ممبئی(ویب ڈیسک) فلم ’زیرو‘ کے ہدایت کارآنند ایل رائے نے بالی ووڈ کنگ شاہ رخ خان کی تعریفوں کے پل باندھ دیئے۔بھارتی میڈیا رپورٹس کے مطابق فلم ’زیرو‘ کے ہدایت کار آنند ایل رائے کا کہنا تھا کہ شاہ رخ خان ایک کامیاب ترین اداکار ہیں جب کہ ان کی جو فلمیں ناکام ہوئیں اس میں قصور شاہ رخ کا نہیں بلکہ ہدایت کار کا تھا جنہوں نے فلموں کو بہتر انداز سے پیش نہیں کیا۔آنند ایل رائے نے کہا کہ میں اتنا کہہ سکتا ہوں کہ فلم ’زیرو‘ بناتے وقت ہم نے خوب انجوائے کیا کیوں کہ ہم جانتے تھے کہ ہم اس فلم میں کچھ مختلف اور نیا کر رہے ہیں اور جہاں تک شاہ رخ کی بات ہے وہ بہت ہی اعلیٰ شخصیت کے مالک اور بہترین اداکار ہیں اور وہ ہمیشہ الگ ہی کردار کی تلاش میں رہتے ہیں۔ہدایت کار نے کہا کہ دوسرے اداکاروں کے لئے یہ فلم ایک تجربہ ہوگی لیکن شاہ رخ کے لئے یہ فلم ایک موقع ہے لیکن انہوں نے کبھی نہیں کہا کہ کیوں کہ وہ میرے ساتھ پہلی دفعہ کام کررہے ہیں تو فلم کو احتیاط سے کریں گے،ان کا جو مقام ہے اور جس طرح کی ان کی اداکاری ہے ان کو احتیاط کی ضرورت ہی نہیں۔واضح رہے کہ آنند ایل رائے کی ہدایت کاری میں بننے والی کنگ خان کی فلم ’زیرو‘ میں کترینہ کیف اور انوشکا شرما بھی مرکزی کردار کرتی نظر آئیں گی جب کہ فلم 21 دسمبر 2018 میں سینما گھروں کی زینت بنے گی۔

ممبئی(ویب ڈیسک) بالی ووڈ کی خوبرو اداکارہ دپیکا پڈوکون اور رنویر سنگھ کے دوسرے استقبالیے کی تقریب گزشتہ روز ممبئی میں منعقد ہوئی تاہم اس بار بھی تقریب میں بالی ووڈ اسٹارز شریک نہیں ہوئے۔رواں ماہ 14 اور 15 نومبر کو اٹلی کے خوبصورت مقام لیک کومو میں شادی کے بندھن میں بندھنے والی اسٹار جوڑی دپیکا پڈوکون اور رنویر سنگھ کے دوسرے استقبالیے کی تقریب گزشتہ روز ممبئی کے گرینڈ ہائٹ ہوٹل میں منعقد کی گئی۔تاہم پہلے استقبالیے کی طرح دوسری تقریب میں بھی اسٹار جوڑی کی جانب سے بالی ووڈاسٹارز کو مدعو نہیں کیاگیا جس کے باعث تقریب کچھ پھیکی لگی۔استقبالیے کی تقریب میں دپیکا پڈوکون سفید اور سنہری رنگ کی خوبصورت ساڑھی میں نظر آئیں جب کہ رنویر سنگھ نے بھی سفید اور سنہرے کام والا لباس زیب تن کیاتھا۔ دونوں گزشتہ روز کسی راجکمار اور راجکماری سے کم نہیں لگ رہے تھے۔اسٹار جوڑی کے پہلے استقبالیے کی تقریب 21 نومبر کو بنگلورو میں منعقد کی گئی تھی جس میں دونوں کے گھر والوں اورقریبی دوستوں نے شرکت کی تھی۔تاہم شائقین کو مایوس ہونے کی ضرورت نہیں کیونکہ اسٹار جوڑی کے تیسرے استقبالیے کی تقریب یکم دسمبرکو منعقد ہوگی جس میں تمام بالی ووڈ اسٹارز شرکت کریں گے اور یہ تقریب بالی ووڈ اسٹارز کی شرکت کی وجہ سے گزشتہ دونوں تقاریب سے زیادہ رنگارنگ اور شاندار ہوگی۔

ممبئی(ویب ڈیسک) بھارتی ریاست تمل ناڈو کی ایک کمپنی نے سپر اسٹار رجنی کانت کی فلم 2.0 کی ریلیز پر چھٹی کااعلان کردیا۔بھارتی میڈیا کے مطابق اداکار رجنی کانت اور اکشے کمار کی فلم 2.0 آج ریلیز ہوگئی ہے۔ سپر اسٹار رجنی کانت کو بھارت میں بے انتہا پسند کیا جاتا ہے اور پرستار ان کی فلم کا بے صبری سے انتظار کرتے ہیں۔حال ہی میں بھارتی ریاست تمل ناڈو کی ایک کمپنی ’گیٹ سیٹ گو ٹریننگ انسٹی ٹیوٹ‘ نے رجنی کانت سے اپنی محبت کا ثبوت دیتے ہوئے فلم 2.0 کی ریلیز پراپنے ملازمین کو چھٹی دے دی ہے تاکہ وہ فلم کو بھرپور انداز میں انجوائے کرسکیں یہاں تک کہ کمپنی مالکان نے تمام ملازمین کو فلم کے مفت ٹکٹس بھی دئیے ہیں۔دوسری جانب فلمی تجزیہ نگار ترن آدرش نے فلم 2.0 کو بلاک بسٹر قرار دیتے ہوئے 5 اسٹارز دئیے ہیں اور فلم میں اکشے کمار کی اداکاری کو سراہتے ہوئے رجنی کانت کو ’باس‘ قراردیاہے۔واضح رہے کہ فلم2.0 ساڑھے 500 کروڑ کے بجٹ کے ساتھ بالی ووڈ کی مہنگی ترین فلم ہے جس میں اکشے کمار، رجنی کانت اور ایمی جیکسن مرکزی کردار نبھارہے ہیں۔

ممبئی(ویب ڈیسک) بالی ووڈ اداکارہ اور سابق ملکہ حسن پریانکا چوپڑا نے دپیکاپڈوکون اور رنویر سنگھ کے نقش قدم پر چلتے ہوئے اپنی شادی میں موبائل فون کے استعمال پر پابندی لگادی۔حال ہی میں شادی کے بندھن میں بندھنے والی اسٹار جوڑی دپیکا پڈوکون اور رنویر سنگھ نے اپنی شادی پر موبائل فون کے استعمال پر پابندی عائد کی تھی تاکہ شادی کی تصاویر سوشل میڈیا پر لیک نہ ہوجائیں۔ اداکارہ پریانکا چوپڑا نے بھی تصاویر لیک ہونے کے ڈر سے یہی طریقہ اپنایا ہے۔بھارتی میڈیا کے مطابق پریانکا چوپڑا اورنک جونز کی شادی میں بھی مہمانوں کے موبائل فون استعمال کرنے پر پابندی عائد ہوگی۔ دونوں اسٹارز نے اپنی شادی کی تصاویر کے حقوق ایک بین الاقوامی میگزین کو 2.5 ملین ڈالرز(تقریباً 33 کروڑ روپے) میں فروخت کیے ہیں۔ لہٰذا شادی کی تقریب میں اس بات کا سختی سے خیال رکھاجائے گا کہ کوئی بھی مہمان اپنے موبائل سے تصاویر نہ کھینچ سکے۔واضح رہے کہ پریانکا چوپڑا اورنک جونز کی شادی کی تقریبات کاآغاز آج سے ہوگیا ہے جو 3 دسمبر تک جاری رہیں گی۔ پریانکا اورنک جونز 2 دسمبر کو ہندو اور3 دسمبر کو کرسچن روایات کے مطابق شادی کے بندھن میں بندھیں گے۔

لاہور(صدف نعیم)صوبائی وزیر ثقافت فیاض الحسن چوہان کی الحمرا آرٹس کونسل میں اسٹیج فنکاروں سے ملاقات ،ملاقات میں نواز انجم، افتخار ٹھاکر، اداکارہ میگھا سمیت فنکاروں اور پروڈیوسرز نے شرکت کی ۔ فیاض الحسن چوہان نے اسٹیج فنکاروں سے ان کے مسائل سنے اور جلد حل کرنے کی یقین دہانی کرائی ۔انہوں نے کہا کہ میرا مقصد فنکاروں کی فلاح سمیت انڈسٹری کی بہتری ہے ۔مجھے آپ سب کے مسائل سننے کے لیے آج مدعوکیا ہے۔جبکہ ادکارہ نواز انجم کا کہنا تھا کہ سابق حکومت میں اسٹیج فنکاروں کو نظر انداز کیا جاتا رہا۔ کئی سالوں سے معیاری ڈرامہ کرنے کی درخواست دےرہاہو مگر الحمرا نے ہال فراہم نہیں کیا۔اس موقع پر افتخار ٹھاکر کا کہنا تھا کہ پنجاب میں جو ڈرامے بن رہے ہیں لوگ اپنی فیملی کے ساتھ نہیں دیکھ سکتے ہیں ۔فیملی ڈرامے پیش کرنے کی ضرورت ہے، اسٹیج کے لیے قوانین سخت کرنا ہونگے۔