واشنگٹن(ویب ڈیسک) ایف بی آئی کی ہدایت پر امریکا میں ہونے والے وسط مدتی الیکشن میں اثر انداز ہونے والے فیس بک اور انسٹاگرام کے مخلتف پیجز حذف کردیے گئے۔بین الاقوامی خبر رساں ادارے کے مطابق امریکی انتخابات میں اثرانداز ہونے کے خدشے کے پیش نظر 30 فیس بک اور 85 انسٹاگرام اکاﺅنٹس اور پیجز سماجی رابطے کی ویب سائٹس سے حذف کردیے ہیں جو مبینہ طور پر روس کے زیر انتظام تھے۔جن فیس بک اکاﺅنٹس کو بند کیا گیا ہے وہ فرانسسی اور روسی زبان میں تھے جب کہ انسٹاگرام اکاﺅنٹس انگریزی زبان میں استعمال ہوتے تھے اور مبینہ طور پر بند کیے گئے تمام اکاﺅنٹس روسی انٹرنیٹ ریسرچ ایجنسی چلا رہی تھی۔ روس کی جانب سے کسی ردعمل کا اظہار نہیں کیا گیا ہے۔سماجی رابطے فیس بک اور انسٹاگرام کے پیجز اور اکاﺅنٹس کو ایف بی آئی کی تفتیشی رپورٹ کی ہدایت میں بند کیا گیا ہے جس میں کہا گیا تھا کہ صدارتی انتخاب کی طرح وسط مدتی انتخاب میں بھی روس سوشل میڈیا ’پیجز‘ کے ذریعے اثرانداز ہونے کی کوشش کر رہا ہے۔واضح رہے کہ ایف بی آئی نے 2016 کے صدارتی انتخاب میں روسی مداخلت کا انکشاف کرتے ہوئے روسی کمپنیوں، تاجروں اور شخصیات کو نامزد کیا تھا جب کہ فیس بک پر بھی صارفین کا ڈیٹا استعمال کرنے کا الزام سامنے آیا تھا۔

واشنگٹن(ویب ڈیسک) امریکا میں صدارتی انتخاب کے بعد ایوان زیریں (کانگریس) کی تمام جب کہ سینیٹ کی ایک تہائی نشستوں کے لیے آج وسط مدتی الیکشن ہورہے ہیں۔بین الاقوامی خبر رساں ادارے کے مطابق امریکا میں ایوان نمائندگان کی تمام (435) اور سینیٹ کی ایک تہائی (34) نشستوں جب کہ 39 ریاستوں کے گورنر کے لیے آج انتخابات ہو رہے ہیں۔ ان انتخابات کے نتائج سے کانگریس کے دونوں ایوانوں میں راج کرنے والی جماعت کا تعین ہوسکے گا۔ایوان زیریں میں ڈونلڈ ٹرمپ کی ریپبلکن پارٹی کو 235 اراکین کے ساتھ برتری حاصل ہے جب کہ ڈیموکریٹک پارٹی کے 193 اراکین بھی اپنی موجودگی کا بھرپور احساس دلاتے رہے ہیں۔ سینیٹ میں صدر ٹرمپ کی جماعت پہلے ہی مشکلات کا شکار ہے 100 رکنی سینیٹ میں ریپبلکن کو محض دو اراکین سے سبقت حاصل ہے۔رواں برس ستمبر میں ووٹر رجسٹریشن کے موقع پر ریکارڈ ووٹرز کا اندراج ہوا ہے جب کہ پچھلے تمام وسط مدتی انتخابات کے برخلاف اس بار مڈٹرم الیکشن میں امریکیوں کی دلچسپی کہیں زیادہ ہے۔ ایک سروے کے مطابق 66 فیصد ووٹرز اس بار ووٹ کرنے کے لیے کمر کس چکے ہیں جب کہ صرف 9 فیصد ووٹرز نے گھر میں بیٹھے رہنے کا ارادہ ظاہر کیا ہے۔صدر ٹرمپ کی جماعت ریپبلکن کے بنیادی اراکین تو اپنے صدر کے ساتھ کھڑے ہیں تاہم معتدل مزاج ریپبلکن ٹرمپ پالیسیوں سے نالاں ہیں اس لیے اس بار معتدل مزاج ریپبلکن کو ووٹ کاسٹ کرنے کے لیے راضی کرنا جوئے شیر لانے کے مترادف ہوگا جس کا فائدہ ڈیمو کریٹک پارٹی کو ہوگا۔واضح رہے کہ ان وسط مدتی الیکشن کے لیے امریکی صدر نے جارحانہ انتخابی مہم چلائی ہے اور اسی دوران ٹرمپ کے ایک حامی نے سابق صدر بارک اوباما اور ہیلری کلنٹن سمیت ٹرمپ مخالف معروف شخصیات کو دھمکانے کے لیے پارسل بم بھیجے تھے۔

سری نگر(ویب ڈیسک) مقبوضہ کشمیر کے ضلع شوپیاں میں بھارتی فورسز کی فائرنگ کے نتیجے میں 2کشمیری نوجوان شہید ہوگئے۔کشمیرمیڈیا سروس کے مطابق بھارتی فورسز نے مقبوضہ کشمیرمیں مظالم کی انتہا کردی ہے اور ضلع شوپیاں میں آپریشن کے دوران بربریت کا مظاہرہ کرتے ہوئے 2 نوجوانوں کوشہید کردیا۔ جام شہادت نوش کرنے والے نوجوانوں کی شناخت محمد ادریس سلطان اورعامر حسین کے نام سے ہوئی ہے۔گزشتہ ایک ہفتے کے دوران مقبوضہ کشمیرمیں بھارتی فوج کی ریاستی دہشت گردی کے نتیجے میں اب تک 5 سے زائد کشمیری شہید ہوچکے ہیں۔واضح رہے کہ بھارتی فوج کی جانب سے انسانیت کے خلاف اپنے جرائم کو عالمی برادری سے چھپانے کےلیے محاصرے اور سرچ آپریشن کے دوران کیمیائی ہتھیاراستعمال کرنے کا انکشاف ہوا ہے۔

کیلیفورنیا(ویب ڈیسک) اقوام متحدہ کا کہنا ہے کہ عراق میں 200 سے زائد اجتماعی قبریں برآمد ہوئی ہیں جن میں قتل عام کے بعد ہزاروں شہریوں کو دفن کیا گیا تھا۔بین الاقوامی خبر رساں ادارے کے مطابق اقوام متحدہ کے انسانی حقوق کے دفتر سےعراق کی صورت حال پر جاری رپورٹ میں 202 اجتماعی قبریں برآمد ہونے کا انکشاف کیا گیا ہے جس میں سب سے چھوٹی قبر میں 8 جب کہ سب سے بڑی قبر میں ہزار سے زائد افراد کو اجتماعی طور پر دفنایا گیا تھا۔زیادہ تر اجتماعی قبریں شمالی اور مشرقی علاقوں کرک، نینوا، صلاح الدین اور انبر سے ملیں، ان علاقوں پر شدت پسند جماعت داعش کے جنگجوﺅں نے 2014 میں قبضہ کرلیا تھا۔ اجتماعی قبروں میں بچوں، بزرگوں، خواتین اور سیکیورٹی اہلکاروں کی لاشیں شامل ہیں۔اقوام متحدہ کی رپورٹ میں مزید بتایا گیا ہے کہ داعش نے ان علاقوں میں باقاعدہ منصوبہ بندی سے قتل عام کیا اور انسانی حقوق کی سنگین خلاف ورزی کرتے ہوئے لاشوں کو اجتماعی قبروں میں دفنا دیا اور اس دوران جنگی جرائم، نسل کشی اور انسانیت سوز مظالم کی تاریخ رقم کی گئی۔اقوام متحدہ کی رپورٹ میں دعویٰ کیا گیا ہے کہ اجتماعی قبروں سے شواہد جمع کیے گئے ہیں،تمام تر مشکلات کے باوجود لاشوں کی باقیات کے فرانزک ٹیسٹ کرائے جائیں گے جس کے لیے ماہرین کی خدمات حاصل کرلی گئی ہیں تاکہ مجرموں کا تعین کیا جا سکے۔واضح رہے کہ 2014 میں شدت پسند جماعت داعش نے عراق کے دوسرے بڑے شہر موصل سمیت ملک کے بڑے حصے پر قبضہ کرلیا تھا تاہم عراقی حکومت اور اتحادی فوج نے بیشتر علاقے واگزار کروالیے ہیں۔

یاﺅندے(ویب ڈیسک) افریقی ملک کیمرون میں علیحدگی پسندوں نے ایک بورڈنگ اسکول پر دھاوا بول کر پرنسپل، استاد اور ڈرائیور سمیت 79 طلبا کو اغوا کرلیا۔بین الاقوامی خبر رساں ادارے کے مطابق افریقی ملک کیمرون کے شمال مغربی شہر بامیندا میں شدت پسند مسلح افراد نے بورڈنگ اسکول پر حملہ کرکے پرنسپل ان کے ڈرائیور، ایک استاد اور 79 طلبا کو اپنے ہمراہ لے گئے۔ اسکول کے بچوں کے عمریں 10 سے 14 سال ہیں۔اغواکاروں کی جانب سے مغویوں کی ویڈیو بنا کر سوشل میڈیا پر جاری کی گئی ہے جس میں تمام بچوں کو ایک چھوٹے سے کمرے میں سہما ہوا دیکھا جا سکتا ہے، خوفزدہ بچے بلبلا کر رو رہے تھے جب کہ ویڈیو بنانے والا شخص انہیں زوردار آواز سے دھمکا رہا تھا۔ ویڈیو بنانے والے شخص نے آخر میں موبائل کیمرہ اپنی جانب کرلیا جس سے اس کی شکل بھی ویڈیو میں آگئی۔سوشل میڈیا پر جاری کی گئی ویڈیو میں اغوا کاروں نے کوئی مطالبہ نہیں کیا ہے تاہم کیمرون کی وزارت داخلہ کی جانب سے جاری بیان میں کہا گیا ہے کہ اغوا کاروں نے بچوں کی رہائی کے بدلے تاوان کے بجائے اسکول کو مکمل طور پر بند کرنے کا مطالبہ کیا ہے۔ حکومت اور اغوا کاروں کے درمیان مذاکرات جاری ہیں۔واضح رہے کہ جس علاقے سے بچوں کو اغوا کیا گیا ہے وہاں کئی علیحدگی پسند مسلح گروہ سرگرم ہیں جو فرانسیسی بولنے والے علاقوں سے علیحدگی چاہتے ہیں اور حال میں مسلح گروہوں نے اسکولوں کو بند کرنے کے لیے انتظامیہ کو دھمکیاں بھی دی تھیں۔