برسلز(ویب ڈیسک) یورپی یونین میں شامل تمام ممالک نے برطانیہ کی وزیراعظم تھریسامے کے ’بریگزٹ پلان‘ کی منظوری دے دی۔بین الاقوامی خبر رساں ادارے کے مطابق یورپی یونین اور برطانیہ کے درمیان بریگزٹ ڈیل پر اتفاق ہو گیا ہے۔ یورپی یونین کے باقی ماندہ 27 رہنماﺅں نے ایک خصوصی تقریب میں بریگزٹ ڈیل پر دستخط کردیئے ہیں۔برسلز میں ہونے والی خصوصی تقریب میں یورپی یونین اور برطانوی وزیراعظم کے درمیان بریگزٹ ڈیل طے پا گئی ہے جس کے آدھے گھنٹے بعد ہی یورپیئن کونسل کے صدر ڈونلڈ ٹسک نے اپنی ٹوئٹ میں لکھا کہ ’ یورپی یونین سے برطانیہ کے انخلاءاور مستقبل میں فریقین کے درمیان سیاسی اور خارجہ تعلقات پر معاملات طے پا گئے ہیں۔یورپی یونین کے رہنماﺅں کی بریگزٹ ڈیل کی منظوری کو برطانوی وزیراعظم کی بڑی کامیابی سمجھا جا رہا ہے، تاہم اصل امتحان اس ڈیل کو برطانوی پارلیمنٹ سے منظور کروانا ہے۔ وزیراعظم تھریسامے کو اس ڈیل پر اپنے رفقا، وزرا اور سیاسی حلیفوں کی مخالفت کا سامنا رہا ہے۔برطانوی عوام نے جون 2016 میں ہونے والے ریفرنڈم میں یورپی یونین سے علیحدگی کا فیصلہ کیا تھا تاہم عمل درآمد میں حائل کٹھن مراحل کو طے کرنے میں ابھی مزید وقت لگے گا۔ ممکن ہے برطانیہ کا یورپی یونین سے 44 سالہ رفاقت کا خاتمہ 2019 میں مکمل ہو جائے گا۔

جے پور(ویب ڈیسک) کانگریسی رہنما اور سابق وزیر ویلاس راﺅ نے کہا ہے کہ ساری دنیا راہول گاندھی کی 5 نسلوں کو جانتی ہے جب کہ وزیراعظم نریندرا مودی کے والد کے نام سے بھی کوئی واقف نہیں۔ بھارتی میڈیا کے مطابق کانگریسی رہنما ویلاس راﺅنے کہا ہے کہ ان کے رہنما راہول گاندھی کی 5 نسلوں کو تو پوری دنیا جانتی ہے البتہ نریندرا مودی کا نام وزیراعظم بننے کے بعد دنیا کے سامنے آیا اور تاحال کوئی بھی نہ تو وزیراعظم مودی کے والد کا نام جانتا ہے اور نہ ماں کے نام سے واقف ہے۔راجستھان میں ایک انتخابی مہم کے دوران کارنر میٹنگ سے خطاب کرتے ہوئے سابق وزیر ویلاس راﺅے مزید کہا کہ نریندرا مودی گاندھی خاندان سے حساب مانگ رہے ہیں، وہ بھول گئے کہ راہول کے باپ راجیو گاندھی، دادی اندرا گاندھی اور پڑ دادا نہرو کو پوری دنیا جانتی ہے جب کہ آپ کے تو والد تک کا نام کوئی نہیں جانتا۔وزیراعظم نریندرا مودی پر تقریر کے دوران ذاتیات کو تنقید کا نشانہ بنانے اور مودی کے خاندان کے حوالے سے ذاتی حملے کی ویڈیو بھارتیہ جنتا پارٹی نے سوشل میڈیا پر اپ لوڈ کردی جس کے بعد سابق وزیر کو اپنی تنقید پر وضاحتیں دینا پڑ گئیں۔ویلاس راﺅ کا کہنا تھا کہ وہ ذاتیات کو سیاست میں گھسیٹنے کے مخالف رہے ہیں، سوشل میڈیا پر وائرل ہونے والی ویڈیو پارٹی میٹنگ کے دوران بنائی گئی اور ویڈیو بنانے والے شخص نے میرے بیان کو سیاق و سباق سے ہٹ کر ایڈٹ کیا اور پھر ویڈیو اپ لوڈ کردی۔

لاہور(ویب ڈیسک) بھارت کے سابق کرکٹر اور مشرقی پنجاب کے سینئر وزیر سدھو نے کرتارپور راہداری کے سنگ بنیاد کی تقریب میں شرکت کا فیصلہ کیا ہے۔نوجوت سنگھ سدھو نے پاکستان کے وزیرخارجہ شاہ محمود قریشی کا شکریہ ادا کرتے ہوئے کہا ہے کہ وہ کرتارپور کوریڈور کے سنگ بنیاد کی تقریب میں شرکت کے لیے پاکستان آئیں گے۔نوجوت سنگھ سدھو نے شاہ محمود قریشی کو لکھے گئے خط میں کہا ہے کہ انہوں نے پاکستان آنے کے لیے بھارتی وزارت خارجہ سے اجازت کے لیے خط لکھا ہے، کرتارپور کوریڈور پاکستان اور بھارت کے مابین تعلقات کی بہتری کے حوالے سے ایک امید ہے، سکھ قوم جو دربار صاحب پر اپنا ماتھا ٹیکنا چاہتی ہے اس کے لیے بھی کرتارپور کوریڈور ایک آس ہے جو پوری ہونے جارہی ہے۔واضح رہے کہ کل 26 نومبر کو بھارتی پنجاب کے وزیراعلی کیپٹن (ر) امریندر سنگھ ڈیرہ بابا نانک میں کرتارپور کوریڈور کا سنگ بنیاد رکھیں گے جبکہ پاکستان میں وزیراعظم عمران خان 28 نومبر کو کرتارپور کوریڈور کا سنگ بنیاد رکھنے جارہے ہیں۔