اسلام آباد (بی بی سی) اگر چوہدری نثار علی خان کے بارے میں کہا جائے کہ انہوں نے پارلیمنٹ میں آنکھ کھولی تو غلط نہ ہو گا۔انھوں نے 31 سال کی عمر میں پہلی بار قومی اسمبلی کا انتخاب جیت کر قومی سطح پر اپنی سیاست کا آغاز کیا اور ابھی تک مسلسل جیتتے ہی آ رہے ہیں۔ وہ ان گنے چنے ارکان اسمبلی میں شامل ہیں جو 1985 سے لے کر 2013 تک تمام الیکشنز جیتے ہیں لیکن اب ان کی یہی طاقت ان کی سیاسی کمزوری کے طور پر سامنے آ رہی ہے۔مسلم لیگ ن کی قیادت کے ساتھ ان کے سرد گرم تعلقات کوئی نئی بات نہیں۔ وہ کبھی پنجاب کی وزارت اعلیٰ نہ ملنے پر ناراض ہو جاتے ہیں اور کبھی ان کے بغیر کوئی اجلاس شروع کر دیئے جانے پر لیکن اس بار ان کی ناراضی کو میاں نواز شریف نے سنجیدگی سے لے لیا۔ نتیجہ یہ نکلا کہ ان کے بارے میں آج کل یہ تاثر عام ہے کہ وہ بیک وقت دو کشتیوں یعنی مسلم لیگ ن اور پاکستان تحریک انصاف میں سواری کی کوشش میں ہیں۔عمران خان کی جانب سے انہیں اپنی جماعت میں شامل ہونے کی سر عام دعوت نے اس تاثر کو تقویت دی ہے کہ وہ تحریک انصاف میں جانے کے لیے پر تول رہے ہیں۔ لیگی حلقے البتہ اس بات کی تردید کرتے ہیں۔انہیں یقین ہے کہ چوہدری نثار کبھی بھی مسلم لیگ چھوڑ کر تحریک انصاف میں شامل نہیں ہوں گے۔نواز لیگ کی سیاست پر گہری نظر رکھنے والے صحافی اس بات سے اتفاق کرتے ہیں کہ چوہدری نثار مسلم لیگ چھوڑ کر کہیں نہیں جا رہے۔ اس کی وجہ وہ ان کی مسلم لیگ ن کے نو منتخب صدر شہباز شریف سے پرانی دوستی کو قرار دیتے ہیں۔’ایسے وقت میں جب شہباز شریف کو پارٹی سنبھالنے کی ذمہ داری دی گئی ہے، ایسے میں اگر وہ پارٹی چھوڑتے ہیں تو اس سے شہباز شریف کی قیادت پر سوالات اٹھیں گے اور بہت پرانے اور ذاتی دوست ہونے کے ناطے چوہدری نثار ایسا کبھی نہیں چاہیں گے۔’چوہدری نثار اور ان کی سیاست پر نظر رکھنے والے کہتے ہیں کہ وہ پارلیمانی اور حلقے کی سیاست جو ہمیشہ سے چوہدری نثار کی طاقت رہی ہے، آئندہ انتخابات میں وہی ان کا مسئلہ بن کر سامنے آ رہی ہے۔چوہدری نثار کا اپنے حلقے میں ایک بڑا خاندانی اور ذاتی ووٹ بنک ہے۔ ان کا خاندان پاکستان بننے سے پہلے اس علاقے میں سیاسی و سماجی اثر رکھتا ہے۔ یہی اثرورسوخ چوہدری نثار کے ووٹ بنک کا بڑا حصہ ہے لیکن یہ ووٹ اتنے نہیں ہیں کہ انہیں بغیر کسی بڑی سیاسی جماعت کی حمایت کے الیکشن جتوا دے۔یعنی انہیں الیکشن جیتنے کے لیے کسی نہ کسی سیاسی جماعت کی حمایت درکار ہو گی۔چوہدری نثار علی خان نے اپنے قائد نواز شریف کے خلاف جو مہم شروع کر رکھی ہے اس کا نقصان انہیں یہ ہوا ہے کہ یہ عین ممکن ہے کہ ن لیگ انہیں اپنے حلقے سے الیکشن لڑنے کے لیے ٹکٹ نہ دے۔اگر شہباز شریف کی بدولت ایسا ہو بھی گیا تو بھی انہوں نے اپنے حلقے میں نواز شریف اور ان کے بیانیے کے خلاف کھلم کھلا جوتقاریر کی ہیں، ممکن ہے کہ مسلم لیگ ن کے وہ ووٹرز جو نواز شریف کے بیانیے کے قائل ہیں، وہ ٹکٹ ملنے کے باوجود چوہدری نثار کو ووٹ نہ دیں۔اس صورتحال کا براہ راست فائدہ پاکستان تحریک انصاف کے دیرینہ امیدوار غلام سرور خان کو ہونے کا قوی امکان ہے۔اب صورتحال یہ ہے کہ اپنی ایک سالہ سیاست کی وجہ سے چوہدری نثار علی خان نے آئندہ الیکشنز میں اپنی جیت کو مشکل بنا دیا ہے اور انتخابی سیاست میں شکست کی انہیں عادت نہیں ہے۔تو ان کے پاس اب کیا آپشن ہے؟اس کا جواب حلقے کی سیاست پر گہری نظر رکھنے والی صحافی رو¿ف کلاسرا کے پاس ہے۔’چوہدری نثار کا ہدف یہ ہے کہ انہیں کسی پارٹی سے ٹکٹ ملے یا نہ ملے، وہ مسلم لیگ ن اور تحریک انصاف سے یہ یقین دہانی حاصل کرنے کی کوشش کر رہے ہیں کہ ان کے مقابلے میں یہ دونوں جماعتیں اپنے امیدوار کھڑے نہ کریں۔’چوہدری نثار کے حلقے میں ووٹوں کی صورتحال کا جائزہ لیں تو یہ بات سمجھ میں آتی ہے۔ چوہدری نثار علی خان کے لیے آئیڈئیل صورتحال یہی ہے کہ وہ آزاد حیثیت میں الیکشن لڑیں اور تحریک انصاف اور ن لیگ دونوں ہی ان کے خلاف امیدوار کھڑے نہ کریں۔اگر وہ ن لیگ کا ٹکٹ لیتے ہیں اور تحریک انصاف غلام سرور کو ٹکٹ دیتی ہے تو ان کا نواز مخالف بیانیہ اور عمران خان کی مقبولیت مل کر ان کے الیکشن جیتنے کی راہ میں رکاوٹ بنتے ہیں۔ اور اگر وہ تحریک انصاف میں شامل ہو کر اس کے ٹکٹ پر الیکشن لڑتے ہیں تو وہ ن لیگ کے ووٹرز کھونے کا خطرہ مول لیں گے۔پارلیمانی سیاست کے شہسوار آج اسی سیاست کے ہاتھوں اس قدر مجبور ہے کہ ایک نہیں بلکہ دو دو کشتیوں کا سہارا تلاش کر رہے ہیں۔

اسلام آباد(صباح نیوز) سپریم کورٹ نے پاناما ریفرنس میں کیپٹن ریٹائرڈ صفدر کی ضمانت منسوخی کیلئے دائر نیب کی اپیل 24 اپریلa کو سماعت کیلئے مقرر کر دی ہے۔قومی احتساب بیورو (نیب)نے کیپٹن ریٹائرڈ صفدر کو ضمانت پر رہائی دینے کے اسلام آباد ہائیکورٹ کے فیصلے کو سپریم کورٹ میں چیلنج کر رکھا ہے۔ چیف جسٹس میاں ثاقب نثار کی سربراہی میں 3 رکنی بینچ 24 اپریل کو نیب کی اپیل پر سماعت کرے گا۔ بینچ کے دیگر جج صاحبان میں جسٹس عمر عطا بندیال اور جسٹس اعجاز الاحسن شامل ہیں۔احتساب عدالت نے کیپٹن ریٹائرڈ صفدر کی ضمانت منظور کی تھی، جس کیخلاف نیب نے اسلام آباد ہائیکورٹ سے رجوع کیا تاہم اسلام آباد ہائی کورٹ نے بھی احتساب عدالت کا فیصلہ برقرار رکھا تھا۔

اسلام آباد (آن لائن) مفکر پاکستان ڈاکٹر سر علامہ محمد اقبال کا 80واں یوم وفات 21اپریل ہفتہ کو منایا جائے گا۔ اس سلسلے میں جہانیاں سمیت ملک بھر میں سرکاری و غیر سرکاری سطح پر تقاریب،تقریری مقابلوں،سیمینارز،مذاکروں اور دیگر پروگراموں کا اہتمام کیا جائے گا جس میں حکیم الامت ڈاکٹر علامہ اقبال کی تحریک پاکستان کیلئے عظیم خدمات کو خراج عقیدت پیش کیا جائے گا ۔اخبارات خصوصی ایڈیشن شائع کریں گے جبکہ پی ٹی وی اور نجی ٹی وی چینلز بھی خصوسی پروگرام نشر کریں گے۔شاعر مشرق علامہ اقبال ممتاز قانون دان اور تحریک پاکستان کی اہم شخصیت تھے اور اردو اور فارسی کے ممتاز شاعر تھے۔ڈاکٹر سر علامہ اقبال کو دور جدید کا صوفی شاعر سمجھا جاتا ہے ان کا بحیثیت سیاستدان اہم ترین کارنامہ نظریہ پاکستان کی تشکیل ہے جو انہوں نے 1930ءمیں الہ آباد میں پیش کیا تھا علامہ اقبال کا پیش کردی یہی نظریہ پاکستان کے قیام کی بنیاد بنا اسی وجہ سے سر علامہ اقبال کو پاکستان کا نظریاتی سرپرست مانا جاتا ہے وہ اگرچہ قیام پاکستان سے قبل ہی اس جہان فانی سے کوچ کر گئے تھے لیکن انہیں پاکستان کے قومی شاعر کی حیثیت حاصل ہے۔بطور شاعر ان کی معروف ترین تصانیف میںبانگ درا،بال جبریل،ضرب کلیم،پیام مشرق اور دیگر قابل ذکر ہیں۔وہ21اپریل1938ءکو60برس کی عمر میں انتقال کر گئے تھے۔