلات کے مطابق اداکارہ کبری خان دیگر فنکاروں کے ہمراہ ڈرامہ سیریل الف کی ریکارڈنگ کیلئے نتھیا گلی پہنچیں جو ان دنوں شدید سردی کی لپیٹ میں ہے ۔بتایا گیا ہے کہ اداکارہ اپنے ہمراہ گرم ملبوسات نہیں لائی تھیں اور شدید سردی کی وجہ سے اداکارہ کپکپاتی رہیں۔ اداکارہ کا کہنا تھاکہ میرے خیال میں نتھیا گلی میں بھی معمول کا موسم ہوگا لیکن مجھے یہاں آکر اپنی غلطی کا احساس ہوا ۔ آئندہ میں نے کسی بھی سفر پر روانہ ہونے سے قبل متعلقہ مقام پر موسم کی شدت بارے پیشگی آگاہی حاصل کرنے کا سبق یاد کر لیا ہے ۔