لاہور(تجزیہ نگار) ن لیگ کی رہنما بیگم تہمینہ دولتانہ لندن میں نواز شریف خاندان کے ساتھ تین روز سے رابطہ نہیں کر سکیں۔ ان کا کہنا ہے کہ وہ مسلسل کوشش میں ہیں مگر ان کی حسن یا حسین نواز میں سے کسی کے ساتھ بات نہیں ہو پا رہی۔ انہوں نے گزشتہ روز ”ضیا شاہد کے ساتھ“ پروگرام میں وعدہ کیا تھا کہ وہ بیگم کلثوم ککی بیماری کی صورتحال کے بارے میں معلومات حاصل کرکے آگاہ کریں گی مگر وہ اس میں ناکام رہی ہیں۔ وہ مشرف دور میں نواز شریف کی گرفتاری کے دوران بیگم کلثوم نواز کے بہت قریب رہی ہیں۔ ان کا کہنا تھا کہ بعد میں بھی وہ ان سے رابطے میں تھیں تاہم اب لندن میںکسی ذمہ دار شخصیت سے رابطہ نہیں ہو پا رہا جو انہیں بیگم صاحبہ کی صحت کے بارے میں حقیقی صورتحال سے آگاہ کرسکے۔

لاہور (مانیٹرنگ ڈیسک) چینل ۵ کے تجزیوں و تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا کہ چیف جسٹس کو رپورٹ ملی تھی کہ مانسہرہ میں زلزلہ زدگان کے لئے ملنے والے فنڈز کو مناسب طریقے سے خرچ نہیں کیا گیا جس کی وجہ سے وہ وہاں گئے۔ مانسہرہ میں زلزلہ زدگان کے فنڈز کا مسئلہ ہو یا دیگر مسائل جن پر چیف جسٹس نے ازخود نوٹس لیا ہے ان پر صوبائی یا وفاقی حکومت کو تب شکایت ہونی چاہئے جب ان کا کام بہتر ہو۔ سرکاری مشینری کم و بیش تباہ ہوچکیہے۔ کارکردگی کا معیار بہت خراب ہے۔ ماہرین مالیات سے سنا ہے کہ جہاں کہیں جو فنڈز ملتے ہیں، سال بعد 80 فیصد استعمال نہیںہوا ہوتا۔ ایک کہتے ہیں وسائل نہیں اگر ہیں بھی تو ان کو استعمال کرنے والی مشینری دستیاب نہیں۔ چیف جسٹس بنیادی حقوق کے تحت نوٹس لے رہے ہیں، جہاں کہیں عوامی مسئلہ ہو خود وہاں پہنچتے ہیں۔ یہ ان کی نیک نیتی ہے کہ انہوں نے کہا جب تک تمام سرکاری ملازمین کی تنخواہیں ادا نہیں کر دی جاتیں میں تنخواہ نہیں لوں گا۔ انہوں نے کہا کہ میں نے پڑھا تھا کہ احسن اقبال کا بھی اقامہ ہے شاید وہ سعودی عرب سے تنخواہ بھی لیتے ہیں۔ وہ کہتے ہیں کہ چیف جسٹس طعنے مارتے ہیں۔ حکومت کے لوگ تلے ہوئے ہیںکہ توہین عدالت کے جرم میں ان کو پکڑا جائے پھر کہیںگے کہ عدالتیں سیاستدانوں پر زیادتی کر رہی ہیں۔ اگر حکومت سمجھتی ہے کہ چیف جسٹس نے اپنے اختیارات سے تجاوز کیا تو پھر ضرور اس طرف توجہ دلائیں۔ وزیر داخلہ نے زیادہ سخت الفاظ نہیں کہے لیکن توہین آمیز الفاظ ہیں۔ یہ کہنا کہ روز طعنے مارتے ہیں یہ کوئی ساس بہو کی لڑائی نہیں۔ چیف جسٹس کو بنیادی انسانی حقوق کی پاسداری کے ضمن میں آئین نے خصوصی اختیارات دیئے ہیں جس کے تحت وہ کسی بھی جگہ کسی بھی سرکاری ادارے کو چیک کرتے ہیں۔ اس سے غصے میں آنے کی کوئی بات نہیں۔انہوں نے مزید کہا کہ شاہد خاقان عباسی کو نون لیگ نے وزیراعظم منتخب کرایا، وہ آج بھی کہتے ہیں کہ میرا لیڈر نواز شریف ہے جبکہ سابق وزیراعظم کہتے ہیں کہ اسمبلیوں کی کارکردگی صفر ہے۔ اگر اسمبلی زیرو ہے، اس کی کوئی حیثیت نہیں، کوئی اختیار نہیں رہا تو ذمہ دار خود وزیراعظم ہیں۔ وزیراعظم نے کہا کہ کے الیکٹرک کو ضرورت کے مطابق گیس ملے گی یہ کہنے میں اتنی دیر کیوں کر دی۔ وہ اسلام آباد یا لندن میں بیٹھ کر بھی کہہ سکتے تھے کہ کے الیکٹرک کو فوری گیس فراہم کی جائے، واجبات کا مسئلہ بعد میں دیکھ لوں گا۔ انہوں نے کہا کہ ندیم افضل چن پہلے ہی پی ٹی آئی میں شمولیت کا اعلان کر چکے تھے۔ عامر سلطان چیمہ معروف سیاسی شخصیت، ان کے والد بہت مدت تک قومی اسمبلی کے رکن رہے ہیں۔ عامر چیمہ پرویز الٰہی کے دور میں وزیر آبپاشی ہوتے تھے۔ انہوں نے مزید کہا کہ اسحاق ڈار کی کچھ فوٹیج مختلف ٹی وی چینلز پر دیکھی جس میں وہ صحت مند طریقے سے چل رہے تھے، وزیراعظم، حسن و حسین نواز کے ساتھ اچھے موڈ میں گپ شپ کرتے نظر آتے ہیں۔ بظاہر لگتا نہیں کہ بیمار ہیں۔ میرے سمیت دیگر سینئر صحافیوں کا مشورہ ہے کہ اسحاق ڈار کو واپس آنا چاہئے اور اپنا کیس لڑنا چاہئے کیونکہ اگر سپریم کورٹ نے ریڈ وارنٹ جاری کر دیئے اور انٹرپول کے ذریعے گرفتار کر کے لانا پڑا تو یہ اچھی بات نہیں۔ ہمیشہ موقف رہا کہ عدالت کے بلانے پر پیش ہونا چاہئے نہ کہ ان کی نیت پر حملے کئے جائیں، یہ کہا جائے کہ یہ پارٹی بن گئے ان کی ڈوری کوئی اور ہلا رہا ہے۔ عدالت نے نوازشریف کا نام ای سی ایل میںڈالنے کا حکم دیا، احسن اقبال نے نیا فلسفہ اختیار کر لیا اور اپنے لیڈر کا نام نہیں ڈالا۔ حکومتی پارٹی اور نواز شریف کا جو مزاج ہے، مجھے نہیں لگتا کہ گھی سیدھی انگلی سے نکلے گا۔ ان سارے لوگوں نے عدالتوں کو تنگ کرنے کی ٹھان رکھی ہے۔ لگتا نہیں کہ سیدھے طریقے سے عدالتوں کے سامنے پیش ہو جائیں گے۔ نون لیگ کی پہلی کوشش ہے کہ ان کے خلاف ٹرائل شروع نہ ہو اگر اسحاق ڈار واپس آ گئے تو ٹرائل شروع ہو جائے گا۔ ڈار نے وضاحت پیش کی ہے کہ ڈاکٹر نے ہوائی جہاز کے سفر سے منع کیا ہے جبکہ فوٹیج میں بالکل بیمار نہیں لگتے۔ اس طرح نوازشریف نے کہہ دیا کہ بیگم کلثوم نواز کافی بہتر ہیں۔ دُعا ہے کہ وہ صحت یاب ہوں لیکن اگر واقعی بیمار ہیں تو احتساب عدالت کو فوری خاص طور پر مریم نواز کی مستردکی گئی استثنیٰ کی درخواست کو قبول کر کے اطلاع کرنی چاہئے کہ وہ عیادت کےلئے جا سکتی ہیں۔ جسٹس محمد بشیر صاحب مہربانی فرمائیں مریم نواز نے کوئی قتل نہیں کیا، مالی بے قاعدگی کے کیسز میں کوئی زیادہ سزا بھی نہیں البتہ بھاری جرمانے ہوتے ہیں۔بیٹی مریم کو والدہ کی عیادت کے لئے باہر جانے کی اجازت دے دیں۔ تحریک انصاف کے رہنما شاہ محمود قریشی نے کہا کہ چیمہ خاندان کا سرگودھا کی سیاست پر گہرا اثر ہے، یہ بڑی وکٹ گری ہے۔ عامر چیمہ کے والد 7 مرتبہ منتخب ہوئے جبکہ عامر چیمہ خود 5,6 دفعہ منتخب ہوئے ہیں۔ ان کے ساتھ 68 کے قریب ممبران نے پی ٹی آئی میں شمولیت اختیار کی ہے جو بہت بڑی تبدیلی ہے۔ سرگودھا میں لوگوں کابڑی تعداد میں باہر نکلنا قابل دید تھا۔ انہوں نے مزید کہا کہ 29 اپریل کو تاریخی جلسہ ہو گا جس کے اثرات میں مزید کئی وکٹیں گریں گی۔ تجزیہ کار لندن وجاہتعلی خان نے کہا کہ جب وزیراعظم و نواز شریف لندن میں تھے تو اسحاق ڈار گاڑی پر آئے اور اپنے پاﺅں پر چلتے سیڑھیاں چڑھیں۔ ڈھائی گھنٹے بیٹھے رہے، میڈیا سے بات نہیں کی۔ ڈار لندن میں اپنے بیٹے کے گھر میں رہتے ہیں، گھومتے پھرتے اور شاپنگ کرتے ہیں۔ ہوائی جہاز کے سفر کا بہانہ ہے کیونکہ ان کے خلاف ٹرائل چل رہا ہے اس لئے پاکستان نہیں جا رہے، بس اپنا میڈیکل سرٹیفکیٹ بھجوا رہے ہیں۔ جب لندن آئے تھے تو شروع میں ہسپتال کے بیڈ پر لیٹنے کی ایک تصویر ایشو کرائی تھی جو تمام ٹی وی چینلز پر چلتی رہی۔ کسی صحافی نے ان کو ہسپتال میں زیر علاج نہیں دیکھا۔ لندن میں کوئی صحافی نہیں کہہ سکتا کہ وہ بیمار ہیں۔ انہوں نے مزید کہا کہ بیگم کلثوم نواز کے بارے ضیا شاہد نے بالکل ٹھیک کالم لکھا، نواز شریف نے روانی میں کہہ دیا ہو گا کہ بیگم کلثوم نواز پہلے سے کافی بہتر ہیں۔ آئے روز بیگم کلثوم کی حالت واقعی خراب ہو رہی ہے۔ کینسر کا مرض آتا جاتا رہتا ہے۔ شریف خاندان نے عراق سے مٹی بھی منگوائی ہے، کہتے ہیں کہ وہ لگائی جائے تو کوئی بھی مرض ٹھیک ہو جاتا ہے، بیگم کلثوم نواز کے لئے وہ مٹی منگوائی گئی ہے۔

اسلام آباد ہائیکورٹ کی جانب سے وزیر خارجہ خواجہ آصف کو تاحیات نااہل کرنے کے بعد ملک بھر میں یہ چہ میگوئیاں شروع ہو گئی ہیں کہ آخر عمران خان کو پہلے سے ہی یہ کیسے علم ہو گیا تھا کہ حکمران جماعت مسلم لیگ(ن) کی بڑی وکٹ گرنے والی ہے۔واضح رہے کہ دورہ لاہور کے دوران چیئرمین پاکستان تحریک انصاف عمران خان نے اس بات کی پیشگوئی کی تھی کہ مسلم لیگ (ن) کی بڑی وکٹ گرنے والی ہے اور اس کے فوراً بعدوہ اسلام آباد کیلئے روانہ ہو گئے تھے۔ ان کے اس بیان پرورے ملک میں پہلے ہی دن سے بحث و مباحثہ جاری تھا کہ آج اسلام آباد ہائیکورٹ کی جانب سے خواجہ آصف کو تاحیات نااہل قرار دیدیا گیا جس سے اس بات کو تقویت ملتی ہے کہ عمران خان کو وقت سے پہلے ہی یہ کیسے معلوم ہوگیا تھا کہ ن لیگ کی بڑی وکٹ گرنے والی ہے۔واضح رہے کہ خواجہ آصف کا شمار مسلم لیگ ن کے سینئر رہنماو¿ں میں ہوتا تھا وہ 1993سے مسلسل 5مرتبہ لگاتار کامیاب ہوتے آئے تھے۔

ایک نجی چینل کی جانب سے ایک حالیہ رپورٹ میں ایک حیرت انگیز انکشاف کیا گیا کہ حکومت چائنہ اورنج لائن ٹرین کی پاکستان میں تعمیر کے خلاف تھی اور اس بنا پر وہ شہباز شریف اور نواز شریف سے سخت نالاں ہیں اور سی پیک کی معاہداتی یا داشت میں جو منصوبے شامل تھے ان میں اورنج لائن منصوبہ سرے سے تھا ہی نہیں اور اسکو وزیر اعلیٰ شہباز شریف اور نواز شریف کی جانب سے زبر دستی اس منصوبے میں شامل کروایا گیا اور اب چائنہ حکومت اس بات کا برملا اظہار کر رہی ہے اور برہم ہے۔۔۔
درحقیقت بات کچھ یو ں ہے کہ پاکستان میں ہونے والی ترقی کے دشمنوں کیلئے یہ بات ابھی بھی ہضم کرنا دشوار ہے کہ پاکستان میں اتنا بڑا ترقیاتی منصوبہ کیسے وجود میں آ گیا۔۔انہی لوگوں نے پاکستان میں مقیم اپنے کچھ دوستوں کے ساتھ مل کر پہلے بھی اس منصوبے کی راہ میں کانٹے پھیلائے اور اس منصوبے کو 22 ماہ کی تاخیر کا سامنا کرنا پڑا اور جب خدا نے سچ کا ساتھ دیا اور اورنج لائن منصوبے پر دوبارہ کام کا آغاز ہوا تو یہ بات پھر پاکستان دشمن تنظیموں کیلئے ناگوار ثابت ہوئی اور ایک نئی مہم کا آغاز کر دیا گیا۔
جب دو حکومتیں کوئی معاہدہ پر دستخط کرتی ہیں تو وہ اس کو مکمل طور پر تسلیم کرتی ہیں اور اس کے قواعد و ضوابط سے واقفیت بھی رکھتی ہیں اس لئے اس طرح کے اوچھے اور منفی ہتھکنڈوں کا مقصد محض پاکستان کی عوام کی آنکھوں میں دھول جھونکنے سے زیادہ کچھ بھی نہیں۔
15دسمبر 2015 کو چائنیزوزیر اعظم لی کی کیانگ نے چائنہ کے شہر زنگ زو میں منعقدہ ایک تقریب میں وزیر اعلیٰ پنجاب سے مخاطب ہوتے ہوئے اس بات کا اظہار کیا کہ اورنج لائن میٹرو ٹرین چائنہ حکومت کی جانب سے پاکستان کی عوام کیلئے ایک تحفہ ہے۔۔اور اس منصوبہ پر تیزی سے ہونے والے بہترین کام کو بھی سراہا۔
لہٰذا اس طرح کے الزامات کا سچائی سے تو کوئی تعلق نہیں اگرچہ ان تنظیموں اور ان کے شراکت داروں سے ضرور ہے جو ایک سازش کے زریعے پاکستان کی ترقی کی راہ میں منظم حکمت عملی کے تحت عمل پیرا ہیں۔